އޮސްޓްރޭލިޔާގެ މެޑިކެއަރ ޕްލެޓްފޯމަށް އޯޕަންއޭއައިގެ އޭޖެންޓުން ހަމަލާދީފި

އޯޕަންއޭއައިގެ އޭއައި އެޖެންޓަކު، އޮސްޓްރޭލިޔާގެ ގައުމީ ސިއްހީ ޕްލެޓްފޯމް، މެޑިކެއަރއަށް އެކްސެސްކޮށް ހަމަލާދިން ހާދިސާއަކާއި ގުޅިގެން އޮސްޓްރޭލިޔާގެ ސަރުކާރުން ވަނީ ކަންބޮޑުވުން ފާޅުކޮށްފައެވެ. މިކަން ހާމަކޮށްފައިވަނީ މިދިޔަ ހަފްތާގައި ކުރިއަށް ދިޔަ ޔުނައިޓެޑް ނޭޝަންސް ޖެނެރަލް އެސެމްބްލީ (ޔޫއެންޖީއޭ)ގައި ބައިވެރިވުމަށް ނިއުޔޯކަށް ވަޑައިގެން ހުންނަވާ ނޫސްވެރިންނާއި އެކު ބޭއްވި ބައްދަލުވުމެއްގައި އޮސްޓްރޭލިޔާގެ ޕްރައިމް މިނިސްޓަރ އެންތަނީ އަލްބަނީސީއެވެ.

އޯޕަންއޭއައިގެ އެޖެންޓެއް، އޮސްޓްރޭލިޔާގެ ސިއްހީ ޑޭޓާ ބަލަހައްޓާ ސިސްޓަމް (މެޑިކެއަރ) އަށް ވަދެ އާންމުކޮށް ލިބެން ނެތް މައުލޫމާތަށް އެކްސެސްކޮށް، ސިސްޓަމަށް ވަންނަން ބޭނުންވާނެ ކްރެޑެންޝަލްސް (ޔޫސަރނޭމް އަދި ޕާސްވޯޑް) ހޯދާ، އެ ސިސްޓަމްގެ ތެރެއަށް ފައިލްތަކެއް އިތުރުކޮށްފައިވާ ކަމަށް ޕްރައިމް މިނިސްޓަރުގެ ވާހަކައިގައި ކަށަވަރު ކޮށްދިނެވެ.

މީގެ ކުރިން ފެނިފައިވާ އޭއައި އެޖެންޓުން ސިސްޓަމްތައް ހެކްކޮށް ވަންނަ ހާދިސާތަކާއި މިހާދިސާއާއި ތަފާތު ވާ ގޮތަކީ، އެއްވެސް މީހަކު މިކަން ކުރުމަށް އެޖެންޓް ކައިރީގައި ބުނެފައި ނުވާކަމެވެ. ކުރިން ފެނިފައިވާ މިފަދަ ސައިބަރ ސެކިޔުރިޓީ ހާދިސާތައް ފެށިފައިވަނީ ކޮންމެވެސް އިންސާނެއްގެ އިރުޝާދަށް، ނުވަތަ އިންސާނުން ކުރަން ބުނާ ކޮންމެވެސް އެހެން މަސައްކަތެއްގެ ތެރެއިންނެވެ. މިސާލަކަށް އެޖެންޓުން ހެކް ކުރޭތޯ ކުރާ ޓެސްޓެއްގެ ތެރެއިން، ނުވަތަ އެޖެންޓަކަށް ކުރަން ހަވާލު ކުރާ ކަމެއްގެ ފުރިހަމަ ކުރުމުގެ ގޮތުންނެވެ.

އެހެން ނަމަވެސް މިހާދިސާ ހިނގާފައިވަނީ އާންމުކޮށް ކުރިއަށްދާ މައުލޫމާތު އެއްކުރުމުގެ ތެރެއިންނެވެ. މިކަމުގެ ތެރެއިން އެޖެންޓު އަމިއްލަ އިހްތިޔާރުގައި މީހެއްގެ އިރުޝާދަކާއި ނުލާ، މެޑިކެއަރ ސިސްޓަމްގައި ހުރި ވަލްނަރަބިލިޓީއެއް ދެނެގަތީއެވެ. އަދި ސިސްޓަމްގައި ސެކިޔުރިޓީއަށް އަޅާފައިވާ ފިޔަވަޅުތައް ހުރަސް ކުރެވޭނެ ގޮތެއް ހޯދާ، ސިސްޓަމް ހެކްކުރީއެވެ.

އެ ސިސްޓަމަށް ވަންނަން އެކްސެސް ނެތް ހިސާބުތަކަށް އެޖެންޓް ވަތް ނަމަވެސް، ސިސްޓަމްގައި ހިމެނޭ ރައްޔިތުންގެ އެއްވެސް ޑޭޓާއަކަށް ބަދަލެއް ގެނެސްފައި ނުވާކަމަށާއި، އެއްވެސް ރިކޯޑެއް ގެއްލިފައިވާ ކަމުގެ އެއްވެސް ހެއްކެއް ނެތްކަމަށް އޮސްޓްރޭލިޔާ ސަރުކާރުގެ ކަމާބެހޭ އިދާރާއިން އަދި އޯޕަންއޭއައިއިން ވެސް ކަށަވަރުކޮށްދެއެވެ.

އޮސްޓްރޭލިޔާގެ ޕްރައިމް މިނިސްޓަރ ހާމަކުރިގޮތުގައި އޭނާ ވަނީ އޯޕަންއޭއައިގެ ސީއީއޯ ސޭމް އޯލްޓްމަން އާއި ސީދާ ގުޅާ މިކަމާއި ބެހޭގޮތުން ވާހަކަ ދައްކާފައެވެ. އޯޕަންއޭއައިގެ ސިސްޓަމްތަކާއި އެޖެންޓުންގެ ބައުންޑަރީތަކާއި ރައްކާތެރިކަމުގެ ޕްރޮޓޮކޯލްތަކާއި ގުޅޭ ގޮތުން އެގައުމުން ކަންބޮޑުވާ ބޮޑެތި މައްސަލަތައް ރަސްމީކޮށް ވަނީ ހުށަހަޅާފައެވެ.

މިކަމާއި ގުޅިގެން އޯޕަންއޭއައި އިން ވަނީ އޮސްޓްރޭލިއާ ސަރުކާރަށް ރަސްމީކޮށް މައާފަށް އެދިފައެވެ. އަދި މިކަން ތަކުރާރު ވިޔަ ނުދިނުމަށް އަވަސް ފިޔަވަޅުތަކެއް އަޅާނެކަމަށް ވަނީ އިއުލާންކޮށްފައެވެ. މިގޮތުން،

- ހާއްސަ ޓާސްކްފޯސްއެއް އެކުލަވާލުން

މިހާދިސާ ރަނގަޅަށް ދިރާސާކުރުމަށް އޮސްޓްރޭލިޔާގައި ހާއްސަ ސޭފްޓީ ޓާސްކްފޯސްއެއް އެކުލަވާލާނެކަމަށް އޯޕަންއޭއައި އިން ހާމަކުރިއެވެ. މިހާދިސާ ހިނގިގޮތާއި ގުޅޭ އިތުރު ހެކިތައް ހޯދާ އެކުންފުނީގެ ސިސްޓަމްތަކަށް ހިނގާ ކޮންޓްރޯލްތައް ހަރުދަނާކުރުމަށް، އޭއައި ކޮންޓެއިންމަންޓް ޕްރޭމްވޯކް އިތުރަށް ރިފައިންކުރާނެ ކަމަށްވެއެވެ.

- އައު މޮޑެލް ރިލީޒްކުރުން ލަސްކުރުން

އޯޕަންއޭއައިގެ ސިސްޓަމްތަކުގެ ސެކިޔުރިޓީގައި ހުރި މައްސަލަތައް އިތުރަށް ދެނެގަތުމަށާއި، ސިސްޓަމްތަކުގެ ބައުންޑަރީ އިތުރަށް ޓެސްޓުކުރުމަށްޓަކައި، ކުރިއަށް ރިލީޒްކުރަން އޮތް ޖީޕީޓީ-6.1 އެސްޓްރާ މޮޑެލް އާންމުކޮށް ތައާރަފްކުރުން ފަސްކުރާނެކަމަށް އޯޕަންއޭއައި އިން ހާމަކުރިއެވެ.

- ގައުމީ އިދާރާތަކާއި އެކު މަސައްކަތްކުރުން

ނޭދެވޭ އޮޓޮނޮމިކް އޭއައި އޭޖެންޓުންގެ މިފަދަ ހަމަލާތަކާއި ހާދިސާތައް ހުއްޓުވުމަށާއި، ސިސްޓަމްތަކުގެ އިންފްރާސްޓްރަކްޗަރ އިތުރަށް ބާރުގަދަކުރުމަށް ސައިބަރ ރައްކާތެރިކަމަށް މަސައްކަތްކުރާ ގައުމީ އިދާރާތަކާއި އެކު ގުޅިގެން މަސައްކަތްކުރާނޭ ކަމަށް ވެސް އޯޕަންއޭއައި އިން ފާހަގަކުރިއެވެ.

ދުނިޔޭގެ ގިނަ ގައުމުތަކުން އެކި އެކި ސިސްޓަމްތައް އުފެއްދުމަށާއި އާންމު ހިދުމަތްތައް ދިނުމުގައި އޭއައި ބޭނުންކުރުން އެތައް ގުނައެއް ހަލުވިކުރަމުންދާ މިދަނޑިވަޅުގައި މިފަދަ ހާދިސާތަކުން ދަސްކުރަންވީ ވަރަށް މުހިއްމު ފިލާވަޅެއް ހާމަވެގެންދެއެވެ.

އޮޓޮނޮމިކް އޭޖެންޓިކް އޭއައި ނުވަތަ އަމިއްލަ އިހްތިޔާރުގައި މަސައްކަތްކުރުމުގެ ގާބިލްކަން ހުރި އޭއައި ނިޒާމުތައް އުފައްދާ އާންމުބޭނުންތަކަށް "ދޫކޮށްލުމުގެ" ކުރިން އެތަކެތީގެ ކޮންޓްރޯލް ނުގެއްލޭ ފަދަ ގޮތަކަށް ފިޔަވަޅުތަކެއް އެޅުން މުހިއްމު ވެއެވެ. މީހެއްގެ އިރުޝާދެއް ނެތި، ބޭނުންހާ ގޮތަކަށް އެތަކެތި ދޫކޮށްލެވިގެން ނުވާނެއެވެ. ހަރުދަނާ ގޮތެއްގައި އޭޖެންޓުންގެ ބައުންޑަރީ ކަނޑައަޅާ، ކޮންޓެއިންކުރުމުގެ ފިޔަވަޅުތަކެއް އަވަސް ފުރުސަތެއްގައި ތަންފީޒު ކުރުން ވަރަށް މުހިއްމެވެ. އޭއައި އަކީ ބާރުގަދަ ޓޫލެއްކަމުން، އޭގެ ފައިދާ ހޯދުމުގެ ރޭހުގައި ކުރިއަރައި ދިޔުމުގެ ދަހިވެތިކަމުގައި މިކަން ހަނދާން ނައްތާލުމަކީ ބަލައިގަނެވޭނެކަމެއް ނޫނެވެ.