ސޯޝަލް މީޑިއާ ދާއިރާގެ ބޮޑު ކުންފުންޏެއް ކަމަށްވާ ސްނެޕް އިން އޮގްމެންޓެޑް ރިއަލިޓީ (އޭއާރު) ގެ ދާއިރާގައި އާ ހޯދުމެއް ހޯދައިފިއެވެ. އެ ކުންފުނިން މިއަދު ތަޢާރަފުކޮށްފައިވަނީ ފަސްވަނަ ޖީލުގެ ސްޕެކްޓެކަލްސް ނަމަކަށް ކިޔާ އޭއާރު އައިނުތަކެކެވެ.
މި ސްޕެކްޓެކަލްސްގެ އެންމެ ޚާއްޞަ މުހިންމު ސިފައަކީ ލެންސްތައް ބޭނުންކޮށްގެން ރަހުމަތްތެރިންނާއެކު ދުނިޔެ ބަލައިލުމުގެ އާ ގޮތްތަކެއް ތަޖުރިބާކުރެވުމެވެ. މި އައިނުތައް ރަންކުރަނީ "ސްނެޕް އޯއެސް" ނަމަކަށް ކިޔާ އޮޕަރޭޓިންގ ސިސްޓަމަކުންނެވެ. މިއީ މީހުން އާންމު ގޮތެއްގައި ދުނިޔެއާ މުޢާމަލާތްކުރާ ގޮތް އިތުރަށް ފުރިހަމަކުރުމަށް އެކުލަވާލާފައިވާ ނިޒާމެކެވެ.
ބަރުދަނުގައި 226 ގްރާމް ހުންނަ މި ސްޕެކްޓަކަލްސްއަކީ އާންމު ވާރޗުއަލް ރިއަލިޓީ (ވީއާރު) ހެޑްސެޓަކާ އަޅާބަލާއިރު ދެބައިކުޅަ އެއްބަޔަށްވުރެ ލުއި އުފެއްދުމެކެވެ. މި އައިނުތަކުގައި ހަތަރު ކެމެރާ ހަރުކުރެވިފައި ވާއިރު، ވަށައިގެންވާ މާހައުލުގައި ހުންނަ އެއްޗެހި ދެނެގަންނަ ނިޒާމަކާއި، އަތުގެ ހަރަކާތްތައް ދެނެގަންނަ ނިޒާމެއްވެސް ހިމެނެއެވެ.
ސްނެޕް އިން މަޢުލޫމާތު ދީފައިވާ ގޮތުގައި، މި އައިނުތަކުގެ އޮޕްޓިކަލް އިންޖީނު ފަރުމާކޮށް އުފައްދާފައިވަނީ އެ ކުންފުނިންނެވެ. މި އިންޖީނު މެދުވެރިކޮށް ފެންވަރު ރަނގަޅު އޭއާރު ޑިސްޕްލޭއެއް ބޭނުންކުރެވެއެވެ. އަދި ކުދިކުދި ޕްރޮޖެކްޓަރުތަކެއް ބޭނުންކޮށްގެން ސާފު އަދި ހިތްގައިމު މަންޒަރުތަކެއް ދައްކުވައިދެއެވެ.
މީގެ އިތުރުންވެސް މި ސްޕެކްޓަކަލްސްގެ އެންމެ މުހިންމު ސިފަތަކުގެ ތެރޭގައި 46 ޑިގްރީގެ ފުޅާ ރޭންޖެއްގައި ފެންނަ ސަރަހައްދެއް ހިމެނެއެވެ. އަދި 37 ޕިކްސެލް-ޕަރ-ޑިގްރީ ރެޒޮލިއުޝަނެއް ހިމެނޭއިރު، މިއީ 10 ފޫޓު ދުރުގައި ހުންނަ 100 އިންޗީގެ ޑިސްޕްލޭއަކާ އެއްވަރުގެ މިންކުރުމެކެވެ. މީގެ އިތުރުން، މާހައުލުގެ އަލިކަމަށް ބަލައި އަމިއްލައަށް އޭގެ ލެންސް ކަޅުކުލައަށް ބަދަލުވާ ނިޒާމެއްވެސް އެކުލެވިގެންވެއެވެ.
ސްނެޕް އޯއެސް ނަމަކަށް ކިޔާ އޮޕަރޭޓިންގ ސިސްޓަމުގެ ސަބަބުން ސްޕެކްޓަކަލްސް އަށް ދިރުން ލިބެއެވެ. މި ނިޒާމު ބޭނުންކުރުމަށް އަތާއި އަޑު ބޭނުންކުރެވެއެވެ. އަދި މައި މެނޫ އަބަދުވެސް އަތުގެ ތިލައިގައި ފެންނަން ހުންނާނެއެވެ.
ސްނެޕް އިން ވަނީ ޑިވެލޮޕަރުންނަށް އެހީތެރިވުމަށް އިތުރު ފިޔަވަޅުތަކެއް އަޅާފައެވެ. މިގޮތުން ލެންސް ސްޓޫޑިއޯ 5.0 ތަޢާރަފުކޮށްފައިވާއިރު، މީގެ ސަބަބުން ޑިވެލޮޕަރުންނަށް އަވަހަށް ލެންސްތައް ތައްޔާރުކޮށް ސްޕެކްޓަކަލްސް އަށް އަޕްލޯޑުކުރެވޭނެއެވެ. އަދި އޯޕަންއޭއައި އާ ގުޅިގެން އިތުރު ކްލައުޑް-ހޯސްޓެޑް މަލްޓިމޯޑަލް އޭއައި މޮޑެލްތަކެއްވެސް ސްޕެކްޓަކަލްސް އަށް ގެނެވޭނެއެވެ.
މި އާ ޓެކްނޮލޮޖީ ބޭނުންކޮށްގެން ވަރަށް ގިނަ ކުންފުނިތަކަކުން އާ ތަޖުރިބާތަކެއް ތައްޔާރުކުރަމުންދާކަމަށް ސްނެޕް އިން ބުނެފައިވެއެވެ. މީގެ ތެރޭގައި ލެގޯ ގްރޫޕް، ސްޓާރ ވޯޒް ފްރެންޗައިޒް، ނިއަންޓިކް އަދި ވަބިސަބި ގޭމްސް ހިމެނެއެވެ.
އެމެރިކާގައި ޑިވެލޮޕަރުންނަށް މަހަކު 99 ޑޮލަރަށް އަހަރު ދުވަހުގެ މުއްދަތަށް ސްޕެކްޓަކަލްސް ޑިވެލޮޕަރ ޕްރޮގްރާމުގައި ބައިވެރިވެވޭނެއެވެ. މި ޕްރޮގްރާމުގެ ދަށުން ސްޕެކްޓަކަލްސް ބޭނުންކުރުމުގެ ފުރުސަތު ލިބުމުގެ އިތުރުން ޕްރޮޖެކްޓްތައް ތަރައްޤީކުރުމަށް ސްނެޕްގެ އެހީތެރިކަން ލިބޭނެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.