ޓިކްޓޮކުން ރައްކާތެރިކަމުގެ އާ ވަޞީލަތްތަކެއް ތަޢާރަފްކޮށްފި

ޓިކްޓޮކުން ޢާއިލާތަކަށް ޑިޖިޓަލް ސަލާމަތްތެރިކަމުގެ އައު ވަސީލަތްތަކެއް ތަޢާރަފުކޮށްފިއެވެ.

ޓިކްޓޮކް އަދި ފެމިލީ އޮންލައިން ސޭފްޓީ އިންސްޓިޓިއުޓް (އެފްއޯއެސްއައި) ގުޅިގެން، ޢާއިލާތަކަށް އަމާޒުކޮށްގެން "ޑިޖިޓަލް ސޭފްޓީ ޕާޓްނަރޝިޕް ފޯ ފެމިލީޒް" ނަމުގައި ތަޢާރަފުކުރި މި ވަސީލަތުގެ މައިގަނޑު މަޤްޞަދަކީ އޮންލައިން ސަލާމަތްތެރިކަމާ ބެހޭގޮތުން ޢާއިލާތަކުގެ މެދުގައި މަޝްވަރާކުރުމަށް މަގުފަހިކޮށްދިނުމާއި، އެކަށީގެންވާ ޑިޖިޓަލް ސުލޫކީ މިންގަނޑުތަކެއް ކަނޑައެޅުމަށް މަގުފަހިކޮށްދިނުމެވެ.

މި އައު ވަސީލަތް ފަރުމާކުރެވިފައިވަނީ ވަކި އެޕެއް ނުވަތަ ޚިދުމަތަކަށް ޚާއްޞަކޮށްގެންނެއް ނޫނެވެ. އެހެންކަމުން، މައިންބަފައިންނާއި ޅަފުރައިގެ ކުދިންނަށް އެމީހުންގެ ބޭނުންތަކަށް އެކަށޭނަ ގޮތަށް މި ވަސީލަތް ބޭނުންކުރެވޭނެއެވެ. މި ވަސީލަތުގެ އެހީގައި ޢާއިލާތަކަށް މަޝްވަރާކުރެވޭނެ ބައެއް މުހިންމު ކަންތައްތަކުގެ ތެރޭގައި:

- އޮންލައިން ތަޖުރިބާތަކާ ބެހޭގޮތުން ގަވާއިދުން މަޝްވަރާކުރުމުގެ މުހިންމުކަން

- ޑިވައިސްތައް ޒިންމާދާރުކަމާއެކު ބޭނުންކުރުމުގެ އުސޫލުތައް ކަނޑައެޅުން

- އެޕްތަކުގެ ގަވާއިދުތަކާއި، ސަލާމަތީ ފީޗަރތަކާއި، ބެލެނިވެރިންގެ ކޮންޓްރޯލްތައް ބޭނުންކުރުމުގެ ކުރިން އެކަންކަން ދިރާސާކުރުމަށް އެއްބަސްވުން

ހިމެނެއެވެ.

ޓިކްޓޮކުން އިތުރަށް ވަނީ އެ ކުންފުނީގެ "ގާޑިއަންސް ގައިޑް" އަދި "ޓީން ސޭފްޓީ ސެންޓަރ" އަޕްޑޭޓްކޮށްފައެވެ. މި އަޕްޑޭޓްތަކުގައި:

- އިތުރު ވީޑިއޯ ކޮންޓެންޓް

- ކުއިޒްތައްފަދަ އިންޓަރެކްޓިވް ފީޗަރތައް

- ބްލޮކްކުރުމާއި ރިޕޯޓުކުރުން މަސައްކަތްކުރާ ގޮތުގެ އިތުރު މަޢުލޫމާތު

ހިމަނާފައިވާކަމަށް ޓިކްޓޮކުން ބުނެއެވެ.

އެމެރިކާގެ ބެލެނިވެރިންގެ މެދުގައި ކުރެވުނު ސަރވޭއަކުން ދައްކާގޮތުގައި، 48% ބެލެނިވެރިން ބޭނުންވަނީ ކުދިންނަށް ނޭދެވޭ ކޮންޓެންޓް ނުފެންނާނެ ގޮތަށް ފިލްޓަރކުރާނެ ގޮތުގެ ތަމްރީނު ލިބުމަށެވެ. އަދި 37% ބެލެނިވެރިން ބޭނުންވަނީ އެކައުންޓެއް ހަދަން ނުޖެހި މި މަޢުލޫމާތު ލިބޭނެ ގޮތް ހެދުމަށެވެ.

މި ކަންކަމަށް އަމާޒުކޮށް، ޓިކްޓޮކުން ވަނީ ހަތަރު މުހިންމު ސަލާމަތީ ފީޗަރއެއް ފާހަގަކޮށްފައެވެ. އެއީ:

1. ފެމިލީ ޕެއަރިންގ

2. 16 އަހަރުން ދަށުގެ ކުދިންނަށް އުމުރާ އެކަށީގެންވާ ޑިފޯލްޓް ސެޓިންގތައް

3. ކީވާޑް ފިލްޓަރިންގ

4. ކޮމެންޓް ޕްރައިވަސީ ސެޓިންގތައް

މި ފީޗަރތަކާ ބެހޭ މަޢުލޫމާތު ފެތުރުމަށްޓަކައި ޓިކްޓޮކުން ވަނީ ޤައުމީ އަދި ލޯކަލް ޓީވީ ކެމްޕޭނެއް ފެށުމަށް ނިންމާފައެވެ. މި ކެމްޕޭނުގައި ބައިވެރިވާނީ ޓިކްޓޮކުގައި މަޝްހޫރު، އަދި ޅަފުރައިގެ ދަރިން ތިބި ބައެއް ކްރިއޭޓަރުންނެވެ.

ޓިކްޓޮކުން ބުނާ ގޮތުގައި، 16 އަހަރުން ދަށުގެ ކުދިންނަށް ޑައިރެކްޓް މެސެޖު ފޮނުވުން ހުއްޓުވުމާއި، 18 އަހަރުން ދަށުގެ އެންމެންނަށް އެއް ގަޑިއިރުގެ ސްކްރީން ޓައިމް ލިމިޓެއް ކަނޑައެޅުން ފަދަ ފިޔަވަޅުތައް ނަގާފައިވީ ނަމަވެސް، މި މަސައްކަތަކީ ދެމެހެއްޓެނިވި ގޮތެއްގައި ކުރިއަށްގެންދަންޖެހޭ ކަމެއްކަމުގައި އެ ކުންފުނިން ދެކެއެވެ.