ސެމްސަންގް ގެލެކްސީ ޒީ ޓްރައިފޯލްޑް އުފެއްދުން ހުއްޓާލަނީ

ސެމްސަންގް ގެލެކްސީ ޒީ ޓްރައިފޯލްޑް ބާޒާރަށް ނެރުނުތާ އެންމެ ތިން މަސްދުވަސް ފަހުން، އެ ފޯނު އުފެއްދުން އެއްކޮށް ހުއްޓާލަން ނިންމައިފިކަން ސެމްސަންގުން ކަށަވަރުކޮށްދީފިއެވެ. އަދި އޮންލައިންކޮށް މި ފޯނުގެ ސްޓޮކް ދެން އިތުރަށް ނުލިބޭނެކަމަށް ވަނީ ބެލެވިފައެވެ.

ބްލޫމްބާގް އަށް ސެމްސަންގުން ދިން މައުލޫމާތުގައި ވާގޮތުން، މި ފޯނު އެންމެ ފުރަތަމަ ވިއްކަން ފަށާފައިވަނީ 2026 ވަނަ އަހަރުގެ ޖެނުއަރީ މަހުގެ ފަހުކޮޅު އެމެރިކާގައެވެ.

ސެމްސަންގުގެ ތަރުޖަމާނަކު ވިދާޅުވި ގޮތުގައި، އެންމެ ފުރަތަމަ އެ ކުންފުނީގެ އަމިއްލަ ގައުމު ކަމަށްވާ ދެކުނު ކޮރެއާގައި ފޯނު ވިއްކުން ހުއްޓާލުމަށްފަހު، އެމެރިކާގައި މިހާރު ހުރި ސްޓޮކް ހުސްވުމުން އެ ގައުމުގައިވެސް ވިއްކުން އެއްކޮށް ހުއްޓާލާނެއެވެ.

މިހާރު ސެމްސަންގުގެ ވެބްސައިޓުގައިވެސް ފޯނު އިތުރަށް ލިބެން ހުންނާނެ ކަމަށް ލިޔެފައެއް ނުވެއެވެ. އޭގެ ބަދަލުގައި ވެބްސައިޓުގައި އިންނަނީ ފޯނު "ސޯލްޑް އައުޓް" (ވިކި ހުސްވެފައި) ކަމަށެވެ. އަދި ފޯނު ގަންނަން ބޭނުންވާ ފަރާތްތަކުން ސެމްސަންގް އެކްސްޕީރިއަންސް ސްޓޯރުތަކަށް ގޮސްގެން ގަތުމަށް ވެބްސައިޓުގައި ވަނީ އިރުޝާދުދީފައެވެ.

ބްލޫމްބާގް އިން ފާހަގަކޮށްފައިވާ ގޮތުގައި އެމެރިކާގެ ޓެކްސަސް އަދި ނިއު ޔޯކްގެ ބައެއް ފިހާރަތަކުން އަދިވެސް މި ފޯނު ލިބެން އެބަހުއްޓެވެ. ނަމަވެސް އެ ފިހާރަތަކުގައި ހުރި ފޯނުތައް ވިކި ހުސްވުމުން އެމެރިކާގެ މާކެޓުގައި ޓްރައިފޯލްޑްގެ ވިޔަފާރި އެއްކޮށް ނިމުމަކަށް އަންނާނެއެވެ.

2،899 އެމެރިކާ ޑޮލަރަށް ވިއްކި މި ފޯނަކީ ދެ ހިންޖު (hinge) އަދި އެތެރޭގައި ތިން ސްކްރީން ހިމެނޭހެން ސެމްސަންގުން އުފެއްދި ފުރަތަމަ ފޯނެވެ. މިއީ ހުޅުވާލުމުން 10 އިންޗީގެ ބޮޑު ޓެބްލެޓަކަށް ބަދަލުވާ ފޯނެކެވެ. މިއީ އާންމުކޮށް ގިނަ ބަޔަކަށް ވިއްކުމަށް އަމާޒުކޮށްގެން ސެމްސަންގުން ނެރުނު ފޯނެއް ނޫން ނަމަވެސް، މިހާ އަވަހަށް ފޯނު އުފެއްދުން ހުއްޓާލުމަކީ ގިނަ ބަޔަކަށް ހައިރާންކަން ލިބުނު ކަމެކެވެ.

ރިޕޯޓުތައް ބުނާގޮތުން މީގެ މައިގަނޑު ސަބަބަކީ، ފޯނު އުފެއްދުމަށްދާ ހަރަދު ބޮޑުވުމާއި އުފައްދަން އުނދަގޫވުމުގެ އިތުރުން، ދުނިޔޭގެ މާކެޓަށް ދިމާވި ރޭމް (RAM) ޝޯޓޭޖެއްގެ ސަބަބުން ސްމާޓްފޯނު އުފެއްދުމުގެ އަގުތައް މައްޗަށް ދިއުމެވެ.

ސެމްސަންގަކީ 2019 ވަނަ އަހަރުން ފެށިގެން ފޯލްޑަބަލް ނުވަތަ ފަތްޖަހާލެވޭ ސްމާޓްފޯނުގެ މާކެޓުގައި އެންމެ ކުރިއަރާފައިވާ އެއް ކުންފުންޏެވެ. އެގޮތުން އެ ކުންފުނީގެ 'ގެލެކްސީ ޒީ ފޯލްޑް' އަދި 'ޒީ ފްލިޕް' ސީރީޒްގެ ފޯނުތައް ވަނީ އާންމުންގެ މެދުގައި ބޮޑު މަގުބޫލުކަމެއް ހޯދައި، ފަތްޖަހާލެވޭ ފޯނުތަކަކީ އާންމު އެއްޗަކަށް ހަދާފައެވެ.

ގެލެކްސީ ޒީ ޓްރައިފޯލްޑަކީ މި ޓެކްނޮލޮޖީގެ ތެރެއަށް ސެމްސަންގުން ގެނައި ވަރަށް ބޮޑު ކުރިއެރުމެކެވެ. ދެތަނުން ފަތްޖަހާލެވޭ ގޮތަށް، ތިން ސްކްރީން ހިމަނައިގެން މި ފޯނު ފަރުމާކޮށްފައިވަނީ އާދައިގެ ސްމާޓްފޯނަކާއި ބޮޑު ޓެބްލެޓެއްގެ ބޭނުން އެއް ޑިވައިސްއަކުން ކުރެވޭނެހެންނެވެ. ނަމަވެސް، މިފަދަ އެންމެ ފަހުގެ ޒަމާނީ އަދި އައު ޓެކްނޮލޮޖީތައް އުފެއްދުމަކީ ވަރަށް ހަރަދު ބޮޑު އަދި އެހާމެ އުނދަގޫ ކަމެކެވެ.

ދުނިޔޭގެ މާކެޓަށް މިވަގުތު ދިމާވެފައިވާ އިލެކްޓްރޯނިކް ސާމާނުތައް (ހާއްސަކޮށް ފޯނުގެ ރޭމް) ލިބުމުގެ ދަތިކަމާ ގުޅިގެންނާއި، ތަކެތީގެ އަގުބޮޑުވުމުގެ ސަބަބުން، މިފަދަ ހާއްސަ އަދި އަގުބޮޑު އުފެއްދުންތައް މާކެޓުގައި ދެމެހެއްޓުމަކީ ޓެކްނޮލޮޖީ ކުންފުނިތަކަށް މިވަގުތު ކުރިމަތިވެފައިވާ ވަރަށް ބޮޑު ގޮންޖެހުމެކެވެ.

މި ސަބަބުތަކާ ހުރެ، ސެމްސަންގުގެ މި ތާރީޚީ އުފެއްދުން މިވަނީ އުންމީދުކުރި ވަރަށްވުރެ މާ އަވަހަށް ނިމުމަކަށް ގެންނަން ޖެހިފައެވެ.