ދިވެހިރާއްޖޭގެ ޑިޖިޓަލް އިޤްތިޞާދަށް އިންޤިލާބީ ބަދަލެއް ގެނައުމުގެ މަގުފަހިކޮށް، ދުނިޔޭގެ އެންމެ ބޮޑު އޮންލައިން ޕޭމަންޓް ޕްލެޓްފޯމް ކަމަށްވާ ޕޭޕަލްގެ ޚިދުމަތް ރާއްޖޭގައި ފެށުމަށް ތައްޔާރުވެއްޖެއެވެ. އުރީދޫ ފިންޓެކްއާއި ޕޭޕަލް ގުޅިގެން ކުރިއަށްގެންދާ މި މަސައްކަތަކީ، ޓެކްނޮލޮޖީގެ ގޮތުން ރާއްޖެއަށް ބޮޑު ކުރިއެރުމެއް ލިބިގެންދާނެ ކަމެކެވެ.
ޓެކްނޮލޮޖީގެ ކުރިއެރުމާއި ޑިޖިޓަލް އިޤްތިޞާދު:
ޕޭޕަލްގެ ޚިދުމަތް ރާއްޖެއަށް ތަޢާރަފްކުރުމަކީ ސަރުކާރުގެ ޑިޖިޓަލް އަދި ކްރިއޭޓިވް އިކޮނޮމީ ޤާއިމުކުރުމުގެ މުހިއްމު އަމާޒަކަށް ވާސިލްވުމަށް ލިބުނު ބޮޑު ކުރިއެރުމެކެވެ. މި ޚިދުމަތް އަންނަ އަހަރުގެ ތެރޭގައި އުރީދޫ އެމްފައިސާ މެދުވެރިކޮށް ލިބިގެންދާނެކަމަށް އުރީދޫއިން ވިދާޅުވެއެވެ. މިއީ ދިވެހި ރައްޔިތުންނަށް ޒަމާނީ އޮންލައިން ޕޭމަންޓް ސިސްޓަމްތަކާއި އިލެކްޓްރޯނިކް ވޮލެޓްތައް (އީ-ވޮލެޓް) މެދުވެރިކޮށް މާލީ މުޢާމަލާތްތައް ފަސޭހަކަމާއެކު ކުރެވޭނެ މަގު ތަނަވަސްކޮށްދޭނެ ކަމެކެވެ.
ޕޭޕަލް ވޯލްޑްގެ ބައިވެރިކަން:
އުރީދޫ ފިންޓެކްއަކީ ޕޭޕަލް ވޯލްޑްގެ ބައިވެރިއެކެވެ. ޕޭޕަލް ވޯލްޑަކީ ދުނިޔޭގެ އެންމެ ބޮޑެތި ޕޭމަންޓް ސިސްޓަމްތަކާއި ޑިޖިޓަލް ވޮލެޓްތައް އެއް ޕްލެޓްފޯމަކުން ގުޅުވައިދޭ ގްލޯބަލް ޕްލެޓްފޯމެކެވެ. މި ގުޅުމުގެ ސަބަބުން އުރީދޫ ވޮލެޓް ބޭނުންކުރާ ފަރާތްތަކަށް ދުނިޔޭގެ އެތައް މިލިއަން ވިޔަފާރިތަކުން ވިޔަފާރިކުރުމުގެ ފުރުސަތު ލިބި، ބައިނަލްއަޤުވާމީ ފައިސާ ފޮނުވުމުގެ ކަންކަން ފަސޭހަވެގެންދާނެއެވެ. މީގެ ސަބަބުން ބައިނަލްއަޤުވާމީ މުޢާމަލާތްތަކުގައި ކުރިމަތިވާ ދަތިތައް ކުޑަވެ، ފައިސާގެ މުޢާމަލާތްތައް ހަލުވިކަމާއެކު ކުރެވޭނެއެވެ.
ވިޔަފާރިތަކަށާއި ފްރީލާންސަރުންނަށް ފުރުސަތުތައް:
ޕޭޕަލްގެ ޚިދުމަތް ރާއްޖެއަށް އައުމާއެކު، ދިވެހި ވިޔަފާރިތަކަށާއި، ފްރީލާންސްކޮށް މަސައްކަތްކުރާ ފަރާތްތަކަށާއި، ކޮންޓެންޓް ތައްޔާރުކުރާ ފަރާތްތަކަށް ދުނިޔޭގެ ޑިޖިޓަލް އިޤްތިޞާދުގައި ހަރަކާތްތެރިވުމަށް ފުޅާ ދޮރުތަކެއް ހުޅުވިގެންދާނެއެވެ. ޕޭޕަލް ވޯލްޑް މެދުވެރިކޮށް ވިޔަފާރިތަކަށް އާ މާކެޓްތަކަށް ފުޅާވެ، ގާތްގަނޑަކަށް ދެ ބިލިއަން ކަސްޓަމަރުންނާއެކު ގުޅިގެން މުއާމަލާތްތައް ކުރެވޭނެއެވެ. އަދި އޮންލައިންކޮށް، ފިޒިކަލް ސްޓޯރުތަކުންނާއި، އޭއައި އޭޖެންޓުން މެދުވެރިކޮށް ޕޭމަންޓް ހެދުމުގެ އިތުރު އޮޕްޝަންތައް ލިބިގެންދާނެއެވެ. މީގެ ސަބަބުން ޑިޖިޓަލް ޕޭމަންޓް އޮޕްޝަންތައް ޤަބޫލުކުރުމަށް އިތުރު މަސައްކަތެއް ކުރަން ނުޖެހި، ވިޔަފާރިތަކަށް ފަސޭހަކަމާއެކު ކުރިއަށް ދެވޭނެއެވެ.
އުރީދޫ ފިންޓެކް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ، ޚާލިދު އަލް ހަމާދީ ވިދާޅުވީ، ދިވެހިރާއްޖެ ޑިޖިޓަލް ޓްރާންސްފޯމޭޝަންގައި ހަލުވިކަމާއެކު ކުރިއަރަމުންދާއިރު، ރާއްޖޭގެ ރައްޔިތުންނާއި ވިޔަފާރިތަކަށް ކްރޮސް ބޯޑަރ ޓްރާންސެކްޝަންތައް ފަހިކޮށްދިނުމަކީ ވަރަށް މުހިންމު ކަމެއް ކަމަށެވެ. އަދި އުރީދޫ ފިންޓެކް އަދި ޕޭޕާލްގެ ޕާޓްނަރޝިޕާއެކު ޕޭޕާލް ވޮލެޓްތައް އެމްފައިސާ ވޮލެޓްތަކާއި ލިންކް ވެގެން ދިޔުމަކީ ވިޔަފާރިތަކާއި އަމިއްލަ ފަރުދުންނަށް ލިބޭނޭ ވަރަށް ބޮޑު ފުރުސަތެއް އަދި ކުރިއެރުމެއް ކަމަށް އޭނާ ފާހަގަކުރެއްވިއެވެ.
ހުރަސްތައް ގިރާކުރުން:
ޕޭޕަލް ފަދަ ޚިދުމަތްތައް ރާއްޖެއަށް ތަޢާރަފްކުރުމުގައި ގިނަ ހުރަސްތަކެއް ކުރިމަތިވެފައިވާ ކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާއިން ފާހަގަކުރައްވައެވެ. ނަމަވެސް މިދިޔަ ދެ އަހަރުގެ ތެރޭގައި އެކަންކަމަށް ހައްލު ހޯދުމަށް ގިނަ މަސައްކަތްތަކެއް ކުރެވިފައިވާ ކަމަށް ވުޒާރާއިން ވިދާޅުވެއެވެ. ޕޭޕަލްގެ ޚިދުމަތް ރާއްޖޭގައި ފެށިގެން ދިޔުމާއެކު ރާއްޖޭގެ މާލީ ނިޒާމު ހަރުދަނާވެ، އީޖާދީ ޑިޖިޓަލް ހައްލުތައް ހޯދޭނެ ފަދަ މާލީ މާހައުލެއް ޤާއިމުކުރުމަށް ސަރުކާރުން ކުރަމުންދާ މަސައްކަތަށް މިއީ ލިބިގެންދިޔަ ބޮޑު ކުރިއެރުމެކެވެ.
ޕޭޕަލްގެ ޚިދުމަތް ރާއްޖެއަށް ތަޢާރަފްވުމަކީ ދިވެހިރާއްޖޭގެ ޑިޖިޓަލް އިޤްތިޞާދަށް އާ ހަރުފަތަކަށް އެރުމުގެ ފުރުސަތު ހުޅުވައިދޭނެ ކަމެކެވެ. ޓެކްނޮލޮޖީގެ ބޭނުން ހިފައިގެން މާލީ މުޢާމަލާތްތައް ފަސޭހަކޮށް، ދުނިޔޭގެ މާކެޓްތަކަށް ދިވެހިންނަށް ވަދެވޭނެ މަގު މިވަނީ ފަހިވެފައެވެ. މިއީ ޑިޖިޓަލް މުސްތަޤުބަލަކަށް ރާއްޖެ ކުރާ ދަތުރުގައި ލިބުނު މުހިއްމު ކާމިޔާބީއެކެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.