ނޯވޭގެ ތައުލީމީ ދާއިރާގައި އޭއައި ބޭނުންކުރުން ހަނިކުރުމަށް ފިޔަވަޅުތަކެއް!

ޓެކްނޮލޮޖީގެ ގޮތުން ކުރިއަރާފައިވާ ނޯވޭއިން ވަނީ ސުކޫލުތަކުގައި އާޓިފިޝަލް އިންޓެލިޖެންސް (އޭއައި) ބޭނުންކުރުން ވަރަށް ބޮޑަށް ހަނިކުރުމަށް ނިންމާފައެވެ. ނޯވޭގެ ބޮޑުވަޒީރު ޔޯނަސް ގާރ ސްޓޯރާ ހަވާލާދީ ބައިނަލްއަގުވާމީ މީޑިއާތަކުން ރިޕޯޓުކޮށްފައިވާ ގޮތުގައި، މިއަހަރުގެ އޮގަސްޓު މަހު ސުކޫލުތައް ހުޅުވޭއިރު އަމަލުކުރަން ފަށާ މި އާ ގަވާއިދަކީ ކުދިންގެ އުނގެނުމަށް ޓެކްނޮލޮޖީގެ ސަބަބުން ކުރާ ނޭދެވޭ އަސަރުތައް ކުޑަކުރުމަށް އެޅި ހަރުދަނާ ފިޔަވަޅެކެވެ.

ނޯވޭ ސަރުކާރުން އެކުލަވައިލި އާ ގަވާއިދުގައި AI ބޭނުންކުރުން މަނާކޮށްފައިވަނީ ދަރިވަރުންގެ އުމުރާއި ގްރޭޑްތަކަށް ބަލައި ތަފާތު ދަރަޖަތަކަކަށެވެ. އެގޮތުން 1 ވަނަ ގްރޭޑުން ފެށިގެން 7 ވަނަ ގްރޭޑާ ހަމައަށް (އުމުރުން 6 އަހަރާއި 13 އަހަރާ ދެމެދުގެ) ކުދިންނަށް ސުކޫލުތަކުގައި AI ބޭނުންކުރުން މުޅިން ކަހަލަ ގޮތަކަށް ވަނީ މަނާކޮށްފައެވެ. އަދި 8 ވަނަ ގްރޭޑުން 10 ވަނަ ގްރޭޑްގެ (އުމުރުން 14-16 އަހަރުގެ) ދަރިވަރުންނަށް AI ބޭނުންކުރުމުގެ ހުއްދަ ލިބެނީ ހަމައެކަނި މުދައްރިސުންގެ ހާއްސަ ބެލުމާއި އިރުޝާދުގެ ދަށުންނެވެ. އުމުރުން 17 އަހަރުން މަތީގެ ސާނަވީ މަތީ ގްރޭޑްތަކުގެ ކުދިންނަށް އުސޫލުތައް ކުޑަކޮށް ލުއިވިނަމަވެސް، އެކުދިންނަށްވެސް ބާރުއަޅަނީ ހަމައެކަނި އެންމެ އެކަށީގެންވާ ހާލަތްތަކުގައި އެފަދަ ޓޫލްތައް ބޭނުންކުރުމަށެވެ.

ބޮޑުވަޒީރު ސްޓޯރާ ހާމަކުރެއްވި ގޮތުގައި، ސުކޫލެއްގައި އެންމެ އަސާސީ އަދި މުހިންމު ކަމަކީ ކުދިން އަމިއްލައަށް ލިޔަން، ކިޔަން އަދި ހިސާބު ހަދަން ދަސްކުރުމެވެ. ޓެކްނޮލޮޖީއަށް މާބޮޑަށް ބަރޯސާވުމުގެ ސަބަބުން ކުދިންގެ މި އަސާސީ ހުނަރުތަކަށް ބުރޫއަރަމުންދާކަން ސަރުކާރަށް ފާހަގަކުރެވިގެން، ނޯވޭއިން ދަނީ ސުކޫލުތަކަށް ފޮތް ގަތުމަށް ބަޖެޓު އިތުރުކޮށް، އަލުން އާދައިގެ ފޮތްބައި ބޭނުންކުރާ ޒަމާނީ ނޫން ނަމަވެސް އުނގެނުމަށް ފައިދާހުރި ނިޒާމަކަށް ރުޖޫއަވުމަށް ގާނޫނީ މަސައްކަތްތަކެއް ކުރަމުންނެވެ.

މި ފިޔަވަޅަކީ ނޯވޭއިން މީގެކުރިން ކްލާސްރޫމްތަކުގައި ޓެކްނޮލޮޖީ އާލާކުރުމަށް ގެންގުޅުނު ސިޔާސަތާ މުޅިން އިދިކޮޅު ނިންމުމެކެވެ. މީގެކުރިން 2016 ވަނަ އަހަރު، އުމުރުން އެންމެ 5 އަހަރުގެ ކުދިންނަށްވެސް ޓެބްލެޓް ދޫކުރަން ފެށި ނަމަވެސް، އޭގެ ސަބަބުން ކުދިންގެ ކިޔުމުގެ ފެންވަރު ވަރަށް ބޮޑަށް ދަށްވެ، އިމްތިހާނުތަކުގެ ނަތީޖާ ވަނީ ދަށަށް ގޮސްފައެވެ. ނަމަވެސް، 2024 ވަނަ އަހަރު ސުކޫލުތަކުގައި ސްމާޓްފޯން ބޭނުންކުރުން މަނާކުރުމާ ގުޅިގެން، ކުދިންގެ މެދުގައި ހިނގާ ބުލީކުރުން މަދުވެ، ކުދިންގެ ފާސްވާ ނިސްބަތް (GPA) މަތިވާން ފެށިކަން ދިރާސާތަކުން ވަނީ ދައްކާފައެވެ.

ޖުމްލަގޮތެއްގައި ބަލާއިރު، ނޯވޭއިން ނިންމި މި ނިންމުމަކީ ޑިޖިޓަލް ޒަމާނެއްގައި ތައުލީމީ ދާއިރާއަށް ގެނައި ވަރަށް ބޮޑު، އަދި އެހާމެ މުހިންމު ބަދަލެކެވެ.

ޓެކްނޮލޮޖީއަށް އެކަނި ބަރޯސާވުމުގެ ބަދަލުގައި، އަސާސީ ތައުލީމާއި ފޮތްތަކަށް އަލުން އަހަންމިއްޔަތުކަން ދިނުމަކީ ޖީލެއްގެ ހޭލުންތެރިކަމާއި ތައުލީމީ ފެންވަރު ހިފެހެއްޓުމަށް އެޅުނު ހަރުދަނާ ފިޔަވަޅެކެވެ.