-medium.jpg)
އެކްސްގެ ޕޯސްޓްތަކަށް ކުރާ ކޮމެންޓް ތަކުގައި ލިންކް ނުލެވޭ ގޮތް ހެދުމަށް އެކްސްއިން އާ ފީޗާއެއް ތަޢާރަފްކުރަމުން ދާކަމަށް މީޑިއާ ރިޕޯޓްތައް ބުނެފިއެވެ.
އެކްސް (ކުރީގެ ޓްވިޓަރ) އިން އަލަށް ތަޢާރަފްކުރާ މި ފީޗާއަކީ އެ ވެބްސައިޓުގައި ސްޕޭމް ޕޯސްޓްތަކާ ދެކޮޅަށް ތަރައްޤީކުރަމުންދާ ފީޗާއެއް ކަމަށް ވަނީ ހާމަވެފައެވެ.
މިގޮތުން، މިނިވަން އެޕް ދިރާސާވެރިއެއް ކަމަށްވާ ނިމާ އޯޖީ އިން ހާމަކުރި މަޢުލޫމާތުގައިވާ ގޮތުން، އެކްސް އިން މިހާރު މަސައްކަތް ކުރަމުން ދަނީ ޕޯސްޓްތަކަށް ދޭ ޖަވާބުތަކުގައި ނުވަތަ ކޮމެންޓް ބައިގައި ލިންކް ބްލޮކް ކުރެވޭނެ ގޮތެއް ތަޢާރަފުކުރުމަށެވެ.
އެކްސްގެ ސީނިއަރ ޑިރެކްޓަރ އޮފް ސެކިއުރިޓީ އިންޖިނިއަރިންގ، ކްރިސްޓޯފަރ ސްޓޭންލީ ވަނީ މި ފީޗަރ ތަރައްޤީކުރަމުންދާކަން ކަށަވަރުކޮށްދީފައެވެ.
މި ފީޗަރގެ ސަބަބުން ސްޕޭމް ބޮޓްތައް ދުރުކުރެވުމުގެ އިތުރުން، އެހެން މީހުންގެ ޕޯސްޓްތަކުގައި އަމިއްލަ ވެބްސައިޓްތައް ޕްރޮމޯޓްކުރުން ހުއްޓުވޭނެއެވެ. ނަމަވެސް، ދޮގު މަޢުލޫމާތު ފެތުރުން ހުއްޓުވުމަށް ސައްހަ މަޢުލޫމާތު ހިމެނޭ ލިންކްތައް ޝާއިޢުކުރުމަށް ވެސް މި ފީޗަރގެ ސަބަބުން ހުރަސްއެޅިދާނެއެވެ.
މީގެ ކުރިން ނިމާ އޯޖީ ވަނީ އެކްސް އިން ކޮންޓެންޓް ކްރިއޭޓަރުންނަށް އާމްދަނީ ލިބޭނެ ގޮތަކަށް އިން-އެޕް ފައިސާގެ ނިޒާމެއް ތަޢާރަފުކުރުމަށް މަސައްކަތްކުރަމުންދާކަން ވެސް ހާމަކޮށްފައެވެ.
އަދި މީގެ އިތުރުން، އައު އައިޑީ ވެރިފިކޭޝަން ފީޗަރތަކެއް ތަޢާރަފުކުރުމާއި، ވަޒީފާގެ އިޢުލާންތައް ޝާއިޢުކުރުމަށް މަސައްކަތްކުރަމުންދާކަން ވެސް އޭނާ ވަނީ ފާހަގަކޮށްފައެވެ.
މިފަދަ އާ ފީޗާތައް އެކްސްއިން ތަޢާރަފްކުރާނެކަން ދޭތެރެދޭތެރެއިން މީޑިއާގައި ފެންމަތިވި ނަމަވެސް އަދި މިހާތަނަށް އެކްސްއިން މިފަދަ ފީޗާއެއް ތަޢާރަފްކޮށްފައެއް ނުވެއެވެ. އަދި އެކްސްއިންވެސް މިފަދަ ފީޗާއެއް ތަޢާރަފްކުރާނެ ސީދާ ވަކި ތާރީޚެއް އިއުލާންކޮށްފައެއް ނުވެއެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.