ބަލިމީހުންގެ މައުލޫމާތު ބޭނުން ކުރުމުގައި ޕްރައިވެސީ އުސޫލުތަކާއި ހިލާފުވުމުގެ ދައުވާތަކުގައި ތުހުމަތު ކުރެވެނީ މެޓާ އާއި އެމެރިކާގެ ހޮސްޕިޓަލްތަކުން ހިޕާއާ ހިލާފުވެފައިވާ ކަމަށެވެ.
ފޭސްބުކްގެ ބެލެނިވެރި ކުންފުނި މެޓާ އާއި އެމެރިކާގެ ބޮޑެތި ހޮސްޕިޓަލްތަކުން ފޭސްބުކަށް ސިއްހީ މައުލޫމާތު ފޮނުވާ ޓްރެކިން ޓޫލަކުން މެޑިކަލް ޕްރައިވެސީ ގާނޫނުތަކާ ހިލާފުވި ކަމަށް ހުށަހަޅާފައިވާ ދެ ކްލާސް އެކްޝަން ދައުވާއެއްގައި ތުހުމަތު ކުރެވެ އެވެ.
ޖޫން އަދި ޖުލައި މަހު ކެލިފޯނިއާގެ ދެކުނު ޑިސްޓްރިކްޓަށް ހުށަހެޅި އެ ދައުވާތަކުގައި ބޮޑަށް އަލިއަޅުވާލާފައިވަނީ މެޓާ ޕިކްސެލް ޓްރެކިން ޓޫލް އަށެވެ. ފޭސްބުކް އަދި އިންސްޓަގްރާމް އިޝްތިހާރުތަކުގައި އެނަލިޓިކްސް ފޯރުކޮށްދިނުމަށް ވެބްސައިޓްތަކުގައި މި ޓޫލް އިންސްޓޯލް ކުރެވޭނެ އެވެ. އަދި މީހުން ވަށައިގެން ކްލިކް ކުރާ ގޮތުގެ މައުލޫމާތު އެއްކޮށް، އެ ވެބްސައިޓްތަކަށް މައުލޫމާތު އިންޕުޓް ކުރެ އެވެ.
ޖޫން މަހުގެ ކުރީކޮޅު ދަ މާކަޕް އިން ކުރި ތަހުގީގެއްގައި ބުނެފައި ވަނީ އެމެރިކާގެ އެންމެ މޮޅު 100 ހޮސްޕިޓަލުގެ ތެރެއިން 33 ހޮސްޕިޓަލަކުން އެތަންތަނުގެ ވެބްސައިޓްތަކުގައި މެޓާ ޕިކްސެލް ބޭނުންކުރާ ކަމަށެވެ. ހަތް ހޮސްޕިޓަލެއްގައި ޕާސްވޯޑް ޕްރޮޓެކްޓްކޮށްފައިވާ ޕޭޝަންޓް ޕޯޓަލްތަކުގައި އިންސްޓޯލްކޮށްފައިވެ އެވެ. އެ ޓޫލްގެ ސަބަބުން ބަލިމީހުންގެ ސިއްހީ ހާލަތާއި، ޑޮކްޓަރަށް ދެއްކުމާއި، ބޭސް އެލާޖީއާ ބެހޭ މައުލޫމާތު ފޭސްބުކަށް ފޮނުވަމުން ދިޔަ ކަމަށް ތަހުގީގުގައި ބުނެފައިވެ އެވެ.
އެއިން އެއް ދައުވާގައި ބަލިމީހަކު ބުނާ ގޮތުގައި އޭނާގެ މެޑިކަލް މައުލޫމާތު ފޭސްބުކަށް ފޮނުވީ ޔުނިވާސިޓީ އޮފް ކެލިފޯނިއާ ސެން ފްރެންސިސްކޯ އާއި ޑިގްނިޓީ ހެލްތުގެ ބަލިމީހުންގެ ޕޯޓަލްތަކުގައި ހުންނަ މެޓާ ޕިކްސެލް ޓޫލް އިންނެވެ (އެ ހޮސްޕިޓަލްތަކަކީ ވެސް ދައުވާގައި ދައުވާ ލިބޭ ހޮސްޕިޓަލްތަކެވެ). އެއަށްފަހު ބަލިމީހާގެ ހިތާއި ކަކުލުގެ ހާލަތަށް އަމާޒުކޮށްގެން އިޝްތިހާރުތައް ދީފައިވާ ކަމަށް ދައުވާގައިވެ އެވެ.
މެރީލޭންޑްގެ ބާލްޓިމޯގައި ހުންނަ މެޑްސްޓާ ހެލްތު ސިސްޓަމްގެ ބަލިމީހަކު ކުރި އަނެއް ދައުވާގައި ބުނެފައި ވަނީ މަދުވެގެން 664 ސިއްހީ ހިދުމަތްދޭ ފަރާތަކުން މެޓާ ޕިކްސެލް މެދުވެރިކޮށް ފޭސްބުކަށް މެޑިކަލް ޑޭޓާ ފޮނުވާފައިވާ ކަމަށެވެ.
މެޑިކަލް ޕްރައިވެސީ ގާނޫނު ހިޕާގެ ދަށުން ސިއްހީ ހިދުމަތްދޭ މަރުކަޒަކުން އިތުރު ފަރާތަކަށް ޒާތީ ސިއްހީ މައުލޫމާތު ހިއްސާކުރުމަށް ބަލިމީހާގެ ރުހުން ބޭނުންވެ އެވެ. މެޓާއިން ބުނާ ގޮތުގައި މެޓާ ޕިކްސެލް ބޭނުންކުރާ ގްރޫޕްތަކަށް އެ ޑޭޓާ ފޭސްބުކަށް ފޮނުވުމުގެ ކުރިން ޑޭޓާ ހިއްސާކުރުމުގެ ހައްގު އޮންނަން ޖެހޭ ކަމަށާއި އެ ޑޭޓާއިން ނާޒުކު ސިއްހީ ޑޭޓާ ފިލްޓަރ ކުރާ ކަމަށެވެ. އެ ދައުވާތަކުގައި ތުހުމަތު ކުރެވެނީ މެޓާއިން އެނގިހުރެ އެ ސިޔާސަތުތައް ތަންފީޒު ނުކުރާ ކަމަށާއި ސިއްހީ ޒާތީ މައުލޫމާތު އެއްކުރާނެކަން އެނގިހުރެ ސިއްހީ ހިދުމަތްދޭ މަރުކަޒުތަކުގެ ވެބްސައިޓްތަކުގައި ޕިކްސެލް ބޭނުން ކޮށްފައެވެ.
ލިޔުންތެރިކަމުގެ ފުރަތަމަ ބިންގާ މި މަންސައިން
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.