ކާރިސާތަކުގެ ވަގުތުގައި ފޯނުގެ ބެޓެރި އަވަހަށް ހުސްވަނީ ކީއްވެ؟

ކާރިސާތަކާއި އެކި ކުއްލި ހާލަތްތައް ކުރިމަތިވާ ވަގުތުތަކުގައި ފޯނުގެ ބެޓެރި އާދަޔާޚިލާފަށް އަވަހަށް ހުސްވުމަކީ ގިނަ ބަޔަކަށް ދިމާވާ މައްސަލައެކެވެ. އާންމުކޮށް ގިނަ މީހުން ގަބޫލުކުރާ ގޮތުގައި މިއީ ހަމައެކަނި ފޯނު ބޭނުންކުރާ މިންވަރު އިތުރުވުމުން ނުވަތަ އިންޓަނެޓުގައި ގިނަ ވަގުތު ހޭދަކުރުމުން ދިމާވާ ކަމެކެވެ.

މީގެ އަސްލު ސަބަބަކީ ނެޓްވޯކަށް ދިމާވާ މައްސަލަތަކުގެ ސަބަބުން ފޯނު ގުޅިފައި ބެހެއްޓުމަށްޓަކައި އެތެރޭގެ ނިޒާމުތަކުން ކުރަންޖެހޭ ބުރަ މަސައްކަތެވެ.

މުވާސަލާތީ ޓަވަރުތަކަށް ލިބޭ ގެއްލުންތަކުގެ ސަބަބުން ނުވަތަ ނެޓްވޯކަށް ބާރުބޮޑުވުމުން ސިގްނަލް ލިބުން ދަތިވުމަކީ ބެޓެރި ހުސްވާ އެންމެ ބޮޑު އެއް ސަބަބެވެ. ސިގްނަލް ބަލިކަށިވުމުން، ސިގްނަލް ހޯދުމަށްޓަކައި ފޯނުގައި ހިމެނޭ އެންމެ ގިނައިން ހަކަތަ ބޭނުންކުރާ އެއް ބައި ކަމަށްވާ 'ޕަވަރ އެމްޕްލިފަޔަރ' އިން އާދަޔާޚިލާފަށް ގިނައިން ހަކަތަ ބޭނުންކޮށްގެން މަސައްކަތް ކުރަން ފަށައެވެ.

ކުއްލި ހާލަތްތަކުގައި ގިނަ ބަޔަކު އެއްފަހަރާ މުވާސަލާތީ ވަސީލަތްތައް ބޭނުންކުރުމުން ނެޓްވޯކަށް ބާރުބޮޑުވެ، ޑޭޓާ ފޮނުވުމާއި، ލިބުމަށް ގިނަ ވަގުތު ނަގައެވެ. މީގެ ސަބަބުން ފޯނުގެ ރޭޑިއޯ އަދި ޕްރޮސެސަރަށް ބާރުބޮޑުވެ، ފޯނު ބޭނުން ނުކުރިޔަސް ބެޓެރި ހުސްވުން އަވަސްވެގެންދެއެވެ.

ފޯނު ބޭނުން ނުކުރިޔަސް، ފޯނުގެ މޮޑެމް އަބަދުވެސް ކައިރީގައިވާ ޓަވަރުތަކާ ގުޅައި ސިންކް ކުރަން މަސައްކަތް ކުރެއެވެ. ޑޭޓާ ޑައުންލޯޑް ކުރާއިރު މޮބައިލްގެ ހަކަތައިގެ %40 ބޭނުންކުރަނީ މޮޑެމް އިންނެވެ. ސިގްނަލް ދަށް ނަމަ އެކި ޓަވަރުތަކަށް ގުޅަން މަސައްކަތްކުރުމުން ބެޓެރީގެ ޗާޖު ވަރަށް އަވަހަށް ދަށްވެއެވެ.

ޖީޕީއެސް ސިގްނަލަށް ބުރޫއެރުމަކީވެސް ބެޓެރި ހުސްވާ ކަމެކެވެ. ރަނގަޅު ސެޓެލައިޓް ސިގްނަލެއް ހޯދަން އުނދަގޫވާ ހާލަތްތަކުގައި، ފޯނުގެ ސެންސަރުތަކާއި ޕްރޮސެސަރު މެދުކެނޑުމެއްނެތި ލޮކޭޝަން ހޯދުމަށް މަސައްކަތްކުރެއެވެ. މިއީ ބެޓެރީގެ ބާރު ވަރަށް ބޮޑަށް ކަނޑުވާލާ ކަމެކެވެ.

މިފަދަ ހާލަތްތަކުގައި ބެޓެރި ސަލާމަތްކުރުމަށްޓަކައި ސްކްރީންގެ އަލިކަން (ބްރައިޓްނެސް) ދަށްކުރުމާއި، އަވަހަށް ސްކްރީން ނިވޭގޮތަށް 'ސްކްރީން ޓައިމްއައުޓް' ސެޓިންގްސް ބަދަލުކުރުމަކީ މުހިންމު ކަމެކެވެ. މީގެ އިތުރުން 'ޕަވަރ ސޭވިންގ މޯޑް' ބޭނުންކުރުމަކީ ބެކްގްރައުންޑްގައި ހިނގާ އެޕްތައް ހުއްޓުވައި ހަކަތަ ރައްކާކުރެވޭނެ ގޮތެކެވެ.

އީމެއިލް އާއި ސޯޝަލް މީޑިއާ އެޕްތައް އަމިއްލައަށް އަޕްޑޭޓްވާ 'އޮޓޯ ސިންކް' ފީޗާ ނިއްވާލުމުންވެސް ބެޓެރީގެ ބޮޑު ބައެއް ސަލާމަތްކުރެވެއެވެ. ދިރާސާތަކުން ދައްކާގޮތުގައި ބެކްގްރައުންޑް ޓްރެފިކް މަދުކޮށްލުމުން ވައިފައިގައި %23.7 އަދި 3ޖީ ނެޓްވޯކްގައި %21.5 ހަކަތަ ސަލާމަތް ކުރެވޭނެއެވެ.

ސިގްނަލް ދަށް ސަރަހައްދުތަކުގައި ފޯނުގެ މޮބައިލް ޑޭޓާ، ވައިފައި، ބްލޫޓޫތު އަދި ޖީޕީއެސް ފަދަ ކަނެކްޝަންތައް ބޭނުން ނުކުރާނަމަ ނިއްވާލުމަކީ ބެޓެރި ދެމެހެއްޓުމަށް ކުރެވިދާނެ ކަމެކެވެ. ސަބަބަކީ މި ފީޗާތަކަކީ އަބަދުވެސް ސިގްނަލް ހޯދަން މަސައްކަތްކުރާ ކަންތައްތަކަށް ވާތީއެވެ.

ބެޓެރީގެ އުމުރު ދިގުކުރުމަށްޓަކައި ފޯނުގެ ސޮފްޓްވެއަރ އަޕްޑޭޓްކޮށް ބެހެއްޓުމާއި، މާބޮޑަށް ހޫނު ނުވަތަ ފިނި ތަންތަނުގައި ފޯނު ނުބޭއްވުމަށް ސަމާލުކަން ދޭންޖެހެއެވެ. އަދި ބެޓެރީގެ ޗާޖު މުޅިން ހުސްކޮށްލުމުގެ ބަދަލުގައި، %20 އަށް ވުރެ ދަށްނުވަނީސް ޗާޖުކުރުމަކީ ބެޓެރީގެ ސިއްހަތު ރަނގަޅުކޮށްދޭނެ ކަމެއް ކަމަށް ސެމްސަންގް ފަދަ ކުންފުނިތަކުން ލަފާދެއެވެ.