މޯލްޑިވްސް ކަސްޓަމްސްގެ އޮޕަރޭޝަންތަކުގައި އާޓިފިޝަލް އިންޓެލިޖެންސް (އޭއައި) ރަސްމީކޮށް ހިމަނައި ބޭނުންކުރަން ފަށައިފިއެވެ.
ބައިނަލްއަގްވާމީ ކަސްޓަމްސް ދުވަހުގެ މުނާސަބަތުގައި ބޭއްވި ރަސްމިއްޔާތެއްގައި އިފްތިތާހުކުރި މި ޓްރާންސްފޯމޭޓިވް ޚިދުމަތަކީ ޓެކްނޮލޮޖީގެ ޒަމާނީ ތަރައްޤީއާ އެކު މަސައްކަތްތައް އަވަސްކޮށް ފަސޭހަކުރުމަށްޓަކައި އެޅުނު މުހިންމު ހަރުދަނާ ފިޔަވަޅެކެވެ.
މީގެ ކުރިން މުދާ ޑިކްލެއަރކުރުމާއި ކަސްޓަމްސްގެ ފޯމަލިޓީތައް ނެވިގޭޓް ކުރުމަކީ ވަގުތު ހޭދަވާ ކަމެކެވެ. އެހެން ނަމަވެސް މިހާރު އެ މަސައްކަތްތަކުގައި އޭއައި ހިމެނުމުން ރާއްޖޭގެ އިމްޕޯޓަރުންނާއި އެކްސްޕޯޓްކުރާ ފަރާތްތަކަށްވެސް އެމީހުންގެ މުދާ އަވަހަށް ޕްރޮސެސްވެ ޚިދުމަތުގެ އިތުބާރު މިހާރަށްވުރެ އިތުރަށް ބޮޑުވެގެން ދާނެއެވެ.
ކަސްޓަމްސްއިން ވަނީ އެ އިދާރާގެ ރަސްމީ ވެބްސައިޓްގައިވެސް އޭއައި އިންޓަގްރޭޓްކޮށްފައެވެ. އެގޮތުން މުދަލެއްގެ މައުލޫމާތާއި ޓެރިފް ރޭޓް ހޯދާލުމަށް ސާޗް ކުރާއިރުވެސް ސީދާ އޭގެނަން ނުވަތަ ސްޕެލިން ރަނގަޅަށް ނުޖެހި ނުބައިކޮށް ޖެހުނަސް އޭއައިގެ އެހީގައި ޕްރެޑިކްޝަން ސެލެކްޝަންއެއް ލިބޭނެއެވެ. އޭރުން ހޯދަން އުޅޭ އެއްޗެއް ހޯދާލަން އަވަސްވެފައި ފަސޭހަވާނެއެވެ.
އިމްޕޯޓް އެކްސްޕޯޓް މުދާ އޮޓޮމެޓިކުން ކެޓަގަރައިޒް ކުރެވޭ ގޮތަށް ފަރުމާކޮށްފައިވާ އޭއައި ސިސްޓަމެއް ކަސްޓަމްސްގައި ބޭނުން ކުރަން ފެށިފައިވާއިރު، މި ޓެކްނޮލޮޖީގެ ސަބަބުން ޕްރޮސެސިންގެ ވަގުތުތައް ވަރަށް ބޮޑަށް މަދުކޮށް، މުޅި ކަސްޓަމްސް ޑިކްލަރޭޝަން ޕްރޮސެސް ސްޓްރީމްލައިން ކުރެވޭނެއެވެ.
މިއީ ދުނިޔޭގެ ސަޕްލައި ޗެއިންތައް ތަރައްޤީވަމުން އަންނަ ދަނޑިވަޅެއްގައި، ރާއްޖޭގެ އިޤްތިޞާދު ހަރުދަނާކުރުމަށް އެޅުނު މުހިންމު ފިޔަވަޅެކެވެ.
ކަސްޓަމްސްގެ ޚިދުމަތްތައް އެއްދުވަހުން އަނެއްދުވަހަށް ހަރުދަނާގޮތެއްގައި ކުރިއަށް ގެންދިއުމަށް މޯލްޑިވްސް ކަސްޓަމްސް އިން ޓާގެޓްތަކެއް ކަނޑައަޅާފައިވާއިރު، އަލަށް ތަޢާރަފްކުރެވުނު މި އޭއައި ސިސްޓަމާއެކު މުސްތަޤުބަލުގައި އިތުރު ޚިދުމަތްތައްވެސް އެސިސްޓަމް މެދުވެރިކޮށް ލިބިގެންދާނެކަމަށް ބެލެވެއެވެ.
ރާއްޖޭގެ ކަސްޓަމްސްއިން އޭއައި ބަލައިގެންފައިވާއިރު، މި ޓެކްނޮލޮޖީތަކުގެ މުހިންމުކަމާއި، ބޭނުންތެރިކަން ދެނެގަނެ، ދުނިޔޭގެ އެކި ކަންކޮޅުތަކުގައި ކަސްޓަމްސް އެޖެންސީތައް އަންނަނީ އޭއައި އިން އުފައްދާ ސޮލިއުޝަންތަކަށް އެނބުރެމުންނެވެ.
އޭއައިގެ ސަބަބުން ކަސްޓަމްސްގެ އޮޕަރޭޝަންތަކަށް ގިނަ ފައިދާތަކެއް ލިބޭއިރު، އޭއައި އެލްގޯރިދަމްތަކުން ޝައްކުކުރެވޭ އެކްޓިވިޓީ އާއި މަނާކަން ދެނެގަތުމަށް ގިނަ އަދަދެއްގެ ޑޭޓާ އެނަލައިޒްކޮށް، ޓާގެޓެޑް އިންސްޕެކްޝަންތައް އިތުރުވެ، ބޯޑަރު ސެކިއުރިޓީ ރަނގަޅު ކުރެވިގެން ދާނެއެވެ.
އަދި ހަމަ އެހެންމެ އޭއައި ސިސްޓަމްތަކުގެ ސަބަބުން މުދަލުގެ ސައްހަ ކްލެސިފިކޭޝަނާއި ވެލިއުއޭޝަން ކަށަވަރުކޮށް، ވިޔަފާރީގެ ގަވާއިދުތަކަށް ފުރިހަމައަށް ބޯލެނބުމަށް މަގުފަހިވެގެންދާނެއެވެ. މީގެއިތުރުންވެސް ރޫޓިން ޓާސްކްތައް އޮޓޮމޭޓްކުރެވި އިންސާނީ ވަސީލަތްތައްކަށް މަސައްކަތުގެ ލޯޑް ވަރަށްބޮޑަށް ކުޑަވެގެން ދާނެއެވެ.
ޖުމްލަގޮތެއްގައި، ބަލާއިރު، މި އީޖާދީ ވިސްނުންތައް ގެންގުޅުމުން، ކަސްޓަމްސްގެ ކަންކަން ހަރުދަނާކޮށް، ބޭރުގެ އިންވެސްޓްމަންޓްތައް ގެނައުމަށާއި، އިޤްތިޞާދު ދެމެހެއްޓެނިވި ކުރިއެރުމަކަށް ގެންދިއުމަށް، ޤައުމު އޮތީ ވަރަށް ރަނގަޅަށް ތައްޔާރަށްކަން ދޭހަކޮށްދެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.