އަޅުގަނޑުމެން މިޒަމާނުގައި އެކިކަންކަމަށް ކަރަންޓު ބޭނުންކުރާ މިންވަރު ދަނީ މައްޗަށް ދަމުންނެވެ. އަމިއްލަ ބޭނުންތަކަށް ބޭނުންކުރަމުންދާ ފޯނުތަކާއި އެކިއެކި އިލެކްޓްރޯނިކް ސާމާނުންފެށިގެން، ސިއްހީ، އަސްކަރީ ސިނާއީ އަދި އެހެނިހެން ބޭނުންތަކަށްވެސް ހަކަތަ ރައްކާކޮށް ބެހެއްޓުމުގެ މުހިންމުކަން ބޮޑުވަމުން ދެއެވެ. މިގޮތުން ބެޓަރީ ޓެކްނޮލަޖީއަށް އަންނަ ކުރިއެރުމަކީ އެެކިއެކި ބޭނުންތަކަށް ހަކަތަ މެދުނުކެނޑި ދާއިމީ ގޮތަކަށް ފޯރުކޮށްދިނުމަށް ވަރަށް މުހިންމު އެއްޗެކެވެ. މިގޮތުން އިތުބާރުކުރެވޭ، ގިނަދުވަހަކަށް ހަކަތަ ރައްކާކޮށް ފޯރުކޮށްދެވޭނެ ބެޓަރީއަކީ އެކިއެކި ކަންކަމަށް ވަރަށް ބޭނުންވެފައިވާ އެއްޗެކެވެ.
މިގޮތުން އެކި ބޭނުންތަކަށް އެކަށީގެންވާފަދަ ކުޑަ ބެޓަރީތައް އުފެއްދުމުގައި ނިއުކްލިއާ ޓެކްނޮލޮޖީއަކީ މިހާރު ދިރާސާކުރަމުންދާ އެއްޗެކެވެ. ޗައިނާގެ ބީޓާވޯލްޓް ނިއުކްލިއާ އެނާޖީ ޓެކްނޮލޮޖީން ފައިސާފޮއްޗެއްގެ ބޮޑުމިނުގެ ނިއުކްލިއާ ބެޓެރީއެއް ކަމަށްވާ BV100 ގެ މާސްކޮށް އުފެއްދުން ފަށައިފިއެވެ. މި ބެޓަރީ ޗާޖުނުކޮށް 50 އަހަރުވަންދެން ހުއްޓުމެއް ނެތި އަލުން ޗާޖުނުކޮށް މެއިންޓެނަންސާނުލާ ބޭނުންކުރެވޭނެއެވެ. މި ބެޓަރީގެ ސަބަބުން ހަކަތަ ރައްކާ ކުރުމަށާއި އެއާއި ގުޅިގެން އުފެދިފައިވާ އެހެން ދާއިރާ ތަކަށް ވަރަށް ބޮޑު ކުރިއެރުމެއް ގެނެސް ދޭނެއެވެ.
މި ބެޓަރީތައް މަސައްކަތްކުރަނީ ބެޓާވޮލްޓިކް ބެޓާރީއެއްގެ ގޮތުގައެވެ. އޭގައި ރޭޑިއޯއެކްޓިވް އެމިޓަރަކާއި ސެމީކޮންޑަކްޓަރ އެބްޒޯބަރެއްވެއެވެ. ބީޓާވޮލްޓިކް ބެޓެރީތަކުން ކަރަންޓް އުފައްދަނީ ސޯލާ ޕެނަލްތަކުން އިރުގެ އަލި ބޭނުންކުރާފަދައިން، ރޭޑިއޯއެކްޓިވް ސޯސަކުން ދޫކުރާ ބީޓާ ޕާޓިކަލްތައް ސެމީކޮންޑަކްޓަރ އެބްޒޯބަރެއްގައި ޖެހުމުން އިލެކްޓްރޯން-ހޯލް ޕެއާތައް އުފައްދައިގެންނެވެ. މި ޕާރޓިކަލްތައް އެބްޒޯބަރގެ ބޭރުފަށަލައިގައި ޖެހުމުން ބާރު، ތުނި ފިލްމަކަށް ކަރަންޓް ދައުރުވެއެވެ.
BV100 ކަރަންޓް އުފައްދުމަށް ބޭނުންކުރަނީ ނިކަލް-63 ގެ ރޭޑިއޯއެކްޓިވް އައިސޮޓޯޕެކެވެ. މި އައިސޮޓޯޕްގެ ގުދުރަތީގޮތުން ޑިކޭވާއިރު ދޫކުރާ ބީޓާ ޕާޓިކަލް (ބާރަށްދާ އިލެކްޓްރޯނުތައް) ބޭނުންކޮށްގެން އިލެކްޓްރިކަލް ހަކަތަ ފޯރުކޮށްދެއެވެ. މީގެ މައިގަނޑުގައި ހަތަރުވަނަ ޖީލުގެ ޒަމާނީ ޑައިމަންޑް ސެމީކޮންޑަކްޓަރ ޓެކްނޮލޮޖީ ބޭނުންކުރެއެވެ. ދެ މައިކްރޯންގެ ބޯމިނުގެ ނިކަލް-63 ފަށަލައެއް ދިހަ މައިކްރޯންގެ ދެ ޑައިމަންޑް ސެމީކޮންޑަކްޓަރ ފަށަލަ ވަށާލައެވެ. މީގެން ރޭޑިއޯއެކްޓިވް ޑީކޭއިން 3Vގައި 100µWގެ އައުޓްޕުޓެއް ބަދަލުނިވެ އެފިޝަންޓުކަމާއެކު ބަދަލުކުރެއެވެ.
ހަމައެކަނި 15×mm15×5 ގެ ބޮޑޫމިނުގެ މި ކުޑަ ބެޓަރީއިން ގްރާމަކަށް 3،300 މިލިވޮޓް ގަޑިއިރުގެ ކަރަންޓުލިބެއެވެ. މިޔަކީ އާންމުކޮށް ބޭނުންކުރާ ލިތިއަމް އަޔަން ބެޓެރީތަކުގެ ދިހަ ގުނަ ބޮޑުއަދަދެކެވެ. މީގެ އިތުރުން، ބެޓާވޮލްޓް ބުނާގޮތުން މި ބެޓަރީތައް 60°C އާއި 120°Cގެ ދެމެދުގެ ހޫނުމިނެއްގައި މި ބެޓަރީ މަސައްކަތްކުރާނެއެވެ. މިކަމުގެ ސަބަބުން އާންމުކޮށް ބޭނުންކުރެވޭ ބެޓަރީތަކަށްވުރެ މި ބެޓަރީ މާ މޮޅުވެ ރައްކާތެރިވެއެވެ.
މީގެ ކޮންމެ ބެޓަރީއަކުން ނެރެވޭ ކަރަންޓު ކުޑަވިޔަސް، މީގެ މޮޑިއުލާ ޑިޒައިންގެ ސަބަބުން ގިނަ ޔުނިޓްތައް ސީރީޒް ނުވަތަ ޕެރެލަލްކޮށް ގުޅުވާލުމުން ނެރެވޭ ޖުމްލަ ހަކަތަ ބޮޑުކުރެވޭނެއެވެ. ބީޓާވޯލްޓުން މި އަހަރުގެ ފަހުކޮޅު 1Wގެ މިއަށްވުރެ ވަރުގަދަ ބެޓަރީއެއް ނެރުމަށް ރާވާފައިވެއެވެ. މި ބެޓަރީ ޑްރޯންތަކާއި މެޑިކަލް ޑިވައިސްތަކާއި އާޓިފިޝަލް އިންޓެލިޖެންސް ސިސްޓަމްތަކާއި މައިކްރޯ ރޮބޮޓްތަކުގައި ބޭނުންކުރެވޭ ގޮތައް ހެދުމަށް ރާވާފައިވެއެވެ.
ދުނިޔެއާއި، ކާއިނާތާއި އިންސާނުންގެ އުފެއްދުންތެރިކަމާއި މެދު އަބަދުވެސް ސުވާލުކޮށް.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.