ރާއްޖޭގައި ކްރިޕްޓޯކަރަންސީ ތަޢާރަފުކުރަނީ

ރާއްޖޭގައި ކްރިޕްޓޯކަރަންސީ ތަޢާރަފުކުރުމަށް އަމަލީ މަސައްކަތް ފަށާފައިވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.

ގައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ، އިގްތިސާދީ ކަންކަން ފުޅާކުރުމުގެ މަސައްކަތުގެ ދަށުން 2030 ވަނަ އަހަރާ ހަމައަށް އިގްތިސާދުގެ 15 އިންސައްތަ ޑިޖިޓަލްކުރުމަށް ސަރުކާރުން މަސައްކަތްކުރާނެ ކަމަށެވެ. އަދި މި މަސައްކަތުގެ ތެރެއިން ޑިޖިޓަލް ކަރަންސީ ތަޢާރަފުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރަށް އިރުޝާދު ދެއްވާފައިވާ ކަމަށް ރައީސް ވިދާޅުވިއެވެ.

ބްލޮކްޗެއިން ޓެކްނޮލޮޖީ ބޭނުންކޮށްގެން ހިންގާ ޑިޖިޓަލް ކަރަންސީއަކީ، ރައްކާތެރި އަދި ހާމަކަން ބޮޑު މާލީ މުޢާމަލާތްތަކެއް ކަމަށްވާއިރު، ރާއްޖެއަށް މި ޓެކްނޮލޮޖީ ތަޢާރަފުކުރާނީ ބައިނަލްއަގުވާމީ މިންގަނޑުތަކާ އެއްގޮތަށް ކަމަށާއި، މިކަމަށް ޚާއްސަ ގާނޫނެއް އެކުލަވާލެވޭނެ ކަމަށްވެސް ރައީސް ވިދާޅުވިއެވެ.

މާލީ ދާއިރާގެ މާހިރުން ފާހަގަކުރާ ގޮތުގައި، ރާއްޖެއަށް ކްރިޕްޓޯކަރަންސީ ތަޢާރަފުކުރުމުން ގިނަގުނަ ފައިދާތަކެއް ލިބިގެންދާނެއެވެ. މީގެ ތެރޭގައި މާލީ މުޢާމަލާތްތައް ކުރުމުގެ އަގު ކުޑަވެ، ބޭންކެއް މެދުވެރިނުކޮށް މުޢާމަލާތްތައް ހިންގުމުގެ ފުރުސަތު ލިބިގެންދިއުން ހިމެނެއެވެ. މީގެ އިތުރުން، ބައިނަލްއަގުވާމީ ވިޔަފާރިތައް ހިންގުމަށް ފަސޭހަވެ، މުޅި ނިޒާމަށް އިތުރު ހަލުވިކަމެއް ލިބިގެންދާނެއެވެ. އަދި ޒުވާނުންނަށް އައު ވަޒީފާގެ ފުރުސަތުތައް އިތުރުވެގެންދާނެ ކަމަށްވެސް މާހިރުން ފާހަގަކުރެއެވެ.

އެހެންނަމަވެސް ވަކި ފަރާތެއްގެ ބާރުގެ ދަށުގައި ނުހިމެނޭ މި ނިޒާމު ތަޢާރަފުކުރުމުގައި އެތައް ގޮންޖެހުންތަކެއް ހުރި ކަމަށް ވެސް ފާހަގަކުރެވެއެވެ. މިގޮތުން ކްރިޕްޓޯކަރަންސީގެ އަގަށް އަންނަ ބޮޑެތި ބަދަލުތަކާއި، ސައިބަރ ސެކިއުރިޓީގެ ނުރައްކާތަކަކީ ބޮޑެތި ކަންބޮޑުވުންތަކެކެވެ. މީގެ އިތުރުން، މަނީ ލޯންޗަރިންގ އަދި ޓެރަރިޒަމްގެ ފައިނޭންސިންގ ފަދަ ކަންކަމަށް ބޭނުންކުރުމުގެ ފުރުސަތު އޮތުމާއެކު، މި ނިޒާމް ބެލެހެއްޓުމަށް ބޭނުންވާ ޓެކްނިކަލް މާހިރުން ހޯދުމަކީވެސް ގޮންޖެހުމެކެވެ.

ޑިޖިޓަލް ކަރަންސީ ތަޢާރަފުކުރުމަކީ ކިޔަވާ ކުދިންނާއި ޒުވާނުންނަށް ލިބިގެންދާނެ މުހިންމު ފުރުސަތެއް ކަމަށް ފާހަގަކުރައްވަމުން، ޑިޖިޓަލައިޒޭޝަންގެ ދާއިރާއިން ބައިނަލްއަގުވާމީ ފެންވަރުގައި ކުރީ ސަފުގައި ރާއްޖެ ބައިވެރިވާނެ ކަމަށް ރައީސް ވިދާޅުވިއެވެ.

ކްރިޕްޓޯކަރަންސީ ރާއްޖެއަށް ތަޢާރަފުކުރުމުގެ ކުރިން، ދުނިޔޭގެ އެހެން ގައުމުތަކުން މިހާރު ގެންގުޅޭ ރެގިއުލޭޓަރީ ފްރޭމްވޯކްތަކަށް ބަލައި، ރާއްޖެއަށް އެންމެ އެކަށީގެންވާ ނިޒާމެއް ގާއިމުކުރުމަށް މަސައްކަތްކުރާނެ ކަމަށް އެމްއެމްއޭގެ އިސްވެރިން މަޢުލޫމާތު ދެއެވެ. އަދި ގާނޫނީ އޮނިގަނޑު ހަރުދަނާކުރުމަށް ބޭނުންވާ ވަގުތު ނަގައިގެން ނަމަވެސް، ބައިނަލްއަގުވާމީ މިންގަނޑުތަކަށް ފެތޭ ޚާއްސަ ގާނޫނެއްގެ ދަށުން މި މަސައްކަތް ކުރިއަށް ގެންދާނެ ކަމަށް ވެސް އެމްއެމްއޭ އިން ބުނެއެވެ.

ކްރިޕްޓޯކަރަންސީ (ނުވަތަ "ކްރިޕްޓޯ") އަކީ ފައިސާގެ ގޮތުގައި ޑިޖިޓަލް ޓޯކެން ނުވަތަ ފައިލްތަކެއް ބޭނުންކުރާ ފައިސާގެ ބާވަތެކެވެ. ސަރުކާރު ނުވަތަ ބޭންކެއް ފަދަ މަރުކަޒީ މަނިޓަރީ އޮތޯރިޓީއެއްގެ ބޭނުމެއް ނެތި އޮންލައިން ސިސްޓަމެއް މެދުވެރިކޮށް ސީދާ އެކަކު އަނެކަކަށް ފައިސާދެއްކުމުގެ ފުރުސަތު ލިބިދޭ ޑިޖިޓަލް ފައިސާގެ ބާވަތެކެވެ. ކްރިޕްޓޯގްރަފިކް (މަޢުލޫމާތު ފޮރުވުމުގެ ސައިންސް) ޓެކްނިކްތައް ބޭނުންކޮށްގެން ކްރިޕްޓޯކަރަންސީތައް އުފައްދަނީ ރައްކާތެރިކަމާއެކު މީހުން ގަނެ، ވިއްކައި ނުވަތަ ވިޔަފާރިކުރުމަށެވެ.

އިތުރަށް ކިޔާލުމަށް

ކްރިޕްޓޯކަރަންސީ އެނގެނީ ކިހާ މިންވަރަކަށް؟

އެންއެފްޓީއަކީ ކޮބާ؟