އޭއައި އަށް ކުރާ ހޭދަ ބޮޑުވެ، ފައިދާ ނުލިބޭތީ ކަންބޮޑުވުންތަކެއް!

އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ކުރިއެރުވުމަށާއި އޭގެ އިންފްރާސްޓްރަކްޗާ ބިނާކުރުމަށް ދުނިޔޭގެ ބޮޑެތި ކުންފުނިތަކުން ބިލިއަނުން ޑޮލަރު އޮއްސަމުންދާއިރު، އެއާ އެއްވަރުގެ މާލީ ފައިދާއެއް ނުވަތަ ރިޓާން އޮން އިންވެސްޓްމަންޓް (އާރްއޯއައި) ނުލިބޭތީ ޓެކްނޮލޮޖީ ދާއިރާގެ މާހިރުން ކަންބޮޑުވުން ފާޅުކުރަން ފަށައިފިއެވެ.

ވޭތުވެދިޔަ ތިން އަހަރުގެ ތެރޭގައި އެކަނިވެސް ބޮޑެތި ޓެކް ކުންފުނިތަކުން އޭއައި އަށް 800 ބިލިއަނަށްވުރެ ގިނަ ޑޮލަރު އިންވެސްޓްކޮށްފައިވާއިރު، މިއަހަރު ވެސް އިތުރު 700 ބިލިއަން ޑޮލަރު މި ދާއިރާއަށް ޚަރަދުކުރުމަށް ވަނީ ރާވާފައެވެ. ނަމަވެސް މިހާ ބޮޑެތި ޚަރަދުތަކެއް ކުރާއިރު، އޭއައި އިން ލިބޭ އާމްދަނީ ބޮޑުތަނުން އިތުރުނުވާނަމަ މި އިންވެސްޓްމަންޓްތަކަކީ ބޭކާރު ޚަރަދުތަކަކަށް ވެގެންދާނެ ކަމުގެ ބިރު ވަނީ ހީވެފައެވެ.

މައިކްރޯސޮފްޓް ފަދަ ކުންފުނިތަކުން އޯޕަންއޭއައި ފަދަ ލެބްތަކާ ގުޅިގެން 100 ބިލިއަނެއްހާ ޑޮލަރު އިންފްރާސްޓްރަކްޗާ ބިނާކުރުމަށް ހޭދަކޮށްފައިވާކަން ހާމަވެފައިވާއިރު، އޭއައިގެ ޚިދުމަތްތަކުން ލިބޭ އާމްދަނީއަކީ ކުރާ ޚަރަދާ އަޅާބަލާއިރު ވަރަށް ކުޑަ މިންވަރެކެވެ.

މީގެ އިތުރުން ގޫގުލް އަދި އެމެޒޯން ފަދަ ކުންފުނިތަކުގެ ކުރިމަގުގެ އާމްދަނީގެ ބޮޑު ބައެއް ބިނާވެފައިވަނީ އޯޕަންއޭއައި އަދި އެންތުރޮޕިކް ފަދަ ބޮޑެތި ގެއްލުމުގައި ހިންގާ އޭއައި ލެބްތަކުގެ މައްޗަށެވެ. މި ލެބްތަކުން އޭއައި މޮޑެލްތައް ތަމްރީނުކުރުމަށާއި ހިންގުމަށް ކުރާ ހޭދަ އިންތިހާއަށް ބޮޑުވުމުގެ ސަބަބުން، ކުންފުނިތަކުގެ މާލީ ދާއިރާ އޮތީ ބޮޑު ނުރައްކަލެއްގެ ތެރޭގައެވެ.

އޭއައި ބޭނުންކުރާ ކަސްޓަމަރުންނަށް ނުވަތަ އެކި ޖަމްއިއްޔާ ޖަމާއަތްތަކަށް ބަލާއިރު، އޭއައި ޓޯކަންތަކަށް ކުރަންޖެހޭ ޚަރަދުތައް އަންދާޒާކުރަން ނޭނގުމުގެ ސަބަބުން އަހަރީ ބަޖެޓްތައް މަދު މަސްކޮޅެއްގެ ތެރޭގައި ހުސްވަމުންދާކަން ވަނީ ފާހަގަކުރެވިފައެވެ. މިގޮތުން މަޝްހޫރު ރިއަލް އެސްޓޭޓް ކުންފުންޏެއް ކަމަށްވާ ޒިލޯއިން އެކަނިވެސް މިއަހަރުގެ ފުރަތަމަ ކުއާޓަރުގައި އޭއައި ޓޯކަންތަކަށް މިލިއަނަކަށްވުރެ ގިނަ ޑޮލަރު ހޭދަކޮށްފައިވެއެވެ. މިއީ އެ ކުންފުނީގެ މާލީ ފައިދާގެ ބޮޑު އިންސައްތައެއް ކަމަށްވާއިރު، އޭއައި ބޭނުންކުރުމުގެ ސަބަބުން އިންޖިނިއަރުންގެ މަސައްކަތް ލުއިވުމުގެ ބަދަލުގައި، އޭއައި އިން އުފައްދާ ކޯޑުތައް ރިވިއުކުރުމަށް ގިނަ ވަގުތުތަކެއް ހޭދަކުރަންޖެހި މަސައްކަތުގެ ފެންވަރު ދަށަށްދާކަމުގެ ޝަކުވާތައް ވަނީ އިތުރުވެފައެވެ.

މިހާރު އުފެދިފައިވާ އޭއައި ބަބްލް ނުވަތަ ކަންބޮޑުވުންތައް ފަޅައިގެން ގޮސްދާނެ ކަމުގެ އިންޒާރު މާހިރުން ދެނީ، ގިނަ ކުންފުނިތަކެއްގެ ވެރިން އެއްވެސް އިސްތިރާޖީ ވިސްނުމެއް ނެތި، ހަމައެކަނި އެހެން ބަޔަކު ކުރާތީ އޭއައިގެ ފަހަތުން ދުވާތީއެވެ.

އޭއައިގެ ސަބަބުން ހަގީގީ މަސައްކަތްތަކެއް ކުރެވޭ ކަމުގެ އިހުސާސްވީ ނަމަވެސް، ގިނަ ފަހަރަށް އޭއައި އިން ނެރެދެނީ ފެންވަރު ދަށް އަދި އިތުބާރު ނުކުރެވޭ ފަދަ ނަތީޖާތަކެކެވެ. އެހެންކަމުން، މި ބޮޑު ޚަރަދާއި ނުބައްދަލު ނަތީޖާތަކުގެ ސަބަބުން ކުންފުނިތަކުން އޭއައި ބަޖެޓްތައް ކަނޑާލަން ފަށާ ހިސާބުން، މުޅި އޭއައި ސިނާއަތަށް ބޮޑު ލޮޅުމެއް އަރާނެ ކަމަށް ބެލެވެއެވެ.