"ދިވެހިފޮތް" އެޕް - ދިވެހި ފޮތްތެރިކަން އައު ހަރުފަތަކަށް

ދިވެހި ބަހުން ލިޔެ ޝާއިއުކޮށްފައިވާ ފޮތްތައް ޑިޖިޓަލް ޑިވައިސްތައް ބޭނުންކޮށްގެން ކިޔޭގޮތަށް ތައްޔާރުކޮށްފައިވާ "ދިވެހި ފޮތް" މޯބައިލް އެޕްކޭޝަން ތައާރަފްކޮށްފިއެވެ. މިއީ މިގޮތަށް ދިވެހި ފޮތް ލިޔުންތެރިންނަށް ހާއްސަކޮށްގެން ތައްޔާރުކުރެވުނު އެންމެ ފުރަތަމަ އެޕްލިކޭޝަނެވެ. މިއެޕްލިކޭޝަން މެދުވެރިވެ ދިވެހި ފޮތްތައް ހިލޭ އަދި ގަނެގެން ކިޔާލެވެއެވެ.

އެންޑްރޮއިޑް އަދި އައިއޯއެސް ޑިވައިސްތަކުގައި ވެސް މިއެޕްލިކޭޝަން ބޭނުންކުރެވޭނެއެވެ. ގޫގުލް ޕްލޭސްޓޯރ އަދި އެޕަލް އެޕްސްޓޯރ މެދުވެރިވެ މިއެޕް އިންސްޓޯލް ކުރުމަށް މިލިންކު ބޭނުންކުރައްވާށެވެ.

އެޕް އިންސްޓޯލްކޮށް ލޮގިން ކުރުމުން ފުރަތަމަ ސަފްހާއިން މިހާރު ވެސް ވަރަށް ގިނަ މަޖައްލާތަކާއި ފޮތްތައް ކިޔާލެވޭ ގޮތަށް އެބަހުއްޓެވެ. އެޕްގެ މައި ސަފްހާގެ އެންމެ މަތިން ފެންނަނީ ފޮތްތައް ފިލްޓަރ ކުރެވޭނެ އެކި ބާވަތްތަކެވެ. އަދި ފޮތްތަކާއި މަޖައްލާތައް ވަކިން ލިސްޓުކުރެވިފައިވާ ބައިތައް އޭގެ ތިރީގައި ހިމެނެއެވެ. މީގެ އިތުރުން ގަންނަން ލިބޭނެ ފޮތްތަކާއި މަގުބޫލު ފޮތްތައް ވަކިން ފެންނަ ގޮތަށް ފޮތްތައް ވަނީ ލިސްޓުކުރެވިފައެވެ.

މިހާރުވެސް މިޕްލެޓްފޯމްގައި އައްޑަނަ، ހިދާޔަތުގެ އަލި، ދަރުމަ، ދިއިސްލާމް، ފަތްތޫރަ، ޖަމާއަތުގެ ހަބަރު ފަދަ މަޖައްލާތައް ހިމެނިފައިވެއެވެ. އަދި ކުރީގެ ބައެއް މަޖައްލާތަކުގެ އަދަދުތައް ވެސް ހިލޭ ކިޔާލެވެން އެބަހުއްޓެވެ. އޭގެ ތެރޭގައި އެސަންދާނު، އައްޑުވަސް، ސަންގު، ހުކުރު، އަލްއިސްލާހް ފަދަ މަޖައްލާތައް ހިމެނެއެވެ.

ތަފާތު މައުލޫއުތަކަށް ލިޔެފައިވާ ވާހަކަ ފޮތާއި، ބަޔޮގްރަފީ އާއި މައުލޫމާތު ފޮތްތައް މިހާރުވެސް ޕްލެޓްފޯމް މެދުވެރިވެ ކިޔާލެވޭގޮތަށް ލިބެން އެބަހުރިއެވެ. މީގެ ބައެއް ފޮތްތަކަކީ ފޮތް ލިޔުންތެރިންނާއި ގުޅިގެން ވިއްކުމަށް ޖަހާފައިވާ ފޮތްތަކެވެ. ވިއްކުމަށް ހުޅުވާލާފައިވާ ފޮތްތައް ގަތުމަށާއި ފަސޭހައިން އޮންލައިންކޮށް ފައިސާ ދައްކާލުމުގެ އެހީއެއްގެ ގޮތުން މިއެޕްލިކޭޝަން ވަނީ ބީއެމްއެލް ޕޭމަންޓް ގޭޓްވޭއާއި އިންޓަގްރޭޓްކޮށްފައެވެ.

ކިޔަން ބޭނުންވާ ފޮތެއް ނުވަތަ މަޖައްލާއެއް އިހްތިޔާރުކުރުމަށްފަހު، ފޮތުގެ ބޭރުގަނޑާއެކުގައި ހިމެނިފައިވާ "ފޮތް ކިޔާލާ" ބަޓަން ބޭނުންކޮށްގެން ފޯނު ނުވަތަ ޓެބްލެޓަށް ޑައުންލޯޑްކޮށް މިއެޕްލިކޭޝަންގެ ތެރެއިން އޮންލައިކޮށް ފޮތް ކިޔާލެވެއެވެ. މިއެޕްލިކޭޝަނުގައި ހިމެނޭ ފޮތްތައް ހުންނަނީ ސްކްރީންޝޮޓް ނުނެގޭ ގޮތަށް އަދި އެހެން މީހުންނާއި ހިއްސާނުކުރޭނެ ގޮތަށް ރައްކާތެރި ކުރެވިފައެވެ. މިއީ ފޮތް ލިޔުންތެރިންގެ ރައްކާތެރިކަމަށް ފައިދާ ހުރި ފީޗަރއެކެވެ.

އެޕްލިކޭޝަން ތައްޔާރުކުރެވިފައިވަނީ ފޮތުގެ ބާވަތުން ނުވަތަ ފޮތުގެ ނަން ޖަހައިގެން ފޮތް ހޯދާލެވޭ ގޮތަށެވެ. އަދި އެޕް ބޭނުންކުރާ ފަރާތުން ޑައުންލޯޑްކޮށްފައިވާ ފޮތްތައް ވަކިން ބަލާލެވޭ ގޮތަށް "މަގޭ ފޮތް" ނަމުގައިވާ ބައެއް މެނޫގައި ހިމެނިފައިވެއެވެ.

"ދިވެހިފޮތް" އެޕްގެ ޑިވެލޮޕަރ މުހައްމަދު ޖައިލަމް މައުލޫމާތު ދެއްވި ގޮތުގައި މިއެޕްލިކޭޝަން އުފެއްދުމުގެ އެއް މަގުސަދަކީ ދިވެހި ފޮތާއި މަޖައްލާ ޒަމާނީ ވަސީލަތްތައް ބޭނުންކޮށްގެން ފަސޭހަކަމާއެކު ކިޔުންތެރިންނާއި ހަމައަށް ގެނެސްދިނުމެވެ. އޭގެ އިތުރުން ޤަދީމީ ފޮތްތަކާއި ލިޔެކިޔުން އާކައިވްކޮށް ރައްކާތެރިކޮށް އެއް މަންސައަކުން ލިބޭނެ ގޮތް ފަހިކޮށް ދިނުމަކީ ވެސް މިމަސައްކަތުގެ މުހިއްމު ބޭނުމެކެވެ.

މިއެޕްލިކޭޝަންއަކީ ލިޔުންތެރިންނަށް އެމީހުންގެ ފޮތްތައް އޮންލައިންކޮށް ވިއްކައިގެން އާމްދަނީ ހޯދުމަށް ލިބިގެންދާނެ ފުރުސަތެކެވެ. މިއެޕްލިކޭޝަން ބޭނުންކުރުމަށް އެއްވެސް އިޝްތިރާކެއް ނުވަތަ ފީއެއް ދައްކާކަށް ނުޖެހެއެވެ. މިއެޕްލިކޭޝަން ތަރައްގީކޮށް ހިންގުމަށް އާމްދަނީ ހޯދަނީ އެޕްލިކޭޝަން މެދުވެރިކޮށް ވިކޭ ފޮތްތަކުން ކޮމިޝަން ނަގައިގެން ކަމަށް ޖައިލަމް މައުލޫމާތު ދެއްވިއެވެ.

މިފަދައިން އިލެކްޓްރޯނިކްކޮށް ފޮތް ޝާއިއުކުރާ ޕްލެޓްފޯމްތަކުން ގިނަ ފައިދާތަކެއް ލިޔުންތެރިންނަށާއި ކިޔުންތެރިންނަށް ލިބިގެންދެއެވެ. އެޕްގެ ސަބަބުން ފޮތް ލިޔުންތެރިންނަށް ފޮތް ޝާއިއުކުރަން ވަރަށް ފަސޭހަ ވެގެންދެއެވެ. މިފަދަ ޕްލެޓްފޯމް މެދުވެރިވެ ހަމައެކަނި ޑިޖިޓަލްކޮށް ފޮތް ޝާއިއު ކުރުމަށް ވެސް ލިޔުންތެރިންނަށް މަގުފަހިވެގެންދެއެވެ. އަދި މިހާރުވެސް ފިޒިކަލްކޮށް ލިބެން ހުރި ފޮތްތައް ފަސޭހައިން ޑިޖިޓަލް ފޯމެޓަށް ބަދަލު ކޮށްލާ އާމްދަނީ ހޯދުމަށް އެހީތެރިވެދޭނެއެވެ. މީގެ އިތުރުން ކިޔުންތެރިންނަށް ދުނިޔޭގެ ކޮންމެ ތަނެއްގައި ހުރެގެންވެސް ފަސޭހަކަމާއެކު ދިވެހިފޮތް ކިޔާލުމުގެ ފުރުސަތު ލިބިގެންދާނެއެވެ.

މިއެޕްލިކޭޝަން މެދުވެރިވެ ފޮތް ޝާއިއުކުރުމަށް ޝައުގުވެރިވާ ފަރާތްތަކުން ނުވަތަ އިތުރު މައުލޫމާތު ހޯދުމަށް ބޭނުންވާ ފަރާތްތަކުން އެޕްގައި ހިއްސާކުރެވިފައިވާ ނަންބަރު 7585289 ގުޅުއްވައިގެން ސާފުކުރެއްވުމަށް ޑިވެލޮޕަރު އެދެއެވެ.