މުނިފޫހިފިލުވުމަށް ފޮތްކިޔުމުން ސިކުނޑިއަށް ލިބޭ ފައިދާ

މުނިފޫހިފިލުވުމަށް ފޮތްކިޔުމުގެ ސަބުބުން ސިކުނޑިއާއި ނަފްސާނީ ސިއްހަތަށް ފައިދާކުރެއެވެ. ސައިކޮލޮޖިކަލް މެޑިސިންގައި ޔުނިވަރސިޓީ އޮފް ކެމްބްރިޑްޖްގެ ދިރާސާވެރިން ޝާއިރުކޮށްފައިވާ އައު އެޑިޓޯރިއަލްއެއްގައި ގަވާއިދުން ފޮތްކިޔުމުން ވިސްނުންތޫނުވެ، ސިކުނޑީގެ ޑެވެލޮޕްމަންޓް ރަނގަޅުވެ، ދުޅަހެޔޮކަމަށް ހެޔޮ ބަދަލުތައް ގެނެސްދޭކަން ފާހަގަކޮށްފައިވެއެވެ.

މީގެކުރިންވެސް ބޮޑެތިމީހުން ފޮތްކިޔުމުން ސްޓްރެސް ދަށްވެ، އެންޕެތީ ބޮޑުވެ، އެކަނިވެރިކަން ކުޑަކުރާކަން ފާހަގަކޮށްފައިވެއެވެ. ދިރާސާތަކުން ދައްކާގޮތުގައި ގިނައިން ފޮތްކިޔާ އުޅޭ މީހުންނަށް އެހެން މީހުންނާ ގުޅުންހުރިމިންވަރު ބޮޑުވެ، ތަފާތު ވިސްނުންތަކާއި ފިކުރުތައް ދެނެގަނެވެއެވެ. މީގެ އިތުރުން ފޮތް ކްލަބްތަކުގައި އެއްކޮށް ފޮތްކިޔުމުން އިޖްތިމާއީ ގުޅުންތައް ބަދަހިވެ، ހިޔާލުތަކާއި ވާހަކަތައް މަޝްވަރާ ކުރެވިގެންދެއެވެ.

ފޮތްކިޔުމުގެ ފައިދާ ޅަފަތުގައި ފެށިގެންދެއެވެ. 10،000އަށް ވުރެ ގިނަ ޒުވާނުންގެ މެދުގައި ބޭވި ދިރާސާއެއް ދައްކައިދޭގޮތުގައި މުނިފޫހިފިލުވުމަށް ފޮތްކިޔަންފަށާ ކުދިންގެ ސަމާލުކަމާއި ހަނދާނާއި އެގްޒެކެޓިވް ސްކިލްސްތައް ފުރާވަރުއިރުގައި ރަނގަޅުވެއެވެ. އަދި ނަފްސާނީ ސިއްހަތާއި ބެހޭ މައްސަލަތައް މަދުވެ، ތައުލީމީ ގޮތުން ނަތީޖާ ވެސް ރަނގަޅުވެއެވެ. ސިކުނޑީގެ ސްކޭންތަކުން ދައްކައިދޭގޮތުގައި ބަހާއި އުނގެނުމާއި ޖަޒުބާތީ ކޮންޓްރޯލް ކުރުމާއި ގުޅޭ ސަރަހައްދުތަކުގައި ފޮތްކިޔާ އުޅޭ ކުދިންގެ ސިކުނޑީގައި ތަފާތުތަކެއް ހިމެނެއެވެ.

ނަމަވެސް ފޮތްކިޔުމުގެ ފައިދާތައް ވަކި އުމުރަކަށް ލިމިޓްވެފައިނުވެއެވެ. ކެމްބްރިޖްގެ ޑިޕާޓްމަންޓް އޮފް ސައިކިއޭޓްރީގެ ޕްރޮފެސަރު ބާބަރާ ސަހަކިއަން އާއި ޑރ ކްރިސްޓެލް ލެންގްލީ ފާހަގަކޮށްފައިވާގޮތުން މިކަމަކީ ކޮންމެ އުމުރެއްގައި ވެސް ފެށިދާނެ ރަނގަޅު އާދައެކެވެ. ކުޑަކުދިންގެ އިތުރުން، މުޅި އުމުރަގައި މުސްކުޅިވަންދެންވެސް މިކަމުން ފައިދާ ލިބޭނެއެވެ. މިގޮތުން 55 އަހަރަށްވުރެ ދުވަސްވީ ފަރާތްތަކުން ގަވާއިދުން ފޮތްކިޔާ އުޅުމުން ވިސްނުން ކޮށިވުމާއި ޑިމެންށިއާ ފަދަ ކަންކަމާ ދުރުވާކަމަށް މި ރިވިއުގައި ފާހަގަކޮށްފައިވެއެވެ. ނަމަވެސް މި ދިރާސާތަކުން ގުޅުންތައް ފާހަގަކޮށްފައިވީ މަނަވެސް، ފޮތްކިޔުމުގެ ސަބަބުން މިކަންކަމުން ރައްކާތެރިވާކަމަށް ސާބިތުކޮށްފައި ނުވެއެވެ.

މި ދިރާސާކުރިއަށް ގެންގޮސްފައިވަނީ ޔުނިވަރސިޓީ އޮފް ކެމްބްރިޑްޖްގެ ސައިންޓިސްޓުން އިނގިރޭސިވިލާތުގެ ރާނީ ކެމިލާ އުފެއްދެވި ޗެރިޓީ ދަ ކުއީންސް ރީޑިން ރޫމްއާއި ގުޅިގެންނެވެ. މި ދިރާސާކުރިއަށް ގެންގޮސްފައިވަނީ ޤައުމީ ފޮތްކިޔުމުގެ އަހަރުގެ ދަށުން ފޮތްކިޔުމުގެ ފައިދާތައް އާންމުކުރުމުގެ ގޮތުން ކުރިއަށް ގެންދިޔަ މަސައްކަތްތަކުގެ ތެރޭގައެވެ.

މި ދިރާސާކުރިއަށް ގެންގޮސަފައިވަނީ ދުނިޔޭގެ އެކި ހިސާބުތަކުން މީހުން ފޮތްކިޔާ މިންވަރު މަދުވަމުންދާ ދަނޑިވަޅެއްގައެވެ. މިގޮތުން އެމެރިކާގެ ޔުނިވަރސިޓީ އޮފް ފްލޮރިޑާއިން 2025ގައި ކޮށްފައިވާ ދިރާސާތަކުން ދައްކައިދޭ ގޮތުގައި ފާއިތުވި ދެ ދަހަރު ތެރޭގައި މީހުން މުނިފޫހި ފިލުވުމަށް ފޮތްކިޔާ އުޅޭ މިންވަރު 40% ދަށްވެފައިވެއެވެ. އަދި 2024ގައި އިނގިރޭސިވިލާތުން ކޮށްފައިވާ ދިރާސާތަކުން ބުނާގޮތުގައި ގަވައިދުން ބޮޑެތިމީހުން ފިތްކިޔާ އުޅޭ މިންވަރު 13.8% ދަށްވެފައިވެއެވެ. މިއާއި ވިދިގެން ފޮތްކިޔުމުގެ ޝައުގުވެރިކަން އިތުރުކުރުމަށް ދުނިޔޭގެ އެކި ޤައުމުތަކުން އިތުރު މަސައްކަތްތައް ކުރަން ފަށާފައިވެއެވެ.