ކޮމްޕްލެކްސް ޕާސްވޯޑްތަކުން ރައްކާތެރިކަން ވަނީ ކުޑަ!

ޕާސްވޯޑްތަކަކީ މިހާރު އަހަރެމެންގެ އާންމު ދިރިއުޅުމުގެ ބަޔަކަށް ވަނީ ވެފައެވެ. އަހަރުމެންގެ ތެރެއިން ކޮންމެ މީހަކު، ކޮންމެ ދުވަހަކު ވެސް ބޭނުންކުރާ އެތައް ޕްލެޓްފޯމްތަކަކާއި އޮންލައިން އެޕްލިކޭޝަންތަކެއްގައި އެތައް ޕާސްވޯޑްތަކެއް ގެންގުޅެންޖެހެއެވެ. އޭގެ ތެރޭގައި ސޯޝަލް މީޑިއާ އެކައުންޓްތަކާއި، ބޭންކާއި ފައިސާއާއި ގުޅޭ އެޕްލިކޭޝަންތަކާއި، އޮފީހުގެ ކޮމްޕިޔުޓަރ ސިސްޓަމާއި، ޑޮމެއިންނާއި އީމެއިލްއާއި މިފަދަ އެހެން ބައިވަރު އެކައުންޓްތަކެއް ހިމެނެއެވެ. މިޕާސްވޯޑްތައް ވެގެން ދަނީ އަހަރުމެންގެ މަސައްކަތަށާއި މުނިފޫހިފިލުވުމަށް ބޭނުންކުރާ އެކި އެޕްލިކޭޝަންތަކެއްގެ ރައްކާތެރި ކުރުމަށް އޮންނަ ތަޅުދަނޑިއަށެވެ.

އެކައުންޓްތަކުގެ އަދަދު އިތުރުވެގެންދާ މިންވަރަކަށް މިޕާސްވޯޑުތައް ހަނދާންކުރުމާއި އެކައުންޓްތައް ރައްކާތެރިކަމާއި އެކު ބެހެލެއްޓުން ވަނީ ވޭނަކަށެވެ. މަސައްކަތުގައި ބޭނުންކުރާ އެންމެ އެކައުންޓަކަށް ވިސްނާލަމާތޯއެވެ. ކޮމްޕްލެކްސް ޕާސްވޯޑެއް ސެޓް ކުރުމަށް ފަހު، ހަނދާނުގައި ބެހެއްޓުމަށްޓަކައި، ފުރަތަމަ އައު ކޮޅު އަހަރުމެންގެ ތެރެއިން ގިނަ މީހުން ހަދާނެ ގޮތަކީ ޕާސްވޯޑު އެއްޗެއްގައި ލިޔާނީއެވެ. ގިނަ ފަހަރަށް ޕާސްވޯޑު ބޭނުންކުރަން ފެށުމުން ހަނދާނުގައި ހަމަ ހަރުލާ އިރަށް އިރުކޮޅަކުން ސައިބަރ ސެކިޔުރިޓީގެ ނަމުގައި އޮފީހުގެ ޕާސްވޯޑު ޕޮލިސީގެ ދަށުން ކުރިން ކުރި ހުރިހާ ކަމެއް ހަނދާން ނައްތާލާފައި އައު ޕާސްވޯޑެއް ސެޓް ކުރަންޖެހެއެވެ. އައު ޕާސްވޯޑެއް ސެޓްކޮށްފައިވެސް ދެން އާދައިގައި ހަރުލާފައިވާ ގޮތަށް ޖަހާނީ ކުރީގެ ޕާސްވޯޑެވެ. މިގޮތަށް ގިނަ އެކައުންޓްތަކަކަށް ތަކުރާރު ކުރަން ޖެހުމުން ބޮލުގައި ރިއްސާނޭ ވަރު ވިސްނާލާށެވެ.

ބައެއް މީހުން ފަސޭހަ ވާނެކަމަށް ޕާސްވޯޑު މެނޭޖަރެއް ބޭނުންކޮށްފާނެއެވެ. އެހެން ނަމަވެސް ޕާސްވޯޑް މެނޭޖަރެއް މެނޭޖުކުރުމަކީ ވެސް ފަސޭހަ ކަމަކަށް ނުވެއެވެ.

މިއީ ޕާސްވޯޑު މެނޭޖުކުރަން އެންމެ ރަނގަޅު ގޮތްތަ؟

ޕާސްވޯޑުގެ ރައްކާތެރިކަން އިތުރު ކުރަން ބޭނުންވާނަމަ، ކުރިން ދެންނެވުނު ކޮންމެ އެކައުންޓަކަށް ހާއްސަކުރާ ކޮންމެ ޕްލެޓްފޯމެއްގައި ލަފާދޭ ފަދައިން ކެޕިޓަލް އަކުރާއި، ނަންބަރާއި ހާއްސަ ކެރެކްޓަރ ހިމަނައިގެން ތަފާތު އެތައް ޕާސްވޯޑުތަކެއް އަަހަރުމެން ހަނދާނުގައި ބަހައްޓަން ޖެހެއެވެ. އަދި ހަމަ ރައްކާތެރިކަން އިތުރަށް ކަށަވަރު ކުރުމަށް އެޕްލެޓްފޯމްތަކުން އަަހަރުމެންނަށް ލަފާދެނީ އަވަސް އަވަހަށް ޕާސްވޯޑު ބަދަލުވެސް ކުރުމަށެވެ.

މިފަދައިން އަކުރާއި ނަންބަރާއި ހާއްސަ ކެރެކްޓަރ އެކުލެވޭހެން ޖެނެރޭޓްކުރާ ޕާސްވޯޑުތަކާއި އަދި ގަވާއިދުން ޕާސްވޯޑް ބަދަލުކުރުމަކީ މިހާރު ޕާސްވޯޑް މެނޭޖުކުރުމަށް އެންމެ ރަނގަޅު ގޮތެއް ނޫން ކަމަށް ތަޖުރިބާ ކާރުން ބުނެއެވެ.

އެމެރިކާގެ ނޭޝަނަލް އިންސްޓިޓިއުޓް އޮފް ސްޓޭންޑަރޑްސް އެންޑް ޓެކްނޮލޮޖީ (އެންއައިއެސްޓީ) އިން މިއަހަރުގެ ސެޕްޓެމްބަރު މަހު ޕަބްލިޝްކޮށްފައިވާ އައު ޑިޖިޓަލް އައިޑެންޓިޓީ ގައިޑްލައިނެއްގައި ބުނާގޮތުން ޕާސްވޯޑުގެ ރައްކާތެރިކަމަށް ކުރިން ގެންގުޅޭ އުސޫލުތައް މިހާރު ބަދަލު ކުރަންޖެހެއެވެ. މީގެ ތެރޭގައި ހިމެނެނީ ކޮމްޕްލެކްސިޓީ އިތުރުކުރުމަށް ގެންގުޅޭ އުސޫލުތަކާއި އަވަސް އަވަހަށް ޕާސްވޯޑު ބަދަލުކުރުމުގެ އުސޫލުތަކެވެ. އެންއައިއެސްޓީއަކީ އެމެރިކާގެ ސަރުކާރުގެ އިދާރާތަކާއި ސްޓޭންޑަޑްސް އޯގަނައިޒޭޝަންތަކާއި އަމިއްލަ ކުންފުނިތައް އަމަލުކުރަންޖެހޭ ޑިޖިޓަލް އުސޫލުތައް ކަނޑައަޅާ ފެޑެރަލް އިދާރާއެވެ.

ކެޕިޓަލް އަކުރާއި ސިމްޕަލް އަކުރާއި ނަންބަރާއި ހާއްސަ ކެރެކްޓަރ އެކުލެވޭ ޕާސްވޯޑުތައް ބޭނުންކުރުމަކީ އެތައް އަހަރުތަކެއް ވަންދެން އަހަރުމެން ބަލައިގަންނަމުން އަންނަ ކޮންވެންޝަނަލް ގޮތެވެ. އަދި ގިނަ ބަޔަކު ގަބޫލު ކުރަމުން އަންނަނީ މިއީ އެންމެ ރައްކާތެރި ގޮތް ކަމަށެވެ. އޭގެ ފަހަތުގައިވާ ހިކުމަތަކީ މިފަދައިން ޖެނެރޭޓް ކުރާ ޕާސްވޯޑުތަކަކީ އެހެން މީހުންނަށް ދެނެގަން އުނދަގޫވާނެ ކޮމްޕްލެކްސް ޕާސްވޯޑުތަކަކަށް ވާނެތީ، ބްރޫޓް ފޯސް ފަދަ އުކުޅުތައް ބޭނުންކޮށްގެން ޕާސްވޯޑްތައް ބްރޭކް ކުރަން ދަތިވާނެކަމަށް ބެލެވުމެވެ.

އެހެން ނަމަވެސް މިގޮތަށް ކޮމްޕްލެކްސް ޕާސްވޯޑު ޖެނެރޭޓްކުރަން އެޕްލިކޭޝަންތަކުން މަޖުބޫރު ކުރުމުން އާންމުކޮށް އެތަކެތި ބޭނުންކުރާ މީހުން ފަސޭހައިން ހަނދާނުގައި ބެހެއްޓުމުގެ ބޭނުމުގައި ޖެނެރޭޓް ކުރަނީ ޕާސްވޯޑުގެ މިންގަނޑަށް ކިރިޔާ ފެތޭ P@ssw0rd123 ފަދަ އާދައިގެ ޕާސްވޯޑުތަކެވެ. އެންއައިއެސްޓީއިން ބުނާގޮތުގައި މީހުން ޖެނެރޭޓްކުރާ މިފަދަ ޕާސްވޯޑުތައް ހިމެނޭ ގިނަ ޑޭޓާތަކެއް ދިރާސާކުރުމަށްފަހު ފާހަގަވަނީ، ޕާސްވޯޑު ޖެނެރޭޓްކުރުމުގައި ކޮމްޕްލެކްސިޓީއަށް ފޯކަސް ކުރުމަކީ ރައްކާތެރިކަމަށް ނޭދެވޭ ނަތީޖާ ނިކުންނަ ކަމެއް ކަމަށާއި ހަގީގަތުގައި އެއީ ސެކިއުރިޓީ ބަލިކަށިވާ ކަމެއް ކަމަށެވެ.

އެންއައިއެސްޓީގެ އައު ޑިޖިޓަލް އައިޑެންޓިޓީ ގައިޑްލައިންގައި ބާރު އަޅަނީ ކޮމްޕްލެކްސް ޕާސްވޯޑު ޖެނެރޭޓް ކުރުން ހުއްޓުވުމަށާއި، ދިގު ޕާސްވޯޑުތައް ޖެނެރޭޓްކުރުމަށެވެ. އޭގެ ފަހަތުގައި ހިމެނޭ ސަބަބުތަކެއްގެ ގޮތުގައި އެއިދާރާއިން ފާހަގަކޮށްފައިވާ ބައެއް ކަންތައްތަކަށް ބަލާލާނަމެވެ.

ޕާސްވޯޑު ޖެނެރޭޓް ކުރުމުގައި މީހުން ގެންގުޅޭ އާދަ

ދިރާސާތަކުން ދައްކާގޮތުގައި ކޮމްޕްލެކްސް ޕާސްވޯޑު ޖެނެރޭޓްކުރުމަކީ އާންމުކޮށް ގިނަ މީހުންނަށް އުނދަގޫކަމެކެވެ. އެހެން ކަމުން ގިނަ މީހުން ކަންތައްކުރާ ގޮތަކީ ކޮމްޕްލެކްސް އެއް ޕާސްވޯޑު ޖެނެރޭޓްކޮށްފައި ތަކުރާރުކޮށް އެ ޕާސްވޯޑު ހުރިހާ ނުވަތަ ގިނަ އެކައުންޓްތަކެއްގައި ބޭނުންކުރަނީއެވެ. ނުވަތަ ދެން ގިނަ މީހުން ޕާސްވޯޑު ޖެނެރޭޓްކުރުމުގައި އާދައަކަށް ވަނީ އަކުރެއްގެ ބަދަލުގައި އެއާއި އެއްވައްތަރުގެ ނަންބަރެއް ޖަހާ (މިސާލަކަށް: E ޖަހަން ބޭނުންވާ ތަނުގައި 3 ޖެހުން) ކޮމްޕްލެކްސް ޕާސްވޯޑެއް ޖެނެރޭޓް ކުރަނީއެވެ. މިހެން ހެދުމުން އެހެން މީހުންނަށް ޕާސްވޯޑު ފަސޭހައިން ލަފާކުރެވެއެވެ.

މިއާދަ އަދި އިތުރަށް ގޯސްވާ އަނެއް ސަބަބަކީ ގިނަ ޕްލެޓްފޯމްތަކުގައި އެކުލެވޭ ކޮންމެ 60 ނުަވަތަ 90 ދުވަހަކުން ޕާސްވޯޑް ބަދަލުކުރަން ޖެހޭ ޖެހުމެވެ. އެންއައިއެސްޓީގެ އައު ގައިޑްލައިންގައި މިކަމަކީ ވެސް މިހާރު ހުއްޓާލުމަށް ލަފާދޭ ކަމެކެވެ.

ޕާސްވޯޑު ޖެނެރޭޓް ކުރެވޭ މިންވަރު

ކޮމްޕްލެކްސް ޕާސްވޯޑު ޖެނެރޭޓް ކުރުމުގެ އެއް ބޭނުމަކީ ޕާސްވޯޑެއް ޖެނެރޭޓް ކުރުމަށް އަހަރުމެންނަށް ބޭނުންކުރެވޭނެ އަކުރުތަކާއި ނަންބަރުތަކާއި ކެރެކްޓަރތައް ބޭނުންކޮށްގެން ގިނަ އަދަދަކަށް ޕާސްވޯޑު ޖެނެރޭޓް ކުރުމަށް މަގުފަހިވާތީއެވެ. ބޭނުންކުރެވޭ ކެރެކްޓަރތައް އިތުރުވީ މިންވަރަކަށް ޕާސްވޯޑު އިތުރަށް ކޮމްޕްލެކްސް ކުރެވެއެވެ. އަދި އޭގެ ސަބަބުން ޕާސްވޯޑު ބްރޭކްކުރަން އިތުރަށް އުނދަގޫވެއެވެ.

ކޮމްޕްލެކްސިޓީގެ ސަބަބުން ގިނަ އަދަދަކަށް ޕާސްވޯޑު ޖެނެރޭޓް ކުރެވުނު ނަމަވެސް، ޕާސްވޯޑުގެ ދިގުމިނަކީ މިކަމުގައި އިތުރަށް ބޮޑު ދައުރެއް އަދާކުރާ އެއްޗެކެވެ. ގިނަ އަކުރުތައް ހިމަނައިގެން ޕާސްވޯޑު އެކުލެވުމުން ޕާސްވޯޑު ކޮމްބިނޭޝަންތައް އިތުރުކޮށްދީ ބޮޑު ތަނުން ޔުނީކް ޕާސްވޯޑު ޖެނެރޭޓް ކުރެވޭ މިންވަރު އިތުރުކުރެވެއެވެ. ނަންބަރާއި ހާއްސަ ކެރެކްޓަރ ނުހިމަނާ ހަމައެކަނި އާދާއިގެ އަކުރުތަކުން ޖެނެރޭޓް ކުރާ ދިގު ޕާސްވޯޑުތައް އެހެން ބަޔަކަށް ބްރޭކްކުރަން އަދި މާ އުނދަގޫވެއެވެ.

އިންސާނުންނަށް ހަނދާންކުރަން ފަސޭހަކުރުން

އެންއައިއެސްޓީއިން ބުނާގޮތުގައި ހަމައެކަނި އާދައިގެ ކެރެކްޓަރ ބޭނުންކުރާ ދިގު ޕާސްވޯޑް ފަސޭހައިން ހަނދާން ކުރެވޭނެއެވެ. ގިނަ އާންމު ބަސްތަކެއް އެއްކޮށްލައިގެން ޕާސްފްރޭސްއެއް ހެދުމުން ހަނދާންކުރަން ފަސޭހަވެއެވެ. މިސާލަކަށް މަލުގެ ކުލައާއި ނަން ހިމެނޭ، ރެޑް ރޯސް އޮރެންޖް ކާނޭޝަން ޔެލޯ ސަންފްލާވަރ ޕަރޕަލް އޯކިޑް ފަދަ އާދައިގެ ހަނދާންކުރަން ފަސޭހަ ބަސްތަކެއް ސްޕޭސްތައް ނުލާ ޕާސްވޯޑަކަށް ހަދާލުމުން redroseorangecarnationyellowsunflowerpurpleorchid ވެގެންދާނީ ދިގު ބްރޭކްކުރަން އުނދަގޫ ރައްކާތެރި އަދި ހަނދާން ކުރަން ފަސޭހަ ޕާސްވޯޑަކަށެވެ.

މިފަދައިން ޕާސްވޯޑް ޖެނެރޭޓް ކުރުމުން ގިނަ އަދަދަކަށް ޕާސްވޯޑު ކޮމްބިނޭޝަން ޖެނެރޭޓް ކުރެވުން، ދިގުވުން އަދި ފަސޭހައިން ހަނދާން ކުރެވުން މި 3 ކަމުގެ ބެލެންސެއް އެކުލަވާލެވޭނެއެވެ. އަދި މިހާރު މީހުންގެ އާދަ ހުންނަ ފަދައިން ޕާސްވޯޑު ހަނދާކުރަން ތަންތަނުގައި ޕާސްވޯޑު ލިޔެ ސޭވްކުރާކަށް ވެސް މަޖުބޫރެއް ނުވާނެއެވެ.

ދިގު ޕާސްވޯޑު ޖެނެރޭޓް ކުރެވުން

ކޮމްޕްލެކްސް ޕާސްވޯޑު ޖެނެރޭޓްކުރަން ގިނަ އަކުރުތަކާއި ނަންބަރު އަދި ކެރެކްޓަރ ބޭނުންކުރުމުގެ ސަބަބުން ގިނަ އަދަދަކަށް ޕާސްވޯޑު ޖެނެރޭޓް ކުރެވުނު ނަމަވެސް، ޕާސްވޯޑުގެ ދިގުވީ މިންވަރަކަށް ވެސް ޕާސްވޯޑު ޖެނެރޭޓް ކުރެވޭ މިންވަރު އިތުރުކުރެވެއެވެ. ޕާސްވޯޑު ދިގުވީ މިންވަރަކަށް އަކުރުތަކުގެ ކޮމްބިނޭޝަން ގިނަކުރެވި، ޕާސްވޯޑު ބްރޭކްކުރަން އުނދަގޫވެއެވެ.

ފަހުގެ ކޮމްޕިޔުޓަރތަކަކީ ކޮމްޕިޔުޓިންގ ބާރު ވަރުގަދަ ތަކެތި ކަމުން ހެކްކުރާ ބަޔަކަށް ކޮމްޕްލެކްސް ވިޔަސް ކުރު ޕާސްވޯޑުތައް ބްރޭކްކުރަން އުނދަގުލެއް ނުވެއެވެ. ނަމަވެސް ބާރުގަދަ އެލްގޮރިދަމްތަކަށް ވެސް ޕާސްވޯޑު ދިގުވި މިންވަރަކުން އެ ބްރޭކްކުރަން އުނދަގޫވެއެވެ. އެއީ ދިގު ޕާސްވޯޑު ބޭނުންކުރާ ހާލަތުގައި ޕާސްވޯޑު ކޮމްބިނޭޝަންތައް އެތައް ހާސް ގުނައަކަށް އިތުރުވެގެންދާތީއެވެ.

މިސާލަކަށް 4 ކެރެކްޓަރގެ ޕާސްވޯޑެއް 6 ކެރެކްޓަރގެ ޕާސްވޯޑަކަށް ބަދަލުކޮށްލައިފި ނަމަވެސް ރައްކާތެރިކަން އެތައް ގުނައަކަށް އިތުރުވެއެވެ. އެންމެ 2 ކެރެކްޓަރ އިތުރުކޮށްލައިގެން 10،000 ކޮމްބިނޭޝަނުން 1 މިލިއަން ކޮމްބިނޭޝަނަށް އިތުރުކޮށްދެއެވެ. އެހެން ކަމުން ޕާސްވޯޑު ދިގުވި މިންވަރަކަށް އިތުރަށް ރައްކާތެރިވެއެވެ. އެންއައިއެސްޓީގެ އައު ގައިޑްލައިންގައި 64 ކެރެކްޓަރ އާއި ހަމައަށް ޕާސްވޯޑު ދިގުކުރުމަށް ލަފާދެއެވެ.

ހަމައެކަނި ސިމްޕަލް އަކުރުތައް އެކަނި ބޭނުންކޮށްގެން ޖެނެރޭޓް ކުރާ 64 ކެރެކްޓަރގެ ޕާސްވޯޑެއް ބްރޭކްކުރަން ވަރަށް އުނދަގޫވާނެއެވެ. އަދި އޭގެ ތެރެއަށް ކެޕިޓަލް އަކުރުތަކާއި ނަންބަރުތަކާއި ހާއްސަ ކެރެކްޓަރ އިތުރުކޮށްފިނަމަ، އެފަދަ ޕާސްވޯޑެއް ބްރޭކްކުރުމަކީ ކުޅަދާނަ ކަމަކަށްވެސް ނުވެދާނެއެވެ.

ކޮންމެއަކަސް، އެންއައިއެސްޓީ އިން ޕާސްވޯޑު އުސޫލު މިގޮތަށް ބަދަލުކުރުމުގެ ފަހަތުގައިވާ މައިގަޑު ސަބަބަކީ ކޮމްޕްލެކްސް ޕާސްވޯޑް އެކުލަވާލާ އަދި ގިނަގިނައިން އެބަދަލުކުރަން މަޖުބޫރުވެއްޖެނަމަ، ހަނދާނުގައި ބެހެއްޓުމަށް ފަސޭހައަކަށް މީހުން ސެޓްކުރާ ޕާސްވޯޑުތަކަކީ ރައްކާތެރިކަން ކުޑަ އެއްޗަކަށް ވެގެން ދިޔުމުގެ ޗާންސްބޮޑުވުމެވެ.

ދެން އޮތް ސުވާލަކީ މިބަދަލަށް އަމަލުކުރަނީ ކޮންއިރަކުންތޯއެވެ؟ ދާއިރާގައި މަސައްކަތް ކުރާ ފަރާތްތަކުގެ ހިޔާލު ހުރި ގޮތަކީ އެމެރިކާގެ ސަރުކާރު އިދާރާތަކުގައި އަވަސް ފުރުސަތެއްގައި މިއުސޫލަށް އަމަލު ކުރަން ފަށާފާނެކަމަށެވެ. އެހެން ނަމަވެސް ޕްރައިވެޓް ކުންފުނިތަކުގައި މިއުސޫލު ހިންގަން އަދި ވަގުތު ނަގާނެކަމަށްވެއެވެ. މިކަމުގައި އަދި އިތުރު ގޮންޖެހުމެއް ގޮތުގައި ގިނަ ފަރާތުން ފާހަގަކުރަނީ، ގިނަގިނައިން ޕާސްވޯޑް ބަދަލުކުރުމާއި ކޮމްޕްލެކްސް ޕާސްވޯޑުތަކުގެ ރައްކާތެރިކަމާއި ގުޅިގެން މިހުރިހާ ޒަމާނުއްސުރެ އޮތް މީހުންގެ ނަޒަރިއްޔާތު ބަދަލު ކުރުމަކީ ދަތިކަމަކަށް ވާނެތީ މިކަމަށް އަދި ވަގުތު ނަގާނެކަމަށެވެ. މަސައްކަތުގެ މާހައުލުގައާއި އެހެނިހެން އެޕްލިކޭޝަންތަކުގައިވެސް އަހަރުމެންގެ މައުލޫމާތުގެ ރައްކާތެރިކަން އިތުރުކޮށްދޭ ކޮންމެ ކަމަކަށް އަހަރުމެން ވަރަށް މަރުހަބާ ކިޔަމެވެ.