"ޕްލާސްޓިކޯރަލް" އޮކިނާވާގެ ގޮނޑުދޮށުން ފެނިއްޖެ

ޖަޕާނުގެ އޮކިނާވާގެ ގޮނޑުދޮށުން އާ ބާވަތެއްގެ ޕްލާސްޓިކް ޕޮލިއުޝަނެއް ފެނިއްޖެއެވެ. "ޕްލާސްޓިކޯރަލް"ގެ ނަންދީފައިވާ މި އައު ޕްލާސްޓިކް ޕޮލިއުޝަންއަކީ މުރަކަތަކާއި ފިއުޒްވެފައިވާ ގިރާފައިވާ ޕްލާސްޓިކްއެވެ. މި ހޯދުންތައް ފެނިފައިވަނީ އޮކިނާވާ އިންސްޓިޓިއުޓް އޮފް ސައިންސް އެންޑް ޓެކްނޮލޮޖީ އާއި ޔުނިވާސިޓީ އޮފް ދަ ރިޔުކިއުސްގެ ދިރާސާވެރިން ކުރި ގޮނޑުދޮށުގައި ކުނިއުކުމާއި ގުޅިގެންކުރި ދިރާސާއެއްގެ ތެެރެއިންނެވެ. މިގޮތުން ތިން ގޮނޑުދޮށެއްގައި ކަޅު، ފެހި، ރީނދޫ، އަދި ރަތް ކުލައިގެ ޕްލާސްޓިކް އެތިކޮޅުތައް މުރަކަޔާއި ފިއުޒްވެފައި އޮތްތަން ފެނިފައިވެއެވެ.

ލެބޯޓްރީ ޓެސްޓްތަކުން ދައްކާ ގޮތުގައި މި ޕްލާސްޓިކް އެތިކޮޅުތައް މުރަކައިގެ މަތީގަިއ ހުރުމުގެ ބަދަލުގައި ވަނީ މުރަކަޔާއި އެއްވަފައެވެ. ރަމަން ސްޕެކްޓްރޯސްކޯޕީ އާއި މައިކްރޯސްކޯޕް އަދި އެކްސްރޭ ސްކޭން ބޭނުންކޮށްގެން ދިރާސާވެރިން ހޯދާފައިވާ ގޮތުގައި މި ޕްލާސްޓިކް އެތިކޮޅުރައް ވަނީ މުރަކައިގެ ކަށިގަނޑުގައިވާ ކުދިކުދި ހޮހޮޅަތަކައް ވަދެފައެވެ. ދިރާސާވެރިންނަށް ޖުމްލަ ފަސް ޕްލާސްޓިކޯރަލް އެތިކޮޅު ފެނިފައިވީއިރު، ތަފްސީލުކޮށް ބަލާފައިވަނީ ހަމައެކަނި ހަތަރު އެތިކޮޅެވެ. މިގޮތުން ކޮށްފައިވާ ޓެސްޓުތަކިން އާންމުކޮށް ބޭނުންކޮށް އުޅޭ ޕޮލިއެތިލިން އާއި ޕޮލިޕްރޮޕައިލީން ފެނިފައިވެއެެވެ.

ސައިންސްވެރިން ޤަބޫލުކުރާ ގޮތުގައި މި ޕްލާސްޓިކް އެތިކޮޅުތައްވަނީ ހޫނުގެ ސަބަބުން ގިރައުގެންގޮސް މުރަކަ ތެރެއަށް ވަދެފައެވެ. ގޮނޑުދޮށުގައި ރޯކުރާ އަލިފާނުގެ ސަބަބުން މުރަކަތެރެއް ޕްލާސްޓިކް އެއްވެގެން ދާކަމަށް ބައެއް ދިރާސާވެރިން ލަފާކޮށްފައިވެއެވެ. ނަމަވެސް މިކަން ކަށަވަރުކުރުމަށް އިތުރު ތަހުގީގުތަކެއް ބޭނުންވެއެވެ.

ޕްލާސްޓިކޮރަލް އަކީ ޕްލާސްޓިގްލޯމެރޭޓްސް ކިޔާ މާއްދާތަކުގެ ތެރޭގައި ހިމެނޭ ބައެކެވެ. ދިރާސާވެރިން ބުނާ ގޮތުގައި މިފަދަ ތަކެތި ދިގުމުސްތަގުބަލުގައި ދުނިޔޭގެ ޖިޔޮލޮޖިކަލް ސްޓްރަކްޗަރުތަކުގެ ތެރޭގައި ދެމިގެންދާނެކަމަށް ލަފާކުރެއެވެ. ސެޑިމެންޓްތަކާއި ހިލަތަކުގައި އެއްވެގެން ގޮސްދާނެކަމަށް ޝައްކުކުރެވިފައިވީއިރު، މިކަންތައް ކަށަވަރުކުރުމަށް އިތުރު ދިރާސާތަކެއް ބޭނުންވެއެވެ.

މީގެކުރިން ހަވާއީގެ ގޮނޑުދޮށުގައި ވެއްޔާއި، މުރަކައާއި، ބަސަލްޓްއާއި އެހެން ޑެބްރީއާއި އެއްވެފައި ހުރި ގިރިފައި ހުރި ޕްލާސްޓިކް ފެނިފައިވެއެވެ. އަދި އިންޑޮނީޝިޔާގައި ޕްލާސްޓިކް ގޮނޑުދޮށުގައި އެންދުމުން އެހެން ޕްލާސްޓިގްލޯމެރޭޓްސް ފެނިފައިވެއެވެ. ބްރެޒިލް ކައިރީގެ ރަށެއްގައި ކޮށްފައިވާ އެހެން ދިރާސާއެއް ދައްކައިދޭގޮތުން، އަލިފާން ފަރުބަދައެއްގެ ކައިރީގައި ގާޕަކުގެ ތެރެއަށް ވިރިފައިވާ ޕްލާސްޓިކުން އުފެދިފައިވާ ޕްލާސްޓިގްލޯމެރޭޓްސް ކަމަށް ޝައްކުވާ މާއްދާއެއް ފެނިފައިވެއެވެ. މީގެެއިތުރުން، ކުރިން ކޮށްފައިވާ ދިރާސާތައް ދައްކާ ގޮތުން ޕްލާސްޓިކް އެންދުމުން މައިކްރޯޕްލާސްޓިކްތަކާއި ވިހަ މާއްދާތައް ތިމާވަށްޓަށް ދޫކުރެވިގެންދެއެވެ.

މިފަހަރު މެރިން ޕޮލިއުޝަން ބުލެޓިންގައި ޝާއިރުކޮށްފައިވާ މިދިރާސާއިން އާވައްތަރެއްގެ ޕްލާސްޓިކް ޕޮލިއުޝަނެއް ފާހަގަކޮށްފައިވީ ނަމަވެސް، މީގެން ފެނިފައިވަނީ ހަމައެކަނި ފަސް ސާމްޕަލެވެ. މީގެން ތިމާވަށްޓަށް ކޮށްފާނެ އަސަރާއި، މި މާއްދާ ޑީގްރޭޑްވުމުން ނެރޭނެ މާއްދާތަކުން ކަނޑުގައި އުޅޭ ސޫފިތަކަށް ކުރާނެ އަސަރާއި، ޖިއޮލޮޖިކަލް ޒަރިއްޔާއަކުން މީގެން ކުރާނެ އަސަރު އަަދި ކަށަވަރުވެފައި ނުވެއެވެ.

އެންމެ ފަހުން ސެޑިމެންޓްތަކާއި ހިލަތަކުގައި ދިގުދެމިގެންދާ ނިޝާނެއް ދޫކޮށްލައި، ޕްލާސްޓިކް ތަޣައްޔަރުވުމުގެ މިޒަމާނުގެ ރެކޯޑެއް އުފެދިދާނެ އެވެ. މިވަގުތު ފެނިފައިވަނީ މަދު ޕްލާސްޓިސޯރަލްތަކެއް ކަމުން އެއީ ކިހާ އާންމު އެއްޗެއްކަން ސައިންސްވެރިންނަކަށް ނޭނގެ އެވެ. އެހެންނަމަވެސް މި ހޯދުން ދައްކާ ގޮތުގައި ޕްލާސްޓިކް ތަޣައްޔަރުވުމަކީ ހީވެސް ނުކުރާ ގޮތްގޮތަށް ގުދުރަތީ މާހައުލުތަކުގެ ތެރެއަށް ފިޒިކަލީ ވަދެދާނެ ކަމެކެވެ.