މޯބައިލް ނެޓްވޯކަށް ސްޓާލިންކުން އާ ޓެކްނޮލޮޖީއެއް

ސްޓާރލިންކްގެ މޮބައިލް ނެޓްވޯކް ޚިދުމަތް މުޅި ދުނިޔެއަށް ފޯރުކޮށްދިނުމުގެ މަޤްޞަދުގައި އެކުންފުނިން އިސްނަގައިގެން މުޅިން އާ ޓެކްނޮލޮޖީއެއް ތަޢާރަފްކުރަން ނިންމައިފިއެވެ.

ދުނިޔޭގެ އެންމެ ބޮޑެތި ޓެލެކޮމިއުނިކޭޝަން ކުންފުނިތައް އިލޮން މަސްކްގެ ސްޓާރލިންކާ ގުޅިގެން އައު ޓެކްނޮލޮޖީއެއް ތައާރަފްކުރަން ނިންމާފައިވާއިރު، މި އައު ޓެކްނޮލޮޖީގެ ސަބަބުން ދުނިޔޭގެ ކޮންމެ ހިސާބެއްގައި ވިޔަސް މޮބައިލް ނެޓްވޯކްގެ ޚިދުމަތް ލިބޭނެއެވެ.

ސްޓާރލިންކް އިން ތަޢާރަފްކުރާ އައު ޓެކްނޮލޮޖީ، ޑައިރެކްޓް-ޓު-ސެލް (ޑީޓީސީ) އާއެކު މަސައްކަތްކުރަން އެއްބަސްވެފައިވާ ކުންފުނިތަކުގެ ތެރޭގައި އެމެރިކާގެ ޓީ-މޮބައިލް، ކެނެޑާގެ ރޮޖަރސް، ނިއުޒީލަންޑްގެ ވަން އެންޒެޑް، ޖަޕާނުގެ ކޭޑީޑީއައި، އޮސްޓްރޭލިއާގެ އޮޕްޓަސް އަދި ސްވިޒަލޭންޑްގެ ސޯލްޓް ހިމެނެއެވެ.

ޑައިރެކްޓް-ޓު-ސެލް އަކީ ސްޓާރލިންކްގެ ސެޓެލައިޓްތަކާއި ސީދާ މޮބައިލް ފޯނާ ދެމެދު ގުޅުން ގާއިމްކުރެވޭ އައު ޓެކްނޮލޮޖީއެކެވެ. މި ޓެކްނޮލޮޖީގައި ބޭނުންކުރަނީ ޓީ-މޮބައިލްގެ މިޑް-ބޭންޑް ޕީސީއެސް ސްޕެކްޓްރަމްއެވެ. އާންމު މޮބައިލް ފޯނުތަކުގައިވެސް މި ޓެކްނޮލޮޖީ ބޭނުންކުރެވޭނެއެވެ. މި ގުޅުން ގާއިމްކުރެވެނީ ޖައްވުގައި ހުންނަ މުވާޞަލާތީ ސެޓެލައިޓްތަކާއި މޮބައިލް ފޯނާ ދެމެދުގައި ސީދާ ގުޅުމެއް ގާއިމްކޮށްގެންނެވެ. އެހެންކަމުން މިޓެކްނޮލޮޖީއަށް މޮބައިލް ޓަވަރުތަކެއް ބޭނުމެއް ނުވެއެވެ.

މި އައު ޚިދުމަތުގެ ސަބަބުން ނެޓްވޯކް ނުލިބޭ ސަރަޙައްދުތަކުގައި ވެސް ގުޅުން ލިބި، ދަތުރުވެރިންނަށް ދުނިޔޭގެ ކޮންމެ ތަނެއްގައި ވެސް މުވާސަލާތުކުރެވޭނެއެވެ. އަދި ކާރިސާތަކާއި ހާދިސާތަކުގައި ވެސް މުވާސަލާތީ ޚިދުމަތް މެދުނުކެނޑި ލިބޭނެއެވެ.

ސްޕޭސްއެކްސްގެ ސީއީއޯ އިލޮން މަސްކް ވިދާޅުވި ގޮތުގައި މި ޓެކްނޮލޮޖީއަކީ މުވާސަލާތީ ދާއިރާގައި އަންނަ އެންމެ ބޮޑު އެއް ކުރިއެރުމެވެ. އަދި މީގެ ސަބަބުން ދުނިޔޭގެ ހުރިހާ ހިސާބެއްގައި ތިބޭ މީހުންނަށް ވެސް ފަސޭހަކަމާއެކު އިންޓަރނެޓްގެ ޚިދުމަތް ލިބިގެންދާނެއެވެ.

އަންނަ އަހަރުގެ ތެރޭގައި މި ޚިދުމަތް އިތުރު ގައުމުތަކަށް ފުޅާކުރުމަށް ވަނީ ރޭވިފައެވެ. މީގެ ސަބަބުން ދުނިޔޭގެ މުވާސަލާތީ ވިއުގަ އިތުރަށް ފުޅާވެ، އާ ހަޔަތެއް ލިބިގެންދާނެ ކަމަށް ކަމުގެ މާހިރުން ދެކިލައްވައެވެ.

ސްޓާރލިންކްގެ މި އައު ފިޔަވަޅަކީ ދުނިޔޭގެ މުވާސަލާތީ ދާއިރާއަށް އަންނަ ބޮޑު ބަދަލެކެވެ. މި ބަދަލާއެކު، ދުނިޔޭގެ ކޮންމެ ކަންކޮޅެއްގައި ވިޔަސް މުވާސަލާތީ ޚިދުމަތްތައް ލިބުމަކީ ޙަޤީޤަތަކަށް ވެގެންދާނެއެވެ.