ސެމްސަންގްގެ ސޭލްސް އިތުރުކުރުމަށް އޭއައި އަށް ބަރޯސާވަނީ

ފަރަންސޭސިވިލާތުގެ ޕެރިސްގައި ބޭއްވުނު އަންޕެކްޑް އިވެންޓުގައި ސެމްސަންގުން ވަނީ އާ ޑިވައިސްތަކެއް ތަޢާރަފުކޮށްފައެވެ. ކުންފުނިން ވަނީ އެންމެ ފަހުގެ ފޯލްޑަބަލް ސްމާޓްފޯނުތައް ކަމުގައިވާ އެންޑްރޮއިޑް ބޭސްޑް ޒެޑް ފޯލްޑް 6 އާއި ޒެޑް ފްލިޕް 6 އަދި އެންމެ އާ ސްމާޓްވޮޗްތައް ކަމުގައިވާ ގެލެކްސީ ވޮޗް 7 އާއި ގެލެކްސީ ވޮޗް އަލްޓްރާގެ އިތުރުން ގިނަ ބަޔަކު އިންތިޒާރުކުރަމުންދިޔަ ގެލެކްސީ ރިންގ ވެސް ތަޢާރަފުކޮށްފައެވެ.

ނަމަވެސް މި އިވެންޓުގެ އެންމެ މުހިންމު އެއްޗަކީ ކުންފުނީގެ ގެލެކްސީ އޭއައި ޕްލެޓްފޯމެވެ. މިއީ މިއަހަރުގެ ކުރީކޮޅު ގެލެކްސީ އެސް 24 ސިރީޒްގެ ސްމާޓްފޯނުތަކާއެކު ތަޢާރަފުކުރި ސޮފްޓްވެއަރ ޕްރޮޑަކްޓްތަކެކެވެ. ގެލެކްސީ އޭއައި ގައި ހިމެނެނީ ޖެނެރޭޓިވް އޭއައިގެ ގިނަ ޚާއްޞަ ކަންތައްތަކެވެ. މީގެ ތެރޭގައި ސެމްސަންގްގެ ހެލްތް އެންޑް ފިޓްނެސް އެޕްތަކާއި ފޮޓޯ، ޕްރޮޑަކްޓިވިޓީ އަދި ވެބް ބްރައުޒަރ ފަދަ އެޕްތައް ހިމެނެއެވެ.

ސެމްސަންގްގެ އޭއައި ޒަމާން

އެންމެ ފަހުގެ ޑިވައިސްތަކުގައި އޭއައި ހިމަނައި އަދީ އޭއަިގެ ގާބިލްކަން އިތުރުކުރުމަށް ސެމްސަންގުން ވަރަށް ބޮޑަށް ފޯކަސްކުރެއެވެ.

ސެމްސަންގުން ވަނީ ގެލެކްސީ އޭއައި، ގެލެކްސީ ރިންގް، ވޮޗް 7 އަދި ވޮޗް އަލްޓްރާއާ ގުޅިފައިވާ ގޮތް ދައްކާލައިފައެވެ. .އޭއައި ބޭނުންކޮށްގެން މީހާގެ ފިޓްނެސް ލެވެލް ޗެކްކޮށް މީހާގެ ހަށިގަނޑު ވަރުބަލިވުން ނުވަތަ ހަކަތަ އިތުރުވެފައިވާ ސަބަބު ދެނެގަތުމަށް އެހީތެރިވެދެއެވެ. މިކަން ކުރަނީ މީހާގެ ދިރިއުޅުމުގެ އާދަކާދަތަކާއި ނިދާފައިވާ މިންވަރު ވެސް ހިސާބުކޮށްގެންނެވެ.

އަދި އެ ކުންފުނިން ވަނީ ކޮންވަރސޭޝަން މޯޑް ފީޗަރ ވެސް ދައްކާލައިފައެވެ. މި ފީޗަރގެ އެހީގައި ތަފާތު ބަހަކުން އެހެން މީހަކާ ވާހަކަދެއްކިދާނެއެވެ. މިގޮތުން ފޯލްޑްގެ އަދި ފްލިޕްގެ ބޭރު ކަވަރާއި މައި ސްކްރީން ބަދަލުވެގެންދަނީ ޑިޖިޓަލް ވައިޓްބޯޑަކަށެވެ. މި ވައިޓްބޯޑުގައި ތިބާއާއި ތިބާ ވާހަކަދައްކާ މީހާ ދައްކާ ވާހަކަ އެމީހުންގެ އަމިއްލަ ބަހުން ދައްކައިދެއެވެ.

ސެމްސަންގް ވެސް ވަނީ އޭގެ ފޮޓޯ އެޕްގައި އާޓިފިޝަލް އިންޓެލިޖެންސް ފީޗަރތައް ތަޢާރަފުކޮށްފައެވެ. މިގޮތުން ފޮޓޯއެއްގައިވާ މީހެއްގެ މޫނުގައި އަވިއައިނު ކުރަހާލުމުން އެމީހާގެ މޫނަށް ފެތޭގޮތަށް ޙަޤީޤީ އަވިއައިނުއެއް އޮޓޮމެޓިކުން ފެންނާނެއެވެ. އަދި ސެމްސަންގުން ވަނީ ގޫގުލްގެ އާޓިފިޝަލް އިންޓެލިޖެންސް ޓެކްނޮލޮޖީ ވެސް ބޭނުންކޮށްފައެވެ. މިގޮތުން ގޫގުލްގެ ޖެމިނައި ސޮފްޓްވެއަރ އާއި އެސިސްޓެންޓް ސެމްސަންގުގެ ޑިވައިސްތަކަށް އިތުރުކޮށްފައިވެއެވެ.

މިއަހަރުގެ ޖޫން މަހު އެޕަލްއިން ތަޢާރަފުކުރި އެޕަލް އިންޓެލިޖެންސް ޕްރޮގްރާމް ފަދައިން، ސެމްސަންގުން ވެސް އާޓިފިޝަލް އިންޓެލިޖެންސް ބޭނުންކުރަނީ އެކުންފުނީގެ އައު ޑިވައިސްތައް ކުރީގެ މޮޑެލްތަކާ ތަފާތުކޮށް، ކުރީގެ ފޯނުތައް ބޭނުންކުރާ މީހުން އައު ފޯނުތަކަށް އަޕްގްރޭޑްކުރުމަށް ހިތްވަރު ދިނުމަށެވެ. މިގޮތުން ގެލެކްސީ އޭއައި އާއި އޭގެ ފީޗަރތައް ބޭނުންކޮށްގެން 2 އަހަރު ނުވަތަ އެއަށްވުރެ ގިނަ ދުވަހު ފޯނު ބޭނުންކުރާ މީހުން އައު އަދި އަގުބޮޑު ފޯނުތަކަށް ބަދަލުވާނެކަމަށް އުއްމީދުކުރެވެއެވެ.

އެޕަލްއިން އާޓިފިޝަލް އިންޓެލިޖެންސް ފީޗަރތައް ހަމައެކަނި އައިފޯން 15 ޕްރޯ އާއި އޭގެ ފަހުގެ ފޯނުތަކަށް ތަޢާރަފުކުރާއިރު، ސެމްސަންގުން ގެލެކްސީ އޭއައި ސޮފްޓްވެއަރ ވަނީ އެކުންފުނީގެ ކުރީގެ މޮޑެލްތަކަށް ވެސް ތަޢާރަފުކޮށްފައެވެ. މީގެ ތެރޭގައި 2022 ވަނަ އަހަރުގެ އެސް 22 އާއި ޒެޑް ފޯލްޑް އަދި ފްލިޕް 4 ސީރީޒް އަދި 2023 ވަނަ އަހަރުގެ އެސް 23 އާއި ޒެޑް ފޯލްޑް އަދި ޒެޑް ފްލިޕް 5 ސީރީޒް ހިމެނެއެވެ.

ސްމާޓްފޯނު ބޭނުންކުރާ މީހުން އެމީހުންގެ ފޯނު 2 އަހަރާއި 3 އަހަރާ ދެމެދުގެ މުއްދަތަކަށް ބޭނުންކުރާތީ، މިކަން އެހާ މުހިންމުވަނީ އެހެންވެގެންނެވެ. މިގޮތުން ބޭނުންކުރާ މީހުންނަށް ގެލެކްސީ އޭއައި ގެ ރަހަ ލިބެނީ އެމީހުން އަޕްގްރޭޑްކުރަން ތައްޔާރުވާ ވަގުތުގައެވެ. މިއީ ސެމްސަންގ އާއެކު ދެމިތިބުމަށާއި އޭގެ ޖެނެރޭޓިވް އޭއައި ފީޗަރތަކުގެ ފައިދާ ލިބިގަތުމަށް ލިބޭ ހިތްވަރެކެވެ.

ސެމްސަންގގެ އެންމެ ފަހުގެ ގެލެކްސީ ޒެޑް ފްލިޕް 6 އަށް ކުދިކުދި ބަދަލުތަކެއް ގެނެވިފައިވީނަމަވެސް، އެ ކުންފުނީގެ ގެލެކްސީ އޭއައި ޖެނެރޭޓިވް އޭއައި ޕްލެޓްފޯމް ހިމެނިފައިވެއެވެ.

މަސްދަރު: ޔާހޫ ފައިނޭންސް