އޭއައި ޓެކްނޮލޮޖީ ބޭނުންކޮށްގެން ހަދާފައިވާ ރޮބޮޓިކްސް ސިސްޓަމެއް ކަމުގައިވާ 'ރޮބޮޓް ޑެންޓިސްޓް' އަކުން އިންސާނެއްގެ ދަތުގެ ފަރުވާއެއް އޮޓޮމޭޓިކްކޮށް ފުރިހަމަކޮށްފިއެވެ. ޕަސެޕްޓިވް އިން ފަރުމާކޮށްފައިވާ މި ސިސްޓަމުގެ ބޭނުމަކީ އިންސާނުންނަށްވުރެ މާ އަވަހަށް އަދި ސައްހަކަން ބޮޑުކޮށް ދަތުގެ ފަރުވާތައް ފޯރުކޮށްދިނުމެވެ.
މި ޓެކްނޮލޮޖީގައި ހިމެނެނީ އޭއައި އަށް ބިނާކޮށްފައިވާ 3ޑީ އިމޭޖިންގ ސޮފްޓްވެއަރ އަކާއި ދަތުގެ ފަރުވާތައް ދިނުމަށް ބޭނުންކުރާ ރޮބޮޓިކް އަތެކެވެ. މީގެ އިތުރުން، މި ސިސްޓަމަށް ވަރަށް އަވަހަށް އަދި ސައްހަކަމާއެކު، ހަރަކާތްތެރިވާން ޖެހޭ ކޮންމެ ހާލަތްތެއްގައިވެސް މަސައްކަތްކުރެވޭނެ ކަމަށް ބުނެއެވެ.
ޕަސެޕްޓިވްގެ އުންމީދަކީ ދަތުގައި ކްރައުން އެޅުން ފަދަ ފަރުވާތައް 15 މިނެޓްގެ ތެރޭގައި ނިންމާލެވޭނެ ގޮތް ހެދުމެވެ. އަދި މިކަމަށް ދެވަނަ އެޕޮއިންޓްމަންޓެއް ބޭނުން ނުވާނެއެވެ. މިއީ މިހާރު ދަތުގެ ފަރުވާ ދިނުމުގައި ހޭދަވާ ވަގުތަށްވުރެ ވަރަށް ބޮޑު ކުރިއެރުމެކެވެ.
ނަމަވެސް، މި'ރޮބޮޓް ޑެންޓިސްޓް' ބޭނުންކުރުމުގެ ކުރިން ގަވާއިދުތަކާ އެއްގޮތްވާ ގޮތުގެމަތިން ހުއްދަ ހޯދަންޖެހޭނެއެވެ. މިފަދަ އައު ޓެކްނޮލޮޖީތައް ބޭނުންކުރުމުގައި ރައްކާތެރިކަމާއި ފެންވަރު ކަށަވަރުކުރުމަކީ ވަރަށް މުހިންމު ކަމެކެވެ.
ޕަސެޕްޓިވްގެ ސީއީއޯ އަދި ބާނީ ޑރ.ކްރިސް ސިރިއެލޯ ވިދާޅުވީ މިއީ ބޮޑު ކުރިއެރުމެއް ކަމަށާއި، މިކަމުގެ ސަބަބުން ދަތުގެ ފަރުވާތައް އިތުރަށް ސައްހަކަމާއި ހަލުވިކަމާއެކު ފޯރުކޮށްދެވޭނެ ކަމަށެވެ. އަދި އާންމުންނަށް ރަނގަޅު ފެންވަރުގެ ދަތުގެ ފަރުވާ ލިބުމުގެ ފުރުސަތު ތަނަވަސްވެގެންދާނެ ކަމަށެވެ.
މި ޓެކްނޮލޮޖީ ތަރައްޤީކުރުމަށް ޕަސެޕްޓިވްއަށް 30 މިލިއަން ޑޮލަރު ލިބިފައިވެއެވެ. އަދި މީގެ އިތުރުން މެޓާގެ މާކް ޒަކަބާގްގެ ބައްޕަ އަދި ޑެންޓިސްޓެއް ކަމުގައިވާ އެޑް ޒަކަބާގްގެ އެހީތެރިކަންވެސް މި މަޝްރޫޢުއަށް ލިބިފައިވެއެވެ.
ޒަކަބާގް ވިދާޅުވީ މި ރޮބޮޓިކްސް ސިސްޓަމް ފަރުމާކޮށް ޓެސްޓުކޮށްފައިވަނީ ބަލިމީހާ އެންމެ ސީރިއަސް ހާލަތްތަކުގައިވެސް ރައްކާތެރިކަމާއެކު ފަރުވާތައް ދެވޭނެގޮތަށް ކަމަށެވެ. އަދި މިއީ ޕަސެޕްޓިވްގެ އެންމެ އިސް އަމާޒުތަކުގެ ތެރޭގައި ހިމެނޭ ކަމެއްކަމުގައި ވިދާޅުވިއެވެ.
މި އައު ޓެކްނޮލޮޖީ ތަޢާރަފުވުމާއެކު، ދަތުގެ ފަރުވާގެ ދާއިރާއަށް އައު ބަދަލުތަކެއް އަންނާނެކަމަށް ބެލެވެއެވެ. ނަމަވެސް، ބައެއް ފަރާތްތަކުން ކަންބޮޑުވުން ފާޅުކޮށްފައިވަނީ މި ޓެކްނޮލޮޖީގެ ސަބަބުން ޑެންޓިސްޓުންގެ ވަޒީފާތަކަށް ކުރާނެ އަސަރާ ގުޅޭގޮތުންނެވެ. އެހެންނަމަވެސް، ޕަސެޕްޓިވްއިން ބުނެފައިވަނީ މި ޓެކްނޮލޮޖީގެ ބޭނުމަކީ ޑެންޓިސްޓުންގެ މަސައްކަތަށް އެހީތެރިވެދިނުން ކަމަށާއި، އެ ބޭފުޅުންގެ މަސައްކަތް ފަސޭހަކޮށްދިނުން ކަމުގައެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.