އެފްޖީސީ 2024 ރޮބޮޓިކްސް މުބާރާތުގައި ދިވެހިރާއްޖޭގެ ޓީމެއް!

މިއަހަރު ވެސް ފަސްޓް ގްލޯބަލް ޗެލެންޖް (އެފްޖީސީ) ރޮބޮޓިކްސް މުބާރާތުގައި ދިވެހިރާއްޖޭގެ ޓީމެއް ބައިވެރިވުމަށް ދަނީ ތައްޔާރުވަމުންނެވެ. މިފަހަރު ވެސް މުބާރާތަށް ޓީމް ތައްޔާރުކޮށްދެނީ ވިމެން އިންޓެކް މޯލްޑިވްސްގެ ފަރާތުންނެވެ. މިމުބާރާތް މިއަހަރު ކުރިއަށްދާނީ ސެޕްޓެމްބަރ 26 އިން 29 އަށް ގްރީސްގެ އެތެންސްގައެވެ. ރާއްޖެ ތަމްސީލުކުރާ ޓީމުގައި މިފަހަރު ހިމެނެނީ 8 ބައިވެރިންނެވެ. އެއީ ގިޔާސުއްދީން ސްކޫލްގެ 6 ދަރިވަރަކާއި އެސްކޫލުންނާއި ވިމެން އިން ޓެކް މޯލްޑިވްސްއިން ކުދިންނަށް އެހީތެރިވުމަށް ބައިވެރިވާ 2 މެންޓަރުންނެވެ.

ފަސްޓް ގްލޯބަލް ޗެލެންޖް 2024 އަށް ދިވެހިރާއްޖޭގެ ޓީމް އެތެންސްއަށް ދަތުރުކޮށް މިއިވެންޓްގައި ބައިވެރިވުމުގައި ސްޕޮންސަރުންގެ ދީލަތި އެހީ ފާހަގަކޮށް ޝުކުރު އަދާކުރަން ބޭނުންވާކަމަށް ވިމެން އިން ޓެކް މޯލްޑިވްސްގެ ޓީމުން ހާމަކުރެއެވެ. އެގޮތުން މިފަހަރުގެ ގޯލްޑް ސްޕޮންސަރއަކީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އެވެ. މީގެ އިތުރުން އެލިއާ މޯލްޑިވްސް އަދި ބީއެޗްއެމް ޓްރޭޑިންގގެ އެހީވެސް ޓީމަށް ވަނީ ލިބިފައެވެ.

ދުނިޔޭގެ ލެވެލްގައި ދިވެހިރާއްޖެ ތަމްސީލްކުރާ މިޓީމުގެ މައިގަނޑު މަގްސަދަކީ ދިވެހިރާއްޖެއަށް ސްޓެމް ތައުލީމުގެ މުހިންމުކަން ހާމަކުރުމެވެ. އެޓީމުން ދަނީ ރޮބޮޓިކްސްއަކީ ގައުމީ ލެވެލްގައި ރަސްމީ ކުޅިވަރެއްގެ ގޮތުގައި ބަލައިގަތުމަށް ވަކާލާތު ކުރަމުންނެވެ.

ފަސްޓް ގްލޯބަލް ޗެލެންޖަކީ ކޮންމެ އަހަރަކު ވެސް ބާއްވާ އޮލިމްޕިކްސް ސްޓައިލްގެ، ބައިނަލްއަގުވާމީ ރޮބޮޓިކްސް މުބާރާތެކެވެ. ފަސްޓް ގްލޯބަލްގެ މިމުބާރާތް ކުރިއަށް ދާގޮތުން ބައިވެރިވާ ކޮންމެ ޓީމަކުން ޖެހެނީ މުބާރާތުގައި ވާދަކުރުމަށް ރޮބޮޓެއް އުފައްދާ ކަނޑައެޅިފައިވާ އެކިއެކި ޗެލެންޖުތައް ފުރިހަމަކުރުމަށް އެރޮބޮޓް ޕްރޮގްރާމް ކުރާށެވެ. މިޗެލެންޖުތަކުގެ ތެރެއިން ބައިވެރިންނަށް ޓީމެއްގެ ގޮތުގައި މަސައްކަތްކޮށްގެން އަހަރުމެންގެ ދުނިޔޭގައި ދިމާވާ އެކިއެކި މައްސަލަތަކަށް އީޖާދީ ހައްލު ހޯދުމަށް ދަސްވެގެންދާނެއެވެ.

ދެމެހެއްޓެނިވި ގޮތެއްގައި ކާބޯތަކެތި އުފެއްދުމަކީ 21 ވަނަ ގަރުނުގެ ދުނިޔެއަށް ކުރިމަތިވެފައިވާ އެއް މައްސަލައެވެ. ފަސްޓް ގްލޯބަލް މުބާރާތުގެ މިއަހަރުގެ ތީމަކީ މިމައްސަލަ ހައްލުކުރުމަށް އީޖާދީ ގޮތްތަކެއް ހޯދުމެވެ. ދުނިޔޭގެ އެކި ކަންކޮޅުތަކުން ބައިވެރިވާ ޓީމުތަކުން އެޓީމެއް ނިސްބަތްވާ ގައުމެއްގައި މިމައްސަލައާއި ގުޅިގެން ކުރިމަތިވާ ދަތިތަކާއި އެކަން ހައްލުކުރުމަށް އެގައުމުގައި ހިމެނޭ ފުރުސަތުތައް ދެނެގަންނާނެއެވެ. އަދި މުޅި ދުނިޔޭގެ އާބާދީއަށް ހަމަހަމަ، ރައްކާތެރި، ނިއުޓްރިޝަނަލް، އަދި ތިމާވެށްޓަށް ޒިންމާދާރު ކާނާ ފޯރުކޮށްދިނުމަށް ގޮތްތަކެއް ހޯދުމަށް މަސައްކަތް ކުރާނެއެވެ.

2024 ވަނަ އަހަރުގެ ފަސްޓް ގްލޯބަލް ޗެލެންޖަށް ހޮވުމަށް ގިޔާސުއްދީން ސްކޫލާއި ވިމެން އިން ޓެކް މޯލްޑިވްސް ހިމެނޭ ޓީމް މޯލްޑިވްސް އިން ދަނީ ކަނޑައެޅިފައިވާ އެކިއެކި ޗެލެންޖުތައް ފުރިހަމަ ކުރުމަށް ގިނަ ގުނަ މަސައްކަތްތަކެއް މިހާރުވެސް ފުރިހަމަކޮށްފައެވެ. އެގޮތުން ރާއްޖޭގެ ގައުމީ ލީޑަރުންނާއި އޮލިމްޕިއަނުންނާއި މުހިއްމު އެތަކެއް ފަރާތްތަކާއި ވަނީ ބައްދަލުކޮށްފައެވެ. މީގެތެރޭގައި މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން އަބްދުالله ރާފިޢު އަދި ރާއްޖެ ފަހުރުވެރިވާ އޮލިމްޕިއަންސް ފާތިމަތު ދީމާ އަދި މުބާލް އަޒާމް ހިމެނެއެވެ.

މި ބައްދަލުވުންތަކުގެ ތެރެއިން ސްޓެމް ތައުލީމާއި ރޮބޮޓިކްސްގެ މުހިއްމުކަމާއި މެދު ވާހަކަ ދެއްކުމުގެ ފުރުސަތު ޓީމުގެ ބައިވެރިންނަށް ވަނީ ލިބިފައެވެ. މިބައްދަލުވުން ތަކުގައި، މުބާރަތަށް ތައްޔާރުވުމުގެ ތެރެއިން އެކުދިންނަށް ދަސްވެފައިވާ ހުނަރުތައް ދަނީ ހިއްސާކުރަމުންނެވެ. އަދި މިހުނަރުތަކަކީ ރާއްޖޭގެ ހުރިހާ ދަރިވަރުންނަށް މުހިއްމު ހުނަރުތަކެއް ކަމަށާއި، ދުރުރާސްތާގައި ރޮބޮޓިކްސްއާއި ސްޓެމް ތައުލީމަކީ ރާއްޖެ ތަރައްގީކޮށް ކުރިއެރުވުމަށް އަދި ރާއްޖެއަށް ދިމާވާ އެކިއެކި މައްސަލަތައް ހައްލުކުރުމަށް ބޭނުންކުރެވިދާނެ ވަރުގަދަ ޓޫލެއް ކަމަށް ފާހަގަކޮށްފައެވެ.

ރާއްޖޭގެ ޓީމުން މިމުބާރާތައް ތައްޔާރުވުމާއި މިތަޖުރިބާގެ ތެރެއިން ހާއްސަކޮށް ފާހަގަކުރުމަށް ބޭނުންވާ ކަމެއް ހިމެނެއެވެ. އެއީ ގައުމީ ލެވެލްގައި ރަސްމީ ކުޅިވަރެއްގެ ގޮތުގައި ރޮބޮޓިކްސް ހިމެނުމެވެ. ސްޓެމް ތަޢުލީމަކީ އަޅުގަނޑުމެންގެ ޤައުމުގެ މުސްތަޤްބަލް ބައްޓަންކުރަން ބޭނުންވާ މުހިއްމު ތައުލީމެކެވެ. އަދި ގައުމަށް ކުރިމަތިވާ މައްސަލަތައް ހައްލުކުރުމުގައި އީޖާދީ އުފެއްދުންތައް ހޯދުމަށް ބޭނުންވާ މުހިންމު މަގެކެވެ. ސްޓެމް ހުނަރުތަކުގެ ސަބަބުން ކުރިއަށް އަންނަން އޮތް ޖީލުތަކުގެ ޒުވާނުންނަށް ކޮންމެހެން ބޭނުންވާ ހުނަރުތައް ބިނާކުރުމަށް މަގުފަހިވެއެވެ.

ރޮބޮޓިކްސްއަކީ ހަމައެކަނި މުބާރާތަކުން ނިންމާލެވޭނޭ ކަމެއް ނޫންކަމަށް ޓީމުގެ މެންބަރުން ފާހަގަ ކުރެއެވެ. އެއީ އެހެން ކުޅިވަރިތެކެކޭ އެއްފަދައިން ޓީމެއްގެ ގޮތުގައި މަސައްކަތް ކުރުމާއި، ސްޓްރެޓީޖިކްކޮށް ވިސްނުމަށާއި، ބޭނުންވާ ނަތީޖާ ހޯދުމަށް ގަދައަޅާ މަސައްކަތް ކުރަންޖެހޭ ކުޅިވަރެއް ކަމަށް މިކުދިން ހާމަކުރެއެވެ. އެހެން ކަމުން ދުނިޔޭގެ އެންމެ މޮޅު ސިކުނޑިތައް ގުޅުވާލަދީ އައު ކަންތައްތަކެއް އުފެއްދުމަށް ރޮބޮޓިކްސްއަކީ ރަސްމީ ކުޅިވަރެއްގެ ގޮތުގައި ބަލައިގަންނަން ވެއްޖެކަމަށް ޓީމުން ހާއްސަކޮށް ފާހަގަކުރެއެވެ.

މިއީ ދިވެހިރާއްޖެއިން ފަސްޓް ގްލޯބަލް މުބާރާތުގައި ބައިވެރިވާ ފުރަތަމަ ފަހަރެއް ނޫނެވެ. 2023 ގައި ސިންގަޕޫރުގައި ބޭއްވުނު މިމުބާރާތުގައި އައްޑޫ ސިޓީގެ ހިރާ ސްކޫލުގެ ހުނަރުވެރި ޓީމަކުން ފަޚުރުވެރިކަމާއެކު ރާއްޖެ ތަމްސީލުކުރިއެވެ. އެފަހަރުވެސް 'ހައިޑްރޯޖަން ހޮރައިޒަންސް' ގެ ތީމްގެ ދަށުން ރާއްޖޭގެ ޓީމުން ވެސް ވަނީ ދެމެހެއްޓެނިވި ހަކަތައިގެ ދާއިރާގައި އައު ހައްލުތަކެއް ހޯދުމުގެ މަސައްކަތުގައި ދުނިޔޭގެ އެހެން ގައުމުތަކާއެކު ބައިވެރިވެފައެވެ. މިދިޔަ އަހަރުގެ ޓީމުން ވެސް ގްލޯބަލް ސްޓޭޖެއްގައި ރާއްޖޭގެ ޒުވާން އިނޮވޭޓަރުންގެ ގާބިލްކަން ދައްކާލާ، ސްޓެމް ތައުލީމުގެ އެހީގައި ތިމާވެއްޓަށް ދިމާވާ ގޮންޖެހުންތައް ހައްލުކުރުމަށް ދިވެހިރާއްޖޭއިން ކުރާ މަސައްކަތަށް އަލިއަޅުވާލިއެވެ.

ޓީމް މޯލްޑިވްސް އިން އެދެނީ އެކުދިންގެ މިދަތުރުގައި އެހެން ބޭފުޅުން ވެސް ބައިވެރިވުމަށެވެ. ސްޓެމް ތައުލީމުގެ މުހިއްމުކަމާއި ރާއްޖޭގައި ރޮބޮޓިކްސްއަކީ ރަސްމީ ކުޅިވަރެއްގެ ގޮތުގައި ކަނޑައެޅުމަށް ވަކާލާތުކުރުމުގައި އެކުދިންނަށް އެހީތެރިވުމަށެވެ.