ސައުތް ކޮރެއާގައި ބާއްވާ ފަސްޓްގްލޯބަލް ޗެލެންޖަށް ރާއްޖޭގެ ޓީމު ތައްޔާރު

190 އަށް ވުރެ ގިނަ ޤައުމުގެ ކުދިން ބައިވެރިވާ ބައިނަލްއަޤްވާމީ ރޮބޮޓިކްސް މުބާރާތެއް ކަމަށްވާ 202 ފަރސްޓް ގްލޯބަލް ޗެލެންޖުގައި ދިވެހިރާއްޖެ ތަމްސީލުކުރާނީ ޓީމް މޯލްޑިވްސް އެވެ. މި އިވެންޓް ކުރިއަށްދާނީ 7 އިން 10 އޮކްޓޯބަރު 2026 އަށް، ރިޕަބްލިކް އޮފް ކޮރެއާގެ އިންޗިއޮންގައެވެ.

ފަރސްޓް ގްލޯބަލް ޗެލެންޖަކީ އޮލިމްޕިކްސްގެ އުސޫލުން ބާއްވާ ރޮބޮޓިކްސް މުބާރާތެކެވެ. މި މުބާރާތުގައި ކޮންމެ ޤައުމެއް ވެސް ތަމްސީލުކުރަނީ ކިޔަވާކުދިންގެ ޓީމަކުންނެވެ. ޓީމުތަކުން ރޮބޮޓެއް ޑިޒައިންކޮށް އަދި ޕްރޮގްރާމް ކުރަނީ އެއް މިންގަނޑެއްގެ ސާމާނު (ސްޓޭންޑަޑް ކިޓެއް) ބޭނުންކޮށްގެންނެވެ. މެޗުތަކުގައި އެކި ޤައުމުތަކުގެ ޓީމުތައް އެލަޔަންސްތަކެއްގެ ގޮތުގައި ގުޅިގެން މަސައްކަތްކޮށް، ރޮބޮޓްތައް ބޭނުންކޮށްގެން ޓާސްކުތައް ފުރިހަމަކޮށް ޕޮއިންޓް ހޯދައެވެ. މި މުބާރާތުގައި ކާމިޔާބީ ބިނާވަނީ އިންޖިނިއަރިންގ، ސްޓްރެޓެޖީ އަދި ގުޅިގެން މަސައްކަތްކުރުމުގެ (ޓީމްވޯކް) މައްޗަށެވެ.

ފަރސްޓް ގްލޯބަލްގެ ރާއްޖޭގެ ޕާޓްނަރު ކަމަށްވާ ވިމެން އިން ޓެކް މޯލްޑިވްސްގެ އިސްނެގުމުގެ ދަށުން، ޓީމް މޯލްޑިވްސް އިން އަންނަނީ 2023 ވަނަ އަހަރުން ފެށިގެން މި ބައިނަލްއަޤްވާމީ ރޮބޮޓިކްސް މުބާރާތުގައި ރާއްޖެ ތަމްސީލުކުރަމުންނެވެ. ފަރސްޓް ގްލޯބަލް އިން ދޭ ޓްރެވެލް ސަޕޯރޓާއި އިތުރު ފުރުސަތުތަކުން ދިވެހި ޒުވާނުންނަށް ދުނިޔޭގެ އެކި ކަންކޮޅުތަކުގެ ދަރިވަރުންނާ އެކު ވާދަކުރުމާއި، ގުޅިގެން މަސައްކަތްކުރުމާއި، ދަސްކުރުމުގެ ފުރުޞަތު ވަނީ ލިބިފައެވެ.

މި އަހަރުގެ ޤައުމީ ޓީމަށް ތަމްރީނު ދެނީ ރޮބޮޓިކްސް އަދި ޓެކްނޮލޮޖީ ތަޢުލީމުގެ ޒަރީޢާއިން ޒުވާން ދަރިވަރުން ބާރުވެރިކުރުވުމަށް މަސައްކަތްކުރާ، ސްޓެމް (STEM) ސެޓިފައިޑް މަރުކަޒެއް ކަމަށްވާ ފޯލޫޕް ކޯޑިންގ އެކެޑަމީންނެވެ. ޓީމުގެ ދިހަ މެންބަރުންނަކީ ރާއްޖޭގެ އެކި އަމިއްލަ އަދި ސަރުކާރު ސްކޫލްތަކުގެ ދަރިވަރުން ކަމުގައި ވިޔަސް، ހުރިހާ މެންބަރުންނަށް ވެސް ފޯލޫޕް ކޯޑިންގ އެކެޑަމީން ދަނީ ޚާއްޞަ، ފުންނާބުއުސް ޓެކްނިކަލް ތަމްރީނުތަކެއް ދެމުންނެވެ. މި ތައްޔާރީތައް ކުރިއަށްދަނީ ފާއިތުވި އަހަރު ލިބުނު ބޮޑު ކުރިއެރުމުގެ މައްޗަށް ބިނާކޮށެވެ؛ އެގޮތުން ޕެނަމާގައި ބޭއްވުނު ފަރސްޓް ގްލޯބަލް ޗެލެންޖުގައި 190 އަށް ވުރެ ގިނަ ޤައުމުގެ ތެރެއިން ޓީމް މޯލްޑިވްސް ވަނީ ދުނިޔޭގެ ގަދަ 50 ގެ ތެރޭގައި ހިމެނިފައެވެ.

ބައިނަލްއަޤްވާމީ އެހީގެ އިތުރުން، ޓީމުގެ މި ދަތުރަށް އެއްބާރުލުން ދިނުމަށް ރާއްޖޭގެ ކުންފުނިތަކުންނާއި ޖަމްޢިއްޔާތަކުން ވަނީ އިސްނަގާފައެވެ. 2026 ވަނަ އަހަރަށް، ޓީމް މޯލްޑިވްސްއަށް އެހީތެރިކަން ފޯރުކޮށްދެނީ ލީޑް ޕާޓްނަރުގެ ގޮތުގައި އެމް.ޑަބްލިއު.އެސް.ސީ (MWSC) އެވެ. މީގެ އިތުރުން އިނޭބްލިންގ ޕާޓްނަރުންގެ ގޮތުގައި ވިޒިޓް މޯލްޑިވްސް، އައިލެންޑް އާޓް، އަދި އެލައިޑް އިންޝުއަރަންސް ކޮމްޕެނީ އޮފް ދަ މޯލްޑިވްސް ހިމެނެއެވެ.

މުބާރާތަށް ތައްޔާރުވުމުގެ ގޮތުން، ޓީމުން ވަނީ ރޮބޮޓް އެސެމްބަލްކުރުމާއި، ޓެސްޓުކުރުމާއި އަދި ފުރިހަމަކުރުމަށް ގިނަ ދުވަސްތަކެއް ހޭދަކޮށްފައެވެ. އަދި މީގެ އިތުރުން، ޓީމާއި ޓީމުގެ ދަތުރު އިޝްތިހާރުކުރާ ޙަރަކާތްތަކުގެ ޒަރީޢާއިން، ކޯޑިނޭޝަނާއި، މުޢާމަލާތުކުރުމާއި، އަދި ވަކާލާތުކުރުމުގެ ހުނަރުތައް ތަރައްޤީކުރުމަށްޓަކައި މަހުން މަހަށް ކުރިއަށްގެންދިޔަ ޗެލެންޖުތަކެއްގައި ވެސް މެންބަރުން ވަނީ ބައިވެރިވެފައެވެ.

ޓީމް މޯލްޑިވްސް އެކުލެވިގެންވަނީ 10 މެންބަރުންގެ މައްޗަށެވެ. އެއީ މުބާރާތަށް ދަތުރުކުރާ ފަސް މެންބަރުންނާއި، ރާއްޖޭގައި ތިބެ މުޅި އިވެންޓްގައި ރިމޯޓްކޮށް (އޮންލައިންކޮށް) އެހީތެރިކަން ފޯރުކޮށްދޭ ހޯމް ޓީމުގެ ފަސް މެންބަރުންނެވެ.

ޓީމުގެ މެންބަރުން:

(ދަތުރުކުރާ ޓީމު)

1. ޔޫނުސް މުޙައްމަދު އަޙްމަދު (ލީޑް ޑިވެލޮޕަރ)

2. ޢާއިޝަތު އީޝަލް އިސްމާޢީލް (ބިލްޑަރ)

3. ޒައިދާން މުޙައްމަދު ޒަމީރު (ޑްރައިވަރ)

4. ޢާއިޝާ ބިންތި ޠަލްޙަތު އަޙްމަދު (ޑިޒައިން އެންޑް ޕްލޭނިންގ)

5. މާހިލް މުޙައްމަދު ސިނާން ޢަލީ (ޑިޒައިން އެންޑް ޕްލޭނިންގ)

(ހޯމް ޓީމު)

1. ޙައްވާ ޔުޒްކާ ޔޫސުފް

2. ނޫރީން އަޝްޢާ މުޙައްމަދު

3. ޔޫސުފް ޔުޢާން އަޙްމަދު

4. ޢައްމާރު ބިން ޒުބައިރު

5. އާމިނަތު ޝަޔާން ޞާލިޙް

އިންޗިއޮންގައި ޓީމު ވާދަކުރާނީ 2026 ވަނަ އަހަރުގެ ޝިޢާރު ކަމަށްވާ "އިގްނައިޓިންގ އިނޮވޭޝަން" ގެ ދަށުންނެވެ. މި ޝިޢާރުގެ ދަށުން ދަރިވަރުން ރޮބޮޓިކްސް، އުފެއްދުންތެރިކަން އަދި އިންޖިނިއަރިންގ ބޭނުންކޮށްގެން، ޖަންގަލިތަކުގައި އަލިފާން ރޯވުން ހުއްޓުވުމާއި، ގެއްލުންތައް ކުޑަކުރުމާއި، އަދި އަލުން އާރާސްތުކުރުމާ ގުޅޭ ޙައްލުތައް ހޯދުމަށް މަސައްކަތްކުރާނެއެވެ.މި މުބާރާތުގެ މުހިންމުކަމާ ގުޅޭގޮތުން ވާހަކަދައްކަވަމުން، ފޯލޫޕް ކޯޑިންގ އެކަޑަމީގެ ސީއީއޯ ރިޔާޟް ވިދާޅުވިއެވެ:

"ފަސްޓް ގްލޯބަލް ޗެލެންޖުގައި ބައިވެރިވުމަކީ ރާއްޖެއަށް ޚާއްޞަ މާނައެއް އެކުލެވިގެންވާ ކަމެކެވެ. އަދި އަޅުގަނޑުމެންގެ ޒުވާނުންނަށް މިފަދަ އަގުހުރި ފުރުޞަތެއް ފަހިކޮށްދެއްވި ކަމަށްޓަކައި ވިމެން އިން ޓެކް މޯލްޑިވްސްއަށް ނުހަނު އިޚްލާޞްތެރިކަމާއެކު ޝުކުރު އަދާކުރަމެވެ. މި އިސްނެގުމުގެ ސަބަބުން ސްޓެމް (STEM) ތަޢުލީމުގެ ފުރުޞަތުތައް ފުޅާވެ، ކޯޑިންގ، ރޮބޮޓިކްސް، ގުޅިގެން މަސައްކަތްކުރުން އަދި މައްސަލަތައް ޙައްލުކުރުމުގެ ޢަމަލީ ހުނަރުތައް ތަރައްޤީކުރުމަށް އަޅުގަނޑުމެންގެ ދަރިވަރުންނަށް އެހީތެރިވެދެއެވެ. މިއީ ތިމާވެށި ޙިމާޔަތްކުރުމާއި ދެމެހެއްޓެނިވި ތަރައްޤީ ފަދަ ދުނިޔެއަށް ދިމާވެފައިވާ ގޮންޖެހުންތަކަށް ޙައްލު ހޯދުމުގައި، ކުދި ޖަޒީރާ ޤައުމުތަކުގެ ޒުވާނުންނަށްވެސް އައު އީޖާދީ ޚިޔާލުތައް ގެނެސްދެވިދާނެކަން ސާބިތުކޮށްދޭ ކަމެކެވެ."

މި މުބާރާތުގެ މުހިންމުކަމާ ގުޅޭގޮތުން ވާހަކަދައްކަވަމުން، ވިމެން އިން ޓެކް މޯލްޑިވްސްގެ ނައިބު ރައީސާ މިހްނާ ޒާހިރު ވިދާޅުވިއެވެ:

"ވިމެން އިން ޓެކް މޯލްޑިވްސްއިން އަޅުގަނޑުމެން ޤަބޫލުކުރަނީ ޒުވާނުންނަށް ކަންކަން ދަސްކޮށް، އީޖާދުކޮށް، އަދި އެކުދިންގެ ކުޅަދާނަކަން ސާބިތުކޮށްދިނުމުގެ ފުރުޞަތުތައް ފަހިކޮށްދޭންޖެހޭ ކަމަށެވެ. ފަސްޓް ގްލޯބަލް ފަދަ ތަޖުރިބާތަކުގެ ޒަރީޢާއިން، އަޅުގަނޑުމެންގެ ޒުވާން އީޖާދުވެރިންނަށް ބޮޑެތި ހުވަފެންތައް ދުށުމަށާއި، ސްޓެމް ދާއިރާގެ މުސްތަޤުބަލުގެ ލީޑަރުންނަށް ވުމަށް ބޭނުންވާ އިތުބާރާއި، ތަޖުރިބާއާއި، ހިތްވަރު ލިބިގެންދާނެ ކަމަށް އުންމީދުކުރަމެވެ. ފަސްޓް ގްލޯބަލް އަދި ޓީމް މޯލްޑިވްސްއަށް މި ފުރުޞަތުތައް ފަހިކޮށްދެއްވުމުގައި ދެމިތިއްބެވި އެންމެހައި ބައިވެރިންނަށާއި، ސްޕޮންސަރުންނަށާއި، އަދި އެހީތެރިންނަށް އަޅުގަނޑުމެން ޝުކުރު އަދާކުރަމެވެ."

ދިވެހިރާއްޖޭގެ ދިދަ އިންޗިއޮންގައި ވިހުރުވާލުމަށާއި، މުޅި ޤައުމުގެ އިތުރު ޒުވާނުންނަށް ސްޓެމް، ރޮބޮޓިކްސް އަދި އީޖާދީ ދާއިރާތަކުން ކުރިއަށްދިއުމުގެ ޝައުޤުވެރިކަން އުފައްދައިދިނުމަށް ރާއްޖޭގެ ޓީމު އޮތީ ތައްޔާރަށެވެ. އަދި ޓީމްގެ އެންމެ ފަހުގެ ހަރާކާތްތައް ޓީމުގެ އިންސްޓަގްރާމް ޕޭޖަށް އަޕްޑޭޓްކުރަމުންގެންދާނެއެވެ.