ކޮޕާރ ހޯދުމަށް ކޭބަލްތައް ރީސައިކަލް ކުރަން ފަށައިފި

މިހާރު ކުރިމަތިވެފައިވާ ކޮޕާރ ޝޯޓޭޖްގެ ހައްލުކުރުމަށް އެހީތެރިވުމުގެ ގޮތުން ޔޫކޭގެ ރައްޔިތުންނަށް ގޭގައި ބޭނުންނުކޮށް ބަހައްޓާފައި ހުރި ކޭބަލްތަކާއި ކަރަންޓު ތަކެތި ހޯދުމަށް ކެމްޕެއިންއެއް ފަށައިފިއެވެ. "ރީސައިކަލް ޔުއަރ އިލެކްޓްރިކަލްސް" (އާރްވައިއީ) ގެ ނަމުގައި ހިންގޭ މި ކެމްޕޭނުން އަލިއަޅުވާލަނީ ކޮޕާރގެ ދެމެހެއްޓެނިވި ސަޕްލައިއެއް ޔަގީންކުރުމަށް ރީސައިކަލްކުރުމުގެ މުހިންމުކަމަވެ.

ފަހުގެ ދިރާސާތަކުން ދައްކާގޮތުގައި އިނގިރޭސިވިލާތުގައި ގާތްގަނޑަކަށް 1.3 ބިލިއަން ބޭނުންނުކުރާ ނުވަތަ އުކާލާފައިވާ ކަރަންޓު ތަކެތި ހުރެއެވެ. އޭގެ ތެރޭގައި 627 މިލިއަނެއްހާ ކޭބަލް ހިމެނެއެވެ. މި ތަކެތި ގިނަފަހަރު ބަހައްޓާފައި ހުންނަނީ ވަތްގަނޑުތަކުގައި ނުވަތަ ގުދަންކޮށްފައި، ހަނދާންނެތި އަޅާނުލާ ދޫކޮށްލެވިފައެވެ. ނަމަވެސް، މި ތަކެތީގައި ރީސައިކަލްކޮށް އަލުން ބޭނުންކުރެވޭނެ ކޮޕާރގެ ޚަޒާނާއެއް އެކުލެވިގެންވެއެވެ. ކޮޕާރ އަކީ އެކިއެކި ފަންނިއްޔާތު އުފެއްދުމަށް ވަރަށް މުހިންމު އެއްޗެކެވެ. މިސާލަކަށް ސޯލާ ޕެނަލްތަކާއި ވައިގެ ޓާބައިންތަކުގަޔާއި އަދި އިލެކްޓްރިކް އުޅަނދުފަހަރުތަކުގައެވެ.

މި ކެމްޕޭނުގެ އެހާމެ މުހިންމުވަމުންދާ ސަބަބަކީ ކޮޕާރއަށް އިތުރުވަމުންދާ ޑިމާންޑެވެ. 2030 ވަނަ އަހަރަށް އިނގިރޭސިވިލާތުން ތިމާވެއްޓާ ރައްޓެހި އިޤްތިޞާދަކަށް ބަދަލުވުމުގެ ލަނޑުދަނޑިއާއެކު، މާހިރުން އިންޒާރުދެނީ ކޮޕާރ މަޢުދަނުގެ ދަތިކަމަކުން ކުރިއެރުމަށް ހުރަސްއެޅިދާނެ ކަމަށެވެ. ރިޕޯޓުތަކުން ދައްކާގޮތުގައި ރިނިއުވަބުލް އެނާރޖީގެ ލަނޑުދަނޑިތައް ހާސިލުކުރުމަށް ގާތްގަނޑަކަށް 347,000 ޓަނުގެ ކޮޕާރ މަޢުދަން ބޭނުންވާއިރު، މިހާރުގެ ޕްރޮޑަކްޝަން ޑިމާންޑާ އެއްވަރަށް ނުދެއެވެ.

ބޭނުންނުވާ ކަރަންޓު ތަކެތި ރީސައިކަލްކުރުމުން، ގޭބިސީތަކުން ކޮޕާރ މަޢުދަނުގެ ސަޕްލައިއަށް ބޮޑު ހިއްސާއެއް ކުރެވޭނެއެވެ. ކޮންމެ ކޭބަލެއްގައިވެސް އަގުހުރި މާއްދާތައް އެކުލެވިގެންވެއެވެ. އަދި އެތަކެތި ރީސައިކަލްކުރުމުން ތިމާވެއްޓަށް އެހީތެރިވުމުގެ އިތުރުން، ގެއްލުންދެނިވި މައުދަނު ނަގާ އާދަތައް މަދުކުރެވޭނެއެވެ.

ކޮޕަރ އަކީ އޭގެ ފެންވަރު ދަށްނުވެ ތަކުރާރުކޮށް ރީސައިކަލް ކުރެވޭ މަދު މާއްދާތަކުގެ ތެރެއިން އެއްޗެކެވެ. އަދި ރީސައިކަލް ކުރެވިފައިވާ ކޮޕަރއާއި (ސެކަންޑަރީ ޕްރޮޑަކްޝަން) އަދި މައިންކުރެވިފައިވާ ކޮޕަރ (ޕްރައިމަރީ ޕްރޮޑަކްޝަން) ދެމެދު އެއްވެސް ފެންވަރެއްގެ ތަފާތެއް ނުހުރެއެވެ. އެހެންކަމުން މި ދެބާވަތް ބޭނުންކުރެވޭނީ އެއް ގޮތަކަށެވެ.

ރީސައިކަލް ކުރާ ތަންތަނުގައި މުސްކުޅި އިލެކްޓްރޯނިކްސް ހުރިތޯ ބެލުމަށް ބާރު އެބައެޅެވެއެވެ. ޕްލަގް، ބެޓެރީ، ނުވަތަ ކޭބަލެއް ހުންނަ ކޮންމެ އާލާތެއްވެސް ރީސައިކަލް ކުރެވިދާނެވެ. މި މަސައްކަތުގައި ބައިވެރިވުމުން، ދެމެހެއްޓެނިވި މުސްތަގުބަލަކަށް ބޭނުންވާ ތަކެތި ރައްކާތެރިކުރުމުގައި ވަކިވަކި ފަރުދުންނަށް އެހީތެރިވެދެވޭއިރު، އީ-ވޭސްޓް ވެސް މަދުކުރެވޭނެވެ.

ބޭނުން ނުކުރާ ކޭބަލްތަކާއި އިލެކްޓްރިކަލްތައް ރީސައިކަލް ކުރުމަކީ އެންމެންނަށް ވެސް ފެހި، ދެމެހެއްޓެނިވި އިގްތިސާދަކަށް ޙިއްޞާ ކުރެވޭނެ ފަސޭހަ ގޮތެކެވެ.