ނ. އަތޮޅު ކައުންސިލްގެ "ޑިޖިގަވް ސަމިޓް 2024" ނ. މަނަދޫގައި

ނޫނު އަތޮޅު ކައުންސިލުން އިންތިޒާމްކޮށްގެން "ޑިޖިގަވް ސަމިޓް 2024"ގެ ނަމުގައި އިވެންޓެއް ބޭއްވުމަށް ދަނީ ތައްޔާރުވަމުންނެވެ. މިސަމިޓް ބޭއްވުމަށް ހަމަޖެހިފައިވަނީ ޑިސެމްބަރު 28 އިން 30 އަށް ނ. މަނަދޫގައެވެ. ނޫނު އަތޮޅު ކައުންސިލުން މައުލޫމާތު ދެއްވާ ގޮތުގައި މިސަމިޓު ކުރިއަށް ގެންދަނީ ސަރުކާރުގެ ހިދުމަތްތައް ފޯރުކޮށްދިނުމަށް ބޭނުންކުރާ ޑިޖިޓަލް ސޮލިޔުޝަންތަކަށް އަލިއަޅުވާލާ، މިފަދަ މަސައްކަތްތައް ކުރާ ފަރާތްތަކުގެ މެދުގައި ގުޅުން ބަދަހިކޮށް ހިޔާލު ބަދަލު ކުރުމުގެ މަގުސަދުގައެވެ. މިސަމިޓުގައި ޑިޖިޓަލް އިނޮވޭޝަންތަކުގެ ބޭނުންކޮށްގެން ރައްޔިތުން ބާރުވެރިކުރުމާއި، ލޯކަލް ގަވަރނަންސް ކުރިއެރުވުމާއި، މޫސުމީ ބަދަލުތަކުން ދިމާވާ މައްސަލަތަކަށް ޑިޖިޓަލް ހައްލުތައް ހޯދުމަށް ކުރެވޭ މަސައްކަތްތަކަށް އަލިއަޅުވާލާނެއެވެ.

މިސަމިޓުގައި ސަރުކާރުގެ ޕޮލިސީ އެކުލަވާލާ ފަރާތްތަކާއި ރައްޔިތުންނަށް ފޯރުކޮށްދޭ ހިދުމަތުގެ ފެންވަރު ރަނގަޅުކުރުމަށް އީޖާދީ އުފެއްދުންތައް އުފައްދާ ފަރާތްތަކާއި މިދާއިރާގައި އިޖުތިމާއީ މަސައްކަތް ކުރާ އިސްފަރާތްތައް އެއްތަނަކަށް އެއްވެ ރާއްޖޭގެ ޑިޖިޓަލް ގަވަރނަންސް ލޭންޑްސްކޭޕް ތަރައްގީ ކުރެވޭނެ އެންމެ ޒަމާނީ ޑިޖިޓަލް ޓޫލްތަކާއި އުފެއްދުންތައް އުފެއްދުމާއި ސްޓްރެޓެޖީތައް ކަނޑައެޅުމާއި ގުޅޭގޮތުން މަޝްވަރާކުރެވޭނެއެވެ.

ހަލުވިކަމާއެކު ތަރައްގީވަމުން އަންނަ ޑިޖިޓަލް ޒަމާނެއްގައި މޫސުމަށް އަންނަ ބަދަލުތަކާއި ގުޅިގެން ކުރިމަތިވާ ގޮންޖެހުންތަކުން އަރައިގައިގަތުމަށް ވެސް އޮތް އެންމެ މުހިއްމު އެއް ގޮތަކީ އިނޮވޭޓިވް އުފެއްދުންތައް ކަމަށްވާތީ، މިސަމިޓުގައި މިކަމަށްވެސް ހާއްސަ ގޮތެއްގައި ބަލާލާނެއެވެ.

މިހާތަނަށް ސަމިޓުގެ ބައިވެރިންގެ ތެރޭގައި ވިމެން އިން ޓެކް މޯލްޑިވްސް، ވިޝުއަލް ޕްރޮޕެގެންޑާ، މޯލްޑިވްސް އައިޖީއެފް، މޯލްޑިވްސް ސްޕޭސް ރިސަރޗް އޮގަނައިޒޭޝަން، ޓްރޭޑްނެޓް މޯލްޑިވްސް، ވަންގަވް، ޖަވާބު، ޖަޒީރާ ހޮސްޕިޓާލިޓީ އަދި ޕައި ނެޓްވޯކްސް ހިމެނެއެވެ.

ތިން ދުވަހުގެ މުއްދަތަށް ކުރިއަށްދާ މިސަމިޓުގައި ކުރިއަށް ދާނެ ބައެއް ހަރަކާތްތަކުގެ ތަފްސީލަށް ބަލާލާނަމެވެ.

ނޫނު އަތޮޅު ކައުންސިލްގެ ރައީސް މުހައްމަދު ބަޝީރު ދެއްވާ ކީނޯޓް ސްޕީޗެއް ސަމިޓުގެ ފުރަތަމަ ދުވަހަށް އެޖެންޑާ ކުރެވިފައިވެއެވެ. މިސްޕީޗުގައި ބަލާލާނީ ރައްޔިތުން ބައިވެރިވާ، ހާމަކަން ބޮޑު ގޮތެއްގައި ރައްޔިތުންނަށް ހިދުމަތް ދިނުމަށް ފޯކަސް ކުރާ ޑިޖިޓަލް ގަވަރނަންސް މޮޑެލްގެ މައްޗަށެވެ. މިމަސައްކަތުގައި ނޫނު އަތޮޅު ކައުންސިލްއަށް ދިމާވާ ގޮންޖެހުންތަކާއި އެކަންތައްތަކަށް ހައްލު ހޯދާ ގޮތްތަކާއި މިބަދަލުތަކުގެ ސަބަބުން ކައުންސިލަށް ލިބިފައިވާ ކުރިއެރުންތަކަށް މިސްޕީޗުގައި އަލިއަޅުވާލެއެވެ.

ޑިސެމްބަރު 28 އާއި 29، ދެ ދުވަހު ސަމިޓުގައި ބައިވެރިވާ އީޖާދީ އުފެއްދުންތައް އުފައްދާ ފަރާތްތަކުން، އެފަރާތްތަކުގެ ޕްރޮޑަކްސްތައް ދައްކާލާ އެތަކެއްޗާއި ބެހޭ މައުލޫމާތު ދިނުމުގެ ބައިތަކެއް ކުރިއަށް ދާނެއެވެ. މިއުފެއްދުންތައް އަމިއްލައަށް ތަޖުރިބާކޮށްލާ އިތުރު މައުލޫމާތު ހޯދުމަށް އާންމު ރައްޔިތުންނަށް ހުޅުވާލެވިގެން ހިންގާ ބައެއް ވެސް ސަމިޓުގެ ތެރެއިން ކުރިއަށް ދާނެއެވެ.

މީގެ ތެރޭގައި ނޫނު އަތޮޅު ކައުންސިލްގެ ޕަބްލިކް އެންގޭޖްމަންޓް ޕްލެޓްފޯމް ތައާރަފްކުރުން ފުރަތަމަ ދުވަހަށް އެޖެންޑާ ކުރެވިފައިވެއެވެ. މިއީ އަތޮޅުގެ ކުރިއެރުމަށް ރައްޔިތުންގެ ހިޔާލު ހުށަހެޅުމަށާއި ކައުންސިލުން ކުރާ މަސައްކަތްތަކާއި ބެހޭގޮތުން ރައްޔިތުންގެ ފީޑްބެކް ހޯދުމަށާއި ދާއިރާގެ ތަރައްގީއާއި ގުޅޭ މައުލޫމާތު ރައްޔިތުންނަށް ހިއްސާކުރުމަށް ބޭނުންކުރާ ޕްލެޓްފޯމެކެވެ. މިސެޝަން ކުރިއަށް ގެންދާނީ މިސަމިޓްގައި ބައިވެރިވާ ވިޝުއަލް ޕްރޮޕެގެންޑާ އަދި ނޫނު އަތޮޅު ކޮމްޕެނީއިންނެވެ.

މީގެ އިތުރުން 28 ވަނަ ދުވަހު ޕައި ނެޓްވޯކްގެ ފަރާތުން ހުށަހަޅާ މައިކްރޯސޮފްޓް ބިޒްނަސް ޕްރޮޑަކްސްއާއި ގުޅޭ ސެޝަންއަކާއި، މޯލްޑިވްސް ސްޕޭސް ރިސަރޗް އޮގަނައިޒޭޝަނުން ހުށަހަޅާ ގުދުރަތީ ވަސީލަތްތައް ބެލެހެއްޓުން ކުރިއެރުވުމަށް ޖީއައިއެސް އާއި ޖައްވީ ޓެކްނޮލޮޖީތައް ބޭނުންކުރުމާއި ގުޅޭ މައުލޫމާތު ދޭނެ ސެޝަންއެއް ރޭވިފައިވެއެވެ.

އަދި 29 ވަނަ ދުވަހުގެ އެޖެންޑާގައި ޖަވާބު ކުންފުނީގެ ފަރާތުން ހުށަހަޅާ އޭއައި ޓެކްނޮލޮޖީއަށް ފޯކަސް ކުރާ ސެޝަންއަކާއި ދިވެހި ޖީޕީޓީ އުފެއްދުމާއި މިޕްރޮޑްކްޓްގެ އެހީގައި ބަސް ކުރިއެރުވުމާއި، ބަހުގެ މުވާސަލާތާއި، ވީހާވެސް ގިނަ ބަޔަކަށް ދިވެހި ބަހަށް އަދި ޑިޖިޓަލް ޓެކްނޮލޮޖީއަށް އެކްސެސް ކުރުމަށް ކުރެވުނު މަސައްކަތްތަކާއި ބެހޭގޮތުން މައުލޫމާތު ދިނުމުގެ ސެޝަންއެއްވެސް ކުރިއަށް ދާނެއެވެ. މީގެ އިތުރުން ނޫނު އަތޮޅު ކައުންސިލުންދޭ ހިދުމަތްތައް ރަސްމީކޮށް ވަންގަވް ޕްލެޓްފޯމު މެދުވެރިވެ މިސަމިޓުގައި ފެށުމަށް ވެސް ވަނީ ހަމަޖެހިފައެވެ.

30 ވަނަ ދުވަހުގެ ހަރަކާތްތަކުގެ ތެރޭގައި ވިމެން އިން ޓެކް މޯލްޑިވްސް އިން ހުށަހަޅާ ސައިބަރ ސެކިޔުރިޓީއާއި މައުލޫމާތުގެ ރައްކާތެރިކަމާއި ގުޅޭ ސެޝަންއަކާއި ޑިޖިޓަލް ހިދުމަތްތައް އުފެއްދުމުގައި ހުރިހާ ރައްޔިތުންގެ (އަންހެނުންނާއި، އުމުރުން ދުވަސްވީ ފަރާތްތަކާއި ނުކުޅެދުންތެރިކަން ހުންނަ ފަރާތްތައް ހިމެނޭހެން) ބައިވެރިވުން އިތުރުކުރުމުގެ މުހިއްމުކަމާއި ގުޅޭ ސެޝަންއެއް ހިމެނެއެވެ. އަދި ޖަޒީރާ ހޮސްޕިޓާލިޓީއިން ކުރިއަށް ގެންދާ ކުދި އަދި މެދު ފަންތީގެ ކުންފުނިތަކުގެ މަސައްކަތްތައް ކުރިއެރުވުމަށް އީޖާދީ ޓެކްނޮލޮޖީ ބޭނުންކުރުމާއި ގުޅޭ ސެޝަންއަކާއި ނޫނު އަތޮޅު ކައުންސިލުގެ މީޓީން މެނޭޖްމަންޓް ސިސްޓަމާއި ގުޅޭ ސެޝަންއެއްވެސް ހިމެނެއެވެ.

ޑިސެމްބަރ 29 އަދި 30، ދެ ދުވަހު ލޯކަލް ކައުންސިލްތަކުން ރައްޔިތުންނަށް ފޯރުކޮށްދޭ ޚިދުމަތްތައް އިތުރަށް ރަނގަޅު ކުރުމަށް ހިޔާލު ބަދަލުކުރާ ސެޝަންތަކަކާއި އެމަސައްކަތަށް ބޭނުންވާ ވަސީލަތްތައްތަކާއި ބެހޭ ޓްރޭނިންގ ތަކެއް ވެސް ކުރިއަށްދާނެއެވެ.

މީގެ އިތުރުން މިސަމިޓުގެ ތެރޭގައި އިންޓަރެކްޓިވް ވޯކްޝޮޕްތަކާއި ޕެނަލް ޑިސްކަޝަންތަކެއްވެސް ކުރިއަށް ގެންދިޔުމަށް ވަނީ ރާވާފައެވެ. އަދި އީޖާދީ ޑިޖިޓަލްތައް އުފެއްދުމާއި މިދާއިރާ ކުރިއެރުވުމުގެ މަސައްކަތްތައް ކުރާ ގިނަ ފަރާތްތަކެއް އެއް ތަނަކަށް ޖަމާވެ ނެޓްވޯކްކުރުމުގެ ހަރަކާތްތަކެއްވެސް ކުރިއަށް ގެންދިޔުމަށް ރޭވިފައިވެއެވެ. މިބައިތަކުގެ ތެރެއިން ގިނަ ފަރާތްތަކެއްގެ މައުލޫމާތާއި، ހިޔާލު ބަދަލުކުރެވި، މިމަސައްކަތްތަކުގައި ގެންގުޅެވިދާނެ ބެސްޓް ޕްރެކްޓިސް ނުވަތަ އެންމެ ރަނގަޅު އުސޫލުތައް ހިއްސާކުރުމަށް ފުރުސަތު ލިބިގެންދާނެއެވެ.

ނޫނު އަތޮޅު ކައުންސިލްގެ ވެބްސައިޓްގައި މިސަމިޓާއި ގުޅޭ އިތުރު މައުލޫމާތުތައް ހިމެނިފައިވެއެވެ. ސަމިޓުގައި ބައިވެރިވުމަށް ބޭނުންވާ ފަރާތްތަކަށް ނޫނު އަތޮޅު މަނަދޫއަށް ދަތުރުކުރުމަށް އެހީއެއްގެ ގޮތުން ގުޅާނެ ބައެއް ފަރާތްތަކުގެ މައުލޫމާތު ވެސް ވެބްސައިޓުގައި ހިއްސާކޮށްފައިވެއެވެ. ޑިޖިޓަލް އިނޮވޭޝަންތަކުގެ އެހީގައި ހިދުމަތުގެ ފެންވަރު ރަނގަޅުކުރުމަށާއި މޫސުމަށް އަންނަ ބަދަލުތަކުގެ މުސްތަގުބަލު ބައްޓަންކުރުމުގައި އީޖާދީ އުފެއްދުންތަކަށް ޝައުގުވެރިވާ ފަރާތްތަކުން މިސަމިޓުގައި ބައިވެރިވުމަށް ނޫނު އަތޮޅު ކައުންސިލުން ބާރުއަޅައެވެ. މިސަމިޓުގައި ބައިވެރިވުމަށް ޝައުގުވެރިވާ ފަރާތްތަކުން ރަޖިސްޓްރީ ކުރުމަށާއި އިތުރު މައުލޫމާތު ހޯދުމަށް 6568514، 6568521 ނަންބަރަށް ގުޅުއްވުމަށް އެކައުންސިލުން އެދެއެވެ.