ބީއެމްއެލް ހެކަތޯން: އީޖާދީ ގިނަ ހިޔާލުތަކެއް ފެނިގެން ދިޔަ

ބޭންކް އޮފް މޯލްޑިވްސްގެ 40 ވަނަ އަހަރު ފާހަގަކުރުމުގެ ގޮތުން ހިންގާ ޕްރޮގްރާމްތަކުގެ ތެރޭގައި ހިމެނިގެން އޮކްޓޯބަރ 14، 15، 16 ގައި ކުރިއަށް ދިޔަ ބީއެމްއެލް ހެކަތޯން ނިންމާލާ، ކާމިޔާބު ކުރި ފަރާތްތައް އިޢުލާނުކޮށްފިއެވެ. މިފަރާތްތައް އިޢުލާނު ކުރީ ރޭ ހޮޓެލް ޖެންގައި ކުރިއަށް ގެންދެވުނު ހެކަތޯން ނިންމުމުގެ ރަސްމިއްޔާތުގެ ތެރޭގައިއެވެ.

ހެކަތޯންގައި ހުށަހެޅުނު ޕްރޮޖެކްޓްތަކުގެ ތެރެއިން އެންމެ ރަނގަޅު 3 އުފެއްދުމުގެ ގޮތުގައި ހޮވުނީ، ޑިޖިޓަލް އޮންބޯޑިންގ ޕްރޮޖެކްޓަކާއި އެކްސްޕެންސް ޓްރެކަރއަކާއި ޕަރސަނަލް ފައިނޭންސް މެނޭޖިންގ ޕްރޮޖެކްޓެކެވެ.

ޑިޖިޓަލް އޮންބޯޑިންގ އެޕްލިކޭޝަން ތައްޔާރު ކުރި ޓީމުގައި ހިމެނެނީ އަޙްމަދު މަހަފޫޒް، މޫސާ އިރުޝާން އަދި ޙުސައިން ޒަޔާންއެވެ. މިއީ ބޭންކުން އަލަށް ތައާރަފްކުރާ ހިދުމަތްތަކަށް އެދި ކަސްޓަމަރުންނަށް ފަސޭހައިން ހުށަހެޅުމަށް އެހީތެރިވެދޭނެ އެޕްލިކޭޝަނެކެވެ.

އެކްސްޕެންސް ޓްރެކަރ ނުވަތަ ކުރާ ޚަރަދުތައް މެނޭޖްކުރުމަށް ބޭނުންކުރާ އެޕްލިކޭޝަނެއް ތައްޔާރުކުރި ޓީމުގައި ހިމެނެނީ މުޙައްމަދު އާތިކް ޢަލީ ރިޒާ، މުޙައްމަދު ޔާނިއު ރަމީޒް އަދި ފާތިމަތު އަރީން ނަސީމެވެ.

ޕަރސަނަލް ފައިނޭންސް މެނޭޖަރ ތައްޔާރުކުރި ޓީމުގައި ހިމެނެނީ މުޙައްމަދު ޖައިލަމް، އިބްރާހިމް ޙުސައިން ޝަރީފް އަދި މުޙައްމަދު އީމާނެވެ. ކުރާ ޚަރަދުތަކާއި އޭގެ ތަފްސީލްތައް މިއެޕްލިކޭޝަނުން މެނޭޖުކުރެވޭނެ ކަމަށާއި އަދި އޮޓޮމެޓިކުން ޚަރަދުތައް ދެނެގަނެވޭނެ ފީޗަރ ވެސް މިއެޕްގައި ހިމެނޭނެއެވެ.

ހެކަތޯންގެ ހުރިހާ ޓީމްތަކުން ހިޔާލު ހުށަހެޅުމަށްފަހު، ހިޔާލުތައް އެސެސްކޮށް އިވެލުއޭޓްކުރީ ކަނޑައެޅިފައިވާ ޖަޖުންގެ ޕެނަލަކުންނެވެ. ޕެނަލްގައި ހިމެނުނީ ބޭންކްގެ އެކި ޑިޕާޓްމަންޓްތަކުގެ ސީނިއަރ ބޭފުޅުންނެވެ.

ހެކަތޯން ކާމިޔާބު ކުރި 3 ޓީމަށްވެސް ބޭންކް އޮފް މޯލްޑިވްސް އިނޮވޭޝަން ލެބްގައި ޕްރޮޑަކްޓްތައް އިތުރަށް ޑިވެލޮޕްކުރުމުގެ ފުރުސަތު ލިބިގެންދާނެއެވެ. ފުރިހަމަ ޕްރޮޑަކްޓެއް އުފެއްދުމަށް ޓީމުތަކަށް 6 މަހުގެ މުއްދަތެއް ލިބިގެންދާނެއެވެ. މިމުއްދަތުގައި މަސައްކަތް ކުރުމަށް ބޭނުންވާ އޮފީސް ސްޕޭސްއާއި މަހަކު 20،000 ރުފިޔާގެ އެލަވަންސްއަކާއި އުފައްދާ ސޮލިޔުޝަންސްގެ މެއިންޓެނަންސް ކޮންޓްރެކްޓްވެސް ބޭންކުން ފޯރުކޮށްދޭނެއެވެ.

ހެކަތޯންގެ ތީމަކީ 'ބޭންކިންގ ސޮލިޔުޝަންސް ޓު އެންހާންސް ކަސްޓަމަރ އެކްސްޕީރިއެންސް' އެވެ. މިތީމްގެ ދަށުން ހެކަތޯންގައި ހުށަހެޅުނު ހުރިހާ ހިޔާލުތަކެއްވެސް ހުށަހެޅިގެން ދިޔައީ ހެކަތޯންގެ މަގުސަދާގުޅޭ، ބޭންކުގެ ހިދުމަތްތައް ބޭނުންކުރުމުގައި ކަސްޓަމަރުންގެ ތަޖުރިބާ އިތުރަށް ފަސޭހަކުރެވޭނެ ފަދަ ބޭންކިންގ ސޮލިއުޝަންސްތަކެއްކަމަށް ބޭންކުން ވިދާޅުވިއެވެ.

48 ގަޑިއިރުގެ މުއްދަތަށް ކުރިއަށް ގެންދެވުނު މި ހެކަތޯންގައި 30 އަށް ވުރެ ގިނަ ފަރާތް ބައިވެރިވިކަމަށް ބީއެމްއެލްއިން މައުލޫމާތު ލިބެއެވެ. ބައިވެރިންގެ ތެރޭގައި ހިމެނެނީ ރާއްޖޭގައި އުޅޭ ޑިވެލޮޕަރުންނާއި، ޑިޒައިނަރުންނާއި އަދި އިނޮވޭޓިވް ޓެކެނޮލޮޖީ އުފެއްދުމަށް ޝައުގުވެރިވާ ފަރާތްތަކުންނެވެ.

ހެކަތޯންގައި ހުށަހެޅުނު ހިޔާލުތަކުގެ ތެރެއިން 3 ހިޔާލެއް ހޮވިގެން ދިޔަނަމަވެސް ޖުމްލަ 9 ޓީމަކުން ފާހަގަކޮށްލެވޭ އިތުރު ގިނަ ޕްރޮޑަކްޓްތަކެއްގެ ޕިޗްތައްވެސް ހުށަހެޅިއެވެ. އޭގެ ތެރޭގައި ވަރޗުއަލް އެސިސްޓަންޓް އެޕަކާއި ޕިއަރ-ޓު-ޕިއަރ ފައިސާ ލެންޑްކުރުމަށް ބޭނުންކުރެވިދާނެ ޕްރޮޑަކްޓާއި މިހާރު ގިނަވަމުންދާ ސްކޭމްތައް ދެނެގަނެ، ހުއްޓުވުމަށް ބޭނުން ކުރެވިދާނެ ސޮލިޔުޝަންތައްވެސް ފެނިގެން ދިޔައެވެ. އަދި ގިނަ ބަޔަކު ފާހަގަކުރާ އޮންލައިން ޕޭމަންޓް ދެއްކުމަށްފަހު ވައިބާ ފަދަ އެޕްތަކުން ސްލިޕް ޓްރާންސްފަރ ކުރަން މައްސަލަ ހައްލުކޮށްދޭ ޕްރޮޑަކްޓެއްވެސް ހުށަހެޅިގެން ދިޔައެވެ. އެއީ ބީއެމްއެލް އެޕް ތެރެއިން މަރޗަންޓުންނަށް ސްލިޕް ފޮނުވާލެވޭނެ ސޮލިޔުޝަންއެކެވެ.

މިއީ މިފަދަ ހެކަތެންއެއް ބީއެމްއެލްއިން ބޭއްވި ފުރަތަމަ ފަހަރެވެ. ބީއެމްއެލްގެ އެކްޓިން އެމްޑީ އައިޝަތު ނޫރައްދީން ވިދާޅުވީ ފިންޓެކް ސޮލިޔުޝަން އުފެއްދުމަށް އަދި އީޖާދީ އުފެއްދުންތަކެއް ބިނާކުރުމަށް ޝައުގުވެރިކަން ހުރި ޑިވެލޮޕަރުންތަކެއް މިކަމާ ކުރިމަތިލާ ބޭންކުގެ ކަސްޓަމަރުންނަށް ރަނގަޅު ސޮލިޔުޝަންތަކެއް ހޯދައި ދިނުމަށް މަސައްކަތްތަކެއް ކުރިތަން ފެނިގެން ދިޔުމުން އުފާވެއްޖެކަމަށެވެ. އަދި ބޭންކުގެ އިނޮވޭޝަން ލެބުގައި މިއުފެއްދުންތައް އިތުރަށް ތަރައްގީކުރުމަށް ބޭންކުން ފުރިހަމަ ސަޕޯޓެއް ދެއްވާނެކަމަށް ވެސް ވިދާޅުވިއެވެ. މީގެ އިތުރުން ހެކަތޯންގެ ބައިވެރިންނަށާއި މެންޓަރުންގެ ގޮތުގައި މަސައްކަތްކޮށްދެއްވި ހުރިހާ ފަރާތްތަކަށް ޝުކުރު އަދާކުރެއްވިއެވެ.

އިތުރަށް ކިޔާލުމަށް:

ބޭންކް އޮފް މޯލްޑިވްސް އިން ހެކަތޯންއެއް ބާއްވަނީ