ހެކް ކުރަން މަޝްހޫރު ޖެނެސިސް މާކެޓް އަތުލައިގަނެފި

އެމެރިކާއާއި ބައިނަލްއަގްވާމީ ގާނޫނު ތަންފީޒުކުރާ އިދާރާތަކުން ވަނީ ކޮމްޕްރޮމައިޒްޑް ކްރެޑިޝަންސް އާއި ޑިޖިޓަލް ބްރައުޒާ ފިންގަރޕްރިންޓް ހޯދުމަށް ބޭނުންކުރާ ހެކަރު މާކެޓްޕްލޭސްއެއް ކަމަށްވާ ޖެނެސިސް މާކެޓް އަތުލައިގަނެފައެވެ.

އެފްބީއައި އިން ވަނީ "އޮޕަރޭޝަން ކުކީ މޮންސްޓާ" ގެ ނަމުން ނަންދީފައިވާ ޓޭކްޑައުން މިދިޔަ ހަފްތާގައި އިއުލާން ކޮށްފައެވެ. ޖެނެސިސް މާކެޓްގެ ޑޮމެއިންތަކުގައި މިހާރު އެމެރިކާގެ ގާނޫނު ތަންފީޒުކުރާ އިދާރާއިން ނެރެފައިވާ އަތުލައިގަތުމުގެ އަމުރު ތަންފީޒުކޮށްފައިވާ ކަމަށް ބުނެ ނޯޓިހެއް ދައްކާފައިވެ އެވެ. "ޖެނެސިސް މާކެޓްގެ ޑޮމެއިންތައް އެފްބީއައި އިން އަތުލައިގަތީ އެމެރިކާގެ ޑިސްޓްރިކްޓް ކޯޓުން ވިސްކޮންސިންގެ އިރުމަތީ ޑިސްޓްރިކްޓުން ނެރުނު އަމުރެއްގެ ދަށުން،" މެސެޖުގައިވެއެވެ.

އެފްބީއައިގެ އިތުރުން ޓެކްޑައުންގައި އިނގިރޭސިވިލާތާއި ޔޫރަޕާއި އޮސްޓްރޭލިއާއާއި ކެނެޑާއާއި ޖަރުމަނާއި ޕޮލެންޑް އަދި ސްވިޑެންގެ ގާނޫނު ތަންފީޒުކުރާ އިދާރާތައް ބައިވެރިވެފައިވާ ކަމަށް އެ ނޯޓިސްގައިވެއެވެ.

މި އޮޕަރޭޝަންގައި ދުނިޔޭގެ އެކި ކަންކޮޅުތަކުގައި 120 އެއްހާ މީހުން ހައްޔަރުކޮށް 200 އެއްހާ މީހުން ބަލައި ފާސްކޮށްފައިވެއެވެ. އިނގިރޭސިވިލާތުގެ ނޭޝަނަލް ކްރައިމް އެޖެންސީން ބުނީ ސައިޓް ބޭނުންކުރާ ކަމަށް ޝައްކުކުރެވޭ 19 މީހަކު ހައްޔަރުކޮށްފައިވާ ކަމަށާއި އޭގެ ތެރޭގައި އުމުރުން 34 އަހަރާއި 36 އަހަރުގެ ދެ މީހުން ހިމެނޭ ކަމަށެވެ. މައުލޫމާތު ދެއްވަމުން އެފްބީއައިގެ އިސް އޮފިޝަލަކު ވިދާޅުވީ އެމެރިކާގައި ވެސް މީހުން ހައްޔަރުކޮށްފައިވާ ކަމަށާއި ނަމަވެސް ސީދާ އަދަދުތައް ކަށަވަރުކޮށްދީފައި ނުވާ ކަމަށެވެ.

"މިއީ މިވައްތަރުގެ އެންމެ ބޮޑު އޮޕަރޭޝަން. އަޅުގަނޑުމެން މިދަނީ ހަމައެކަނި އެޑްމިނިސްޓްރޭޓަރުންގެ ފަހަތުން ނުވަތަ ސައިޓްތައް ނަގަމުން ނޫން، އަހަރެމެން މިދަނީ ގްލޯބަލް ސްކޭލްގައި ޔޫޒަރުންގެ ފަހަތުން،" އޮފިޝަލް ވިދާޅުވިއެވެ. އެމީހުން އިތުރަށް ބުނީ ޖެނެސިސް މާކެޓްގެ ކޮމްޕިއުޓަރ ސިސްޓަމްތައް ހޯދައިގެން އޮފިޝަލުން ވަނީ މާކެޓްޕްލޭސްގެ ގާތްގަނޑަކަށް 59،000 ޔޫޒަރުން ދެނެގަނެފައެވެ.

އަދި އެފްބީއައި އިން ވަނީ ޑޭޓާ ބްރީޗް ނޮޓިފިކޭޝަން ވެބްސައިޓް 'ހެވް އައި ބީން ޕްއުންޑް' އަށް ޖެނެސިސް މާކެޓުން "މިލިއަން" އީމެއިލް އެޑްރެސްތަކާއި ޕާސްވޯޑްތައް ފޯރުކޮށްދީފައެވެ. އެއީ އިންޓަނެޓް ބޭނުންކުރާ މީހުންނަށް ކޮމްޕްރޮމައިޒް ކުރެވިފައިވޭތޯ ބެލުމަށެވެ.

ޖެނެސިސް މާކެޓަކީ 2017 ވަނަ އަހަރުން ފެށިގެން ހަރަކާތްތެރިވަމުން އަންނަ ކުންފުންޏެއް ކަމަށާއި އެއީ ވަގަށް ނަގާފައިވާ ކްރެޑިޝަންތަކާއި ކުކީސް އަދި ކޮމްޕްރޮމައިޒްޑް ސިސްޓަމްތަކުން އެއްކޮށްފައިވާ ޑިޖިޓަލް ބްރައުޒާ ފިންގަރޕްރިންޓް ވިއްކާ ދައުވަތު ލިބޭ އޮންލައިން މާކެޓް ޕްލޭސް އެކެއެވެ. މި ފިންގަރޕްރިންޓް ނުވަތަ "ބޮޓް" ގައި އައިޕީ އެޑްރެސް، ސެޝަން ކުކީސް، ޕްލަގިންސް އަދި އޮޕަރޭޓިން ސިސްޓަމްގެ ތަފްސީލު ހިމެނޭއިރު، ހަމަލާދޭ މީހުންނަށް ޝިކާރައަކަށް ވެފައިވާ މީހުންގެ ބްރައުޒާ އަށް ހެދިގެން އެމެޒޯން އަދި ނެޓްފްލިކްސް ފަދަ އޮންލައިން ސަބްސްކްރިޕްޝަން އަދި ބޭންކިން ހިދުމަތްތަކަށް ވަދެވޭނެއެވެ.

ޝަޓްޑައުން ކުރުމުގެ ކުރިން ޖެނެސިސް އިން ބުނީ ކޮމްޕްރޮމައިޒް ވެފައިވާ ޑިވައިސްއަކަށް އެކްސެސް ލިބިފައިވާހާ ހިނދަކު މި ބްރައުޒާ ފިންގަރޕްރިންޓްތައް އަޕްޑޭޓްކޮށް ބަހައްޓާނެ ކަމަށެވެ.

އަތުލައިގަތުމާ ހަމައަށް ވެސް ބާޒާރުގައި ވިއްކަން ހުރި އިންފެކްޓް ޑިވައިސްތަކުގެ އަދަދު ދިޔައީ ބޮޑުވަމުންނެވެ.

"2021 ވަނަ އަހަރު މަހަކު 20،000 އަށް ވުރެ ގިނަ އާ ބޮޓް ސައިޓަށް އިތުރު ކުރަމުން ދިޔައީ،" ސައިބަރ ސެކިއުރިޓީ އަދި ބޮޓް މެނޭޖްމަންޓް ކުންފުނި ނެޓާސީއާގެ ޕްރިންސިޕަލް ރިސާޗާ ސައިރިލް ނޯއެލް ޓަގޯ ވިދާޅުވި އެވެ. "2022 ވަނަ އަހަރުގެ މެދުތެރޭގައި މާކެޓް ވަގުތީ ގޮތުން ދަށްވި ނަމަވެސް މިހެން ކަންތައް ކުރި ނަމަވެސް 2023 ވަނަ އަހަރުގެ މާޗް މަހުގެ ނިޔަލަށް ވިއްކަން ހުރި ބޮޓްތަކުގެ އަދަދު ވަނީ 450،000 އަށް ވުރެ މައްޗަށް ގޮސްފަ."

އެފްބީއައި އިން ބުނީ ޖެނެސިސް މާކެޓް އުފެދުނު ދުވަހުން ފެށިގެން ދުނިޔޭގެ 1.5 މިލިއަނަށް ވުރެ ގިނަ ކޮމްޕްރޮމައިޒްޑް ކޮމްޕިއުޓަރުތަކުން ވަގަށް ނަގާފައިވާ ޑޭޓާ އަށް އެކްސެސް ލިބޭ ގޮތަށް 80 މިލިއަނަށް ވުރެ ގިނަ އެކައުންޓް އެކްސެސް ކްރެޑެންޝިއަލްސް ހިމެނޭ ކަމަށެވެ. ޖުމްލަ މާލީ ގެއްލުން އަދި ކަނޑައެޅިފައި ނުވާއިރު، އެފްބީއައި އިން ބުނާ ގޮތުގައި ވަގަށް ނަގާފައިވާ ކްރެޑެންޝިއަލްސް ވިއްކައިގެން ޖެނެސިސް އަށް މަދުވެގެން 8.7 މިލިއަން ޑޮލަރު ލިބިފައިވީ ނަމަވެސް ފުރިހަމަ ޖުމްލަ 10 މިލިއަން ޑޮލަރަށް ވުރެ ބޮޑުވުން އެކަށީގެންވާ ކަމަށް ފާހަގަކޮށްފައިވެއެވެ.

ރިޕޯޓްތައް ބުނާ ގޮތުގައި މިހާރު މާކެޓް ޕްލޭސް ގުޅިފައިވަނީ ދުނިޔޭގެ އެކި ކަންކޮޅުތަކުގައި މާލީ ގޮތުން ހިނގާ އެތައް މިލިއަން ސައިބަރ ހާދިސާތަކަކާއެވެ. ޖޫން 2021 ގައި ގޭމިން ޖަޔަންޓް އިލެކްޓްރޯނިކް އާޓްސް އާއި ހިލާފުވި ހެކަރުން ވަނީ ޖެނެސިސް މާކެޓުން 10 ޑޮލަރުގެ ބޮޓެއް ގަނެގެން ކުންފުނީގެ ސްލެކް އެކައުންޓަކަށް ލޮގް އިން ކޮށްގެން ގޭމިން ޖަޔަންޓަށް ވަދެވޭނެ ކަމަށް ބުނެފައެވެ.

ޖެނެސިސް މާކެޓް ނަގާފައިވަނީ އެފްބީއައިއަށް މަޝްހޫރު 'ބްރީޗްފޯރަމްސް' ހެކިން ފޯރަމް އަށް ވަދެ، އެ ސައިޓް ހިންގާ ކަމަށް ތުހުމަތު ކުރެވޭ ނިއުޔޯކުގެ އުމުރުން 20 އަހަރުގެ މީހަކު ހައްޔަރުކުރިތާ ހަފްތާއެއްހާ ދުވަސް ފަހުންނެވެ. އަދި އެމެރިކާގެ ގާނޫނު ތަންފީޒުކުރާ ފަރާތްތަކުން މިދިޔަ އަހަރު އެމެރިކާގެ އެތައް މިލިއަން މީހުންގެ ޒާތީ މައުލޫމާތު، ސޯޝަލް ސެކިއުރިޓީ ނަންބަރުތައް ހިމެނޭ ގޮތަށް ވިޔަފާރި ކުރުމަށް ބޭނުންކުރާ މާކެޓެއް ކަމަށްވާ އެސްއެސްއެންޑީއޯބީ ނަގާފައިވާކަން އިއުލާން ކުރުމުންނެވެ.