ޗައިނާއިން ޓްރަމްޕް އާއިލާގެ ފޯނުތައް ހެކް ކުރި: އެފްބީއައި

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ އާއިލާގެ މެންބަރުންގެ ފޯނުތައް ޗައިނާގެ ހެކަރުން ހެކްކޮށްފައިވާ ކަމަށް އެފްބީއައި އިން ބުނެފިއެވެ.

ނިއުޔޯކް ޓައިމްސްގެ ރިޕޯޓެއްގައި ބުނެފައިވާ ގޮތުގައި، މި ތަޙުޤީޤު ފުރަތަމަ ފެށުނީ ޓްރަމްޕް އަދި ޖޭޑީ ވޭންސްގެ އަމިއްލަ ފޯނުތަކުގެ މުއާސަލާތީ މަޢުލޫމާތުތަކަށް ޗައިނާއާ ގުޅުންހުރި ހެކަރުން ވަދެފައިވާ ކަމުގެ ޝައްކު އުފެދުމާ ގުޅިގެންނެވެ. ނަމަވެސް، މިހާރު މި ތަޙުޤީޤުގެ ދާއިރާ ފުޅާވެފައިވަނީ ކުރީގެ ރައީސްގެ ދަރިފުޅު އެރިކް ޓްރަމްޕް އަދި ބޮޑުދައިތަ ޖަރެޑް ކުޝްނަރ އަށްވެސް އަމާޒުކޮށްފައިވާކަން ހާމަވުމާ ގުޅިގެންނެވެ.

މި ސޮފިސްޓިކޭޓެޑް ހެކިންގ އޮޕަރޭޝަނުގައި 100 އަށްވުރެ މަދު މީހުންނަށް އަމާޒުކޮށްފައިވާކަމަށް ވަނީ ބުނެފައެވެ. މީގެ ތެރޭގައި ކަމާލާ ހެރިސްގެ ކެމްޕޭން މުވައްޒަފުންނާއި، ޑިޕްލޮމެޓިކް، ސަރުކާރު އަދި ޕޮލިސީ މާހިރުން ހިމެނެއެވެ. އަދި ސެނެޓް މެޖޯރިޓީ ލީޑަރ ޗަކް ޝޫމަރގެ އެހީތެރިއަކަށްވެސް އަމާޒުކޮށްފައިވާކަމަށް ވަނީ ބުނެފައެވެ.

އެފްބީއައި ތަޙުޤީޤުކުރާ ފަރާތްތަކުން ގަބޫލުކުރާ ގޮތުގައި އަޑުގެ މުއާސަލާތުތަށް ހެކްކޮށްފައިވާކަމުގެ ހެކި ލިބިފައިވެއެވެ. އަދި ބައެއް ޑިވައިސްތަކުގައި ހުރި އެންކްރިޕްޓް ނުކުރެވޭ މެސެޖުތަކާއި ކޯލް ލޮގްތަކަށް ވަދެވިފައިވާ ކަމަށްވެސް ބެލެވެއެވެ.

އެރިކް ޓްރަމްޕް ވަނީ މި ސެކިއުރިޓީ މައްސަލައާ ގުޅިގެން ބައިޑެންގެ ސަރުކާރަށް ފާޑުކިޔާފައެވެ. "މިކަމުން އެއްވެސް މީހަކު ހައިރާންވޭތޯ؟ ކަމާލާ އާއި ބައިޑެންގެ ދަށުން ޗައިނާއިން ވަނީ އަޅުގަނޑުމެންގެ ޤައުމުގެ މައްޗަށް ފައިންއަރާފައި،" އެރިކް ނިއުޔޯކް ޓައިމްސްއަށް ބުންޏެވެ.

މި ޚަބަރު ފެތުރުމާއެކު، ޓްރަމްޕްގެ ކެމްޕޭން ތަރުޖަމާނެއް ވަނީ މިދިޔަ ހަފްތާގައި ވެސް މިފަދަ ޚިޔާލުތަކެއް ފާޅުކޮށްފައެވެ. އޭނާ ބުނި ގޮތުގައި ޑިމޮކްރެޓުން "ޓްރަމްޕް ވައިޓް ހައުސްއަށް ވަނުން ހުއްޓުވުމަށް ކުރެވެން ހުރި ހުރިހާ ކަމެއް ކުރާނެ" އެވެ.

ވެރިޒޯން ފޯނު ނެޓްވަރކަށް ވަދެފައިވާކަން އެނގުމާ ގުޅިގެން، ކުރީގެ ރައީސް އާއި އޭނާގެ ރަނިންގ މޭޓް އަދި އެމެރިކާ ސަރުކާރުގެ އެތެރެ އާއި ބޭރުގެ އެތައް ބައެއްގެ އަމިއްލަ މަޢުލޫމާތު ހާމަވުމުގެ ފުރުސަތު އޮތްކަން ޓްރަމްޕްގެ ކެމްޕޭންޓީމަށް އެވަގުތު އެންގުނެވެ.

އެމެރިކާގެ އިދާރާތަކުން މި އަމާޒުކުރެވުނު ސެކިއުރިޓީ މައްސަލަ ނިސްބަތްކޮށްފައިވަނީ "ޗައިނާ ސަރުކާރާއި ގުޅުންހުރި ފަރާތްތަކަށެވެ." ހަމައެއާއެކު، ހުޅަނގުގެ ސައިބަރ ސެކިއުރިޓީ މާހިރުން ބުނާ ގޮތުގައި މި ހަމަލާގެ ފަހަތުގައި ވަނީ "ސޯލްޓް ޓައިފޫން" ކިޔާ ގްރޫޕެކެވެ.

މި ގްރޫޕަކީ ޗައިނާގެ އިންޓެލިޖެންސްގެ ފަރާތުން ސޮފިސްޓިކޭޓެޑް ސައިބަރ އޮޕަރޭޝަންތައް ހިންގުމުގެ ތާރީޚެއް އޮތް ގްރޫޕެކެވެ. އަދި މިއަހަރުގެ ކުރީކޮޅު އެމެރިކާގެ ޓެލެކޮމިއުނިކޭޝަން ނިޒާމަށް ވަދެފައިވާކަމަށް އެމެރިކާގެ ސެކިއުރިޓީ އޮފިޝަލުން ވަނީ މި ގްރޫޕަށް ތުހުމަތުކޮށްފައެވެ.

ތަޙުޤީޤުކުރާ ފަރާތްތަކުން އެންމެ ފަހުން ދެނެގަތް ގޮތުގައި މި ގްރޫޕުން ވަކި ވަކި ފޯނު ނަންބަރުތަކަށް އަމާޒުކުރަމުން ގެންގޮސްފައިވެއެވެ. ނަމަވެސް، ޗައިނާގެ ހެކަރުންނަށް މެސެޖުތައް ކިޔޭތޯ، ޚާއްޞަކޮށް އެންކްރިޕްޓެޑް މެސެޖިންގ ސަރވިސްތަކުން ފޮނުވާ މެސެޖުތައް ކިޔޭކަމެއް ނުވަތަ ނޫންކަމެއް އަދި ނޭނގެއެވެ.

ރިޔާސީ ކެންޑިޑޭޓް އަދި އޭނާގެ ރަނިންގ މޭޓަށް ދިމާވި ކަމަށް ބުނެވޭ ހެކިންގެ މައްސަލަ އާ ގުޅޭގޮތުން ޓްރަމްޕްގެ ކެމްޕޭނުން ސީދާ އެއްވެސް އެއްޗެއް ބުނެފައެއް ނުވެއެވެ.