ކުދި އަދި މެދުފަންތީގެ ވިޔަފާރިތަކަށް ފައިސާގެ އެހީތެރިކަން ފޯރުކޮށްދޭ އިދާރާއެއްގެ ގޮތުގައި މަޝްހޫރުވެފައިވާ ދިވެހި ސަރުކާރުގެ ކުންފުނި 'އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން' (އެސްޑީއެފްސީ) އިން، ޒަމާނީ ޓެކްނޮލޮޖީއަށް ބިނާކޮށް ވިޔަފާރިތަކުގެ 'ޑިޖިޓަލް އިކޯސިސްޓަމް' އެއް ބިނާކުރުމުގެ އަމާޒުގައި އެ ކުންފުނީގެ ނަން 'އެސްއެމްއީ ޑިޖިޓަލް' އަށް ރަސްމީކޮށް ބަދަލުކޮށްފިއެވެ. މި ބަދަލަކީ ހަމައެކަނި ނަމަށް އައި ބަދަލެއް ނޫން ކަމަށްވާއިރު، މިއީ ފައިނޭންސިންގ އިން އަލަފާށް ފިންޓެކް ދާއިރާއަށް އެ ކުންފުނި ކުރާ ދަތުރުގެ ފެށުންކަން އަންގައިދޭ ވަރުގަދަ ސިގްނަލެކެވެ.
މި ބަދަލާއެކު، އެސްއެމްއީ ޑިޖިޓަލް ވެގެންދާނީ ހަމައެކަނި ލޯނު ދޫކުރާ ތަނަކަށްވުރެ، ވިޔަފާރިތަކުގެ ދުވަހީ ހިންގުންތައް ޑިޖިޓަލައިޒްކޮށް، މާލީ މުއާމަލާތްތައް ފަސޭހަކަމާއެކު ބެލެހެއްޓޭނެ ޓޫލްތައް ފޯރުކޮށްދޭ، އަދި އޮންލައިންކޮށް މާކެޓަށް ނުކުތުމަށް އެހީތެރިވެދޭ ޓެކްނޮލޮޖީ ޕާޓްނަރަކަށެވެ. ކުންފުނީގެ އަމާޒަކީ ވިޔަފާރިއެއް ފެށުމުގެ ފިކުރުން ފެށިގެން، އެ ވިޔަފާރިއެއް ހިންގައި ތަރައްގީކުރުމުގެ ކޮންމެ މަރުހަލާއަކަށް ބޭނުންވާ ޑިޖިޓަލް ވަސީލަތްތައް އެއް ޕްލެޓްފޯމަކުން ފޯރުކޮށްދިނުމެވެ.
މި ޑިޖިޓަލް ވިސްނުމުގެ ފުރަތަމަ ފިޔަވަޅުތައް މިހާރުވެސް ފެންނަން ފަށާފައިވާއިރު، ބީއެމްއެލްގެ ސަބްސިޑިއަރީއަކަށް ވުމާ ގުޅިގެން އެ ބޭންކުގެ ޓެކްނޮލޮޖީއާ ވަނީ އިންޓަގްރޭޓްކޮށްފައެވެ. މިގޮތުން، ބީއެމްއެލްގެ އޭޕީއައި މެދުވެރިކޮށް، ކަސްޓަމަރުންނަށް އެސްއެމްއީ ޑިޖިޓަލްގެ ފެސިލިޓީތަކަށް ފައިސާ ދެއްކުން ފަދަ ކަންކަން މިހާރު ވަނީ ބީއެމްއެލް މޯބައިލް އެޕް ތެރެއިން ފަސޭހަކޮށްދީފައެވެ.
މިއީ މާލީ ދެ މުއައްސަސާއެއް ގުޅިގެން ޓެކްނޮލޮޖީގެ ބޭނުންކޮށްގެން ކަސްޓަމަރުންނަށް ފަސޭހަ ގޮތްތަކެއް ހޯދައިދިނުމުގެ ރީތި މިސާލެކެވެ.
ކުންފުނީގެ ޓެކްނޮލޮޖީގެ ދަތުރުގެ ކުރިއަށް އޮތް މުހިންމު މަންޒިލަކީ 'އެސްއެމްއީ ޑިޖިޓަލް' ގެ ނަމުގައި ތައާރަފްކުރާ މޯބައިލް އެޕްލިކޭޝަނެވެ. މި އެޕް މެދުވެރިކޮށް ވިޔަފާރިވެރިންނަށް އެމީހުންގެ ޕްރޮފައިލް ބެލެހެއްޓުމާއި، ލޯނުތަކުގެ މައުލޫމާތު ހޯދުން ފަދަ ޚިދުމަތްތައް ލިބޭނެއެވެ. ނަމަވެސް، މީގެ އެންމެ އިންގިލާބީ ފީޗަރއަކަށް ވާނީ އަންނަ އަހަރު ތައާރަފްކުރަން ނިންމާފައިވާ 'ޑިޖިޓަލް މާކެޓްޕްލޭސް' އެވެ.
މިއީ ރާއްޖޭގެ އެކި ރަށްރަށުގައި ތިބި ހުނަރުވެރިންނާއި، ދަނޑުވެރިންނާއި، އަދި އެހެނިހެން ވިޔަފާރިވެރިން، ގުޅުވައިދޭ ޑިޖިޓަލް ޕްލެޓްފޯމެކެވެ.
މި ސްޓްރެޓެޖިކް ބަދަލާ ގުޅޭގޮތުން ވާހަކަ ދައްކަވަމުން، އެސްއެމްއީ ޑިޖިޓަލްގެ ސީއީއޯ، ބަދުރުއްދީން ހަސަން ވިދާޅުވީ، "މި ރީބްރޭންޑިން އަކީ އީޖާދީ ޙައްލުތަކާއި، ޒަމާނީ ޓެކްނޮލޮޖީއާއި، އަދި ހުރިހާ ފަރާތްތަކުގެ ފުރިހަމަ ބައިވެރިވުން ހިމެނޭގޮތަށް، ކުދި އަދި މެދު ފަންތީގެ ވިޔަފާރިތަކުގެ މުޅި ނިޒާމު އަލުން ބައްޓަންކުރުމަށް އަޅުގަނޑުމެން ވެފައިވާ ވަޢުދުގެ ފެށުމެއް. މިއަދުގެ ވިޔަފާރިތަކަށް ބޭނުންވަނީ ހަމައެކަނި ފައިސާއެއް ނޫން، އެމީހުންނަށް ބޭނުންވަނީ ޑިޖިޓަލް ޓޫލްތަކާއި، ނެޓްވޯކްކުރުމުގެ ފުރުސަތުތައް. އެސްއެމްއީ ޑިޖިޓަލްއިން އެ ހުރިހާ ޚިދުމަތެއް ފޯރުކޮށްދޭނެ." އޭނާ ވިދާޅުވިއެވެ.
އެސްއެމްއީ ޑިޖިޓަލްގެ އަމާޒަކީ ދިވެހިރާއްޖޭގައި އެމްއެސްއެމްއީ ދާއިރާ ތަރައްގީކުރުމަށްޓަކައި، އިސްލާމީ ޝަރީއަތާ އެއްގޮތްވާ އުސޫލުތަކުގެ މަތިން، ޓެކްނޮލޮޖީގެ އެންމެ ފަހުގެ ވަސީލަތްތައް ބޭނުންކޮށްގެން ހިންގާ ފުރަތަމަ މާލީ މުއައްސަސާއަށް ވުމެވެ.
ކުންފުނީގެ ނަން ބަދަލުކުރުމުގެ މަރުހަލާތައް ވަނީ ހިއްސާދާރުންގެ ރުހުމާއި، އެމްއެމްއޭގެ ހުއްދަ ލިބުމަށްފަހު، އިކޮނޮމިކް މިނިސްޓްރީގައި ރަޖިސްޓްރީކޮށް ނިންމާލާފައެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.