ޓެކްނޮލޮޖީ ކުންފުނިތަކުން ގިނައަދަދަކަށް މުވައްޒަފުން ވަކިކުރަނީ ކީއްވެ؟

ދުނިޔޭގައި އެންމެ ހަލުވިކަމާއެކު ކުރިއަރަމުން އަންނަ އެއް ސިނާއަތް ކަމަށްވާ ޓެކް އިންޑަސްޓްރީއަށް މިފަހަކަށް އައިސް ވަނީ ވަރަށް ބޮޑު ހީނަރުކަމެއް އައިސްފަ އެވެ. ގޫގަލް، މައިކްރޮސޮފްޓް، މެޓަ އަދި އެމެޒޯން ފަދަ ބޮޑެތި ޓެކް ކުންފުނިތަކުން ވަނީ 150،000 އަށް ވުރެ ގިނަ މުވައްޒަފުން އެއްކޮށް ވަޒީފާއިން ވަކިކޮށްފަ އެވެ. މި ކުންފުނިތަކުން ވަޒީފާއިން ވަކިކުރަން ޖެހޭ ގިނަ ސަބަބުތަކެއް ހުށަހަޅާފައިވާއިރު، އެންމެ އާންމު ކަމަކީ ދުނިޔޭގެ އިގްތިސާދު މަޑުޖެހިފައިވާ ވަރަކަށް ހަރަދު ކުޑަކުރަން ޖެހުމެވެ. ނަމަވެސް މި ބޮޑެތި ކުންފުނިތަކުގެ ވަޒީފާއިން ވަކިކުރި ހަގީގީ ސަބަބުތައް މިއަށްވުރެ ބޮޑަށް ކޮމްޕްލިކޭޓްވުމަކީ އެކަށީގެންވާ ކަމެކެވެ.

10،000 މުވައްޒަފުން ވަޒީފާއިން ވަކިކޮށްފައިވާ މައިކްރޮސޮފްޓުން ފަށައިގަންނަމާ ހިނގާށެވެ. ފާހަގަކޮށްލެވޭ ގޮތުގައި ވަޒީފާއިން ވަކިކުރިކަން އިއުލާނުކުރި އިރު މައިކްރޮސޮފްޓުން ވެސް ވަނީ މަޝްހޫރު ޗެޓްޖީޕީޓީ އެޕްލިކޭޝަންގެ ފަހަތުގައި ވާ ކުންފުނި އޯޕަންއޭއައިގައި 10 ބިލިއަން ޑޮލަރު އިންވެސްޓް ކުރަން ނިންމާފައިވާކަން އިއުލާނުކޮށްފަ އެވެ. ވަޒީފާއިން ވަކިކުރާ ކޮންމެ މުވައްޒަފަކަށް އެއް މިލިއަން ޑޮލަރާ އެއްވަރުކުރާ މި އިންވެސްޓްމަންޓުން އެނގެނީ އެ ނިންމުމުގެ ފަހަތުގައި ވިޔަފާރީގެ ސާފު ސަބަބެއް އޮތް ކަމެވެ.

ހަމަ އެފަދައިން ގޫގަލްގެ ބެލެނިވެރި ކުންފުނި އަލްފަބެޓް އިން ވެސް ވަނީ އެ ކުންފުނީގެ ގްލޯބަލް ހެޑްކައުންޓް 12،000 މުވައްޒަފުން މަދުކުރަން ނިންމާފައިވާކަން އިއުލާނުކޮށްފަ އެވެ. އަލްފަބެޓްގެ ސީއީއޯ ސުންދަރު ޕިޗާއީ މީގެ ކުރިން ވަނީ އޭއައި އަކީ މިހާތަނަށް އެންމެ ޓްރާންސްފޯމޭޓިވް ޓެކްނޮލޮޖީގެ ގޮތުގައި ސިފަކުރައްވައި، ވަޒީފާއިން ވަކިކޮށްފައި ވަނީ "ކުންފުނީގެ މުވައްޒަފުންގެ ހުނަރާއި ކެޕިޓަލް އެންމެ ބޮޑު އިސްކަމެއް ދީގެން" ކަމަށް ވިދާޅުވެފަ އެވެ. ގިނަ ބަޔަކު ގަބޫލުކުރާ ގޮތުގައި ގޫގަލް އިން އަންނަނީ ޗެޓްޖީޕީޓީ ފަދަ އަމިއްލަ އޭއައި ޕަވާޑް އެޕްލިކޭޝަނެއް ގެނައުމުގެ މަސައްކަތް ކުރަމުން ނެވެ. އަދި އެކަން ވަރަށް އަވަހަށް އިއުލާނު ކުރާނެއެވެ.

ޓެކްނޮލޮޖީ ދާއިރާގެ މި ބޮޑެތި ހަތަރު ކުންފުނި ކަމަށްވާ މެޓަ، އަލްފަބެޓް، އެމެޒޯން އަދި މައިކްރޮސޮފްޓް ގުޅިގެން ވަނީ 50،000 ވަޒީފާ ކަނޑާލައިފަ އެވެ. ޓްވިޓަރގެ ސީއީއޯ އީލޮން މަސްކް މިދިޔަ އަހަރުގެ ފަހުކޮޅު އެ ކުންފުންޏާ ހަވާލުވިއިރު އެ ކުންފުނީގެ ދެބައިކުޅަ އެއްބައި މުވައްޒަފުން ވަޒީފާއިން ވަކިކޮށްފައިވާ ކަމަށް ރިޕޯޓްތައް ބުނެ އެވެ.

އެހެންވީމާ، މި ފުޅާ ދާއިރާއެއްގައި ގިނަބަޔަކު ވަޒީފާތަކުން ކަނޑާލުމުގެ ހަގީގީ ސަބަބަކީ ކޮބައިހެއްޔެވެ؟ އޭގެ ސަބަބުން، އެންމެ ގިނައިން ވަޒީފާތަކުން ވަކިވެފައިވަނީ އެމެރިކާގައި ތިބި މުވައްޒަފުންނެވެ. އެމެރިކާގެ އެތައް ހާސް ބަޔަކު ވަނީ ވަޒީފާއިން ވަކިވެފައެވެ. މި ސުވާލަށް ޖަވާބު ދިނުމުގެ ގޮތުން 365 ޑޭޓާ ސައިންސްގެ ޑޭޓާ އެކްސްޕާޓުން ވަނީ އެ އަދަދުތައް އަމިއްލައަށް ދިރާސާ ކޮށްފަ އެވެ.

އޭގެ ތެރެއިން އެއް ހޯދުމަކީ ހައިރާންވާ ވަރުގެ ހޯދުމެއް ނޫނެވެ. ކޮވިޑް-19 ގެ ބަލިމަޑުކަމުގެ ތެރޭގައި ރެކޯޑް އާމްދަނީއެއް ލިބުނު ޓެކް ކުންފުނިތަކުން ވަޒީފާ އަށް މީހުން ހޯދުމުގެ ހަރަކާތެއް ކުރިއަށް ގެންދިއުމުގެ ސަބަބުން ރެކޯޑް އަދަދަކަށް މުސާރަ ބޮޑުވެ، ބޮޑެތި އިނާޔަތްތަކާ މެދު މީޑިއާގައި ވަނީ ނުތަނަވަސްކަން އުފެދިފަ އެވެ. ދާދި ފަހުން ވަޒީފާއިން ވަކިކުރި މުވައްޒަފަކު އެމުވައްޒަފުންގެ މަގާމުގައި ހުންނެވި މީޑިއަން ޓައިމަކީ ގާތްގަނޑަކަށް ދެ އަހަރެއްހާ ދުވަސް ކަމަށް ވާއިރު، މި ކަނޑާލުމަކީ ޕެންޑެމިކްގެ ތެރޭގައި އެކުލަވާލާފައިވާ ވަޒީފާއަދާކުރުމުގެ ސިޔާސަތުތަކުގެ ސްކޭލިން ބެކް ރަމްޒުކޮށްދޭ ކަމެއް ކަމަށް ބެލެވެ އެވެ.

ނަމަވެސް އެންމެ ހައިރާންކުރުވަނިވި ހޯދުމަކީ ވަޒީފާއިން ވަކިކުރި މީހުންގެ ތަޖުރިބާގެ މީޑިއަން ލެވެލް އަކީ 11.5 އަހަރެވެ. މިކަމުން އެނގެނީ ވަޒީފާއިން ވަކިކުރީ މަދު ތަޖުރިބާއެއް ލިބިފައިވާ ޖޫނިއާ މަސައްކަތްތެރިން ނައްތާލުމަށް ނުވަތަ ވަޒީފާ އޮޓޮމޭޓް ކުރުމަށް ނޫން ކަމެވެ. މި ތަފާސް ހިސާބު ތައް ކަނޑައެޅިދާނެ އެއް ސަބަބަކީ ދިގު މުއްދަތަކަށް ހިދުމަތް ކުރާ މުވައްޒަފުންނަށް ބޮޑު މުސާރައެއް ލިބޭތީ، އެ އަދަދުތައް ކަނޑާލުމުން ވިޔަފާރިތަކަށް މާލީ ލަނޑުދަނޑިތައް ހާސިލްކުރުމަށް މަގުފަހިވެގެންދާނެތީ އެވެ.

އަނެއް ޝައުގުވެރި އޮބްޒަވޭޝަނަކީ އެންމެ ބޮޑަށް އަސަރުކުރި ރޯލްތަކާއި ޖޮބް ފަންކްޝަންތައް ހުރީ އެޗްއާރުގެ ތެރޭގައި ކަމަށްވާއިރު، އެއީ ވަޒީފާއިން ވަކިކުރި މީހުންގެ 28 އިންސައްތައެވެ. އެހެނީ ކުންފުނިތަކުން މުވައްޒަފުން ވަކިކުރާނަމަ، އެ ކުންފުނިތަކުން ވެސް މީހުން ރެކްރޫޓްކުރުން ކަނޑާލާނެ ކަމަށާއި އޭގެ ސަބަބުން އެޗްއާރު ސްޓާފުން ބޭނުންވާ މިންވަރު ކުޑަވާނެ ތީ ކަމަށް ވެދާނެއެވެ. އަނެއް ސަބަބަކީ އެޗްއާރު އަކީ ބައެއް ފަންކްޝަންތަކުގެ ބަދަލުގައި އޮޓޮމޭޝަން ގެނައުމުގެ މަސައްކަތް ކުރާ ސަރަހައްދަކަށް ވުމެވެ. އަލަށް ވަޒީފާ އަދާކުރާ ފަރާތްތަކާ އިންޓަވިއު ކުރުމާއި އޮންބޯޑް ކުރުމާ ގުޅޭ ރޫޓިން މަސައްކަތްތައް އޮޓޮމޭޓް ކުރުމުގެ މަގްސަދުގައި މިހާރުވެސް ޕްލެޓްފޯމްތައް އެބަހުއްޓެވެ. ފާއިތުވި އަހަރުތަކުގައި އެމެޒޯން ފަދަ ކުންފުނިތަކުން ވަނީ އޭއައި ބޭނުންކޮށްގެން ދަށް ޕާފޯމަންސް މުވައްޒަފުން ދެނެގަނެ ވަޒީފާއިން ވަކިކޮށްފަ އެވެ.

އަދި 365 ޑޭޓާ ސައިންސުން އެއްކުރި ޑޭޓާއިން ވެސް އެނގުނު ގޮތުގައި އަސަރުކުރި ރޯލްތައް ކޮންމެ ކުންފުންޏެއްގެ މެދުގައި ވެސް ތަފާތެވެ. މައިކްރޮސޮފްޓާއި މެޓަގައި އެޗްއާރު އަދި ޓެލެންޓް ސޯސިންއަށް އެންމެ ބޮޑަށް އަސަރުކޮށްފައިވާއިރު، ގޫގަލް އަދި ޓްވިޓަރގައި މި ކަނޑާލުމުގެ އަސަރު ސޮފްޓްވެއާ އިންޖިނިއަރުންނަށް ވަނީ ކޮށްފަ އެވެ. އަދި ވަޒީފާއިން ވަކިކުރި މުވައްޒަފުންގެ ތެރެއިން 56 އިންސައްތަ އަކީ އަންހެން މުވައްޒަފުންކަން ވެސް މި ދިރާސާއިން ވަނީ ފާހަގަކޮށްފައެވެ. ޚާއްޞަކޮށް ޓެކް އިންޑަސްޓްރީގެ ފަރާތުން މިކަމަށް ކުރާ މަސައްކަތްތަކަށް ބަލާއިރު، މިއީ ވަރަށް ކަންބޮޑުވާ ކަމެކެވެ. މި ލިޔުމަކީ ފޯރބްސް މަޖައްލާގައި ދުނިޔޭގެ ބޮޑެތި ޓެކްނޮލޮޖީ ކުންފުނިތަކުން މުވައްޒަފުން ވަކިކުރުމާއި ގުޅޭގޮތުން ލިޔެފައިވާ ލިޔުން އަސްލަކަށް ބަލައިގެން ލިޔެފައިވާ ލިޔުމެކެވެ.