ޓެކްނޮލޮޖީގެ ބިޔަ ކުންފުނި ގޫގަލްއިން ތަޢާރަފްކުރި އާ އޭއައި ކޯޑިންގ ޓޫލް "އެންޓިގްރެވިޓީ" ނެރުނުތާ އެންމެ 24 ގަޑިއިރުވެސް ނުވަނީސް، ސެކިއުރިޓީ ރިސާޗަރަކު އެ ޓޫލް ހެކްކޮށް، އޭގައި އޮތް ސަލާމަތީ ބޮޑު މައްސަލައެއް ފަޅާއަރުވާލައިފިއެވެ.
ފޯބްސް އިން ރިޕޯޓްކޮށްފައިވާ ގޮތުގައި ސެކިއުރިޓީ ރިސާޗަރ އާރޮން ޕޯޓްނޯއީ ހޯދި މި މައްސަލައިން ދައްކުވައިދެނީ، ޓެކް ކުންފުނިތަކުން އޭއައި އުފެއްދުންތައް ބާޒާރަށް ނެރުމަށް އަވަސްއަރައިގަނެގެން އުޅުމުގެ ތެރޭގައި، ސަލާމަތީ ކަންކަމަށް ދޭންޖެހޭ ސަމާލުކަން ކުޑަވެ، ބޭނުންކުރާ މީހުން ނުރައްކަލަށް ހުށަހެޅިފައިވާ މިންވަރެވެ.
ޕޯޓްނޯއީ ހާމަކުރި ގޮތުގައި، އެންޓިގްރެވިޓީގެ ކޮންފިގަރޭޝަން ސެޓިންގްސްއަށް ބަދަލު ގެނެސްގެން، ޔޫޒަރުންގެ ކޮމްޕިއުޓަރުތަކަށް ވަގަށް ވަދެވޭނެ "ބެކްޑޯ"އެއް އުފެއްދުމުގެ ފުރުސަތު ހެކަރުންނަށް ލިބިގެންދެއެވެ. މީގެ ސަބަބުން، ޔޫޒަރުން އެއްފަހަރު "ޓްރަސްޓް" ކޮށްފައިވާ ކޯޑެއް މެދުވެރިކޮށް، ވިންޑޯސް އަދި މެކް ކޮމްޕިއުޓަރުތަކަށް މެލްވެއާ އާއި ރެންސަމްވެއާ ފަދަ ނުރައްކާތެރި ވައިރަސްތައް ފޮނުވާލުމުގެ މަގު ފަހިވެގެންދެއެވެ.
މީގެ އެންމެ ނުރައްކާތެރި ކަމަކީ، އެއްފަހަރު މެލިޝަސް ކޯޑެއް ރަން ކުރުމުން އޭގެ އަސަރު ދާއިމީ ގޮތެއްގައި ހުންނާތީއެވެ. ޕޯޓްނޯއީ ވިދާޅުވާ ގޮތުގައި ޔޫޒަރުން އެ ޕްރޮޖެކްޓް އަލުން ހުޅުވާ ކޮންމެ ފަހަރަކު، ނުވަތަ އެޕްލިކޭޝަން ފޮހެލާފައި އަލުން އިންސްޓޯލް ކުރިކަމުގައި ވިޔަސް، އެ މެލިޝަސް ކޯޑު އަލުން ރަންވެ، ހެކަރުންނަށް ޖާސޫސްކުރުމުގެ ފުރުސަތު ލިބިގެންދާނެއެވެ.
މި މައްސަލަ ގޫގަލްގެ ސަމާލުކަމަށް ގެނައުމުން އެ ކުންފުނިން ވަނީ ތަހުގީގެއް ފަށާފައެވެ. ނަމަވެސް، އަދި މިހާތަނަށް މިކަމަށް އެއްވެސް ހައްލެއް ނުވަތަ "ޕެޗެއް" ލިބިފައެއް ނުވެއެވެ.
ސައިބަރ ސެކިއުރިޓީ މާހިރުން ދެކޭގޮތުގައި، މިހާރުގެ އޭއައި ސިސްޓަމްތައް އަންނަނީ ވަރުގަދަ ސަލާމަތީ ފިޔަވަޅުތަކެއް ނެތި، ހަމައެކަނި "ޓްރަސްޓް" ގެ މައްޗަށް ބިނާކޮށެވެ. މީގެ ސަބަބުން ކުދިކުދި ގޮތްގޮތުން ސިސްޓަމްތަކަށް ވަނުމުގެ ފުރުސަތު ހެކަރުންނަށް ފަސޭހަވެގެންދެއެވެ.
މާހިރުން އިތުރަށް އިންޒާރު ދެއްވާ ގޮތުގައި، އިންސާނުންގެ ބެލުމެއް ނެތި އަމިއްލައަށް މަސައްކަތްކުރާ "އޭޖެންޓިކް" އޭއައި ޓޫލްތައް މިފަދަ ގޮތަކަށް ހެކްވުމަކީ، ކުންފުނިތަކުގެ ނެޓްވޯކްތަކަށާއި ޒާތީ މައުލޫމާތުތަކަށް އޮތް ބޮޑު ނުރައްކަލެކެވެ. އެހެންކަމުން، އޭއައި ޕްރޮޑަކްޓްތައް އަވަހަށް ނެރުމުގެ ބަދަލުގައި، ފުރިހަމަ ސެކިއުރިޓީ ޓެސްޓްތައް ހެދުމަށް މާހިރުން ވަނީ ގޮވާލާފައެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.