5.5 ބިލިއަން ޑޮލަރުގެ އިލެކްޓްރިކްވެހިކަލް ޕްލާންޓެއް ހިއުންޑައި އިން ހަދަނީ

ކޮމަންވޮއިސްގެ އެހީގައި މިލިޔުން ކިޔާލާ

އެމެރިކާގައި 5.5 ބިލިއަން ޑޮލަރުގެ އިލެކްޓްރިކް ވެހިކަލް ޕްލާންޓެއް ހަދަން ހިއުންޑައި އިން ނިންމައިފި އެވެ.

ދެކުނު ކޮރެއާގެ އޮޓޯ އުފެއްދުންތެރިޔާ ހިއުންޑައި އިން 5.5 ބިލިއަން ޑޮލަރުގެ އިލެކްޓްރިކް ވެހިކަލަކާއި ބެޓެރީ ޕްލާންޓެއް އެމެރިކާގެ ދެކުނު ސްޓޭޓް ޖޯޖިއާގައި އަޅާނެ ކަމަށް އެ ކުންފުނީގެ ގަވަރުނަރު ހުކުރު ދުވަހު ވަނީ އިއުލާން ކުރައްވާފަ އެވެ.

ބްރައިއަން ކެމްޕް މިކަން އިއުލާން ކުރެއްވީ ހިއުންޑައި މޮޓޯ ކޮމްޕެނީގެ ރައީސް ޖޭ ޗަންގް އާއި އެކު ސަވާނާގައި ހުންނަ ފެކްޓްރީ ސައިޓުގައި ބޭއްވި ބައްދަލުވުމެއްގައެވެ. މިފެކްޓްރީގެ ސަބަބުން އިތުރު 8،000 އަށް ވުރެ ގިނަ ވަޒީފާއުފެދޭނެކަމަށްވެސް އޭނާ ވަނީ ވިދާޅުވެފައެވެ.

"އަޅުގަނޑުމެން އެކުގައި އާ މުސްތަގުބަލެއް އެކުލަވާލުމުގައި ހިއުންޑައި މޮޓޯ ގްރޫޕަށް ޖޯޖިއާއަށް މަރުހަބާ ކިޔުމަކީ އަޅުގަނޑުމެން ފަޚުރުވެރިވާ ކަމެއް،" ކެމްޕް ވިދާޅުވި ކަމަށް އޭނާގެ އޮފީހުން ނެރުނު ބަޔާނުގައިވެ އެވެ.

އެ ޕްލާންޓަކީ "އަޅުގަނޑުމެންގެ ދައުލަތުގެ ތާރީހުގައި ވެސް އެންމެ ބޮޑު އިގްތިސާދީ ތަރައްގީގެ މަޝްރޫއު" ކެމްޕް ވިދާޅުވިކަމަށް އެރިޕޯޓްގައި ވެއެވެ.

ހިއުންޑައިގެ ސަޕްލައި ކުރާ ކުންފުނިތަކުން އިތުރު އެއް ބިލިއަން ޑޮލަރު އިންވެސްޓް ކުރާނެ ކަމަށް ލަފާކުރެވޭއިރު، އެ ފެކްޓްރީގެ އަހަރީ ކެޕޭސިޓީއަކީ 300،000 ޔުނިޓް ކަމަށް ބަޔާނުގައިވެ އެވެ.

އޮޓޯ އުފައްދާ ކުންފުނިން ބުނީ 2023 ވަނަ އަހަރުގެ ޖެނުއަރީ މަހު އިމާރާތް ކުރުމުގެ މަސައްކަތް ފެށުމަށް ރާވާފައިވާ ކަމަށާއި 2025 ވަނަ އަހަރުގެ ފުރަތަމަ ކުއާޓަރުގައި ޕްލާންޓް ނިންމުމަށް ރާވާފައިވާ ކަމަށެވެ. އެކަމަކު ޖޯޖިއާގެ ލޮކޭޝަންގައި އުފައްދާން ނިންމާފައިވާ އިލެކްޓްރިކް މޮޑެލްތަކެއްގެ ތަފްސީލެއް އަދި ނުދެއެވެ.

"މި އާ އީވީ ޕްލާންޓަކީ އަޅުގަނޑުމެންގެ ވިޔަފާރީގެ މުސްތަގުބަލު، އަދި އެމެރިކާގެ ކަސްޓަމަރުންގެ ބޮޑުވަމުން އަންނަ ޑިމާންޑްތައް ފުއްދުމަށް އެހީތެރިވެދޭނެ ޕްލާންޓެއް،" ޗަންގްގެ ބަޔާނުގައިވެ އެވެ.

ހިއުންޑައިގެ ގްލޯބަލް ފްލީޓުގެ 27 ޕަސެންޓް ހަތް އަހަރު ތެރޭގައި އިލެކްޓްރިކް ވެގެންދާނެ ކަމަށް ހިއުންޑައި އިން ލަފާކޮށްފައިވެއެވެ.

އާ ފެކްޓްރީގައި ބެޓެރީ އުފައްދާނެކަމަށް ބެލެވޭއިރު، ހިއުންޑައިގެ އަމާޒަކީ "އެމެރިކާގެ ބާޒާރުގައި އީވީ ބެޓެރީ އާއި އެހެނިހެން އީވީ ކޮމްޕޯނެންޓްތަކަށް ސްޓޭބަލް ސަޕްލައި ޗޭންއެއް ގާއިމް ކުރުން" ކަމަށް ބަޔާނުގައިވެ އެވެ.

ހިއުންޑައި ޕްލާންޓަކީ ޖޯޖިއާގެ ދެވަނަ އިލެކްޓްރިކް ވެހިކަލް ފެކްޓްރީއަކަށް ވާނެއެވެ. އިލެކްޓްރިކް ޓްރަކް އުފައްދާ ކުންފުނި ރިވިއަން އިން ޑިސެމްބަރު މަހު އިއުލާން ކުރި ގޮތުގައި އެތަނުގައި އެމެރިކާގެ ދެވަނަ އެސެމްބްލީ ޕްލާންޓް އެޅުމަށް ފަސް ބިލިއަން ޑޮލަރު އިންވެސްޓް ކުރާނެ އެވެ.

ހިއުންޑައިގެ އަމާޒަކީ 2026 ވަނަ އަހަރުގެ ނިޔަލަށް އެމެރިކާގައި ތިންވަނައަށް އެންމެ ގިނައިން އިލެކްޓްރިކް ވެހިކަލް ފޯރުކޮށްދޭ ކުންފުންޏަކަށް ވުމެވެ.

މިހާރު މި ދާއިރާގައި ޓެސްލާގެ ބާރު ގަދަ ނަމަވެސް ސަގާފީ އޮޓޯ އުފައްދާ ކުންފުނި ޖެނެރަލް މޮޓޯސް އާއި ފޯޑުން ކުރިއަށް އޮތް އަހަރުތަކުގައި އިލެކްޓްރިކް އޮފާތައް އިތުރު ކުރުމަށް ދިހަ ބިލިއަން ޑޮލަރު އިންވެސްޓް ކުރަން ރާވާފައިވާއިރު، ގިނަ ސްޓާޓްއަޕްތަކުން ވެސް ދަނީ މި ސިނާއަތަށް ވަދެގަންނަން މަސައްކަތް ކުރަމުންނެވެ.

އަޙްމަދު ދާއޫދު

އަޙްމަދު ދާއޫދު

ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.

ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.

ލޯތްބާއެކު ދިވެހިން އުފައްދާފައިވާ އުފެއްދުމެއް.