ރިސޯޓީ (Resortee) އަކީ ރިސޯޓްތަކުގެ އިންޓަރނަލް އޮޕަރޭޝަންތަކަށް ޚާއްޞަކޮށްގެން ތައްޔާރުކޮށްފައިވާ ވެބް އެޕްލިކޭޝަންއެކެވެ. މިއީ ރިސޯޓްތަކުގެ ހިންގުން ހަރުދަނާކޮށް، ޚިދުމަތްތައް ފުރިހަމަކުރުމަށް ބޭނުންކުރެވޭ ޑިޖިޓަލް ޙައްލެކެވެ. ރިސޯޓީ އިން ފޯރުކޮށްދެނީ ރިސޯޓްތަކުގެ އެކި ޑިޕާޓްމަންޓްތައް ގުޅުވާލައި، ހުރިހާ މަސައްކަތެއް އެއް ޕްލެޓްފޯމަކުން ބެލެހެއްޓޭނެ ނިޒާމެކެވެ.
މި ނިޒާމަކީ ކްލައުޑް ޓެކްނޮލޮޖީގައި ބިނާކޮށްފައިވާ ސޮފްޓްވެއަރ-އޭޒް-އަ-ސަރވިސް (SaaS) ޙައްލެކެވެ. މިއީ މޮބައިލް ޑިވައިސްތަކުންވެސް ބޭނުންކުރެވޭގޮތަށް ފަރުމާކޮށް، އޯރެކަލް ޕްރޮޕަރޓީ މެނޭޖްމަންޓް ސިސްޓަމްސް (PMS) އާ އިންޓަރގްރޭޓްކޮށްފައިވާ ނިޒާމެކެވެ.
ރިސޯރޓީގެ ޓީމް
ރިސޯޓީގެ ކޯރ ޓީމްގައި ކުންފުނީގެ ފައުންޑަރުން ކަމަށްވާ 3 ދިވެހިން (އަޝްހަމް، ޖާވިޝް، ފަހުމީ) ހިމެނެއެވެ. އަދި ކުންފުނީގެ އޮޕަރޭޝަން ފުޅާކުރުމަށްޓަކައި، ދިވެހިރާއްޖެއިން ބޭރުގެ ތަޖުރިބާކާރުން ވެސް ޓީމަށް އިތުރުކުރުމުގެ މަސައްކަތް ކުރަމުން އެބަދެއެވެ.
ސޮފްޓްވެއަރ ޑިވެލޮޕްމަންޓް ޓީމްގައި އަޝްހަމްގެ އިތުރުން ތިން ދިވެހި ޑިވެލޮޕަރުން ހިމެނެއެވެ. ޓީމު ކުޑަ ނަމަވެސް، ތަޖުރިބާގެ ގޮތުން މަތީ ފަންތީގެ ޓީމެއް ބިނާކުރުމަކީ އެ ފަރާތްތަކުގެ އަމާޒެކެވެ. މިކަމުގައި ލޯކަލް ނުވަތަ އިންޓަރނޭޝަނަލް ތަޖުރިބާކާރުން ހިމެނުމުގައި ތަފާތެއް ނުކުރެއެވެ.
ނިޒާމުގެ ވިސްނުން އަދި ލަނޑުދަނޑިތައް
ރިސޯޓީގެ ވިސްނުމަކީ ބައިނަލްއަޤްވާމީ ފެންވަރުގެ ހޮސްޕިޓަލިޓީ ޙައްލުތައް ފޯރުކޮށްދޭ، ދާއިރާގެ ކުންފުންޏަކަށް ވުމެވެ. މި މަސައްކަތް ފަށާނީ ދިވެހިރާއްޖެއިން ކަމަށްވާއިރު، ކުރިއަށް އޮތް ތަނުގައި އެހެން ޤައުމުތަކަށް ފުޅާކުރާނެއެވެ.
މުހިންމު ލަނޑުދަނޑިތަކުގެ ތެރޭގައި:
ރިސޯޓްތައް ހިންގުން ޑިޖިޓައިޒްކޮށް، ގެސްޓުން، މުވައްޒަފުން އަދި ރިސޯޓްގެ ޚިދުމަތްތަކާ ދެމެދު ފަސޭހައިން ގުޅުވައިދޭ ޒަމާނީ ޓެކްނޮލޮޖީ ސޫޓެއް ފޯރުކޮށްދިނުން.
ރިސޯޓްތަކަށް ޑޭޓާގެ އަލީގައި ނިންމުންތައް ނިންމައި، ރިއަލް-ޓައިމްކޮށް ހިންގުމުގެ ކަންކަން ބެލެހެއްޓުމަށް ބޭނުންވާ ވަސީލަތްތައް ފޯރުކޮށްދިނުން.
ރިސޯޓީ ކޯރ (މައިގަނޑު ބައި)
ރިސޯޓީ ކޯރ އަކީ މި ނިޒާމުގެ މައިގަނޑު ބައެވެ. މިއީ ރިސޯޓްތަކުގެ ހިންގުމުގެ ހުރިހާ ކަމެއް އެއްތަނަކުން ބެލެހެއްޓުމަށް ފަރުމާކޮށްފައިވާ، ފުރިހަމަ ޙައްލެކެވެ. މި ސިސްޓަމް އޯރަކަލް އާ ފުރިހަމައަށް އިންޓަރގްރޭޓްކޮށްފައިވުމުން، ރިސޯޓްގެ ހުރިހާ ޑިޕާޓްމަންޓްތަކެއް ގުޅުވާލައި، ހިންގުމުގެ ހުރިހާ ކަމެއް ރިއަލް-ޓައިމްކޮށް ބެލެހެއްޓުމުގެ ފުރުޞަތު ލިބިދެއެވެ.
ރިސޯޓީ ކޯރގެ މައިގަނޑު ފީޗަރތައް:
ރިސޯޓީ ކޯރގެ މައިގަނޑު ފީޗަރތަކުގެ ތެރޭގައި ޕަރފޯމަންސް ޑޭޝްބޯޑްތައް، ގެސްޓް މެނޭޖްމަންޓް އަދި ޗެކް-އިން ޙައްލުތައް، ރިއަލް-ޓައިމް ރޫމް އެވައިލެބިލިޓީ މެނޭޖްމަންޓް، ރޫމް ޗެކްލިސްޓްތަކާއެކު ހައުސްކީޕިންގ މެނޭޖްމަންޓް، ގެސްޓް ރިކުއެސްޓް ހަބް، އޮޓޮމޭޓެޑް މިނިބާރ ބިލިންގ، ސައިނިންގ އެންޑް ޓްރެކިންގ، އަދި އައުޓްލެޓްތަކާއި ރިސޯޓް އެކްސްޕީރިއަންސް ބުކިންގ ހިމެނެއެވެ.
ރިސޯޓީ ގެސްޓް އެޕް
ރިސޯޓީ ގެސްޓް އެޕަކީ 2025 ވަނަ އަހަރުގެ ތިންވަނަ ކުއާޓަރގައި (Q3 2025) ތަޢާރަފްކުރުމަށް ހަމަޖެހިފައިވާ މޮބައިލް އެޕްލިކޭޝަނެކެވެ. މި އެޕް މެދުވެރިކޮށް ގެސްޓުންނަށް ރިސޯޓްގެ ޚިދުމަތްތަކާ ފަސޭހައިން ގުޅުން ބޭއްވޭނެއެވެ. އަދި ގެސްޓުންނާއި ރިސޯޓްގެ މުވައްޒަފުންނާ ދެމެދު ގުޅުން ބަދަހިކޮށް، ޚިދުމަތްތައް ލިބިގަތުމަށް ހޭދަވާ ވަގުތު މަދުކޮށްދޭނެއެވެ.
ގެސްޓް އެޕްގެ މައިގަނޑު ފީޗަރތައް:
ޓެކްނޮލޮޖީ އަދި އޯރަކަލް ސާޓިފިކޭޝަން
ރިސޯޓީގެ ނިޒާމަކީ މޮބައިލް ޑިވައިސްތަކުން ބޭނުންކުރެވޭ ގޮތަށް ފަރުމާކޮށް، އޯރަކަލް ޕްރޮޕަރޓީ މެނޭޖްމަންޓް ސިސްޓަމްސް (PMS) އާ ފުރިހަމައަށް އިންޓަރގްރޭޓްކޮށްފައިވާ ނިޒާމެކެވެ. ރިސޯޓީ އަންނަނީ އެ ކުންފުނީގެ ޕްރޮޑަކްޓް ސަރޓިފައިކޮށް، ސްޓޭންޑަޑައިޒް ކުރުމުގެ މަސައްކަތް ކުރަމުންނެވެ. މި ޕްރޮޑަކްޓް ވާނީ ދިވެހިރާއްޖޭގައި ތައްޔާރުކުރެވޭ، އޯރަކަލް ހޮސްޕިޓަލިޓީ ސިސްޓަމްތަކާ ގުޅާލެވޭ ގޮތަށް ސާޓިފައިކުރެވޭ ފުރަތަމަ ޕްރޮޑަކްޓަށެވެ.
ރިސޯޓީ ބޭނުންކުރާ ރިސޯޓްތައް
މި ޕްރޮޑަކްޓްގެ ޕްރޮޓޮޓައިޕް/އެމްވީޕީ (MVP) އެއް ފާއިތުވި 3 އަހަރު ދުވަހު 2 ރިސޯޓެއްގައި (ފުރަވެރި، ބްރެނިއާ ކޮއްޓަފަރު) ބޭނުންކުރެވުނެވެ. ރަސްމީކޮށް ރިސޯޓީ ކޯރ ޕްލެޓްފޯމް ލޯންޗް ކުރެވުނީ 9 މާރިޗް 2025 ގައެވެ.
ރަސްމީ ލޯންޗަށްފަހު، މި އާ ޕްރޮޑަކްޓް 2 ޕްރޮޕަޓީއަކުން (އެޗް.އައި.އެޗް އަދި މަޑިފުށި ޕްރައިވެޓް އައިލެންޑް) ބޭނުންކުރަމުން އެބަގެންދެއެވެ. މިހާރު މަސައްކަތް ކުރަމުން ދަނީ ޕްރޮޓޮޓައިޕް ބޭނުންކުރި ރިސޯޓްތައް، މި އާ ޕްރޮޑަކްޓަށް ބަދަލުކުރުމަށެވެ. މީގެ އިތުރުން، ބްރެނިއާ ފަދަ ރިސޯޓްތަކާ ޕާޓްނަރޝިޕް ގާއިމްކޮށް، އާ ރިސޯޓްތަކުގައިވެސް ޕްލެޓްފޯމް ލޯންޗްކުރުމަށް ބާރުއަޅަމުން އެބަދެއެވެ.
ކާމިޔާބީތަކާއި ގޮންޖެހުންތައް
މި ޕްރޮޑަކްޓް ތައްޔާރުކުރުމަށް 3 އަހަރު ހޭދަވިއެވެ. ދިވެހިރާއްޖޭގެ ރިސޯޓްތަކަށް ޕްރީމިއަމް ފެންވަރުގެ ޙައްލެއް ތައްޔާރުކުރުމުގައި، ރާއްޖޭގެ ސްޓާޓްއަޕް އިކޯސިސްޓަމްގެ ގޮންޖެހުންތައް (މަޝްވަރާ، ފަންޑިންގ، ބޭންކިންގ) ވަރަށް ބޮޑަށް ކުރިމަތިވިއެވެ.
ނަމަވެސް، މި ހުރިހާ ގޮންޖެހުންތަކާއެކު، ބޮޑެތި އޮޕަރޭޝަންތައް ހިންގާ ވާދަވެރި އިންޑަސްޓްރީއަކަށް ބާރުގަދަ ޕްރޮޑަކްޝަން އެޕްލިކޭޝަނެއް ތަރައްޤީކޮށް ނެރެވުމަކީ ޓީމަށް ލިބުނު ވަރަށް ބޮޑު ކާމިޔާބީއެކެވެ.
އާފްޓަރ-ސޭލްސް ޚިދުމަތްތައް
ރިސޯޓީގެ ޚިދުމަތް ގަތުމަށްފަހު ލިބޭ އާފްޓަރ-ސޭލްސް ޚިދުމަތްތަކުގެ ތެރޭގައި ކަސްޓަމައިޒޭޝަން އަދި ޓްރެއިނިންގ ހިމެނެއެވެ. މި ޚިދުމަތްތަކުގެ ސަބަބުން ރިސޯޓްތަކަށް، އެ ތަނެއްގެ ޚާއްޞަ ބޭނުންތަކާ އެއްގޮތަށް ނިޒާމް ބައްޓަންކުރުމުގެ ފުރުޞަތު ލިބިގެންދެއެވެ.
ދިވެހިރާއްޖޭގެ ސްޓާޓްއަޕްތަކަށް ފައުންޑަރުންގެ އިރުޝާދެއް
ރިސޯޓީގެ މި ދަތުރުން ލިބުނު ތަޖުރިބާގެ އަލީގައި، ދިވެހިރާއްޖޭގައި ސްޓާޓްއަޕެއް ފަށަން ގަސްތުކުރާ ފަރާތްތަކަށް ތިރީގައިވާ 3 ކަމަކަށް ޚާއްޞަ ސަމާލުކަމެއް ދިނުމަށް އަޝްހަމް އިރުޝާދު ދެއެވެ.
1. ވިސްނުން ވެލިޑޭޓްކުރުން (Idea Validation):
ސްޓާޓްއަޕެއް ކާމިޔާބުކުރުމަށް ވަގުތާއި، ހަކަތައާއި، ހުރިހާ ވަސީލަތެއް އެކަމަށް ހުސްކުރަންޖެހެއެވެ. މިފަދަ ބޮޑު ޤުރުބާނީއެއް ވުމުގެ ކުރިން، އެކުރާ މަސައްކަތުން ނަތީޖާ ނެރެވޭނެކަމުގެ ޔަޤީންކަން އޮތުން މުހިންމެވެ. އެހެންކަމުން، ތިމާގެ ވިސްނުން ނުވަތަ ހައިޕޮތިސިސްއެއްގެ ސައްޙަކަން ކަށަވަރުކުރުމަކީ ކޮންމެހެން ކުރަންޖެހޭ ކަމެކެވެ. ޚިޔާލު ވެލިޑޭޓްވުމުން، ފައުންޑަރުންގެ އަމިއްލަ ނަފްސަށް ޔަޤީންކަން ލިބި، މަސައްކަތަށް އިތުރު ހިތްވަރެއް ލިބެއެވެ. އަދި އިންވެސްޓަރުންނާއި އެހީތެރިވާން ބޭނުންވާ ފަރާތްތަކުގެ އިތުބާރު ހޯދުމަށްވެސް މަގުފަހިވެއެވެ.
2. ރިސްކް މެނޭޖްކުރުން (Risk Management):
ދިވެހިރާއްޖެއަކީ ދިރިއުޅުމުގެ ޚަރަދު ބޮޑު ތަނެކެވެ. މީގެ ތެރޭގައި ކުއްޔާއި، ބިލްތަކާއި، އާއިލީ ޒިންމާތައް ހިމެނެއެވެ. ސްޓާޓްއަޕެއްގެ ކުރީކޮޅު، މަސައްކަތުގައި ގިނަ ވަގުތު ހޭދަކުރަންޖެހޭއިރު، މިފަދަ ކަންކަމުގެ ސަބަބުން ބޮޑެތި ގޮންޖެހުންތަކެއް ކުރިމަތިވެއެވެ. އެހެންކަމުން، މިފަދަ މާލީ އަދި ޝަޚްޞީ ރިސްކްތައް ދެނެގަނެ، އެކަންކަން މެނޭޖްކުރެވޭނެ ގޮތްތަކެއް ރޭވުމަކީ ޕްރޮޑަކްޓް ކާމިޔާބުވުމުގެ ފުރުޞަތު ވަރަށް ބޮޑުތަން އިތުރުކޮށްދޭނެ ކަމެކެވެ.
3. ގުޅުންތައް ބިނާކުރުމާއި ނެޓްވޯކިންގ (Connections and Networking):
ރިސޯޓީގެ ޕްރޮޑަކްޓް މިހިސާބަށް އާދެވުނީ އެކި ދާއިރާތަކުގައި ތިއްބެވި ފައުންޑަރުންގެ ގުޅުންތަކާއި، އެހެން ފަރާތްތަކާ ގުޅިގެން ކުރެވުނު މަސައްކަތުންނެވެ. އެހެންކަމުން، އެޓީމްގެ އިރުޝާދަކީ، އަބަދުވެސް ހަރަކާތްތެރިވެ، އެކި އިވެންޓްތަކަށް ގޮސް، އައު މީހުންނާ ބައްދަލުކުރުމެވެ. ހިއްސާކުރެވިދާނެ ޚިޔާލުތައް ހިއްސާކުރުމެވެ. ބައެއްފަހަރު، އެންމެ އަގުހުރި ގުޅުންތައް ޤާއިމުވެގެންދަނީ ހީވެސްނުކުރާފަދަ ތަންތަނުންނެވެ.
ރިސޯރޓީގެ ޑެމޯއެއް ރިކުއެސްޓްކުރުމަށް : https://www.resortee.com/
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.