ތަކުރުވޯސްގެ އައު ވަރޝަން ޓެސްޓުކުރާނެ ދިވެހިން ހޯދަނީ

އަރސިލްސް ޕްރައިވެޓް ލިމިޓެޑް އިން އުފައްދާފައިވާ ތަކުރުވޯސްގެ އައު ވަރޝަން ޓެސްޓުކުރާނެ ދިވެހިން ހޯދުމަށް އަރސިލްއިން މިއަދު ހުޅުވާލައިފިއެވެ.

ގޭމް ޑިޒައިން އަދި ޑިވެލޮޕްމަންޓްގެ މަސައްކަތް ކުރާ މިކުންފުންޏަކީ ރާއްޖޭގެ މިފަދަ މަސައްކަތްކުރަން ރަޖިސްޓަރ ކުރި ފުރަތަމަ ކުންފުންޏެވެ. ޒުވާން ޑިވެލޮޕަރުންތަކެއް ހިމެނޭ އާރސިލްސްގެ ޓީމުން އުފައްދާ ތަރައްގީ ކުރާ ތަކުރުވޯސް ގޭމަކީ އިހުޒަމާނުގެ ދިވެހިރާއްޖޭގެ ސެޓިންގގައި ދިވެހި ކެރެކްޓަރތަކެެއް ހިމެނޭ، މަލްޓި ޕްލެޔަރ އޮންލައިން ގޭމެކެވެ. މީގެ ފުރަތަމަ ވަރޝަން ރިލީޒް ކުރެވުނީ ޖޫން 2020 ގައެވެ. މިހާރު ރިލީސްކުރަން ތައްޔާރުވާ އައު ވާރޝަންގައި އިތުރު ގިނަ ފީޗަރސްތަކެއް ތަރައްގީ ކުރެވިފައިވާނެ ކަމަށް މަޢުލޫމާތު ލިބެއެވެ.

އަރސިލްސް އިން ބުނާގޮތުގައި ގޭމު ޓެސްޓުކުރަން 4 މީހަކު ބޭނުންވެއެވެ. ޓެސްޓުކުރާ ފަރާތްތަކުގެ މަސްޢޫލިއްޔަތަަކަށް ވާނީ ގޭމުގެ އެކި ފީޗަރސްތަކާއި ގޭމު ކުރިއަށްދާ ގޮތް ޓެސްޓްކުރުމެވެ. އަދި ގޭމުގައި ހުރި މައްސަލަތައް ދެނެގަނެ، މައްސަލަތަކުގެ ތަފްސީލް ޑޮކިޔުމަންޓްކުރުމެވެ. ފާހަގަ ކުރެވޭ މައްސަލަތައް ހައްލުކުރުމުން އަލުން ޓެސްޓްކުރުމާއި، ގޭމުގެ ވަރޝަން އަޕްގްރޭޑަށް ފަހު އަލުން ޓެސްޓުކުރުންވެސް ހިމެނެއެވެ.

އަރސިލްއިން ބުނާގޮތުގައި ގޭމުގެ ޑިވެލޮޕްމަންޓް ކުރިއަށް ދާވަރަކުން ބޭއްވޭ މީޓިންގތަކުގައި ޓެސްޓު ކުރަން ހޮވޭ ފަރާތްތައް ބައިވެރިވުން ވަރަށް މުހިއްމެވެ. މިއީ މުޅިން އޮންލައިންކޮށް ކުރެވޭނެ މަސައްކަތެކެވެ. އެހެން ނަމަވެސް މާލޭގައި ތިބި ފަރާތްތަކަށް އިސްކަން ދެވޭނެކަމަށް އާރސިލްސް އިން މަޢުލޫމާތު ދެއްވިއެވެ.

މިމަސައްކަތަށް ޝައުގުވެރިވާ ފަރާތްތަކުން އިތުރު މަޢުލޫމާތު ހޯއްދެވުމަށް، އަރސިލްސްގެ ކޯ-ފައުންޑަރ ޙުސައިން ޝާފިއުއަށް ޓްވިޓަރ މެދުވެރިކޮށް މެސެޖް ކުރައްވާށެވެ.