އަޅުގަނޑުމެން މިޒަމާނުގައި އަބަދުވެސް ފޯނު ބޭނުންކުރަމުން ދަމެވެ. ނަމަވެސް އަޅުގަނޑުމެންގެ ފޯނުތައް ސާފުކުރަނީ ކިހާ ގިނައިންތޯ؟ 2017 ސުކޫލުކުދިންގެ މެދުގައި ކުރި ދިރާސާއެއް ދައްކައިދޭ ގޮތުގައި ސްމާޓު ފޯނުގެ ސްކްރީނުތަކުގައި އީ.ކޮލައި އާއި ސްޓެފިލޮކޮކަސް އޯރިއަސް ފަދަ ނުރައްކާތެރި ޖަރާސީން ފެނިފައިވެއެވެ. ފާއިތުވެގެން ދިޔަ ކޮރޯނާ ވައިރަސާއި އާންމުވެފައިވާ ރޯގާތަކާމެދު ވިސްނާއިރުގައި މިގޮތައް ފޯނުތަކުގައި ޖަރާސީން އެއްވުމަކީ ސިއްހީގޮތުން ވަރަށް ނުރައްކާތެރި ކަމެކެވެ. ނަމަވެސް ފޯނުގައި ޖަރާސީން އެއްވުމަކީ ހާސްވާންޖެހޭ ކަމެއް ނޫނެވެ. މިކަމަކީ ވަރަށް ފަސޭހަ ހައްލެއް އޮތްކަމެކެވެ. ގަވައިދުން ފޯނު ރަނގަޅަށް ސާފުކުރުމުން، ނުވަތަ "ޑީޕް ކްލީން"ކުރުމުން އަޅުގަނޑުމެންގެ ފޯނުތަކުގައި އެއްވެފައިވާ ޖަރާސީމުގެ އަދަދު ކުޑަކުރެވޭނެއެވެ. މިގޮތުން ފޯނު ސާފުކުރުމަށް ކުރެވިދާނެ ބައެއް ކަންތައް ބަލާލަމާތޯއެވެ.
ފޯނު ސާފުކުރަން ފެށުމުގެ ކުރިން ފޯނު ނިއްވާލަން ހަނދާން ކޮށްލައްވާށެވެ. މިހެން ހަދަން މުހިންމުވާ ސަބަބަކީ އެހެންނޫނިއްޔާ ފޯނަށް ލިބިދާނެ ގެއްލުން ކުޑަކުރުމަށެވެ. ފޯނުގައި ލައްވާފައިވާ ކަވަރާއި އެހެން އެފަދަ ސާމާނުވެސް ނައްޓަން ހަނދާން ކޮށްލައްވައްޗެވެ.
ފޯނުގެ ބޭރު ސާފުކުރުމަށްޓަކައި މައިކްރޯފައިބަރ ފޮތިކޮޅަކުން މަޑުމަޑުން ސާފުކޮށްލައްވާށެވެ. މި ފޮތިގަނޑު ބޭނުންކުރުމުން ބޭރުގައި ހޭކިފައި ހުރި ކިލާތައް ފޯނުން ކޫރުން ނޭޅޭގޮތަކަށް ސާފުކުރެވޭނެއެވެ. އާދައިގެ ފޮތްޗާއި ޓިޝޫފަދަ ތަކެތި ބޭނުންކުރުމުން ފޯނުގެ ބިއްލޫރިއަށް ކޫރުން އެޅި، ހަލާކުވުމުގެ ފުރުސަތު ބޮޑުވެއެވެ. މީގެ އިފުރުން މައިކްރޯފައިބަރއިން އާދައިގެ ފޮތިގަނޑުތަކާއި ޓިޝޫ ފަދަ ތަކެއްޗާއި އަޅާ ބަލާއިރު ފޯނުގެ ބޭރުގައި ތައްލަވާފައިހުރި ޖަރާސީމު ފަސޭހައިން ނެގި، ކިލާ ނެގި، އަދި ގްރީސް ފަދަ ތަކެތިވެސް ނެގިގެންދެއެވެ.
ފޯނުގެ ބޭރުގަނޑު ސާފުކުރުމަށް ބްލީޗާއި އެހެނިހެން ވަރުގަދަ މާއްދާތައް ބޭނުން ނުކުރުމަށް މާހިރުން އިރުޝާދު ދެއެވެ. މިކަމުގެ ސަބަބަކީ މިފަދަ މާއްދާތަކުން ފޯނުގެ ބިއްލޫރިތަކާއި ސެންސަރތަކަށް ގެއްލުން ލިބިދާނެތީއެވެ. މީގެ ބަދަލުގައި އެހާ ތޫނު ނޫން އަދި އެހާ ބާރު ގަދަ ނޫން، 'މައިލްޑު' ލިކުއިޑުތައް ބޭނުންކުރުމެވެ. ނަމަވެސް މި މާއްދާތައް ސީދާ ފޯނަށް ޖެއްސުމުގެ ބަދަލުގައި ފޮތިކޮޅު ތެއްކޮށްލައްވާފައި ފޮތިކޮޅުން ފޮހުން ވަރަށް މުހިންމެވެ. މިގޮތުން ފެން، ނުވަތަ އަލްކަހޯލާއިފެނުން ހަދާފައި ހުރި ބައެއް މާދާތަކަކީ ފޯނު ހަލާކުނުވެ ބޭނުންކުރެވިދާނެ މާއްދާތަކެއްކަމަށް ފާހަގަކުރެވެއެވެ. ބައެއް ފަރާތްތަކުން ފެނާއި ސައިބޯނި ބޭނުންކުރުމަށް ނަސޭހަތްދެއެވެ.
ފޯނަށް ގެއްލުން ނުވާ ފަދަ ޔޫވީ ސެނިޓައިޒަރެއްވެސަ ބޭނުން ކުރެވިދާނެއެވެ. މިފަދަ ތަކެތި ބޭނުންކުރުމުގެ ތެރޭގައި ފޯނާއި އޭގެ ކޭސް ވަކިން ސާފުކުރުން މުހިންމެވެ.
ފޯނު ސާފުކުރުމަށް އައިސޯޕްރޮޕައިލް އަލްކޮހޯލް–ބޭސްޑް ކްލީނިންގ ވައިޕްސް ބޭނުންކުރުމަށް އެޕަލް، ގޫގަލް އަދި ސެމްސަންގް އިފުޝާދު ދީފައިވެއެވެ. މިދިޔަ ކޮރޯނާ ވައިރަސް ޕެންޑެމިކުގެ ތެރޭގައި އެޕަލްއުން %75 އެތައިލް އަލްކޮހޯލް ވައިޕްސްވެސް ފޯނަށް ގެއްލުން ނުލިބި ބޭނުންކުރެވޭނެ ކަމަށް ބުނެފައިވެއެވެ. އަދި ސެމްސަންގްއުން 50- އާއި 80- ޕީޕީއެމް އާއި ދެމެދުގެ ހައިޕޮކްލޮރަސް އެސިޑް އަށް ބިނާކޮށްފައިވާ ސޮލިއުޝަންތައް ވެސް ބޭނުންކުރެވޭނެ ކަމަށް ބުނެފައިވެއެވެ.
ފޯނު އުފައްދާ ގިނަ ފަރާތްތަކުން ފޯނު ސާފުކުރުމުގައި ކޮމްޕްރެސްޑް އެއާ ބޭނުން ނުކުރުމަށް ނަސޭހަތްލާދެއެވެ. އެއީ މިކަމުގެ ސަބަބުން ފޯނުގެ ޕޯޓުތަކުގެ ތެރޭގައި ހަރުލާފައި ހުރި ކިލާތައް މީގެ ސަބަބުން ފޯނުގެ އެތެރެއަށް ދިއުމުންފޯނަށް ގެއްލުން ލިބިދާނެތީއެވެ.
ޗާޖިން ޕޯޓްތަކާއި ހެޑްފޯން ޖެކްތަކާއި ބަޓަންތައް ސާފުކުރުން ވެސް ވަރަށް މުހިންމު ވާނެވެ. މިކަމަށް ހާއްސަ ޓޫލްސް، ލަކުޑި ޓުތުޕިކް، ނުވަތަ ޓިޝޫއާއި ފޮތި ފަދަ ތަކެތި ބޭނުން ކުރެވިދާނެވެ. ނަމަވެސް ދަގަނޑު ޕިން ފަދަތަކެތި ބޭނުންކުރުމުން ދުރުހެލިވާންޖެހޭނެއެވެ. މިހެންމި ބުނާ ސަބަބަކީ ދަގަނޑުން ހަދާފައިވާ ތަކެތި މިކަމަށް ބޭނުން ކުރުމުން ކަރަންޓު ދައުރުވުމުގެ ސަބަބުން ފޯނަށް ގެއްލުމެއ ލިބިދާނެތީއެވެ. ފޯނު ސާފުކުރުން އުޅުމުގެ ތެރޭގައި މަޑުމަޑުން ބޭރު ސާފުކޮށް، މާ އެތެރެއަށް ނުލެއްވުން މުހިންމެވެ. އެއީ އޭގެ ސަބަބުން ކިލާ އެތެރެއަށް ގޮސްދާނެތީއެވެ.
ފޯނު ސާފުކޮށް އުޅުމުގެ ތެރޭގައި ހަނދާންކުރަން އެންމެ މުހިންމު އެއްކަމަކީ މިކަން ގަވައިދުން ކުރުމެވެ. މީގެ އިތުރުން، ފޯނުކޭހެއް ގެންގުޅޭނަމަ، އެވެސް ގަވައިދުން ސާފުކުރުން ވަރަށް މުހިންމެވެ. އެފޯނުކޭހެއގެ ގޮތުން އޭތި ސާނުކުރުމަށް ބޭނުންކުރާތަކެއްޗާއިމެދު ސަމާލުވުން މުހިންމެވެ. އެކޭހެއްހަދާފައި ހުންނަ އެއްޗަކާއި ގުޅޭގޮތުން އެކޭސް ވެސް ގަވާއިދުން ސާފުކުރަން ވާނެއެވެ.
ދުނިޔެއާއި، ކާއިނާތާއި އިންސާނުންގެ އުފެއްދުންތެރިކަމާއި މެދު އަބަދުވެސް ސުވާލުކޮށް.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.