ގޯޕްރޯގެ ލެންސް ބަދަލުކުރެވޭ ފުރަތަމަ ކެމެރާ "މިޝަން 1" އިއުލާނުކޮށްފި

އެކްޝަން ކެމެރާ އުފެއްދުމުގައި ދުނިޔޭގެ މަގްބޫލުކަން ހޯދާފައިވާ އެމެރިކާގެ ގޯޕްރޯ ކުންފުނިން، އެ ކުންފުނީގެ އެންމެ ފަހުގެ ކެމެރާ ސީރީޒް "މިޝަން 1" ރަސްމީކޮށް އިއުލާނުކޮށްފިއެވެ.

ލާސް ވޭގަސްގައި ކުރިއަށްދާ NAB Show 2026 ގައި ތައާރަފުކުރި މި ސީރީޒަކީ، އެ ކުންފުނީގެ މަޝްހޫރު "ހީރޯ" ލައިނަށް ވުރެ ބޮޑަށް ޕްރޮފެޝަނަލް ވީޑިއޯގްރާފަރުންނަށް އަމާޒުކޮށްގެން ނެރުނު ފުރަތަމަ އުފެއްދުމެވެ.

މި އާ ސީރީޒްގައި ތިން މޮޑެލްއެއް ހިމެނޭއިރު، މީގެ ތެރޭގައި ހިމެނެނީ މިޝަން 1، މިޝަން 1 ޕްރޯ އަދި މިޝަން 1 ޕްރޯ އައި.އެލް.އެސް އެވެ.

މި ތިން މޮޑެލްގައި ވެސް ބޭނުންކޮށްފައިވަނީ 50 މެގަޕިކްސެލްގެ 1-އިންޗް ސެންސަރަކާއި ގޯޕްރޯގެ އެންމެ ފަހުގެ ޖީ.ޕީ3 ޕްރޮސެސަރެވެ. މިއީ ކުރީގެ ކެމެރާތަކަށް ވުރެ ހަތަރު ގުނަ ބޮޑު ސެންސަރަކަށް ވުމުން، އަނދިރި ތަންތަނުގައި މާ ފުރިހަމަ ވީޑިއޯއާއި ފޮޓޯ ނެގުމުގެ ގާބިލިއްޔަތު ލިބިގެންދާނެ ކަމަށް ގޯޕްރޯއިން ބުނެއެވެ.

ސީރީޒްގެ އެންޓްރީ މޮޑެލް ކަމަށްވާ މިޝަން 1 އިން 30 ފްރޭމް ރޭޓުގައި 8K ވީޑިއޯ ރެކޯޑް ކުރެވޭއިރު، ޕްރޯ މޮޑެލްއިން 60 ފްރޭމް ރޭޓުގައި 8K ވީޑިއޯ ރެކޯޑް ކުރެވެއެވެ. މީގެ އިތުރުން ޕްރޯ މޮޑެލްގައި ޕްރޮފެޝަނަލް މަސައްކަތްތަކަށް ބޭނުންވާ ޓައިމްކޯޑް ސިންކް، 10-ބިޓް ކަލާ އަދި ޖީ.ޕީ-ލޮގް2 ފަދަ ފީޗާތައް ވަނީ ހިމަނާފައެވެ.

ގޯޕްރޯގެ ތާރީޚުގައި ފުރަތަމަ ފަހަރަށް ލެންސް ބަދަލުކުރެވޭ ގޮތަށް އުފެއްދި "މިޝަން 1 ޕްރޯ އައި.އެލް.އެސް" މޮޑެލްއަކީ މި ފަހަރުގެ އެންމެ ފާހަގަކޮށްލެވޭ އެއް އުފެއްދުމެވެ. މި ކެމެރާގައި މައިކްރޯ ފޯ ތާރޑްސް މައުންޓް ބޭނުންކޮށްފައިވުމުން، އޮލިމްޕަސް އަދި ޕެނަސޮނިކް ފަދަ ބްރޭންޑްތަކުގެ ލެންސްތައް ބޭނުންކުރެވޭނެއެވެ. ނަމަވެސް، މި މޮޑެލް އަކީ މުޅިން ވޯޓަރޕްރޫފް ކެމެރާއެއްގެ ބަދަލުގައި "ވެދަރޕްރޫފް" ކެމެރާއެކެވެ.

ބެޓެރީގެ ފެންވަރު ރަނގަޅު ކުރުމުގެ ގޮތުން މި ކެމެރާތަކުގައި ބޭނުންކޮށްފައިވަނީ އެންޑިއުރޯ 2 ގެ 2،150 އެމް.އޭ.އެޗް ބެޓަރީއެވެ. މީގެ އެހީގައި 4K ކޮލިޓީގައި 3 ގަޑިއިރަށް ވުރެ ގިނައިރު މެދުނުކެނޑި ރެކޯޑް ކުރެވޭނެއެވެ. އަދި އަޑުގެ ފެންވަރު ރަނގަޅު ކުރުމަށްޓަކައި 32-ބިޓް ފްލޯޓް އޯޑިއޯ ޓެކްނޮލޮޖީއާއެކު ހަތަރު މައިކްރަފޯނު މި ކެމެރާތަކުގައި ހަރުކޮށްފައިވެއެވެ.

އަގުތަކަށް ބަލާއިރު، މިޝަން 1 ގެ އަގަކީ 599 ޑޮލަރެވެ. އަދި މިޝަން 1 ޕްރޯ ވިއްކުމަށް ހަމަޖެހިފައިވަނީ 699 ޑޮލަރަށެވެ. ގޯޕްރޯ ސަބްސްކްރައިބަރުންނަށް މި އަގުތަކުން 100 ޑޮލަރުގެ ޑިސްކައުންޓެއް ލިބޭނެއެވެ. މި ކެމެރާތަކަށް ޕްރީ-އޯޑަރ ކުރުމުގެ ފުރުސަތު މެއި 21 ގައި ހުޅުވާލާއިރު، މެއި 28 އިން ފެށިގެން ބާޒާރުން ލިބެން ހުންނާނެއެވެ.

މި އާ އުފެއްދުންތަކަކީ ޑީ.ޖޭ.އައި އަދި އިންސްޓަ360 ފަދަ ކުންފުނިތަކާ ވާދަކުރުމަށް ގޯޕްރޯއިން ނެރުނު މުހިންމު އުފެއްދުންތަކެކެވެ.

ކުންފުނީގެ މުވައްޒަފުންގެ 23 އިންސައްތަ ވަޒީފާއިން ވަކިކޮށްފައިވާ ދަނޑިވަޅެއްގައި ނެރުނު މި "މިޝަން 1" ސީރީޒަކީ ކުންފުނީގެ މުސްތަގްބަލް ކަނޑައެޅުމުގައި ވަރަށް ބޮޑު ދައުރެއް އަދާކުރާނެ އުފެއްދުމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.