ކޮފީ ބުއިމުން އުމުރު ދިގުވޭ: ކިއުއެމްޔޫއެލްގެ ފަހުގެ ދިރާސާ

ކޮފީއަކީ މިޒަމާނުގައި ގިނަ ބަޔަކު އަޅުގަނޑުމެންގެ ހަލަބޮލި ދުވަސްތައް ފަށައި އަޅުގަނޑުމެން ހޭލުއްވުމަށް އާންމުގޮތެއްގައި ބޭނުންކުރަމުންދާ އެއްޗެކެވެ. ނަމަވެސް ކޮފީ ބޭނުންކުރުމުން ގިނަ ބަޔަކަށް ނޭންގޭ އެހެން ފައިދާއެއްވާ ކަމަށް ފަހުގެ ދިރާސާތަކުން ދައްކަައެވެ. ކުއީން މެރީ ޔުނިވާސިޓީ އޮފް ލަންޑަން (ކިއުއެމްޔޫއެލް)އިން ދާދިފަހުން ކުރި ދިރާސާއަކުން ދައްކާ ގޮތުގައި ކެފެއިން ހުންނަ ތަކެތި ބުޔުމުން އުމުރު ދިގުކުރުމަށް ސެލްތަކުގެ ލެވަލުން އެހީތެރިވެދޭއެވެ.

ކިއުއެމްޔޫއެލްގެ ސެލިއުލަރ އެޖިންގ އެންޑް ސެނެސެންސް ލެބޯޓްރީން ކުރި މި ދިރާސާއިން ވަނީ ކެފެއިންގެ ސަބަބުން ސެލްތަކުގެ ލެވެލްގައި މުސްކުޅިވުމަށް އަސަރުކުރާ ގޮތާ މާދު އިތުރު ހޯދުންތަކެއް ހޯދިފައެވެ. 'މައިކްރޮބިއަލް ސެލް'ގައި ޝާއިއުކޮށްފައިވާ މި ދިރާސާ ދައްކާ ގޮތުގައި ކެފެއިންއިން ހަކަތަ ބެލެންސް ރެގިއުލޭޓް ކުރާ ހަށިގަނޑުގެ ސެލްއުލަރ ސިސްޓަމަކަށް އަސަރުކޮށް، މުސްކުޅިވުން ލަސްކޮށް، އުމުރު ދިގުކޮށްދެއެވެ.

އެތައް އަހަރުތަކެއް ވަންދެން ކެފެއިންގެ ސަބަބުން ސިއްހީ ގިނަ ފައިދާތަކެއް ލިބި، ހިތުގެ ބަލިތަކާއި ހަކުރުބަލި ފަދަ އުމުރާ ގުޅުން ހުރި ބަލިތަކުން ރައްކާތެރިވާކަން އެނގިފައިވާ އިރު، މި ފައިދާތައް ލިބިގންދާ ގޮތާމެދު ސުވާލު އުފެދިފައިވެއެވެ. ނަމަވެސް މި ދިރާސާއިން މިކަމުން އެއް ފައިދާ، އެއީީ އުމުރު ދިގުވުން، ލިބިގެންދާ ގޮތާމެދު އިތުރު މައުލޫމާތު ފޯރުކޮށްދެއެވެ.

މި ދިރާސާ ޓީމުން ދިރާސާކޮށްފައިވަނީ އިންސާނާގެ ސެލްތަކާ އެއްގޮތް އެއްސެލްގެ ޖަރާސީމެއް ކަމަށްވާ ފިޝަން ޔީސްޓެވެ. އެފަރާތްތަކުންގެ ހޯދުންތަކުން ހާމަވި ގޮތުގައި ކެފެއިންއުން އަޅުގަނޑުމެންގެ ސެލްތަކަށް ހަކަތަ އިތުރުކޮށްދިނުމުގެ އިތުރުން، ސެލްތަކުގެ 'ފިއުލް ގޯޖް'އެއްގެ ގޮތުގައި މަސައްކަތްކުރާ އެމްޕީކޭ (އެމްޕީ-އެކްޓިވޭޓެޑް ޕްރޮޓީން ކިނާޒް)ގެ ނަންކިޔާމުހިންމު ސިސްޓަމެއް އެކްޓިވޭޓް ކުރެއެވެ. މި ސިސްޓަމުން ލިބެންހުރި ކާނާއާއި ހަކަތައިގެ މިންވަރަށް ބަލައިގެން ސެލްތައް ބޮޑުވާންވީ ވަގުތު އަންގައިދޭ ޓީއޯއާރް (ޓާގެޓް އޮފް ރެޕަމައިސިން) ކިޔާ ގްރޯތް ރެގިއުލޭޓަރެއްގެ މައްޗަށް މަސައްކަތް ކުރެއެވެ.

މި ހޯދުންތައްވަނީ ކުރިން ކޮފީ ބުއިމުން އުމުރު ދިގުވުމާ ގުޅިގެން ކޮށްފައިވާ ދިރާސާތަކަށް އިތުރު ނަޒަރެއް ދައްކައިދީފައެވެ. މިގޮތުން ޖީއޭއެމްއޭ އިންޓަރނަލް މެޑިސިންގައި ޝާއިއުކުރި 500،000 މީހުންގެ މައްޗަށް ކުރި ދިރާސާި ދައްކާގޮތުގައި ދުވާލަކު ގިނަ ތަށި ކޮފީ ބޯ މީހުންގެ އުމުރު ދިގުވެފައިވެއެވެ. އަދި ޔޫރަޕިއަން ހާޓް ޖާނަލްގައި ކުރި އެހެން ދިރާސާއެއް ދައްކައިދޭ ގޮތުގައި ހެނދުނު ކޮފީ ބުއިމުން ހިތުގެ ބަލިތަކާއި މަރުވުމާއި ގުޅުންހުރި ބައެއް ރިސްކުތައް މަދުވެއެވެ. މިހޯދުންތައް ވަނީ އެނަލްސް އޮފް އިންޓަރނަލް މެޑިސިންގައި ވެސް ޝާއިރުކޮށްފައެވެ.