"ރައިޓު ޑިސްކަނެކް އަވާސް"އަށް އޮސްޓްރޭލިއާގައި ޢަމަލުކުރަނީ

"މަސައްކަތުން ވަކިވުމުގެ ޙައްޤު" ގެ ގަވާއިދެއް އޮސްޓްރޭލިއާގައި ޢަމަލުކުރަން ފަށައިފިއެވެ. މި ގަވާއިދުގެ ސަބަބުން، މުވައްޒަފުން އެމީހުންގެ ދުވަހުގެ މަސައްކަތް ނިންމުމަށްފަހު ވެރިންގެ ފަރާތުން އަންނަ ފޯނު ކޯލުތަކަށް ޖަވާބުދިނުމަށް ނުވަތަ އީމެއިލް ކިޔަން މަޖުބޫރުވާކަމަށް ދެކޭ މީހުންނަށް ލުޔެއް ލިބިގެންދާނެއެވެ.

އައު ޤާނޫނުގެ ދަށުން، މުވައްޒަފުން އެމީހުންގެ ވެރިންގެ ފަރާތުން އަދަބެއް ލިބިދާނެކަމުގެ ބިރަކާއި ނުލައި، މަސައްކަތުގެ ގަޑިން ބޭރުގައި ލިބޭ މުޢާމަލާތްތަކަށް ޖަވާބު ނުދިނުމުގެ އިޚްތިޔާރު ލިބިގެންވެއެވެ.

ޤާނޫނުގައި ވަޒީފާދޭ ފަރާތްތަކަށް މަސައްކަތުގެ ގަޑިން ބޭރުގައި މުވައްޒަފުންނާ ގުޅުން މަނާކޮށްފައެއް ނުވެއެވެ. ނަމަވެސް އޭގެ ބަދަލުގައި، މުވައްޒަފުންގެ ޖަވާބު ދިނުމަށް އިންކާރުކުރުން އެކަށީގެންނުވާ ކަމެއް ކަމުގައި ނުބެލެވޭނަމަ، ޖަވާބު ނުދިނުމުގެ ޙައްޤު މުވައްޒަފުންނަށް ދީފައިވެއެވެ.

ގަވާއިދުތަކުގެ ދަށުން، ވަޒީފާދޭ ފަރާތްތަކާއި ވަޒީފާ އަދާކުރާ ފަރާތްތަކުން އެމީހުންގެ މެދުގައި އުފެދޭ ޚިލާފުތައް ޙައްލުކުރަން މަސައްކަތްކުރަންވާނެއެވެ. އެގޮތަށް މައްސަލަ ޙައްލުކުރުމަށް ކުރާ މަސައްކަތް ކާމިޔާބުނުވެއްޖެނަމަ، އޮސްޓްރޭލިއާގެ ފެއަރ ވަރކް ކޮމިޝަން (އެފްޑަބްލިއުސީ) އަށް އެކަމުގައި އެހީތެރިވެވިދާނެއެވެ.

މިކަމާއި ގުޅިގެން އެފްޑަބްލިއުސީ އަށް މުވައްޒަފާ މަސައްކަތުގެ ގަޑިން ބޭރުގައި ގުޅުން ހުއްޓާލުމަށް ވަޒީފާދޭ ފަރާތަށް އަމުރުކުރެވިދާނެ އެވެ. އަދި އެފްޑަބްލިއުސީ އިން ފާހަގަކުރެވިއްޖެނަމަ މުވައްޒަފު ޖަވާބުދާރީ ނުވުމަކީ އެކަށީގެންނުވާ ކަމެއްކަމަށާއި، އެފަރާތަށް ޖަވާބުދާރީވުމަށް އަމުރުކުރެވިގެންދާނެއެވެ.

އެފްޑަބްލިއުސީ (އޮސްޓްރޭލިއާގެ ވަޒީފާއާބެހޭ ކޮމިޝަން) ގެ އަމުރުތަކާ ޚިލާފުވުމުގެ ނަތީޖާއެއްގެ ގޮތުން، މުވައްޒަފަކަށް 19,000 އޮސްޓްރޭލިއާ ޑޮލަރު (12,897 އެމެރިކާ ޑޮލަރު ނުވަތަ 9,762 ޕައުންޑް) އާ ހަމައަށް ޖޫރިމަނާ ކުރެވިދާނެއެވެ. އަދި ކުންފުންޏަކަށް 94,000 އޮސްޓްރޭލިއާ ޑޮލަރާ ހަމައަށް ޖޫރިމަނާ ކުރެވިދާނެއެވެ.

މަސައްކަތްތެރިން ތަމްސީލުކުރާ ޖަމްޢިއްޔާތަކުން މި ފިޔަވަޅަށް މަރުޙަބާ ކިޔައިފައިވާއިރު،"މިއީ މަސައްކަތްތެރިންނަށް އެމީހުންގެ މަސައްކަތުގެ ވަގުތުން ބޭރުގައި ކުރެވޭ އެކަށީގެންނުވާ މުޢާމަލާތްތައް ދެކޮޅު ހެދުމުގެ ބާރު ދޭނެ އަދި މަސައްކަތާއި އަމިއްލަ ދިރިއުޅުމުގެ ދެމެދު ރަނގަޅު ވަޒަނެއް ގެނުވައިދޭނެ ކަމެކެވެ،" އޮސްޓްރޭލިއާގެ ވަޒީފާއާބެހޭ ޔޫނިއަންތަކުގެ ކައުންސިލުން ބުނެފައިވެއެވެ.