Download Logo
Copy Logo
ސޯޝަލް މީޑިއާ ޕްލެޓްފޯމްތައް ބޭނުންކުރާ ކުޑަކުދިންނާއި ފުރާވަރުގެ ކުދިންގެ އުމުރު ކަށަވަރުކުރުމަށްޓަކައި، ޔޫރަޕިއަން ޔޫނިއަން (އީޔޫ) އިން މުޅި ބްލޮކަށް ހާއްސަ އުމުރު ކަށަވަރުކުރާ އެޕްލިކޭޝަނެއް ތައާރަފުކޮށްފިއެވެ. މިއީ އިންޓަނެޓްގެ ޒަރީއާއިން ކުޑަކުދިންނަށް ލިބޭ ގެއްލުންތައް ކުޑަކުރުމަށް އެޅި ވަރުގަދަ ފިޔަވަޅެކެވެ.
ބުދަ ދުވަހު އިއުލާނުކުރި މި އެޕްލިކޭޝަނަކީ، ބޭނުންކުރާ މީހާގެ އަމިއްލަ އެއްވެސް މައުލޫމާތެއް ސޯޝަލް މީޑިއާ ޕްލެޓްފޯމްތަކާ ހިއްސާނުކޮށް، އެ މީހަކީ ކަނޑައެޅިފައިވާ އުމުރު ހަމަވާ މީހެއްކަން ސާބިތުކޮށްދޭ އެޕެކެވެ.
މީގެ ކުރިން ޓެކް ކުންފުނިތަކުން ދައްކަމުން އައި އުޒުރަކީ، އުމުރު ކަށަވަރުކުރަން އުޅުމުން މީހުންގެ ޒާތީ މައުލޫމާތުގެ ރައްކާތެރިކަން ގެއްލޭ ކަމުގެ އުޒުރެވެ. ނަމަވެސް މި އެޕާއެކު އެ އުޒުރުތައް މިހާރު ވަނީ ނިމުމަކަށް އައިސްފައެވެ.
ޔޫރަޕިއަން ކޮމިޝަންގެ ރައީސާ އުރްސުލާ ފޮން ޑަ ލޭން ވިދާޅުވީ، "އަޅުގަނޑުމެން މިދަނީ ކުޑަކުދިންނަށް އެކަށީގެންވާ ރައްކާތެރިކަން ނުދޭ އޮންލައިން ޕްލެޓްފޯމްތައް ޒިންމާދާރުކުރުވަމުން. ދެން އިތުރަށް ދެއްކޭނެ އުޒުރެއް ނެތް،" ކަމަށެވެ.
މި އެޕްލިކޭޝަންގައި އުމުރު ކަށަވަރުކުރުމަށްޓަކައި ޕާސްޕޯޓް ނުވަތަ ގައުމީ އައިޑީ ކާޑު ފަދަ ރަސްމީ ލިޔުމެއް އަޕްލޯޑް ކުރެވިދާނެއެވެ. ނުވަތަ ބޭންކްތަކާއި ސްކޫލްތައް ފަދަ އިތުބާރު ހުރި އިދާރާތަކެއް މެދުވެރިކޮށް ވެސް އުމުރު ކަށަވަރު ކުރެވޭނެއެވެ. ސޯޝަލް މީޑިއާ ޕްލެޓްފޯމްތަކަށް އެނގޭނީ ހަމައެކަނި އެ މީހަކީ އެކައުންޓް ހުޅުވުމަށް ބޭނުންވާ އުމުރު ހަމަވާ މީހެއްކަން ނުވަތަ ނޫންކަން އެކަންޏެވެ. އުފަން ތާރީޚު ފަދަ ޒާތީ މައުލޫމާތެއް އެ ކުންފުނިތަކަކަށް ނުލިބޭނެއެވެ.
މި އެޕަކީ "އޯޕަން ސޯސް" އެޕަކަށް ވާއިރު، ކޮންމެ މޯބައިލް ފޯނެއްގައި ވެސް މިއެޕް ބޭނުންކުރެވޭނެއެވެ. ޕްލެޓްފޯމްތަކުން މި އެޕް ބޭނުންކުރުން މަޖުބޫރު ނޫން ނަމަވެސް، މި އެޕާ އެއްވަރުގެ ނިޒާމެއް ބޭނުން ނުކުރާ ނަމަ، އީޔޫގެ 'ޑިޖިޓަލް ސާވިސަސް އެކްޓް' ގެ ދަށުން ބޮޑެތި ޖޫރިމަނާތަކާ ކުރިމަތިލާން ޖެހޭނެއެވެ.
ޔޫރަޕްގެ ގިނަ ގައުމުތަކަކުން މިހާރު ދަނީ ކުޑަކުދިން ސޯޝަލް މީޑިއާ ބޭނުންކުރުން ހަރުކަށި ކުރަމުންނެވެ. އޭގެ ތެރޭގައި ފްރާންސް، ސްޕެއިން އަދި ގްރީސް ހިމެނެއެވެ. މީގެ އިތުރުން، އޮސްޓްރޭލިއާއިން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މުޅިން މަނާކޮށްފައެވެ.
ކުޑަކުދިންގެ ނަފްސާނީ ދުޅަހެޔޮކަމަށް ސޯޝަލް މީޑިއާގެ ސަބަބުން ކުރާ ނޭދެވޭ އަސަރުތަކާއި، ބުލީ ކުރުމާއި، އަދި ނުރައްކާތެރި ކޮންޓެންޓަށް ހުށަހެޅޭތީ ބެލެނިވެރިން ދަނީ ވަރަށް ބޮޑަށް ކަންބޮޑުވުން ފާޅުކުރަމުންނެވެ. އީޔޫގެ މި އާ ފިޔަވަޅަކީ އެ ކަންބޮޑުވުންތަކަށް ލިބުނު ބޮޑު ހައްލެއް ކަމަށް މާހިރުން ދެކެވަޑައިގަންނަވައެވެ.
ބިނާކުރަނިވި ޚިޔާލުތަކާއެކު ލިޔުންތެރިކަމަށް އުފަލާއެކު މަރުޙަބާ ކިޔަމެވެ.
ޓެކްނޮލޮޖީ ހަބަރާއި ލިޔުން ހޮޅުއަށިތަކަށް.
ލޯތްބާއެކު ދިވެހިން އުފައްދާފައިވާ އުފެއްދުމެއް.