ރާއްޖޭގެ އެންމެ ބޮޑު ގޭމިން މުބާރާތް ދިރާގުން ފަށައިފި

ޖުމްލަ 170،000 ރުފިޔާގެ އަގުހުރި އިނާމުތަކަކާއެކު، 1،500 އަށްވުރެ ގިނަ ކުޅުންތެރިންގެ ބައިވެރިވުމާއެކު ދިވެހިރާއްޖޭގައި މިހާތަނަށް ބާއްވާ އެންމެ ބޮޑު ގޭމިންގ މުބާރާތް، "ދިރާގު މޯލްޑިވްސް ގޭމިންގ ކޮންކުއެސްޓް 2025" (ޑީއެމްޖީސީ) ޣިޔާސުއްދީން އިންޓަނޭޝަނަލް ސްކޫލުގައި މިއަދު ރަސްމީކޮށް ފަށައިފިއެވެ. މިއީ ރާއްޖޭގެ ގޭމިންގ ކޮމިއުނިޓީއަށް އާ އުއްމީދުތަކެއް ގެނެސްދިން، ތާރީޚީ ފެށުމެކެވެ.

ތިން ދުވަހުގެ މުއްދަތަށް ކުރިއަށްދާ މި ބޮޑު އިވެންޓުގައި، ވާދަވެރި ހަތަރު ގޭމެއްގެ މުބާރާތް ހިމެނޭއިރު، މީގެ އިތުރުން އާންމުންނަށް ބައިވެރިވެވޭނެ ގިނަ ހަރަކާތްތަކެއް ވަނީ ތައްޔާރުކޮށްފައެވެ. އޭގެ ތެރޭގައި ވީއާރު ގޭމްތަކާއި، ރޭސިންގ ސިމިއުލޭޓަރުތަކާއި، ބޯޑު ގޭމްތަކުގެ އިތުރުން، ކޮންމެ މީހަކަށްވެސް ކުޅެލެވޭނެ 'ފްރީ ޓު ޕްލޭ' ސްޓޭޝަންތައް ހިމެނެއެވެ. މީގެ އިތުރުން، ހަރަކާތްތައް ހިނގަމުންދާ ސަރަހައްދުގައި ކާބޯތަކެއްޗާއި ގޭމިންގއާ ގުޅުންހުރި ސާމާނު ވިއްކާ ސްޓޯލްތައްވެސް ބަހައްޓާފައިވެއެވެ.

ދިރާގުގެ ޑިރެކްޓަރ އޮފް ބްރޭންޑް އެންޑް މަރކެޓިންގ ކޮމިއުނިކޭޝަން، މިރްޝާން ހަސަން ވިދާޅުވީ، މިއަދަކީ ދިވެހިރާއްޖޭގެ ގޭމިންގ ތާރީހުގައި ފާހަގަކޮށްލެވޭ ހާއްސަ ދުވަހެއްކަމާއި، މިއަދު މި ފަށަނީ ރާއްޖޭގައި މިހާތަނަށް ބާއްވާ އެންމެ ބޮޑު ‏‏އީސްޕޯޓްސް މުބާރާތްކަމަށެވެ. އަދި މިއީ، ދިރާގު ގޭމާސް ގިލްޑް މެދުވެރިކޮށް، ގޭމް ކުޅުންތެރިންގެ ހުނަރުތައް ދައްކާލުމުގެ ފުރުސަތުތައް ‏‏މަގުފަހިކޮށްދިނުމުގެ އިތުރުން ޒިންމާދާރުކަމާއެކު ގޭމް ކުޅުމުގެ އާދަތައް (ރެސްޕޮންސިބަލް ގޭމިންގ) އަށަގަންނުވައި، ދެމެހެއްޓެނިވި ‏‏ގޮތެއްގައި ރާއްޖޭގެ ގޭމިންގ ކޮމިއުނިޓީއަށް އިތުރު ކުރިއެރުންތައް ހޯދައިދިނުމަށް ކުރަމުންދާ މަސައްކަތްތަކުގެ ނަތީޖާ އެއް ކަމުގައި އޭނާ ވިދާޅުވިއެވެ.

އެ މުބާރާތް ކުރިއަށް ގެންދިޔުމަށް ހަމަޖެހިފައި ވަނީ ޖުލައި 31، އިން ފެށިގެން އޮގަސްޓް 2، ނިޔަލަށް ޣިޔާސުއްދީން އިންޓަނޭޝަނަލް ސްކޫލުގަ އެވެ.

ޑީއެމްޖީސީ އަކީ ދިރާގުން އީ-ސްޕޯޓްސް އަށް ހާއްސަކޮށްގެން އުފައްދާފައިވާ 'ދިރާގު ގޭމާސް ގިލްޑް' (ޑީޖީޖީ) ގެ ފަރާތުން ހިންގާ އެންމެ ފާހަގަކޮށްލެވޭ އެއް ހަރަކާތެވެ. ޑީޖީޖީ އަކީ ދިވެހި ގޭމަރުންނަށް އެކުގައި މަސައްކަތްކޮށް، ގުޅުން ބަދަހިކުރުމުގެ ފުރުސަތު ހޯދައިދޭ ޑިޖިޓަލް މަންސައެކެވެ. މި ޕްލެޓްފޯމް މެދުވެރިކޮށް މުބާރާތްތަކުގައި ބައިވެރިވުން ފަސޭހަވެފައިވާއިރު، ޑީޖީޖީ މެމްބަރުންނަށް ހާއްސަ ފައިބަރ ބްރޯޑްބޭންޑް އަދި މޯބައިލް ޑޭޓާގެ ފުރުސަތުތައްވެސް ދިރާގުން ފަހިކޮށްދެއެވެ.

މިފަދަ ހަރަކާތްތަކުގެ ސަބަބުން ރާއްޖޭގައި އީ-ސްޕޯޓްސްއަށް އޮތް ބޮޑު ތަރުހީބާއި ޑިމާންޑް ހާމަވެގެންދެއެވެ. ހަމައެއާއެކު، ދިރާގު ފަދަ ކުންފުނިތަކުން މި ދާއިރާ ތަރައްގީކުރުމަށް ދޭ އަހައްމިއްޔަތުކަންވެސް މިކަމުން ސާފުވެއެވެ. މިއީ ދިވެހި ޒުވާން ގޭމަރުންނަށް ބައިނަލްއަގްވާމީ މައިދާނުގައި ވާދަކުރުމުގެ ފުރުސަތުތައް ތަނަވަސްކޮށްދިނުމަށް އެޅޭ ވަރަށް މުހިންމު ފިޔަވަޅެކެވެ.