ޒުވާނުންގެ އީޖާދީ ވިސްނުމާއި ޓެކްނޮލޮޖީގެ ހުނަރު ކުރިއެރުވުމަށް އަމާޒުކޮށްގެން ބާއްވާ "ޔޫތު ހެކް 2025" ގައި ބައިވެރިވުމުގެ ފުރުޞަތު މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް އިން ރަސްމީކޮށް ހުޅުވާލައިފިއެވެ.
މި ހެކަތޯން ކުރިއަށް ގެންދިއުމަށް ހަމަޖެހިފައިވަނީ މިއަހަރުގެ ޑިސެމްބަރު މަހުގެ 11 އިން 13 އަށް، މާލޭގައި ހުންނަ ޔޫތު ހަބްގައެވެ. މިއީ ޓެކްނޮލޮޖީގެ ދާއިރާއިން އާ ހައްލުތައް ހޯދުމަށް ބާރުއެޅުމުގެ ގޮތުން 48 ގަޑިއިރުގެ މުއްދަތަށް ކުރިއަށްގެންދާ ޚާއްޞަ ހަރަކާތެކެވެ.
މިއަހަރުގެ ހެކަތޯންގެ ޝިއާރަކީ "ހުވަފެންތައް ގުޅުވައި، ޤާބިލުކަން ހާމަކުރުން" ނުވަތަ (Bridging Dreams, Unleashing Potential) އެވެ.
މި ހަރަކާތުގެ މައިގަނޑު މަޤްޞަދަކީ ޒުވާނުންގެ ޓީމުތަކަށް އެމީހުންގެ ހުނަރާއި ޤާބިލުކަން އިތުރަށް ތަރައްޤީކޮށް، މުސްތަޤްބަލަށް ބޭނުންވާ އީޖާދީ މަސައްކަތްތައް ބައްޓަންކުރުމުގެ ފުރުޞަތު ފަހިކޮށްދިނުމެވެ.
ޔޫތު ހެކް 2025 ގައި ބައިވެރިވުމުގެ ފުރުޞަތު ހުޅުވާލާފައިވަނީ 18 އަހަރާއި 35 އަހަރާ ދެމެދުގެ ޒުވާނުންނަށެވެ. މި ހަރަކާތުގައި ބައިވެރިވުމަށް ޝައުޤުވެރިވާ ފަރާތްތަކުން، އެކަމަށް ކަނޑައެޅިފައިވާ ވެބްސައިޓް މެދުވެރިކޮށް މިހާރު ރަޖިސްޓްރީ ކުރެވޭނެއެވެ.
މި ހެކަތޯންއަކީ ޓެކްނޮލޮޖީގެ ދާއިރާއިން ކުރިއަރައި ދިއުމަށް ޝައުޤުވެރިވާ ޒުވާނުންނަށް، އެކަކު އަނެކަކާ ގުޅިގެން މަސައްކަތްކޮށް، އެމީހުންގެ ޚިޔާލުތައް ޙަޤީޤަތަކަށް ހެދުމަށް ލިބޭ މުހިންމު ފުރުޞަތަކަށް ވާއިރު، ވީހާވެސް ގިނަ ޒުވާނުން މިކަމުގައި ބައިވެރިވުމަށް އެ ވުޒާރާއިން ވަނީ އިލްތިމާސްކޮށްފައެވެ.
"ޔޫތު ހެކް" ސިލްސިލާއަކީ ރާއްޖޭގެ ޒުވާނުންގެ މެދުގައި ބޮޑު މަޤުބޫލުކަމެއް ހޯދާފައިވާ، ޓެކްނޮލޮޖީ ދާއިރާއިން ޒުވާނުން ބިނާކުރުމަށް ބާއްވަމުން އަންނަ ކާމިޔާބު ހަރަކާތެކެވެ. މީގެ ކުރިން ބޭއްވުނު މިފަދަ ހެކަތޯންތަކުގައި ދިވެހި ޒުވާނުން ވަނީ މުޖުތަމަޢަށް ދިމާވެފައިވާ އެކި މައްސަލަތަކަށް ޓެކްނޮލޮޖީގެ އެހީގައި އީޖާދީ ހައްލުތައް ހުށަހަޅައި، ފާހަގަކޮށްލެވޭ ފެންވަރުގެ އެޕްލިކޭޝަންތަކާއި ޑިޖިޓަލް އުފެއްދުންތައް ތަޢާރަފުކޮށްފައެވެ.
މި ހަރަކާތްތަކަކީ ހަމައެކަނި މުބާރާތްތަކެއްގެ ގޮތުގައި ނުނިމި، އޭގެ ތެރެއިން އުފެދުނު ބައެއް ޚިޔާލުތައް ސްޓާޓްއަޕްތަކުގެ ގޮތުގައި ކުރިއަރުވައި، ރާއްޖޭގެ ޑިޖިޓަލް އިޤްތިޞާދަށް ޒުވާނުންގެ ހިއްސާ އިތުރުކުރުމަށް އެޅިގެންދިޔަ މުހިންމު ބާރެއްކަން ފާހަގަކޮށްލެވެއެވެ.
ޔޫތު ހެކް 2025: ޝަރުޠުތަކާއި އިނާމުތައް
ޔޫތު ހެކް 2025 ގައި ބައިވެރިވުމަށް ހުޅުވާލާފައިވަނީ 18 އަހަރާއި 35 އަހަރާ ދެމެދުގެ ޒުވާނުންނަށެވެ. މި ހެކަތޯންގައި ބައިވެރިވުމަށް 3 އާއި 5 މެންބަރުންގެ ޓީމެއް އެކުލަވާލަން ޖެހެއެވެ. ބައިވެރިވުމަށް އެއްވެސް ފީއެއް ނުނެގޭނެއެވެ. ޒުވާނުންނަށް އީޖާދީ ހައްލުތައް ހޯދުމަށް 4 މައިގަނޑު ތީމެއް ކަނޑައަޅާފައިވެއެވެ.
މި ހެކަތޯންގެ މައިގަނޑު ތީމްތަކުގެ ތެރޭގައި "ކުޅުން، ހަރަކާތް، ދިރިއުޅުން" ހިމެނެއެވެ؛ މިއީ ކުޅިވަރު، ފިޓްނަސް އަދި ހަރަކާތްތެރި ދިރިއުޅުމާ ބެހޭ ތީމެކެވެ. ދެވަނަ ތީމަކީ "އިތުރުކުރުން، ގުޅުން، ކުރިއެރުން"؛ މި ތީމުގެ ދަށުން ނަފްސާނީ ދުޅަހެޔޮކަމާއި ހިތްވަރު ދިނުން ހިމެނެއެވެ. އަދި، "ފެށުން، ހޯދުން، ކުރިއެރުން" މި ތީމަކީ ޒުވާނުންގެ ވިޔަފާރިތަކާއި ގިގް އިކޮނޮމީއަށް ހާއްސަކުރެވިފައިވާ ތީމެކެވެ. ހަތަރުވަނަ އަދި އެންމެ ފަހު ތީމަކީ "ތަޞައްވުރުކުރުން، ހާމަކުރުން، ހިތްވަރުދިނުން"؛ މިއީ ފަންނު، ސަގާފަތް އަދި ޑިޖިޓަލް ކްރިއޭޓިވިޓީއާ ގުޅުންހުރި ތީމެކެވެ.
މި ހެކަތޯންގައި އެންމެ ރަނގަޅު ނަތީޖާ ދައްކާ ޓީމުތަކަށް ބޮޑެތި ފައިސާގެ އިނާމުތަކެއް ވަނީ ކަނޑައަޅާފައެވެ. އެގޮތުން، އެއްވަނައަށް ހޮވޭ ޓީމަށް 100,000 ރުފިޔާ، ދެވަނައަށް ހޮވޭ ޓީމަށް 75,000 ރުފިޔާ، އަދި ތިންވަނައަށް ހޮވޭ ޓީމަށް 50,000 ރުފިޔާ ލިބޭނެއެވެ.
ޒުވާނުންނަށް އީޖާދީ ހައްލުތައް ހޯދުމަށް ހިތްވަރުދިނުމަކީ މި ހެކަތޯންގެ މައިގަނޑު އެއް މަޤްސަދެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.