މަޝްހޫރު ނޫސް ކުންފުނި ގާޑިއަން އިން އެކްސް (ކުރީގެ ޓްވިޓަރ) ޕްލެޓްފޯމުގައި އިތުރަށް ކޮންޓެންޓް ޕޯސްޓް ނުކުރުމަށް ނިންމައިފިއެވެ. މި ނިންމުން ނިންމާފައިވަނީ އެ ޕްލެޓްފޯމުގައި ފެންނަމުންދާ "ކަންބޮޑުވާ ފަދަ" ކޮންޓެންޓްތަކާ ގުޅިގެންކަމަށް އެކުންފުނިން ބުނެއެވެ.
ގާޑިއަން އިން ކިޔުންތެރިންނަށް އަންގާފައިވާ ގޮތުގައި، އެ ކުންފުނީގެ އެއްވެސް ރަސްމީ އެކައުންޓަކުން އެކްސް ޕްލެޓްފޯމުގައި އިތުރު ޕޯސްޓެއް ނުކުރާނެއެވެ. މި ނިންމުން ނިންމާފައިވަނީ އެ ޕްލެޓްފޯމުގައި ހުންނަ ކަނާތުފިޔައިގެ ކޮންސްޕިރަސީ ތިއަރީތަކާއި ނަސްލީ ތަފާތުކުރުންތަކާ ގުޅޭ ކޮންޓެންޓްތަކާ ގުޅިގެންނެވެ.
ގާޑިއަން އިން ބުނެފައިވާ ގޮތުގައި، އެމެރިކާގެ ރިޔާސީ އިންތިޚާބާ ގުޅޭ ގޮތުން އެކްސް ޕްލެޓްފޯމުގައި ހުރި ކޮންޓެންޓްތަކުން މި ނިންމުން ނިންމުމަށް އިތުރު ބާރެއް ލިބުނެވެ. އަދި އެކްސްގެ ވެރިފަރާތް އީލޮން މަސްކް އަށް އެ ޕްލެޓްފޯމް މެދުވެރިކޮށް ސިޔާސީ ވާހަކަތައް ބައްޓަންކުރުމުގެ ނުފޫޒު ލިބިފައިވާކަމަށް ގާޑިއަން އިން ބުނެފައިވެއެވެ.
ގާޑިއަން އަކީ އެކްސް ޕްލެޓްފޯމުގައި 80 އަށްވުރެ ގިނަ އެކައުންޓް އޮތް، 27 މިލިއަނަށްވުރެ ގިނަ ފޮލޯވަރުން ތިބި ނޫސް ކުންފުންޏެކެވެ.
އެކްސް ޕްލެޓްފޯމުގެ ކޮންޓެންޓް ސްޓޭންޑަޑްތަކާ ގުޅިގެން ނަފްރަތުގެ ވާހަކަތަކާ ދެކޮޅު ކެމްޕޭން ގްރޫޕްތަކާއި ޔޫރަޕިއަން ޔޫނިއަން އިން އީލޮން މަސްކްގެ އަމަލުތަކާމެދު ފާޑުކިޔާފައިވެއެވެ.
2022 ވަނަ އަހަރު 44 ބިލިއަން ޑޮލަރަށް އެކްސް ގަތް މަސްކް އަކީ އަމިއްލައަށް ވިދާޅުވާ ގޮތުގައި "ވާހަކަ ދެއްކުމުގެ މިނިވަންކަމުގެ އެބްސޮލިއުޓިސްޓެކެވެ." އޭނާ ވަނީ ކޮންސްޕިރަސީ ތިއަރިސްޓް އެލެކްސް ޖޯންސް، އަންހެނުންނަށް ނަފްރަތްކުރާ އިންފްލުއެންސަރ އެންޑްރޫ ޓޭޓް އަދި ބްރިޓިޝް ހައްދުފަހަނައަޅާފައިވާ ކަނާތުފިޔައިގެ އެކްޓިވިސްޓް ޓޮމީ ރޮބިންސަން ފަދަ ފަރާތްތަކުގެ ބަންދުކޮށްފައިވާ އެކައުންޓްތައް އަލުން ހުޅުވާފައެވެ.
ގާޑިއަން އިން ބުނެފައިވާ ގޮތުގައި، އެކްސް ބޭނުންކުރާ ފަރާތްތަކަށް ގާޑިއަންގެ އާޓިކަލްތައް އެ ޕްލެޓްފޯމުގައި ޝެއަރ ކުރެވޭނެއެވެ. އަދި ގާޑިއަންގެ ލައިވް ނިއުސް ރިޕޯޓިންގގައި އެކްސްގެ ޕޯސްޓްތައް އެމްބެޑް ކުރެވޭނެއެވެ. އަދި ގާޑިއަންގެ ރިޕޯޓަރުންނަށް ނިއުސް ގެދަރިންގ އަށް އެކްސް ބޭނުންކުރެވޭނެއެވެ.
ގާޑިއަންގެ ރަސްމީ އެކައުންޓްތައް އެކްސް އިން ވަކިވިޔަސް، އެ ކުންފުނީގެ ސޯޝަލް މީޑިއާ ގައިޑްލައިންތަކާ އެއްގޮތަށް ވަކިވަކި ރިޕޯޓަރުންނަށް އެކްސް ބޭނުންކުރުމަށް ހުރަހެއް ނެތެވެ.
ގާޑިއަން އިން ބުނެފައިވާ ގޮތުގައި، ސޯޝަލް މީޑިއާ އަކީ ނޫސް ކުންފުނިތަކަށް މުހިންމު ވަސީލަތެކެވެ. އަދި އާ އޯޑިއަންސްތަކާ ހަމައަށް ވާސިލުވުމަށް އެހީތެރިވެދެއެވެ. ނަމަވެސް މިވަގުތު އެކްސް ޕްލެޓްފޯމުން ގާޑިއަންގެ މަސައްކަތް ޕްރޮމޯޓް ކުރުމުގައި އަދާކުރަމުންދަނީ ވަރަށް ކުޑަ ދައުރެކެވެ. ގާޑިއަންގެ ނޫސްވެރިކަން އެ ކުންފުނީގެ ވެބްސައިޓުން ހުރިހާ ފަރާތްތަކަށް ލިބެން ހުންނާނެކަމަށާއި، މީހުން ގާޑިއަންގެ ވެބްސައިޓަށް އައިސް އެ ކުންފުނީގެ މަސައްކަތަށް އެހީތެރިވުމަށް އެދޭކަމަށް ގާޑިއަން އިން ބުނެފައިވެއެވެ.
ފާއިތުވި އަހަރު، އެމެރިކާގެ ނޮން-ޕްރޮފިޓް މީޑިއާ ކުންފުނި ނޭޝަނަލް ޕަބްލިކް ރޭޑިއޯ (އެންޕީއާރު) އިން އެކްސްގައި ޕޯސްޓް ކުރުން ހުއްޓާލިއެވެ. މިގޮތަށް ހުއްޓާލީ އެކްސް އިން އެންޕީއާރު އަށް "ދައުލަތާ ގުޅުންހުރި މީޑިއާ" ގެ ލޭބަލް ޖެހުމާ ގުޅިގެންނެވެ. އެމެރިކާގެ ޕަބްލިކް ޓީވީ ބްރޯޑްކާސްޓަރ ޕީބީއެސް އިން ވެސް ވަނީ އެ ސަބަބަށްޓަކައި އެކްސްގައި ޕޯސްޓް ކުރުން ހުއްޓާލާފައެވެ.
މީގެ އިތުރުން މި މަހު، ބަރލިން ފިލްމު ފެސްޓިވަލް އިން ވެސް ވަނީ އެކްސް ދޫކޮށްލާފައެވެ. ނަމަވެސް އެކަމުގެ ރަސްމީ ސަބަބެއް ބަޔާންކޮށްފައެއް ނުވެއެވެ. އަދި ފާއިތުވި މަހު، ނޯތު ވޭލްސް ފުލުހުން ވެސް އެކްސް ބޭނުންކުރުން ހުއްޓާލާފައިވެއެވެ. އެކަން އެގޮތަށް ކުރީ އެކްސް އަކީ "އެ ފަރާތުގެ އަގުތަކާ އެއްގޮތް" ތަނަކަށް ނުވާތީއެވެ. އޯގަސްޓް މަހު، ރޯޔަލް ނޭޝަނަލް އޯތޮޕީޑިކް ހޮސްޕިޓަލުން ވެސް އެކްސް ދޫކޮށްލާފައިވެއެވެ. އެކަން އެގޮތަށް ކުރީ އެ ޕްލެޓްފޯމުގައި "ނަފްރަތުގެ ވާހަކަތަކާއި އަނިޔާވެރި ކޮމެންޓްތައް އިތުރުވަމުން" ދިޔުމާ ގުޅިގެން ކަމަށް އެހޮސްޕިޓަލުންވެސް ވަނީ ބުނެފައެވެ.
މި މައްސަލައާ ގުޅޭ ގޮތުން އެކްސް އިން އަދި ރަސްމީކޮށް އެއްޗެއް ބުނިކަމެއް އެނގިފައެއް ނެތެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.