9 އަހަރުގެ އޯޓިސްޓިކް ކުއްޖެއްގެ ވިސްނުން، ދުނިޔޭގެ ރެކޯޑެއް

މެކްސިކޯއަށް ނިސްބަތްވާ އުމުރުން ނުވަ އަހަރުގެ އޯޓިސްޓިކް އަންހެން ކުއްޖަކު އަލްބަޓް އައިންސްޓައިން އާއި ސްޓެފަން ހޯކިން ފަދަ ދުނިޔެމިހާތަނަށް ދުށް އެންމެ ވިސްނުންތޫނު ސައިންޓިސްޓުންނަށް ވުރެ މަތީ އައިކިއުއެއް ދައްކައި، މުޅި ދުނިޔެ ހައިރާންކޮށްލައިފިއެވެ.

އަދަރާ ޕެރޭޒް ސަންޗޭޒް ނަމަކަށް ކިޔާ މިކުއްޖާ ވަނީ އުނގެނުމުގެ މައްސަލަތަކާ ބެހޭ ގޮތުން އުފެދިފައިވާ ހުރިހާ ނުތަނަވަސްކަމާއި އޮޅުންތައް ނައްތާލައިފައެވެ. އުމުރުން ނުވަ އަހަރުގައި އޭނާ ވަނީ ހައި ސްކޫލުން ދަސްވެނިވެފައެވެ. މީގެ އިތުރުން މި ޒުވާން އަންހެންކުއްޖާ އައިކިއު ޑޮކިއުމެންޓެޑް ޖީނިއަސްއަށް ވުރެ މަތިކަން ފާހަގަކޮށްލެވެއެވެ. މިހާރުވެސް އޭނާގެ އައިކިއު ލެވަލް އަލްބަޓް އައިންސްޓައިން އާއި ސްޓެފަން ހޯކިންއަށް ވުރެ މަތީގައި ހުރި ކަމަށް ރިޕޯޓްތައް ބުނެއެވެ.

ސްޓެފަން ހޯކިންގެ އައިކިއު އަކީ 160-170 އާ ދެމެދުގެ މިންވަރެއް ކަމަށް ރެކޯޑް ކުރެވިފައިވާއިރު އޭގެ މާނައަކީ އޭނާގެ އައިކިއު ސްކޯ 160 އާއި 170 އާ ދެމެދުގެ ރޭންޖެއްގެ ތެރޭގައި ހުރިކަމެވެ.

އައިކިއު ޓެސްޓްތަކަކީ އިންޓެލިޖެންސް ދެނެގަތުމަށް ފަރުމާކޮށްފައިވާ ސްޓޭންޑަޑަޑް އެސެސްމަންޓްތަކަކަށް ވާއިރު، އާންމުގޮތެއްގައި ސްކޯތައް ރިޕޯޓް ކުރަނީ އާންމު އާބާދީއާ އަޅާބަލާއިރު މީހާގެ ބުއްދީގެ ގާބިލުކަން ރަމްޒުކޮށްދޭ ނަމްބަރެއްގެ ގޮތުގައެވެ. 100 ގެ ސްކޯއަކީ އެވްރެޖް ސްކޯއެއް ކަމަށް ބެލެވޭއިރު، 130 އިން މަތީގެ ސްކޯއަކީ އާންމުގޮތެއްގައި މަތީ ސްކޯއެއް ކަމަށް ސައިންސްވެރިން ވަނީ ކަނޑައަޅާފައެވެ. 160-170 އާ ދެމެދުގެ ރޭންޖަކީ ވަރަށް މަތީ ރޭންޖެއް ކަމަށް ބެލެވޭއިރު، އެއީ އާދަޔާ ހިލާފު ބުއްދީގެ ގާބިލުކަން ދައްކުވައިދޭ ރޭންޖެކެވެ.

ތަޖުރިބާކާރުން ބުނާ ގޮތުގައި 162 ގެ އައިކިއު ސްކޯއަކީ ބުއްދީގެ ގާބިލުކަމަށް ބަލާއިރު މިހާތަނަށް ދުނިޔޭގެ އާބާދީގައި ރެކޯޑްކުރެވިފައިވާ އެންމެ މަތީ ސްކޯއެވެ. ގިނަ ފަހަރަށް އުނގެނުމުގައި ދިމާވާ ދަތިތަކާއި އިޖުތިމާއީ ގޮންޖެހުންތަކާ ގުޅިފައިވާ އޯޓިޒަމް ސްޕެކްޓްރަމްގައި ހުރުމުން މި އަންހެންކުއްޖާގެ ސްކޯ އިތުރަށް ފާހަގަކޮށްލެވެއެވެ.

މެކްސިކޯއަށް އުފަން މި ކުއްޖާގެ މައިންބަފައިން ބުނާ ގޮތުގައި އޭނާގެ އާދަޔާ ހިލާފު ކުޅަދާނަކަން އެންމެ ފުރަތަމަ ފެނުނީ އޭނާގެ އުމުރުން އެންމެ ތިން އަހަރުގައެވެ. އެހާ ޅައުމުރުގައި ފޮތްތައް ކިޔަން ފެށުމުންނާއި އަދި ބޮޑެތި ފޮތްތައް އަވަސްއަވަހަށް ދަސްކޮށް މައުލޫމާތު މުއްސަނދިވަމުން ދިޔައެވެ. އޭގެ ފަހުން ސައިންސާއި ހިސާބު އަދި ލިޔުންތެރިކަމަށް ޝައުގުވެރިކަން އުފެދި، ހުސް ވަގުތުތަކުގައި އަމިއްލަ އަށް އެކްސްޕެރިމެންޓްތައް ވެސް ކުރަން ފެށި ކަމަށް އެކުއްޖާގެ މައިންބަފައިން ބުނެފައިވެއެވެ.

އަންހެން ދަރިފުޅަށް ލިބުނު ކާމިޔާބީއާ މެދު އޭނާގެ މައިންބަފައިން ފަޚުރުވެރިވާ ކަމަށާއި ނަމަވެސް ޒުވާން އޯޓިސްޓިކް އަންހެން ކުއްޖެއްގެ ހައިސިއްޔަތުން އަންހެން ދަރިފުޅަށް ކުރިމަތިވާ ގޮންޖެހުންތައް ވެސް އެނގޭ ކަމަށް އެ މީހުން ބުނެއެވެ. އެމީހުން އުއްމީދު ކުރަނީ އެކުއްޖާގެ ކާމިޔާބީގެ ސަބަބުން މިފަދަ ހާލަތްތަކުގައި ތިބި އެހެން ކުދިންނަށް ވެސް އެމީހުންގެ ޝައުގުވެރިކަން ކުރިއަށް ގެންދިއުމަށާއި ކުރިމަތިވެދާނެ ކޮންމެ ހުރަހަކުން އަރައިގަތުމަށް ހިތްވަރު ލިބިގެންދާނެ ކަމަށެވެ.

މި އަންހެން ކުއްޖާގެ ފާހަގަކޮށްލެވޭ އައިކިއުގެ ޚަބަރާއެކު ސައިންޓިފިކް މުޖުތަމައުގައި ވަނީ ވަރަށް ބޮޑު ޝައުގުވެރިކަމާއި އުފާވެރިކަން އުފެދިފައެވެ. ތަޖުރިބާކާރުން ބުނަނީ އޭނާގެ ގާބިލުކަން ހަގީގަތުގައި ވެސް އާދަޔާ ހިލާފު ކަމަށާއި ކުރިއަށް އޮތް ތަނުގައި ސައިންސާއި ހިސާބުގެ ރޮނގުން ފާހަގަކޮށްލެވޭ ހިދުމަތްތަކެއް ކުރުމުގެ ގާބިލުކަން އެކުއްޖާގެ ކިބައިގައި އެބަހުރި ކަމަށެވެ.

މި ކުއްޖާގެ ވާހަކައަކީ އިންސާނާގެ ސިކުނޑީގެ ބާރާއި، ބުއްދީގެ ހުނަރު ފެނުނު ކޮންމެ ތަނެއްގައި ވެސް ދެނެގަނެ ތަރުބިއްޔަތު ކުރުމުގެ މުހިންމުކަން ދައްކުވައިދޭ ވާހަކައެކެވެ. އެކުއްޖާގެ ކާމިޔާބީއަކީ ބުއްދި އަކީ ތަފާތު ސިފަތަކެއްގައި އަންނަ އެއްޗެއްކަމާއި، އަޅުގަނޑުމެންގެ ބެކްގްރައުންޑާއި ހާލަތަށް ބެލުމެއްނެތި، އެ ބުއްދި އުފައްދައި، އުފާފާޅުކުރުމަށް އަބަދުވެސް މަސައްކަތް ކުރަންޖެހޭކަން ހަނދާންކޮށްދިނުމެވެ.

ގިނަ ފަހަރަށް މީހުން އެހެން މީހުންނާއި ހާލަތްތައް ޖަޖު ކުރަނީ އަމިއްލަ ވިސްނުމަކުންނެވެ. ނަމަވެސް މީސްތަކުންގެ ޚިޔާލުގެ ބޭރުން އޮތް ދުނިޔެއެއް އެބައޮތެވެ. މީހެއްގެ ކިބައިގައި ކޮންމެވެސް ވަރެއްގެ އުނގެނުމުގެ މައްސަލައެއް ނުވަތަ ދަތިކަމެއް ހުރެދާނެތީ، ބައެއް މީހުން އެ ކަންކަން ނެގެޓިވް ވިސްނުމަކުން ނަގާފާނެއެވެ. ހަމައެއާއެކު، ތަފާތު ގޮތަކަށް ދަސްކުރާ މީހަކަށް، އެމީހެއްގެ އަމިއްލަ ވިސްނުމަށްޓަކައި، އެހެން ގޮތަކަށް މާނަކުރާ ކަންކަންވެސް ބޭނުންވެދާނެއެވެ.