ސިޓީ ބިޓީގެ ޚިދުމަތް ހުއްޓާލި ފުރަތަމަ ޤައުމަކަށް ޑެންމާކް!

ޑެންމާކުގެ ޕޯސްޓަލް ޚިދުމަތް ދޭ ކުންފުނި، ޕޯސްޓްނޯޑުން 401 އަހަރުގެ ދިގު ތާރީޚަކަށްފަހު އެ ޤައުމުގެ އެތެރޭގެ ސިޓީބިޓީގެ ޚިދުމަތް ހުއްޓާލައިފިއެވެ. މި ނިންމުމާއެކު ޑެންމާކު ވެގެން ގޮސްފައިވަނީ ސިޓީ ފޮނުވުމުގެ ޚިދުމަތް ދުނިޔޭގައި ފުރަތަމަ ހުއްޓާލި ޤައުމަށެވެ.

މި ޚިދުމަތް ހުއްޓާލަން ޖެހުނު މައިގަނޑު ސަބަބަކީ ޑިޖިޓަލް ވަސީލަތްތައް މެދުވެރިކޮށް މުޢާމަލާތްކުރުން އިތުރުވެ، ސިޓީ ފޮނުވާ މިންވަރު ވަރަށް ބޮޑަށް ދަށްވުމެވެ. ޑެންމާކަކީ މިހާރު ދުނިޔޭގައި އެންމެ ބޮޑަށް ޑިޖިޓަލައިޒްވެފައިވާ އެއް ޤައުމު ކަމަށްވާއިރު، ގިނަ މުޢާމަލާތްތަކެއް މިހާރު ކުރަނީ އިލެކްޓްރޯނިކް ވަސީލަތްތަކުންނެވެ.

ފާއިތުވި 25 އަހަރުގެ ތެރޭގައި ޑެންމާކުގައި ސިޓީ ފޮނުވާ މިންވަރު ވަނީ 90 އިންސައްތަ ދަށްވެފައެވެ. އަދަދުން ބަލާއިރު 2000 ވަނަ އަހަރު 1.5 ބިލިއަން ސިޓީ ބެހިފައިވީ ނަމަވެސް، މިދިޔަ އަހަރު ބެހިފައިވަނީ އެންމެ 110 މިލިއަން ސިޓީއެވެ.

ސިޓީ ފޮނުވުން މަދުވުމުގެ ސަބަބުން އެ ޚިދުމަތުގެ އަގު ވަނީ ވަރަށް ބޮޑަށް އުފުލިފައެވެ. މިހާރު ޑެންމާކުގައި އެންމެ ސިޓީއެއް ފޮނުވުމަށް ގާތްގަނޑަކަށް 6.84 އެމެރިކާ ޑޮލަރު ހޭދަވެއެވެ.

މި ބަދަލާ ގުޅިގެން ޕޯސްޓްނޯޑުގެ 1,500 މުވައްޒަފުންގެ ވަޒީފާ ވަނީ ގެއްލިފައެވެ. ނަމަވެސް، އޮންލައިން ވިޔަފާރި ކުރިއަރަމުންދާތީ އެ ކުންފުނިން ދެން އެންމެ ބޮޑު ސަމާލުކަމެއް ދޭނީ ފައިދާ ބޮޑު ޕާރުސަލް ބެހުމުގެ ޚިދުމަތަށެވެ.

މި ނިންމުމަށް އާންމުންގެ ތާއީދު އޮތް ނަމަވެސް، އުމުރުން ދުވަސްވީ މީހުންނާއި ދުރު ސަރަޙައްދުތަކުގައި އުޅޭ މީހުންނަށް މިކަމުގެ ސަބަބުން ދަތިތަކެއް ކުރިމަތިވެދާނެ ކަމަށް ބައެއް ޖަމްޢިއްޔާތަކުން ބުނެއެވެ. ޚާއްޞަކޮށް ސިއްޙީ މުހިންމު ލިޔެކިޔުންތައް ސިޓީ މެދުވެރިކޮށް ލިބޭ ފަރާތްތަކަށް މި ބަދަލު އައިލެއް މާ އަވަސްކަން އެ ފަރާތްތަކުން ފާހަގަކުރެއެވެ.

ޚިދުމަތް ހުއްޓާލުމާއެކު އެ ޤައުމުގެ އެކި ކަންކޮޅުތަކުގައި ހުރި ރަތް ކުލައިގެ މަޝްހޫރު 1،500 އެއްހާ ޕޯސްޓް ފޮށިތައް ނަގަން މިހާރު ވަނީ ފަށާފައެވެ. އޭގެ ތެރެއިން ބައެއް ފޮށިތައް ވަނީ ޗެރިޓީއަށް ވިއްކާލާފައެވެ.

އެ ކުންފުނިން ސިޓީ ޕޯސްޓްގެ ޚިދުމަތް ހުއްޓާލި ނަމަވެސް، ޤާނޫނީ ގޮތުން ސިޓީ ފޮނުވުމުގެ ފުރުޞަތު އޮންނަން ޖެހޭތީ، އަމިއްލަ ކުންފުނިތައް މެދުވެރިކޮށް ކުރިއަށް އޮތް ތަނުގައިވެސް ސިޓީ ފޮނުވޭނެއެވެ. އެހެންނަމަވެސް އެކަން ކުރެވޭނީ ސިޓީތައް އަމިއްލައަށް ފިހާރަތަކަށް ގެންގޮސްގެން ނުވަތަ އިތުރު އަގެއް ދައްކައިގެން ގެއިން ނަގަން އެދިގެންނެވެ.

މަސްދަރު: އޭބީސީ ނިއުސް