އިންސާނަކު މަރުވުމުން އޭނާގެ އޮންލައިން އެކައުންޓްތަކަށް ވަނީ ކިހިނެއް؟

އިންސާނަކު މަރުވުމާ ގުޅިގެން އާއިލާއަށް ކުރިމަތިވާ ހިތާމައިގެ އިތުރުން، އިދާރީ ގޮތުން ނިންމަންޖެހޭ ގިނަ ކަންތައްތަކެއް ހުރެއެވެ. އޭގެ ތެރޭގައި ވާރުތަ މުދާ ބެހުމާއި ތަކެތި ނީލަންކިއުމާއި، ބިލުތަކާއި ދަރަނިތައް ދެއްކުން ފަދަ ކަންކަން ހިމެނެއެވެ. ނަމަވެސް، އިންސާނުންގެ ދިރިއުޅުން އިންޓަނެޓަށް ބަދަލުވަމުންދާ މިންވަރަކަށް، މަރުވުމަށްފަހު އޮންލައިން އެކައުންޓްތަކަށް ހަދާނެގޮތެއް ކަނޑައެޅުމަކީވެސް މުހިންމު ކަމަކަށް ވަނީ ވެފައެވެ. އެގޮތުން ގޫގުލް އަދި އެޕަލް އެކައުންޓްތައް ބޭނުންކުރާ މީހަކު މަރުވެއްޖެނަމަ، ނުވަތަ އާއިލާގެ މީހަކު މަރުވެގެން އެފަދަ އެކައުންޓްތަކާމެދު އަމަލުކުރާނެ ގޮތްތަކެއް އެނގުމަކީ ބޭނުންތެރި ކަމެކެވެ.

މަރުވުމަށްފަހު އެކައުންޓްތަކަށް ވާނެގޮތެއް އެންމެ ބޮޑަށް ބިނާވެގެންވަނީ ދިރި ހުރިއިރު އެ މީހަކު އެކަމަށް ތައްޔާރުވެފައިވާ މިންވަރެއްގެ މައްޗަށެވެ. ގޫގުލް އަދި އެޕަލް ފަދަ ކުންފުނިތަކުން ޑިޖިޓަލް ތަރިކަ ނުވަތަ 'ޑިޖިޓަލް ލެގަސީ' ބެލެހެއްޓުމަށް ޚާއްޞަ ޕްރޮގްރާމްތަކެއް ތަޢާރަފުކޮށްފައިވީ ނަމަވެސް، މިއިން ކޮންމެ ޚިދުމަތެއްގެ ވެސް ބޭނުން ހިފޭނީ މަރުވުމުގެ ކުރިން އިތުބާރުކުރެވޭ މީހަކަށް އެކައުންޓްގެ ބާރުތައް ހަވާލުކުރުމަށް ސެޓިންގްސް ހަދާފައިވާނަމައެވެ. އެފަދަ ތައްޔާރީތަކެއް ވެފައި ނުވާނަމަ، އެކައުންޓަށް ވާނެގޮތް ނިންމާނީ އެ ކުންފުންޏެއްގެ އަމިއްލަ ސިޔާސަތުތަކުގެ ދަށުންނެވެ.

ގޫގުލް އެކައުންޓްތަކަށް ބަލާއިރު، މަރުވުމުގެ ކުރިން ވަކި ގޮތެއް ނިންމާފައި ނުވާނަމަ އެކައުންޓަށް ވަގުތުން ބަދަލެއް ނުއަންނާނެއެވެ. ނަމަވެސް ގޫގުލްއިން ވަނީ މަރުވުމަށްފަހު އެކައުންޓްތައް މެނޭޖްކުރުމަށް ފަސޭހަ ގޮތްތަކެއް ހަމަޖައްސައިދީފައެވެ. އެގޮތުން 2013 ވަނަ އަހަރު ގޫގުލްއިން ވަނީ 'އިންއެކްޓިވް އެކައުންޓް މެނޭޖަރު' ގެ ނަމުގައި ޓޫލެއް ތަޢާރަފުކޮށްފައެވެ. މި ޓޫލް މެދުވެރިކޮށް، ގިނަ ދުވަސްތަކެއް ވަންދެން އެކައުންޓް ބޭނުންނުކޮށް ހުރެއްޖެނަމަ ހަދާނެގޮތް ކަނޑައެޅެއެވެ.

މި ޕްރޮގްރާމް މެދުވެރިކޮށް އެކައުންޓް ބޭނުންނުކޮށް 3 މަސް، 6 މަސް ނުވަތަ 12 މަސްވެއްޖެނަމަ އެކައުންޓްގައިވާ މަޢުލޫމާތުތައް ފޮހެލުމަށް އެދެވިދާނެއެވެ. އަދި މެސެޖުތަކާއި، ކޮންޓެކްޓްތަކާއި، ޔޫޓިއުބް ޗެނަލްތައް ފަދަ މަޢުލޫމާތުތައް އިތުބާރުކުރެވޭ 10 މީހަކަށް ފޮނުވުމަށްވެސް ހިޔާރުކުރެވިދާނެއެވެ. ގޫގުލްގެ ޕްރޮޑަކްޓް މެނޭޖަރު އެންޑްރިއަސް ޓާކް ވިދާޅުވެފައިވަނީ، މި ފީޗާގެ މައިގަނޑު ބޭނުމަކީ އަމިއްލަ ރައްކާތެރިކަމާއި ސިއްރު ހިފެހެއްޓޭނެ ގޮތަކަށް މަރުވުމަށްފަހުގެ ޑިޖިޓަލް ދިރިއުޅުން ރޭވުމުގެ ފުރުޞަތު ދިނުން ކަމަށެވެ.

'އިންއެކްޓިވް އެކައުންޓް މެނޭޖަރު' ސެޓްއަޕްކޮށްފައި ނުވާނަމަ، މަދުވެގެން 2 އަހަރު ވަންދެން އެކައުންޓް ބޭނުންނުކޮށް ހުރުމުން ގޫގުލްއިން އެ އެކައުންޓެއް ފޮހެލަފާނެއެވެ. ގޫގުލްއިން އެކައުންޓެއް ބޭނުންކުރޭތޯ ބަލަނީ ސައިންއިންވުމާއި، ޖީމެއިލް އެޕް ބޭނުންކުރުމާއި، ގޫގުލްގެ އެހެނިހެން އުފެއްދުންތައް ބޭނުންކުރާ މިންވަރަށް ބަލައިގެންނެވެ. އެފަދަ ތައްޔާރީތަކެއް ވެފައި ނުވާ ހާލަތްތަކުގައި، މަރުވި މީހާގެ އާއިލާގެ މީހުންނަށް ގޫގުލްއަށް ސީދާ އެދިގެން 2 އަހަރުގެ މުއްދަތު ހަމަވުމުގެ ކުރިން އެކައުންޓް ޑީއެކްޓިވޭޓް ކުރެވިދާނެއެވެ. ނަމަވެސް އެފަދަ ހާލަތްތަކުގައިވެސް އެކައުންޓްގައިވާ އެއްވެސް މަޢުލޫމާތެއް އާއިލާއަށް ގޫގުލްއިން ފޯރުކޮށެއް ނުދޭނެއެވެ.

އެޕަލް އެކައުންޓްތަކަށް ބަލާއިރުވެސް، މަރުވުމަށްފަހު އެކައުންޓްތައް މެނޭޖްކުރެވޭނެ ނިޒާމެއް އޮތްނަމަވެސް، އެކަމަށް ކުރިން ތައްޔާރުވާންޖެހެއެވެ. އެޕަލްއިން ބޭނުންކުރާ ފަރާތްތަކަށް އެކައުންޓް ސެޓިންގްސް މެދުވެރިކޮށް ގިނަވެގެން 5 މީހުން 'ލެގަސީ ކޮންޓެކްޓުން' ގެ ގޮތުގައި ކަނޑައެޅެއެވެ. މިއީ އެ މީހަކު މަރުވުމުން އައިކްލައުޑްގައިވާ މަޢުލޫމާތުތަކާއި ޑިވައިސްތަކަށް ވަނުމުގެ ޤާނޫނީ ޙައްޤު ލިބޭ މީހުންނެވެ. 'ލެގަސީ ކޮންޓެކްޓެއް' ކަނޑައެޅުމުން އެކްސެސް ކީއެއް އުފެދިގެންދާނެއެވެ.

އެކައުންޓްގެ ވެރިފަރާތް މަރުވުމުން، ކަނޑައެޅިފައިވާ ލެގަސީ ކޮންޓެކްޓަށް އެކްސެސް ކީއާއި މަރުވިކަމުގެ ސެޓްފިކެޓް އެޕަލްއަށް ހުށަހެޅުމުން، ފޮޓޯ، މެސެޖު، ނޯޓްސް، ފައިލްތައް އަދި ޑިވައިސް ބެކްއަޕްތައް ފަދަ އަމިއްލަ މަޢުލޫމާތުތަކަށް ވަދެވޭނެއެވެ. މިގޮތަށް މަރުވިކަމުގެ ސެޓްފިކެޓާއި އެކްސެސް ކީ ހުށަހެޅުމަށްފަހު، އެކައުންޓް ދާއިމީކޮށް ފޮހެލުމުގެ ކުރިން މަޢުލޫމާތުތައް ޑައުންލޯޑްކުރުމަށް 3 އަހަރުގެ މުއްދަތެއް އެޕަލްއިން ދެއެވެ.

ނަމަވެސް، ލެގަސީ ކޮންޓެކްޓަށްވެސް އެކައުންޓުން ގަނެފައިވާ ލަވަ، ފިލްމު ނުވަތަ ފޮތް ފަދަ ތަކެއްޗަށް އެކްސެސްއެއް ނުލިބޭނެއެވެ. ސީޑީ ނުވަތަ ފޮތް ފަދަ އެއްކޮށްފައިވާ އާންމު ތަކެތި ވާރުތަކުރެވުނު ކަމުގައިވިޔަސް، ޑިޖިޓަލް މީޑިއާއަކީ ވާރުތަކުރެވޭނެ ތަކެއްޗެއް ނޫނެވެ. ލެގަސީ ކޮންޓެކްޓެއް ސެޓްއަޕްކޮށްފައި ނުވާނަމަ، އެޕަލްއިން ބޭނުންނުކުރާ އެކައުންޓްތައް ފޮހެލުމުގެ މުއްދަތު ގޫގުލްއަށްވުރެ ކުރެވެ. އެގޮތުން އައިކްލައުޑް ބޭނުންނުކޮށް 1 އަހަރުވުމުން އިންޒާރުގެ އީމެއިލެއް ފޮނުވައި، އޭގެ 30 ދުވަސް ފަހުން އެކައުންޓް ދާއިމީކޮށް ފޮހެލައެވެ.