އެމްޑަބްލިޔުއެސްސީގެ ފެނާއި ނަރުދަމާގެ ޚިދުމަތްތައް ހޯދުމަށް ކައުންޓަރުތަކަށް ދިއުމުގެ ބަދަލުގައި، ފަސޭހަކަމާއެކު ޚިދުމަތް ހޯދުމަށް އެ ކުންފުނިން ތަޢާރަފްކޮށްފައިވާ މޯބައިލް އެޕްލިކޭޝަނަށް ގިނަ ބަދަލުތަކެއް ގެނެސް، އިތުރު ޚިދުމަތްތަކާއި ލުއިފަސޭހަތަކާއެކު އަޕްގްރޭޑްކޮށް އަލުން ޢާންމުކޮށްފިއެވެ.
މި ބަދަލުގެ މައިގަނޑު މަޤްޞަދަކީ، ކުރިން ކުންފުނީގެ އީ-ޕޯޓަލް އާއި މޯބައިލް އެޕުން ލިބެމުންދިޔަ ޚިދުމަތްތައް އިތުރަށް ފުރިހަމަކޮށް، ހުރިހާ ޚިދުމަތެއް އެއް ޕްލެޓްފޯމަކަށް ގެނެސް، ކަސްޓަމަރުންނަށް އެންމެ ފަސޭހަ ގޮތްތަކެއް ފަހިކޮށްދިނުމެވެ. މި އަޕްގްރޭޑާއެކު، އާ ޚިދުމަތްތަކަށް އެދުމާއި، ބިލް ދެއްކުމާއި، އެކައުންޓްގެ މަޢުލޫމާތު ބެލުން ފަދަ ކަންކަން ވަގުތުން ވަގުތަށް، ކޮންމެ ތަނެއްގައި ހުރެގެންވެސް ކުރެވޭނެއެވެ.
އެޕަށް އަލަށް އިތުރުކުރި ޚިދުމަތްތަކުގެ ތެރޭގައި، އީފާސް ބޭނުންކޮށްގެން ސީދާ އެޕަށް ލޮގިން ކުރެވުމާއި، ލޮގިން ކުރުމާއެކު އަމިއްލަ ނަމުގައިވާ ހުރިހާ މީޓަރެއްގެ މަޢުލޫމާތު ފެނުން ހިމެނެއެވެ. މީގެ އިތުރުން، ފެނާއި ނަރުދަމާގެ އާ ޚިދުމަތްތަކަށް އޮންލައިންކޮށް ފޯމު ހުށަހެޅުމާއި، އެދިފައިވާ ޚިދުމަތެއްގެ މަސައްކަތް ކުރިއަށްދާގޮތް ބަލައި، އެ ޚިދުމަތަށް އެޕް މެދުވެރިކޮށް ފައިސާ ދެއްކޭނެ އިންތިޒާމުވެސް ވަނީ ހަމަޖައްސާފައެވެ.
ބިލް ދެއްކުމަށް އިތުރު ފަސޭހަތަކެއްވެސް ވަނީ ހިމަނާފައެވެ. އެގޮތުން، "މަލްޓިޕޭ" ބޭނުންކޮށްގެން އެކި އެކައުންޓުތަކުގެ ބިލަށް އެއްފަހަރާ ފައިސާ ދެއްކޭނެއެވެ. އަދި މީޓަރުގެ ރީޑިންގ އާއި ފޮޓޯއެއް ފޮނުވާލައިގެން، މަހުގެ ކޮންމެ ދުވަހަކުވެސް ބޭނުން ވަގުތަކު ބިލް ހެދުމަށް އެދެވޭނެއެވެ.
ޚާއްޞަކޮށް ސްމާޓް މީޓަރު ބޭނުންކުރައްވާ ކަސްޓަމަރުންނަށް، ފެން ބޭނުންކުރެވޭ މިންވަރާއި ބިލަށް އަރާފައިވާ އަދަދު ދުވަހުން ދުވަހަށް ބަލާލެވޭނެއެވެ. އަދި އެމަހެއްގެ އަންދާޒީ ބިލް ދެނެގަތުމުގެ އިތުރުން، އެއް އަހަރު ދުވަހުގެ އެކައުންޓް ސްޓޭޓްމަންޓްވެސް އެޕުން ފަސޭހަކަމާއެކު ބަލާލެވޭނެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ކުންފުނީގެ މެނޭޖިންގ ޑިރެކްޓަރ، ޢަބްދުލް މަތީން މުޙައްމަދު ވިދާޅުވީ، މިއީ ޒަމާނީ ޓެކްނޮލޮޖީ ބޭނުންކޮށްގެން ކަސްޓަމަރުންނަށް ޚިދުމަތް ހޯދުން ލުއިކޮށްދިނުމަށް އެޅުނު މުހިންމު ފިޔަވަޅެއް ކަމަށެވެ.
އެމްޑަބްލިޔުއެސްސީގެ މި އަޕްގްރޭޑްކުރެވުނު މޯބައިލް އެޕްލިކޭޝަން އެޕަލްގެ އެޕް ސްޓޯރ އާއި ގޫގުލް ޕްލޭ ސްޓޯރއިން އަޕްޑޭޓް / ޑައުންލޯޑް ކުރެވެން ހުންނާނެއެވެ. އެޕާ ގުޅޭގޮތުން އިތުރު އެހީތެރިކަމެއް ބޭނުންފުޅުވާނަމަ، ކުންފުނީގެ ހޮޓްލައިން 105 އަށް ގުޅުއްވުމަށް އެމްޑަބްލިޔުއެސްސީން އެދެއެވެ. އަދި ކުންފުނީގެ ވެބްސައިޓް mwsc.com.mv ގައި ވެސް މި އެޕާގުޅޭ މުހިންމު މަޢުލޫމާތުތައް ޝާއިޢުކުރެވިފައިވާނެ ކަމަށް އެކުންފުނިން ބުނެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.