ދިވެހިރާއްޖޭގެ ސިއްހީ ދާއިރާގައި އިންގިލާބީ ބަދަލެއް ގެނެސްދޭނެ ޕަބްލިކް ޕޯޓަލެއް ތަޢާރަފުކޮށްފިއެވެ. މި ޕޯޓަލަކީ ދިވެހިރާއްޖޭގެ އިލެކްޓްރޯނިކް އިމިއުނައިޒޭޝަން ރެޖިސްޓްރީ (އީއައިއާރު) އާއި ސިއްހީ މަޢުލޫމާތު ނިޒާމުގެ މައްޗަށް ބިނާކޮށް ތައްޔާރުކޮށްފައިވާ މޯލްޑިވްސް އިންޓެގްރޭޓެޑް ހެލްތު އިންފޮމޭޝަން ސިސްޓަމް (މިހިސް) ގެ ޕަބްލިކް ޕޯޓަލެވެ.
މި ޕޯޓަލް ބޭނުންކުރުމަށް ރައްޔިތުން އެކައުންޓް ހަދަންޖެހޭނީ އީފާސް (eFaas) މެދުވެރިކޮށެވެ. އީފާސް އެކައުންޓެއް ނެތް ފަރާތްތަކުން efaas.gov.mv އަށް ވަދެ، "ރަޖިސްޓަރ" ބަޓަން އިން އެކައުންޓް ހެދުމަށްފަހު، mihis.health.gov.mv އަށް ވަދެ "ސައިން އިން ވިތް އީފާސް" ބަޓަން އިން ލޮގިންވެވޭނެއެވެ.
މި ޕޯޓަލްގެ ފުރަތަމަ ފިޔަވަހީގައި ކުޑަކުދިންގެ ވެކްސިނޭޝަން ރެކޯޑުތަކާއި ޑިޖިޓަލް ސެޓްފިކެޓްތައް، ކުދިންގެ ހެދިބޮޑުވުމުގެ ޗާޓުތައް، ތަރައްޤީގެ މަރުހަލާތައް، ވިޓަމިން އޭ އާއި ޑީވޯމިންގ އާ ގުޅޭ މަޢުލޫމާތު، އަދި ޕްރައިމަރީ ހެލްތު ކެއަރ ރެޖިސްޓްރީގައި ހިމެނޭ ފަރާތްތަކުގެ އަސާސީ ސިއްހީ މަޢުލޫމާތު ހިމެނެއެވެ.
ކުރިމަގުގައި މި ނިޒާމު އިތުރަށް ފުޅާކުރެވި، މެޑިކަލް ރެކޯޑުތަކާއި، މާބަނޑު އަންހެނުންނާއި ވިހެއުމަށްފަހުދެވޭ ފަރުވާގެ މަޢުލޫމާތު، އަދި ބަލިތަކާ ގުޅޭ މަޢުލޫމާތު ހިމެނޭނެ ނިޒާމަކަށް ހެދުމަށް ވަނީ ރޭވިފައެވެ.
މި ނިޒާމުގެ މައިގަނޑު ބޭނުމަކީ އުފަންވާ ކޮންމެ ކުއްޖަކަށް އުފަންވާ ދުވަހުން ފެށިގެން ޢުމުރުން ދުވަސްވަންދެން ބޭނުންވާ ސިއްހީ މަޢުލޫމާތު އެއްތަނަކުން ލިބޭނެ ނިޒާމެއް ޤާއިމުކުރުމެވެ. މިގޮތުން 2025 ވަނަ އަހަރުގެ ޖަނަވަރީ 1 ވަނަ ދުވަހުން ފެށިގެން އުފަންވާ ކޮންމެ ކުއްޖަކަށް ޑިޖިޓަލް ސިއްހީ ރެކޯޑެއް ޤާއިމުކުރެވޭނެއެވެ. މީގެ އިތުރުން، 18 އަހަރުން މަތީގެ މީހުންގެ ނުރައްކާތެރި ނުވަތަ ގައިންގަޔަށް ނާރާ ބަލިތަކާ ގުޅޭ މަޢުލޫމާތު ހިމެނޭ ވަކި ޕްރައިމަރީ ހެލްތު ކެއަރ ރެޖިސްޓްރީއެއްވެސް ވަނީ ޤާއިމުކޮށްފައެވެ.
މި މަޝްރޫޢު ކުރިއަށް ގެންދިއުމަށްޓަކައި މިނިސްޓްރީ އޮފް ހެލްތުގެ އެކި ޑިވިޜަންތަކުންނާއި އދ. ގެ އެޖެންސީތަކުން (ޑަބްލިއުއެޗްއޯ، ޔުނިސެފް، ޔުއެންއެފްޕީއޭ) މުވައްޒަފުން ހިމެނޭ ވަކި ޓީމެއް ވަނީ އެކުލަވާލާފައެވެ.
މިމަޝްރޫޢު ކުރިއަށް ގެންދިއުމަށްޓަކައި ޑަބްލިއުއެޗްއޯ އިން ވަނީ މާލީ އެހީތެރިކަމާއި ފަންނީ މާހިރުން ފޯރުކޮށްދީފައެވެ. އަދި ޑީއެޗްއައިއެސް2 އަށް ބިނާކޮށް ތައްޔާރުކޮށްފައިވާ މޮޑިއުލްތަކަށް މަޢުލޫމާތު އަޕްޑޭޓްކުރުމުގެ މަސައްކަތުގައި ސިއްހީ ދާއިރާގެ ސަތޭކަ އެތައް މުވައްޒަފުންނެއް ޝާމިލުވެއެވެ.
މޯލްޑިވްސް އިންޓެގްރޭޓެޑް ހެލްތު އިންފޮމޭޝަން ސިސްޓަމް (މިހިސް) ގެ ޕަބްލިކް ޕޯޓަލް ރަސްމީކޮށް ހުޅުވައިދެއްވީ ސިއްހަތާއި ބެހޭ ވަޒީރު އަބްދުﷲ ނާޒިމް އިބްރާހީމެވެ.
މި ނިޒާމުގައި ޚާއްސަ އެންގުންތަކެއްގެ ނިޒާމެއްވެސް ހިމެނެއެވެ. މިގޮތުން ކުރިއަށް އޮންނަ ވެކްސިން ޖަހަންޖެހޭ ތާރީޚުތަކާއި، އިތުރު ބައްދަލުވުންތަކުގެ ހަނދާންކޮށްދިނުމާއި، ކުޑަކުދިންގެ ހެދިބޮޑުވުމާއި ތަރައްޤީ މޮނިޓަރ ކުރުމަށް އެސްއެމްއެސް މެދުވެރިކޮށް އެންގޭނެއެވެ.
މި ނިޒާމުގެ ސަބަބުން ދިވެހި ރައްޔިތުންނަށް އެމީހުންގެ ސިއްހީ މަޢުލޫމާތު ފަސޭހައިން ބެލޭނެ މަގު ވަނީ ތަނަވަސްވެފައެވެ. މިއީ ސިއްހީ ޚިދުމަތްތައް ހަރުދަނާކޮށް، ރައްޔިތުންގެ ދުޅަހެޔޮކަން އިތުރުކުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، ބައެއް އަތޮޅުތަކުގެ ރައްޔިތުންނަށް ނުރައްކާތެރި ނުވަތަ ގައިންގަޔަށް ނާރާ ބަލިތަކާއި އޭގެ ނުރައްކާތަކާ ބެހޭ މަޢުލޫމާތު އަދި ޕްރައިމަރީ ހެލްތު ކެއަރ ޕްރޮގްރާމްތަކާ ބެހޭ މަޢުލޫމާތުވެސް މި ޕޯޓަލް މެދުވެރިކޮށް ލިބޭނެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.