ކަޅު ޕްލާސްޓިކުގައި ނުރައްކާތެރި ވިހަ މާއްދާތަކެއް!

ކުޑަކުދިންގެ ކުޅޭ ތަކެއްޗާއި، ޢާއްމުކޮށް ކާބޯތަކެތި އަޅަން ގެންގުޅޭ ކޮންޓެއިނަރުތަކާއި، ބަދިގޭގައި ބޭނުންކުރާ ތަފާތު ސާމާނުތަކާއި، މާރުކޭޓުގައި މޭވާއާއި މަހުގެ ބާވަތްތައް ފަދަ ތަކެތި ވިއްކާ ފަރާތްތަކުން އެތަކެތި ބަހައްޓަން ބޭނުންކުރާ ޓްރޭތައްވެސް އާންމުކޮށް އުފައްދާފައި ހުންނަނީ ކަޅު ޕްލާސްޓިކުންނެވެ.

މިފަދަ ކަޅު ޕްލާސްޓިކުގައި ނުރައްކާތެރި ވިހަ މާއްދާތައް އެކުލެވިގެންވާކަން އައު ދިރާސާއަކުން ދައްކައިފިއެވެ. މި މާއްދާތަކަކީ އަލިފާން ނުހިފާ މާއްދާތަކެއް ކަމަށްވާއިރު، އިލެކްޓްރޯނިކް ތަކެތި ރީސައިކަލް ކުރުމުގެ ތެރެއިން މި މާއްދާތައް އެހެން ތަކެއްޗަށް ފެތުރޭ ކަމަށް އެ ދިރާސާއިން ވަނީ އެނގިފައެވެ.

ދިރާސާގައި ފާހަގަކުރެވުނު އެންމެ ކަންބޮޑުވާންޖެހޭ ކަމަކީ ކުޑަކުދިންގެ ކުޅޭ ތަކެތީގައި މި މާއްދާތައް ހުރި މިންވަރެވެ. ކަޅު ޕްލާސްޓިކްގައި އެފަދަ މާއްދާތައް އެކުލެވިފައިވާ މިންވަރަކީ މިލިއަނަކުން 22,800 ބައެވެ. މިއީ އެ ތަކެތީގެ ބަރުދަނުން 3% އާ ގާތް މިންވަރެކެވެ. ކުޑަކުދިން މިފަދަ ތަކެއްޗާއެކު ގިނަ ވަގުތު ހޭދަކުރާތީ، މިއީ ވަރަށް ބޮޑަށް ކަންބޮޑުވާންޖެހޭ ކަމެކެވެ.

ކާބޯތަކެތި ގެންގުޅޭ ތަކެތީގައިވެސް މި މާއްދާތައް ހުރިކަން ފާހަގަކުރެވުނެވެ. ކަޅު ޕްލާސްޓިކް ސޫޝީ ޓްރޭއެއްގައި ޑެކަބްރޮމޯޑައިފީނައިލް އީތަރ (ޑެކަބީޑީއީ) ގެ މިންވަރަކީ މިލިއަނަކުން 11,900 ބައެވެ. މިއީ 2021 ގައި އެމެރިކާގެ އެންވަޔަރަންމަންޓަލް ޕްރޮޓެކްޝަން އޭޖެންސީން މުޅިން މަނާކުރި މާއްދާއެކެވެ. ނަމަވެސް، މި މާއްދާ އަދިވެސް ބޭނުންކުރެވެމުންދާކަން މި ދިރާސާއިން ހާމަވެގެންދިޔައެވެ.

ދިރާސާގައި ޓެސްޓުކުރެވުނު ސާމްޕަލްތަކުގެ 70% ގައި ޑެކަބީޑީއީ ހުރި މިންވަރު ވަރަށް މަތިކަން ފާހަގަކުރެވުނެވެ. ޔޫރަޕިއަން ޔޫނިއަންގެ ލިމިޓަށްވުރެ 5 އިން 1,200 ގުނަ އިތުރު އަދަދެއް މި ސާމްޕަލްތަކުގައި ހުރިކަން ފާހަގަކުރެވުނެވެ. މިއީ ވަރަށް ކަންބޮޑުވާންޖެހޭ މިންވަރެކެވެ.

ކަޅު ޕްލާސްޓިކް ބަދިގެ ސާމާނު ބޭނުންކުރުމުގެ ސަބަބުން މީހަކަށް ދުވާލަކު އެވްރެޖްކޮށް މިލިއަނަކުން 34.7 ބައިގެ ޑެކަބީޑީއީގެ އަސަރުކޮށްފާނެ ކަމަށް ބެލެވެއެވެ. މިއީ ދިގު މުއްދަތެއްގައި ޞިއްޙަތަށް ނޭދެވޭ އަސަރުތަކެއް ކުރުވައިފާނެ މިންވަރެކެވެ.

މި މާއްދާތަކަކީ ވަރަށް ނުރައްކާތެރި މާއްދާތަކެކެވެ. މި މާއްދާތަކަށް އެޑިކްޓްވުމުގެ ސަބަބުން ކެންސަރު ޖެހުމުގެ ފުރުޞަތު 300% އިތުރުވާ ކަމަށް ދިރާސާތަކުން ދައްކައެވެ. މީގެ އިތުރުން އެންޑޮކްރައިން އަދި ތައިރޮއިޑް މައްސަލަތައް ކުރިމަތިވުމާއި، ކުޑަކުދިންގެ ދުޅަހެޔޮކަމަށް އަސަރުކުރުމާއި، ނިއުރޯބިހޭވިއަރަލް ފަންކްޝަނަށް އަސަރުކުރުމާއި، އިމިއުން ސިސްޓަމަށް ގެއްލުން ލިބުން ފަދަ ކަންކަން ދިމާވެދާނެ ކަމަށް ބެލެވެއެވެ.

މި ނުރައްކާތަކުން ރައްކާތެރިވުމަށް އާންމުންނަށް އެޅިދާނެ ފިޔަވަޅުތަކެއް ވެއެވެ. އޭގެ ތެރޭގައި ކާއެއްޗެހި ގެންގުޅުމަށް ކަޅު ޕްލާސްޓިކް ބޭނުން ނުކުރުމާއި، ކަޅު ޕްލާސްޓިކް ހިމެނޭ ކުޑަކުދިންގެ ކުޅޭ ތަކެތި ނުގަތުމާއި، ޕްލާސްޓިކް، ބަދިގެ ސާމާނުގެ ބަދަލުގައި ސްޓެއިންލެސް ސްޓީލް ސާމާނު ބޭނުންކުރުން ހިމެނެއެވެ. އަދި ގަވާއިދުން ގެ ސާފުކޮށް، ވެކިއުމްކުރުމާއި، އަތް ދޮވުމާއި ރަނގަޅަށް ވައި ދައުރުވާގޮތަށް ބެހެއްޓުމަކީވެސް މުހިންމު ކަންކަމެވެ. ކަޅު ޕްލާސްޓިކް ކޮންޓެއިނަރުގައި ކާނާ ނުބެހެއްޓުމާއި، ކަޅު ޕްލާސްޓިކް ކޮންޓެއިނަރު މައިކްރޮވޭވް ނުކުރުމަކީވެސް ވަރަށް މުހިންމު ކަންކަމެވެ.

ނަމަވެސް، ޓޮކްސިކް-ފްރީ ފިއުޗަރގެ ސައިންސް އެންޑް ޕޮލިސީ މެނޭޖަރ މީގަން ލިއު ބުނާ ގޮތުގައި މި މައްސަލަ ހައްލުކުރުމަށް އާންމުންނަށް އެޅޭނެ ފިޔަވަޅުތަކަކީ ލިމިޓެޑް ފިޔަވަޅުތަކެކެވެ. އޭނާ ގޮވާލަނީ ސަރުކާރާއި ކުންފުނިތަކުން މިކަމަށް ފިޔަވަޅު އަޅަން ޖެހޭ ކަމަށެވެ.

ނުރައްކާތެރި ކެމިކަލްތަކާއި ޕްލާސްޓިކްތައް ބޭނުންކުރުން ހަނިކުރުމަށް ސިޔާސަތުތައް އެކުލަވާލުމަކީ މުހިންމު ކަމެއް ކަމަށް އޭނާ ދެކެއެވެ. އޭރުން ތަކެތި ރައްކާތެރިކަމާއެކު ރީސައިކަލްކުރެވި، ކެމިކަލްތަކުގެ ތަޣައްޔަރުވުމާއި ޞިއްޙަތަށް ކުރިމަތިވާ ނުރައްކާތަކުން ސަލާމަތްވެވޭނެ ކަމަށް ލިއު ބުނެފައިވެއެވެ.