އީޔޫ އިން ކޮންޓެންޓް އަލޮގްރިދަމް ޑޭޓާ ދިނުމަށް އަންގައިފި

ޔޫރަޕިއަން ޔޫނިއަނުން ޑިޖިޓަލް ޕްލެޓްފޯމްތައް ގަވާއިދުގެ ތެރެއަށް ގެނައުމުގެ މަސައްކަތުގެ ތެރެއިން ސޯޝަލް މީޑިއާ އެލްގޮރިދަމްތަށް ބެލުން ވަނީ އިތުރުކޮށްފައެވެ. ޔޫރަޕިއަން ކޮމިޝަނުން ވަނީ ޔޫޓިއުބް، ސްނެޕްޗެޓް އަދި ޓިކްޓޮކްގެ ކޮންޓެންޓް ރެކޮމެންޑޭޝަން ސިސްޓަމްތައް މަސައްކަތްކުރާ ގޮތުގެ ތަފްސީލީ މަޢުލޫމާތު ރަސްމީކޮށް އެދިފައެވެ. މި ފިޔަވަޅު އެޅިފައިވަނީ ޑިޖިޑިޖިޓަލް ސަރވިސަސް އެކްޓް (ޑީއެސްއޭ) ގެ ދަށުންނެވެ. މިއީ ބޭނުންކުރާ ފަރާތްތަކަށް އިންޓަރނެޓުގައި ރައްކާތެރި މާހައުލެއް ކަށަވަރުކުރުމަށް އަމާޒުކޮށްގެން ހެދިފައިވާ މުހިންމު ޤާނޫނެކެވެ.

2022 ގެ ކުރީކޮޅު ޢަމަލުކުރަން ފެށުނު ޑީއެސްއޭ އިން ބޮޑެތި އޮންލައިން ޕްލެޓްފޯމްތަކުން އެމީހުންގެ އެލްގޮރިދަމްތައް މަސައްކަތްކުރާ ގޮތާއި އެމީހުންގެ ކޮންޓެންޓް ރެކޮމެންޑޭޝަންތަކާ ގުޅިގެން ހުރި ރިސްކުތައް ބަލަހައްޓާ ގޮތް ހާމަކުރަން ލާޒިމްކުރެއެވެ. ކޮމިޝަނުން އެންމެ ފަހުން ކުރި އެދުންތަށް އަމާޒުކޮށްފައިވަނީ މި އެލްގޮރިދަމްތަކުން ބޭނުންކުރާ ފަރާތްތަކުގެ އަމަލުތަކަށް އަސަރުކުރާ ގޮތް ދެނެގަތުމަށެވެ. ޚާއްޞަކޮށް ޤާނޫނާ ޚިލާފު ކޮންޓެންޓާއި، ދޮގު މަޢުލޫމާތާއި އިންތިޚާބުތަކަށާއި އަދި ކުޑަކުދިންގެ ދުޅަހެޔޮކަމަށް އަސަރުކުރާފަދަ ގެއްލުންދެނިވި މާއްދާތައް ފެތުރުމާ ގުޅޭގޮތުންނެވެ.

މި ޕްލެޓްފޯމްތަކުން ކޮންޓެންޓް ހުށަހެޅުމުގައި އެމީހުންގެ އެލްގޮރިދަމްތަކުން ބޭނުންކުރާ ޕެރެމީޓަރތަކުގެ ތަފްސީލު ދޭންޖެހެއެވެ. މީގެ ތެރޭގައި ނަފްރަތުގެ ވާހަކަތައް ފެތުރުމާއި ޤާނޫނާ ޚިލާފު މަސްތުވާތަކެތި ޕްރޮމޯޓްކުރުން ހުއްޓުވުމަށް އަޅާފައިވާ ފިޔަވަޅުތައް ހިމެނެއެވެ. މީގެ އިތުރުން، މި ތަޙްޤީޤުން މި ސިސްޓަމްތަކުގެ ޔޫޒަރުން ގެއްލުންދެނިވި ކޮންޓެންޓްގެ "ރެބިޓް ހޯލް" އަކަށް ވައްޓާލުމަށް މަގުފަހިވާ މިންވަރާއި މިކަން ހުއްޓުވުމަށް މި ކުންފުނިތަކުން އަޅާފައިވާ ފިޔަވަޅުތައް ބެލެވޭނެވެ.

ޓިކްޓޮކް ވަނީ އިތުރު ބެލުމުގެ ދަށަށް ގެނެވިފައެވެ. ކޮމިޝަނުން މި ޕްލެޓްފޯމުން ނުބައި ނިޔަތުގައި ހަރަކާތްތެރިވާ ފަރާތްތަކުން މެނިޕިއުލޭޓްކުރުން ހުއްޓުވުމަށާއި އިންތިޚާބީ ޕްރޮސެސްތަކުގެ ރައްކާތެރިކުރުމަށް ގެންގުޅޭ ސިޔާސަތުތަކާ ބެހޭ މަޢުލޫމާތު ހޯދަން އެދިފައިވެއެވެ.

މި ކުންފުނިތަކަށް ވަނީ 15 ނޮވެމްބަރުގެ ނިޔަލަށް އީޔޫގެ އެދުމާ އެއްގޮތަށް ޢަމަލުކުރުމަށް މުއްދަތު ދީފައެވެ. ސައްޙަ އަދި ފުރިހަމަ މަޢުލޫމާތު ނުދިނުމުން ބޮޑެތި ޖޫރިމަނާތަކާ ކުރިމަތިލާން ޖެހިދާނެއެވެ. ސަބަބަކީ ޑީއެސްއޭ ގަވާއިދާ ޚިލާފުވުމުން ހަރުކަށި އަދަބުތަކެއް ކަނޑައަޅާފައިވާތީއެވެ.