އޯޕަންއޭއައި އިން އެ ކުންފުނީގެ މަޝްހޫރު ޗެޓްބޮޓް، ޗެޓްޖީޕީޓީ، ވަޓްސްއެޕްގައި ބޭނުންކުރެވޭނެ ގޮތް ހަދައިދީފިއެވެ. މި ޚިދުމަތަކީ ހިލޭ ލިބޭނެ ޚިދުމަތެކެވެ.
މި އައު ފީޗަރ އާއެކު، ބޭނުންވާ ފަރާތްތަކަށް ޗެޓްޖީޕީޓީ އާއި އިންސާނަކާ ވާހަކަދައްކާ ފަދައިން މުޢާމަލާތް ކުރެވޭނެއެވެ. މިއީ އޯޕަންއޭއައި އިން ކުރިއަށްގެންދާ "12 ޑޭސް އޮފް އޯޕަންއޭއައި" ޕްރޮގްރާމްގެ ދަށުން ކުރާ ދިހަވަނަ އިޢުލާނެވެ.
މި އައު ޚިދުމަތް ބޭނުންކުރުމަށް، ދުނިޔޭގެ ކޮންމެ ތަނެއްގައި ހުރި މީހަކަށްވެސް 1-800-CHATGPT (1-800-242-8478) ނަންބަރު ވަޓްސްއެޕްގައި އެޑްކުރެވޭނެއެވެ. މިއީ ޑޭޓާ ލިމިޓެޑް ކަނެކްޝަނެއްގައި ތިބި މީހުންނަށްވެސް އޭއައި އާއި މުޢާމަލާތްކުރުމުގެ ފުރުސަތު ދިނުމަށް އެޅޭ ފިޔަވަޅެކެވެ.
ވަޓްސްއެޕްއަކީ ދުނިޔޭގައި އެންމެ ގިނައިން ބޭނުންކުރާ މެސެޖިންގ އެޕްތަކުގެ ތެރެއިން އެއް އެޕެވެ. މިހާރު 2.7 ބިލިއަނަށްވުރެ ގިނަ ބޭނުންކުރާ މީހުން ތިބި މި އެޕްގެ ބޭނުންކުރާ މީހުންގެ އަދަދު އަންނަ އަހަރު 3 ބިލިއަނަށް އަރާނެކަމަށް ލަފާކުރެވެއެވެ.
އެމެރިކާގައި ތިބޭ ވަޓްސްއެޕް ޔޫޒަރުންނަށް ޗެޓްޖީޕީޓީ އަށް ގުޅައި އަޑުން ވާހަކަދެއްކުމުގެ ފުރުސަތުވެސް ލިބޭނެއެވެ.
ދުނިޔޭގެ ބައެއް ހިސާބުތަކުގައި ހައިސްޕީޑް ޑޭޓާ ލިބުމަކީ އަގުބޮޑު ނުވަތަ ދަތި ކަމަކަށްވާތީ، ގިނަ ބަޔަކު ވަޓްސްއެޕް ފަދަ އެޕްތައް މެދުވެރިކޮށް ޑޭޓާ ބޭނުންކުރާ ޚިދުމަތްތައް ބޭނުންކުރެއެވެ.
ވަޓްސްއެޕްގައި ޗެޓްޖީޕީޓީ ބޭނުންކުރާ ފަރާތްތަކަށް އިންސާނަކާ ސުވާލުކުރާ ފަދައިން ސުވާލުކުރެވޭނެއެވެ. އަދި މިކަން ކުރުމަށް ޗެޓްޖީޕީޓީ އެޕްގައި ހުންނަ ވެބް އޯވަރހެޑްތަކެއް ބޭނުމެއް ނުވާނެއެވެ. މި ޚިދުމަތުގައި ބޭނުންކުރަނީ ހިލޭ ލިބޭ ޗެޓްޖީޕީޓީ ވަރޝަންގައި ބޭނުންކުރާ ޖީޕީޓީ-4އޯ-މިނީ މޮޑެލްއެވެ.
އޯޕަންއޭއައި އިން މި ޚިދުމަތް ބޭނުންކުރެވިދާނެ ގޮތްތަކުގެ ތެރޭގައި އުފެއްދުންތެރި ލިޔުންތައް ލިޔުމަށް އެހީތެރިވުމާއި، އައު ޚިޔާލުތައް ހޯދުމާއި، ކެއްކުމުގެ ރެސިޕީތަކާއި ދަތުރުފަތުރުގެ ޚިޔާލުތައް ހޯދުމާއި، އަދި ޚަބަރާއި، ހިތްގައިމު މަސައްކަތްތަކާއި، އާންމު މަޢުލޫމާތުތަކާ ބެހޭގޮތުން ވާހަކަދެއްކުން ހިމެނެއެވެ.
މި ޚިދުމަތަކީ ތަޖުރިބާކުރުމުގެ ގޮތުން ދޫކޮށްފައިވާ ޚިދުމަތެއްކަމަށް އޯޕަންއޭއައި އިން ބުނެފައިވެއެވެ. އަދި ބޭނުންކުރާ މިންވަރަށް ބަލައި ބޭނުންކުރެވޭނެ މިންވަރު ލިމިޓްކުރުމާއި، ޚިދުމަތް ލިބޭ މިންވަރު މަދުކުރެވިދާނެކަމަށްވެސް ބުނެފައިވެއެވެ.
"އިތުރު ޓޫލްތަކާއެކު، މަތީ ލިމިޓްތަކަކާއެކު، އަދި އަމިއްލައަށް ބަދަލުގެނެވޭ ގޮތަށް ފުރިހަމަ ތަޖުރިބާއެއް ބޭނުންވާ ފަރާތްތަކުން މިހާރުވެސް ބޭނުންކުރާ ގޮތަށް ސީދާ ޗެޓްޖީޕީޓީ އެކައުންޓް މެދުވެރިކޮށް ބޭނުންކުރުން ރަނގަޅުވާނެ" ކަމަށް އެ ކުންފުނިން އިތުރަށް ބުނެފައިވެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.