ހަށިގަނޑުގެ ހޫނުން ސްމާޓް ޑިވައިސްތައް ޗާޖުވާ ޓެކްނޮލޮޖީއެއް!

ހަށިގަނޑުގެ ހޫނުން ސްމާޓް ޑިވައިސްތައް ޗާޖުވާ މުޅިން އައު ޓެކްނޮލޮޖީއެއް ޗައިނާގެ ސައިންސްވެރިން ހޯދައިފިއެވެ.

މި އިންގިލާބީ ޓެކްނޮލޮޖީއަކީ، ސްމާޓްވޮޗް ފަދަ އަތުގައި އަޅާ ސާމާނު ޗާޖުކުރުމަށް ވަކިން ކަރަންޓަށް ޖަހަން ނުޖެހި، ހަށިގަނޑުން ބޭރުވާ ހޫނު ބޭނުންކޮށްގެން އެ ތަކެތި އަމިއްލައަށް ޗާޖުކޮށްދޭނެ ފުރުސަތު ހުޅުވައިދިން ހޯދުމެކެވެ.

ޗައިނީޒް އެކަޑަމީ އޮފް ސައިންސަސްގެ ދިރާސާވެރިން ވަނީ މިކަމަށް ބޭނުންވާ ޚާއްޞަ މާއްދާއެއް އުފައްދައި، މިފަދަ އާލާތްތަކަށް ހަކަތަ ފޯރުކޮށްދިނުމުގައި ކުރިމަތިވެފައިވާ އެންމެ ބޮޑު އެއް ހުރަސް ކަމަށްވާ ހޫނު ހިފެހެއްޓުމުގެ މައްސަލަ ހައްލުކޮށްފައެވެ.

"ސައިންސް" މަޖައްލާގައި ޝާއިޢުކޮށްފައިވާ މި ދިރާސާގައި ބުނާގޮތުން، ދިރާސާވެރިން ވަނީ ސްޕޮންޖެއް ފަދަ ކުދިކުދި ލޯވަޅުތަކެއް ހުންނަ، ވަރަށް ފަސޭހައިން ލެނބޭ "ތާމޯއިލެކްޓްރިކް" މާއްދާއެއް ފަރުމާކޮށްފައެވެ. މި މާއްދާގެ ސަބަބުން ހޫނު ބޭރުވިޔަނުދީ 72 އިންސައްތަ ހިފަހައްޓައިދޭއިރު، އޭގެ ތެރެއިން ކަރަންޓު ދައުރުވާ މިންވަރު 25 އިންސައްތައަށް އިތުރުކޮށްދެއެވެ. މިއީ ދުނިޔޭގައި ބޭކާރުވެގެންދާ 60 އިންސައްތަ ހޫނު ހަކަތަ، ބޭނުންތެރި ކަރަންޓަށް ބަދަލުކުރުމަށް ލިބުނު ބޮޑު ކުރިއެރުމެކެވެ.

މި އާ މާއްދާގެ އޮނިގަނޑު ހުންނަ ގޮތުން، އޭގެ ތެރޭގައި ހިމެނޭ ޕޮލިމަރު މޮލިކިއުލްތައް ވަރަށް ބާރަށް އަދި ތަރުތީބުން އެތުރިފައި ހުރެއެވެ. މީގެ ސަބަބުން ކަރަންޓު ދަތުރުކުރުމަށް ފަސޭހަ މަގުތަކެއް އުފެދި، ހަކަތަ އުފައްދާ މިންވަރު ކުރިން މިފަދަ މާއްދާތަކުން ނުފެންނަހާ މަތީ ރެކޯޑަކަށް ވަނީ ގޮސްފައެވެ.

މި އީޖާދުގެ އެންމެ އުންމީދީ އެއް ސިފައަކީ، މިއީ ނޫސް ޗާޕުކުރާ ފަދަ ފަސޭހަ އަދި އަގުހެޔޮ "ސްޕްރޭ-ކޯޓިންގ" ޓެކްނިކް ބޭނުންކޮށްގެން ގިނަ އަދަދަކަށް އުފެއްދޭނެ އެއްޗަކަށް ވުމެވެ. މި ހޯދުމާއެކު، ކުރިމަގުގައި ސްމާޓް ޑިވައިސްތަކަކީ ބެޓެރީ ލޯވެގެން ނިވޭނެ އެއްޗެއްގެ ބަދަލުގައި، އިންސާނާގެ ހަށިގަނޑުން ލިބޭ ހޫނުން މެދުނުކެނޑި ހަކަތަ ލިބިލިބި ހުންނާނެ ވަސީލަތްތަކަކަށް ވެގެންދާނެއެވެ.

ދުނިޔޭގައި އުފައްދާ ހަކަތައިގެ 60 އިންސައްތައަށްވުރެ ބޮޑު ބައެއް ބޭކާރު ހޫނުގެ ގޮތުގައި ގެއްލިގެންދާއިރު، ތާމޯއިލެކްޓްރިކް ޓެކްނޮލޮޖީއަކީ އެފަދަ ހޫނު ބޭނުންކޮށްގެން ކަރަންޓު އުފެއްދުމަށް ޒަމާނުއްސުރެ ސައިންސްވެރިން މަސައްކަތްކުރަމުން އައި ދާއިރާއެކެވެ. ނަމަވެސް، މީގެ ކުރިން މިކަމަށް ބޭނުންކުރަމުން އައި މާއްދާތަކަކީ ވަރަށް ހަރު، ބަރު އަދި ފަސޭހައިން ލެނބޭ އެއްޗެއް ނޫން ކަމުން، ސްމާޓްވޮޗް ފަދަ އަތުގައި އަޅާ ލުއި އިލެކްޓްރޯނިކް ސާމާނުގައި އެ ޓެކްނޮލޮޖީ ބޭނުންކުރުމަކީ ބޮޑު ގޮންޖެހުމަކަށް އޮތީ ވެފައެވެ.

ޗައިނާގެ ސައިންސްވެރިން މިހާރު މި ހޯދި ކުރިއެރުމަކީ، ހޫނު ހިފެހެއްޓުމާއި ކަރަންޓު ދައުރުވުމުގެ މެދުގައި އޮތް އެންމެ ބޮޑު ހުރަސް ނައްތާލައި، އަމިއްލައަށް ހަކަތަ އުފައްދާ އިލެކްޓްރޯނިކް ސާމާނު އުފެއްދުމަށް ލިބުނު ވަރަށް މުހިންމު ކާމިޔާބީއެކެވެ.